Mataupu 5

Faamafanafanaina i le Taimi o le Oti

O le filemu ma le faamafanafanaga a lo tatou Tama o i le Lagi e mafai ona avea ma aafiaga faamalolo mo i latou o e faavauvau i le maliliu o e pele.

Mai le Soifuaga o Heber J. Grant

“I taimi o le ma’i po o le oti, ” na tusia ai e Lucy Grant Cannon, o se afafine o Peresitene Heber J. Grant, “o le lototele o tama sa maoae. Ina ua faataotolia lona atalii [7 tausaga le matua o Heber Stringham Grant] mo le silia ma se tausaga, faapea ma toe masina o lona olaga sa masani ona matuai tigaina lava, e nofonofo ai lava tama i tafatafa o lona moega pepe mo ni itula ma faanana ia te ia. E faatasi atu o ia i totonu o lona potu i le tele o taimi na te mafaia ai, ma ina ua oti o ia sa naunau ia tama e talia lona oti e ui lava sa ia iloaina e tusa ai ma fanau faalelalolagi atonu o le a le toe i ai sona atalii e tauaveina lona igoa. O lona faatuatua tele, lea na foliga mai ia i matou e mausali, sa avea lea ma se malosiaga ma se fesoasoani ia i matou i o matou olaga atoa.”¹

Pe afai e saunoa ia Peresitene Grant i le faanoanoa lea e maua mai le maliliu o e pele, e saunoa o ia ma le malamalama e maua mai i aafiaga na ia oo i ai. I le faaopoopo atu i lona atalii o Heber, e toaono isi tagata totino o lona aiga na muamua maliliu ia te ia. Ina ua iva aso o lona matua, sa faapea ona maliu lona tama. O le 1893, na maliu ai lona faletua o Lucy i le 34 tausaga ina ua mavae lena o le tolu tausaga o tauivi ma se ma’i faigata. O le maliu o le alii e 5 tausaga le matua o Daniel Wells Grant, e na o le pau lava lea o lona atalii, na sosoo mai ai i le lua tausaga na mulimuli ane ai. I le 1908, ae lei leva talu ona faamaeaina e Peresitene Grant ma lona faletua o Emily se misiona i Europa, sa faapea ona uma ai lona soifua i le kanesa i le manava. I le tausaga e tasi na mulimuli ane ai, na faavauvau ai foi ia Peresitene Grant i le maliu o lona tina. I le 1929, o le sefulutasi lena o tausaga talu ona mavae le faamanuiaina ma le tofiaina o ia e avea ma Peresitene o le Ekalesia, sa faapea ona maliu ai lona afafine o Emily i le 33 o tausaga.

Sa matuai ootia Peresitene Grant i nei maliu. I le taimi o le ma- ’i o Lucy, sa ia tusia ai i lana tusi o talaaga: “Sa lagona e Lucy e le mafai ona toe malosi o ia, ma o lea sa matuai loloto ai lava ni a ma talanoaga i lenei aso ma sa taufai maligi o ma loimata i le ma teteaga o le a i ai ona o le oti. Sa le mafai ona ou tatalia lo’u fefe ona o le a le faasaoina lona ola.”²

E ui lava i ni popolega i le faamaonia lea o le a maliu lona afafine, ae na maua lava e Peresitene Grant le faamoemoe ma le filemu a o ia faalagolago i upumoni o le talalelei. Na ia saunoa mai faapea e lei auai atu lava o ia i se maliu o se tagata faamaoni o le Ekalesia e aunoa ma le faafetai atu i le Alii “mo le talalelei a Iesu Keriso, faapea le faamafanafanaga ma le faamalosiauga lea e tuuina mai ia i tatou i le taimi o le faanoanoa ma le oti.”³ Na ia saunoa i lona oo lea i lenei “faamafanafanaga ma o le faamalosiauga” i le maliu o lona atalii: “Ou te iloaina ina ua maliu lo’u atalii (e na o le toalua o’u atalii) sa i ai i totonu o lo’u aiga i lena taimi se faalogona filemu, o se faamafanafanaga ma se olioli lea e sili atu nai lo le mea e iloaina e i latou o e leai ma se mea o le Talalelei latou te iloaina faapea ma le filemu lea e oo mai i totonu o o tatou loto.”⁴

Aoaoga a Heber J. Grant

E mafai e upumoni faavavau ona faamafanafanaina i tatou pe a maliliu i latou e pele.

E maeu le oona matuitui o le mafatiaga ma le faanoanoa e tatau ona i ai i latou e leai se isi mea e vaai atu i ai i luga atu o le tuugamau sei vagana ai le amataga o le pouliuli e faavavau ma le tuugaogaoina. Mo i latou o e talitonu faapea, ua i ai le tui a le oti ma ua manumalo ai foi le tuugamau. Ia i latou, e oo lava i le mamalu o lenei lalolagi ua o se toe mumu a se moligao i totonu o se pogisa e le mavae.

Ae, o le tagata faatuatua, o le oti o le toe faaauauina lea o le ola sa ia motusia ina ua sau iinei i le lalolagi.⁵

E le mafai ona ou mafaufau ia i latou o e pele ia te au, o lo’u tina pele ma i latou o e ua maliliu, e faapea ua i totonu o le tuugamau. Ou te olioli i faatasiga o loo latou fiafia ai ma le fiafiaga o loo latou maua i le feiloai ai ma e pele ia i latou o loo i le isi itu.⁶

O le mea moni lava tatou te le saunia lava mo le oti e tusa lava po o le a le taimi e oo mai ai. Na ou iloaina lena lava mea aua sa matuai lelei lava le soifua maloloina o lo’u tina ma semanu e le itiiti ifo ma le selau ni tausaga e ola ai, ae sa matuai faateia lava ina ua maliu i le toe sefululua tausaga aulia lona selau.

Ou te faafetai pea mo le Talalelei a Iesu Keriso, o le ata o le faaolataga, ae ou te le faafetai mo le mea moni pe a ou i ai i ni faatasiga o lenei ituaiga [maliu]. O le malamalama atoatoa ma le mausali o loo ia i tatou o le Au Paia o Aso e Gata Ai i le paia o le galuega o loo tatou punouai ai, o le mautinoa a’ia’i lea o le olaga e le muta, afai sa tatou faamaoni tatou te maua le fiafia ma le avanoa e toe foi atu ai i le afioaga o i latou o e sa tatou alolofa i ai ma e na muamua atu, ma o le a tatou fegalegaleai faatasi ma lo tatou Tama Faalelagi, o lo tatou Togiola, o le Perofeta o Iosefa Samita, o le Peteriaka o Ailama ma alii ma tamaitai maoae uma o e na tuuina atu o latou ola i lenei galuega, e aumaia ai se filemu ma se fiafiaga i faatasiga faapea o lea ituaiga i totonu o o tatou loto, lea ou te mautinoa e leai se gagana ua ou iloa pe o iloa foi e se tasi e mafai ona faamatalaina ai atoatoa.⁷

I se Au Paia o Aso e Gata Ai, e ui o le oti e oo mai ai le faanoanoa i totonu o o tatou aiga ma o tatou loto, o lena faanoanoa e tutusa lelei lava ma le lagona lea tatou te lagonaina mo se taimi e le tumau pe a tatou valavala ma i latou e pele ia i tatou o e malaga atu i le misiona po o e foi o le a malaga ese atu mo se taimi. O lena tiga matuitui ua ou vaaia o faaalia e i latou e le o iloa le upumoni, ou te talitonu e le oo mai lava i le loto o se tagata moni o le Au Paia o Aso e Gata Ai moni.⁸

Ou te faanoanoa i nisi taimi, i taimi o le popole ma le atuatuvale lea e oo mai ia i latou o e tatou te fiafia ma alolofa i ai, ona o le le mafai ona tatou aveeseina mai o latou tauau le faanoanoa o loo latou oo i ai, pe a valaauina i latou e faamavae atu i e pele ia i latou.

Ae ua tatou iloaina, e mafai e lo tatou Tama o i le Lagi ona fusifusi i e loto momomo, ma e mafai ona Ia aveeseina le faanoanoa, ma e mafai foi ona Ia faasino atu i luma i le olioli ma le fiafia i faamanuiaga na e oo mai i le usiusitai i le Talalelei a le Alii o Iesu Keriso, aua ua tatou malamalama ma ua i ai lo tatou talitonuga o le finagalo o lo tatou Tama o i le Lagi, e tatau ona tatou ola ai, ma e lei maea lo tatou olaga pe a tuu ifo nei tino faaletino i totonu o le tuugamau.

O se faamanuiaga sili lava i le tausiga a le Alii faapea ma faaaliga e tuuina mai e lo tatou Tama o i le Lagi, tatou te maua ai le faamautinoaga o le agaga ma le tino, e i ai le taimi, o le a toe faatasia ai, e ui i se le talitonu o loo i ai i le lalolagi i aso nei—ma e mautinoa lava e tele se masalosalo ma se le talitonu e faatatau i lenei mataupu. Ae ui lava i lenei mea, ua ia i tatou le faamautinoaga e ala i faaaliga na tuuina mai e le Alii lo tatou Atua, e faapea o le faamoemoega lena o le Atua, e ao ona toe faatasia le tino ma le agaga e faavavau ma o le a oo mai le taimi, e ala i le faamanuiaga ma le alofa tunoa o le Atua, o le a tatou le toe faanoanoa ai ae tatou te faatoilaloina nei mea uma e tofotofoina ma faavaivaia ai, ma ia tutu atu i le afioaga o le Atua soifua, ua faatumulia i le olioli ma le filemu ma le fiafia.⁹

E faamalosia e le Alii i tatou pe a tatou iloaina Lona aao ma taliaina Lona finagalo.

E tele naua mea i lenei lalolagi e le mafai ona faamatalaina. O se mea faigata ia te au le taumafai ina ia malamalama pe aisea i le tausiga a le Alii, … e tatau ai ona valaauina ese atu o ni atalii se toalua sa ia te au ma e tatau foi ona faamuta ai lo’u igoa e tusa ma manatu o lenei lalolagi. I se isi itu, o le talalelei e pei o se mea e faagaeetiaina ai, e ui lava i le oti o nei atalii e toalua, ae ou te lei faitio lava i lo’u loto pe ou te lagonaina foi se saili masei. E i ai se mea e uiga i le Talalelei lea e mafua ai ona iloa e alii ma tamaitai le Atua i le ola ma le oti, i le fiafia ma le faanoanoa, i le faamanuiaina ma faigata. Na fetalai le Alii e faapea e fiafia lava o ia na o i latou o e tautino atu e i ai lana pule i mea uma [tagai i le MFF 59:21].¹⁰

E mafai ona ou molimau atu i le mautu o lo’u malamalama e faapea e leai se isi mea sei vagana le Agaga o le Alii e mafai ona aumaia le filemu ma le mafanafana ia te au sa ou iloaina i le taimi o le maliu o [lo’u atalii] o Heber. O au e ese ma lo’u alofa. Sa ou alofa i lou atalii mulimuli na ola ma lo’u loto atoa. Sa ou [faatupuina] ni faamoemoega silisili i mea sa ou faamoemoe na te faataunuuina. Sa ou faamoemoe e vaai atu ia te ia o avea ma se faifeautalai e talaia le talalelei a Iesu Keriso, ma sa ou faamoemoe ina ia ola e avea ma malosiaga o le lelei i le lalolagi; ae peitai, e ui i nei faanaunauga uma sa ia te au mo lo’u atalii, ae o faamanuiaga a le Alii, na ou mafaia ai ona vaai atu ia te ia ina ua oti e aunoa ma se loimata na maligi. E leai se mana o i le lalolagi na mafaia ona aumaia ia te au lenei filemu. E mai le Atua. Ma e le mafai ona ou tautala i ai pe tusi foi i ai e aunoa ma lagona o le loto faafetai e faatumulia ai lo’u loto, e sili atu nai lo soo se isi mana ua ou mauaina e faailoa atu ai o’u lagona.¹¹

Ia tatou manatua pea, talu ai ona e moni ma faamafanafanaina ai foi, o le oti o se tagata amiotonu o se mea noa lea pe a faatusatusa i le leai o musumusuga a le agaga lelei. O le ola e faavavau o le taui sili lea, ma o le a avea ma tatou, ma o le olioli o lo tatou Tama o i le Lagi i le faafeiloaia o i tatou o le a ofoofogia, pe afai tatou te faia le mea tonu; ma e leai se mea e sili atu ona maoae e mafai ona faia i lenei olaga e soo se tasi, nai lo le faia o le mea tonu. O le a faafofoga ma tali mai le Alii i tatalo tatou te tuuina atu ia te ia ma tuu mai mea ia i tatou tatou te ole atu ai mo lo tatou lelei silisili. Na te lei tuulafoaia ma o le a ia le tuulafoaia lava i latou o e auauna atu ia te ia ma le loto atoa; ae tatau ona tatou saunia e faapea atu “Le Tama e, ia faia lou finagalo.”¹²

Sa matuai faatalitonuina au i lo’u lava mafaufau ma lo’u lava loto, ina ua tuua au e lo’u toalua muamua ona o le oti, e faapea o le finagalo o le Alii ua tatau ai ona valaauina atu o ia. Sa ou ifo faamaulalo i lona maliu. Na silafia lelei e le Alii le talafeagai o lena mea ina ia tuuina atu ai i se tasi o la’u fanau laiti se molimau e faapea o le maliu o lona tina o le finagalo o le Alii.

Pe tusa toe itula maliu lo’u toalua, sa ou valaauina atu loa la’u fanau i totonu o lona potu ma ta’u atu ia i latou o le a maliu lo latou tina ma e ao ona latou faatofa atu ia te ia. O se tasi o o’u afafine laitiiti, pe tusa o le sefululua tausaga, sa faapea mai ia te au: “Papa, ou te le manao e oti ia mama. Sa ou i ai ma oe i le falemai i San Francisco mo le ono masina; o le tele o taimi pe a tigaina ai ia mama sa e faamanuia ai ia te ia ma sa aveesea ai lona tiga ma faapea ona moe filemu ai. Ou te manao ina ia faaee ou lima i luga o mama ma faamalolo ia te ia.”

Sa ou ta’uina atu i lo’u afafine e i ai se taimi o le a tatou oti uma ai lava, ma ua ou lagonaina ua oo mai le taimi o lona tina. Sa tuua e ia ma isi tamaiti uma le potu.

Sa ou tootuli ifo i tafatafa o le moega o lo’u toalua (o le taimi lea ua na le iloa ai se isi) ma sa ou ta’u atu i le Alii lo’u iloaina o Lona aao i le ola, i le oti, i le fiafia, i le faanoanoa, i le manuia, po o faigata. Sa ou faafetai atu ia te Ia mo le malamalama ua ou maua o lo’u toalua e a a’u ia mo le faavavau atoa, ma o le talalelei a Iesu Keriso ua toefuatai, ma ua ou iloa e ala i le mana ma le pule o le Perisitua iinei i le lalolagi lea ou te mafaia ai ma o le a ou mauaina lo’u toalua e faavavau pe afai ou te faamaoni e pei o ia. Ae sa ou ta’u atu i le Alii e le lava le malosi o ia te au e vaai atu ai i le maliu o lo’u toalua ma ina ia aafia ai le faatuatua o la’u fanau laiti i sauniga o le talalelei a Iesu Keriso; ma sa ou aioi atu i le Alii ma le malosi uma sa ia te au, ina ia tuuina atu e Ia i la’u teineitiiti laitiiti lena se malamalama, o Lona mafaufau ma Lona finagalo ua tatau ai ona oti lona tina.

Pe tusa ma se itula ae maliu lo’u toalua, ma sa ou toe valaauina atu le fanau i totonu o le potu. O lo’u atalii laitiiti pe tusa ma le lima ma le afa po o le ono tausaga le matua sa matuai tagi lotulotu lava, ma sa fusi atu e le teineitiiti lea e sefululua tausaga o ia i ona lima ma faapea atu i ai: “Aua e te faanoanoa, aua e te tagi, Heber; talu ona tatou o ese atu ma totonu o lenei potu sa faapea mai le siufofoga o le Alii mai le Lagi ia te au, ‘O le maliu o lou tina ua faia i ai le finagalo o le Alii.’ ”

Au uo e, ua ou iloa e faafofoga ma tali mai e le Atua ia tatalo! Ou te le iloaina o taimi o faigata e faamafanafanaina ai ma faamanuia ma faamalosiauina ai le Au Paia o Aso e Gata Ai, e le pei o isi tagata!¹³

O le oti o se vaega moomia o le olaga faaletino ma o se laasaga i lo tatou alualu i luma e faavavau.

Ia aumaia e le filemu ma le faamafanafanaga a lo tatou Tama o i le Lagi ia aafiaga faamalolo mo i latou o e faavauvau i le oti o e pele ma ia onosaia mafatiaga. Ma ia faamalosia i tatou i le malamalama e faapea o le faamanuiaina e le faapea o lona uiga o le a faasaoina pea lava i tatou mai faanoanoaga ma faigata o le olaga. Tatou te maua uma lava, e ui lava e eseese o tatou faafitauli. E le tutusa o’u faigata ma faigata na oo isi i ai, ae peitai ua ou maua ni faigata silisili. A o avea ma se alii talavou, sa maliu lo’u toalua ma o’u atalii e toalua, sa ou taumafai ma lo’u loto atoa e tausia poloaiga a le Alii, ma sa matou tausia ma lo’u aiga le Upu o le Poto ma maua faamanuiaga o le ola. Sa matuai tofotofoina ma faaosoosoina lava au, ae ou te faafetai o faigata ma faaosoosoga e lei sili atu nai lo le mea sa ou mafaia ona onosaia, ma ou te faamoemoe ma lo’u loto atoa ina ia aua ne’i sili atu soo se mea tatou te onosaia nai lo le mea o le a faamanuiaina ai i tatou e le Alii i le malosi e onosaia ai.¹⁴

O i tatou o lenei Ekalesia ua uma ona tauina mai i ai e le Alii ae tatou te lei o mai i lenei lalolagi, e i ai so tatou olaga e toe tau atu lava i le faavavau; ma sa tatou ola o ni agaga ae tatou te lei o mai iinei, lea sa saunia ai i tatou mo le olaga ma le lalolagi; ma o iina, ina ua tatou tausia lo tatou uluai tofi, ua tatou o mai ai i lenei lalolagi ina ia maua le malamalama, atamai, ma le poto, ina ia aoao i lesona, ia mafatia i tiga, ia onosaia ia faaosoosoga, ma maua ia manumalo o le olaga faaletino; ma afai e uma le ola o o tatou tino faaletino, e toe foi atu o tatou agaga e toe maua le olaga agaga lea sa tatou tuua ina ia o mai i le olaga faalelalolagi, ma o iina o le a tatou faaauau ai pea, ma fausiaina i luga o mea na faataunuuina i lo tatou uluai olaga agaga, lo tatou uluai tofi, ma lo tatou olaga faaletino, lo tatou tofi lona lua, ma alualu ai i luma e tau atu i faavavau e le mavae, lea e mulimuli mai ai, seia tatou oo atu ai i le sini ua faatuina e le Alii: “O lenei, ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia.” [Mataio 5:48.]¹⁵

Fautuaga mo Suesuega ma Talanoaga

Afai tatou te faavauvau ona o le oti o se tasi e pele, o a mataupu faavae o le ata o le faaolataga e mafai ona tatou liliu atu i ai mo le faamafanafanaga?
Na faamatalaina e Peresitene Heber J. Grant lona afafine, o le na mauaina se faamafanafanaga mai le “siufofoga o le Alii mai le lagi” i le taimi o le maliu o lona tina. O a nisi o auala e faamafanafanaina ai i tatou e le Alii? Na faapefea ona faamafanafanaina oe ina ua maliliu nisi e pele ia te oe?
O a faamanuiaga e oo mai i le iloaina lea o le aao o le Alii i o tatou olaga, e tusa lava pe tatou te feagai ma ni faigata?
Na saunoa ia Peresitene Grant e faapea “o le faamanuiaina e le faapea o lona uiga o le a faasaoina pea lava i tatou mai faanoanoaga ma faigata o le olaga.” Aisea e taua ai le malamalama i lenei mataupu faavae? O a ni auala e mafai ai e faigata ona tau atu i faamanuiaga?
E mafai faapefea ona tatou saunia nei ina ia mauaina le “filemu ma le faamafanafanaga a lo tatou Tama o i le Lagi” faapea ma Lona “mana faamalolo” i o tatou taimi o faigata ma faanoanoaga?