O le Soifua Auauna o Heber J. Grant

I le konafesi aoao ia Oketopa 1899 O Le Ekalesia a Iesu Keriso o le Au Paia o Aso e Gata Ai, na saunoa ai ia Elder Heber J. Grant, o le taimi lena a o avea ma se sui o le Korama a Aposetolo e Toasefululua, “E leai ni pa vaeloto e le mafai ona soloia i lalo pe a poloai mai le Atua ma tatou usiusitai.”¹ O lenei faamatalaga faigofie o se autu faifai pea lea i le soifua galue o Heber J. Grant. E lei faasaoina o ia mai faigata, ae na tali atu o ia i faigata uma ma le faatuatua, usitai, maelega, ma le naunautai.

O Se Vaitau o le Suia ma le Alualu i Luma

Na soifua ia Peresitene Heber J. Grant i se vaitau o ni suiga ogaoga. Na soifua mai o ia i le 1856 i se lalolagi o taavale toso ma taavale solofanua, a o tai fia masina o fuafua ni faigamalaga. Ina ua maliu o ia i le 1945, na ia tuua se lalolagi o taavaleafi ma vaalele, ma ua na o ni nai itula e fuafua ai faigamalaga. O le auala na tilivaina ai meli i le taimi o lona talavou na suia lea i isi auala o fesootaiga: o le telefoni, o le leitio, ma meli e feaveaiina e vaalele i le ea.

Na soifua mai ina ua tuanai le 26 tausaga talu ona faatuina le Ekalesia ae 9 tausaga talu ona taunuu le au paionia i le Vanu o Sate Leki, sa molimauina ai e Heber J. Grant se taimi o le alualu tele i luma o le malo o le Atua i luga o le fogaeleele. I lona soifuaga atoa, sa ia fiafia ai e fegalegaleai faatasi ma Peresitene o le Ekalesia, ma sa ia fesoasoani foi e saunia alii o e o le a suitulaga atu ia te ia i lena valaauga. I lona talavou sa masani ona ia asiasi atu i le fale o Peresitene Polika Iaga. I le avea ai ma sui o le Korama a Aposetolo e Toasefululua, sa ia auauna atu ai i lalo o le taitaiga a Peresitene Ioane Teila, Uilifoti Uitilafi, Lorenisio Sinou, ma Iosefa F. Samita. Sa ia auauna atu i le Korama a le Toasefululua faatasi ma isi e toatolu o e na avea ma Peresitene o le Ekalesia: O Siaosi Alapati Samita, Tavita O. Makei, ma Iosefa Filitia Samita. I le gasologa o lana auaunaga o se Peresitene o le Ekalesia, na faauuina ai e Heber J. Grant ia Elder Harold B. Lee, Elder Spencer W. Kimball, ma Elder Ezra Taft Benson i le tofi Aposetolo. Ma o le 1935 na faafaigaluegaina ai e ia ma ona fesoasoani i le Au Peresitene Sili se faifeautalai talavou ua foi mai le misiona e igoa ia Gordon B. Hinckley e galue e avea ma failautusi faapitoa i le Leitio, Faasalalauga, ma le Komiti o Tusitusiga a le Misiona a le Ekalesia.

O Se Sootaga Alofa i le va o le Tina ma le Tamaitiiti

Na soifua mai ia Heber Jeddy Grant i le aso 22 o Novema 1856 i le Aai o Sate Leki, Iuta, e na o le pau ai lea o le tama a Rachel Ridgeway Ivins Grant ma Jedediah Morgan Grant, o le sa auauna atu o se Fesoasoani Lua ia Peresitene Polika Iaga. E iva aso mulimuli ane, ae maliu lona tama ona o le gasegase o le palagaau ma le niumonia.

O le tele o lona olaga a o laitiiti, sa tauivi ai Heber ma lona tina ua maliu lana tane ma le tulaga tau tupe. Sa la onosaia ia “po malulu e aunoa ma se afi i le magalafu, o ni masina e aunoa ma ni seevae, e le sili atu ma se ofu se tasi e suiina i le fale mai se ie taugata i lena vaitaimi, ma sei vagana ai sina sapalai o le falaoa ma nai pauna pata ma se suka, o nai meaai na e maua mo le tausaga atoa.”²

Sa naunau lava Rachel e tausia o ia ma lana tama laitiiti. Sa galue o ia o se suisui ma lisiina atu lona fale e mautotogi ai nisi. Na ofo atu ona tuagane e faafaigofie le olaga mo ia pe afai na te tuua le Ekalesia, ae sa tumau faamaoni pea i lona faatuatuaga. O lenei uiga faamaoni a’ia’i ma le ositaulaga na tumau ai ni lagona o Heber, o le na toe faamatalaina mulimuli ane:

“O tuagane o lo’u tina sa tulaga lelei i mea tau tupe sa ofo atu e tuuina atu se aofaiga ia te ia i le tausaga pe afai na te lafoaia lana lotu. O se tasi o ona tuagane na faapea atu ia te ia: ‘Rachel, ua tauleaga le igoa o Ivins ia te oe. Matou te le toe fia vaai ia te oe pe afai tou te nonofo pea ma na Mamona leaga, ’—o le taimi lea na malaga ai o ia i Iuta—‘ae, ’ sa faaauau lana faamatalaga, ‘toe foi mai i se tausaga, toe foi mai i le lima tausaga, toe foi mai i le sefulu po o le luasefulu tausaga, ma e leai se afaina pe a e toe foi mai, o le a matala pea le faitotoa, ma o le a leai ni ou popolega i mea tautupe ma o le a tuumamaina foi lau avega.’

“Mulimuli ane, ina ua oo mai le mativa i lona olaga, ana faapea na te leiloa o Iosefa Samita o se perofeta a le Atua ma e moni le talalelei, e na o le pau lava le mea na ia manaomia o le toe foi atu lea i sasae ma tuu atu i ona tuagane e tausia o ia. Ae nai lo le toe foi atu i ona aiga maumea i sasae lea e mafai ona tausia ai o ia, ma e tau leai ai foi se tauiviga mo ia lava po o lana tama, sa ia manatu pea e tausia o ia lava faatasi ma i latou o e sa sili atu ona ia pipii i ai nai lo ona aiga o e sa le talitonu i lona faatuatuaga.”³

Sa matitiva ia Rachel Grant ma lana tama i mea tau tupe, ae sa tamaoaiga i lo la fealofani ma lo la faamaoni i le talalelei toefuataiina a Iesu Keriso. Na saunoa ia Peresitene Grant, “Ou te nofo aitalafu i lo’u tina i mea uma, aua na maliu lo’u tama ae faatoa iva aso lo’u matua; ma o aoaoga ofoofogia, o le faatuatua, o le faamaoni o lo’u tina sa avea lea ma se musumusuga ia te au.”⁴

O le musuia o Heber J. Grant talu lona tina, na ia atiinaeina ai se uiga na lauiloa ai o ia i le Ekalesia atoa: o le tumau mausali. O lona maelega ma le naunau e galue na fesoasoani ai ia te ia e foia nisi o vaivaiga e masani ai. Mo se faataitaiga, sa ula nisi tamaiti i lona faapalupe i luga o le malae peisipolo. Na ia tali atu i a latou tauemuga e ala lea i lona sailia o ni tupe ia lava e faatau ai se polo peisipolo ma faaalu ai ni itula e togitogi ai le polo agai i se fale teu saito i le faatoaga. O le taunuuga o lona tumau mausali, na ia taalo mulimuli ane ai i se au peisipolo sa taaalo mo le siamupini. I le aoga, e taufaalilili ai nisi o ana uo i le vasega e uiga i le sipasipa o lana tusitusi. Na ia toe faamatalaina mulimuli ane: “O nei faamatalaga faapea ma isi, e ui ina latou te le i faia ia faatiga ai o’u lagona ona sa fai i le fia malie, ae sa matua oona matuitui ia te au, ma sa tupu ae ai se agaga o le finafinau maua’i ia te au. Sa ou faia ai loa se faaiuga ina ia ou ola e tusia ni kopi mo i latou uma o e auai i le iunivesite, ma ia avea au ma faiaoga o le tusitusi ma le tausitusi i lena aoga. … Sa amata ona ou faaaogaina o’u taimi avanoa e faataitai ai la’u tusitusi, ma faaauau ai pea lava i lea tausaga ma lea tausaga seia oo ina ua ta’ua au o le ‘tagata tusitusi sili i le lalolagi.’” Sa oo ina manumalo o ia i le faailoga muamua i le lelei o le tusitusi i se faaaliga a le teritori sa faia ma sa avea foi o ia ma se faiaoga o le tusitusi ma le tausitusi i le Iunivesite o Tesareta (lea ua avea nei ma Iunivesite o Iuta).⁵

“O Se Taitai O Mea Tau Tupe ma Pisinisi”

Na ulufale atu Heber J. Grant i le lalolagi o pisinisi i le talavou o lona olaga ina ia mafai ai ona fesoasoani i le tausiga o lona tina. I le 15 o tausaga, na faafaigaluegaina ai o ia o se tausitusi ma se tasi e tusia inisiua. Na galue foi o ia i le vaega o faletupe ma maua ai nisi tupe i ona itula e ese mai ona itula faigaluega e ala lea i le tusia o faamanuiaga ma valaaulia ma le faia o faafanua.

A o ia vaavaai atu agai i luma i nisi avanoa, sa i ai “sona faanaunauga mo se aoaoga i le iunivesite ma sona tikeri mai se aoga sili atu.” Na ia lagonaina e “laitiiti lava sona faamoemoe e maua ai, ona e leai ni tupe ma o loo tausi foi lona tina ua maliu lana tane, ” ae sa ofoina atu ia te ia se avanoa e suesue ai i le Aoga a le Neivi a le Iunaite Setete. Na ia toe faamatalaina e faapea:

“Mo le uluai taimi i lou olaga e lei lelei sau moe; na toeitiiti ao lelei ou te lei moe, i lou fiafia ona o le a faataunuuina le manaoga o lou olaga. Na ou moe ae ua tafa mai ata; sa fafagu au e lo’u tina.

“Sa ou fai atu: ‘Tina, o se mea ofoofogia lo’u mauaina o se aoaoga lelei lea e tatau ai mo soo se alii talavou i Iuta atoa. Sa le mafai ona ou moe; sa ou ala i le po atoa seia oo mai lava nei i le tafa o ata.’

“Sa ou tilotilo atu i ona foliga; sa ou vaaia ai o ia o tagi.

“Ua ou faalogo a fai e malelemo tagata, e na o ni nai sekone lava ona mavae atu lea o lo latou olaga. Sa ou vaaia i o’u mata faalemafaufau le avea o au ma se atimalala. Sa ou vaaia lo’u malaga taamilo i le lalolagi i se vaa, ma mamaoese mai lo’u tina ua oti lana tane. Sa ou ata ma fusi mai lou tina, ma sogi atu i ai ma faapea atu ia te ia:

“ ‘Tina, ou te le manao i se aoaoga faaneivi. O le a avea au ma se tagata fai pisinisi ma fai loa lava so’u ofisa, ma tausi oe, ma faagata ai ma le sueina o au tupe mo le tausiga, mai tagata e mautotogi i le fale.’

“Sa ootia o ia ma tagi ma sa fai mai, e lei moeiini ona mata ae sa tatalo i le po atoa ina ia ou faataatiaese o’u manaoga o le olaga ina ia aua nei tuua ai na o ia.”⁶

A o tulitulimatai e Heber lona naunau i pisinisi, sa faamanuiaina o ia a o talavou lona olaga, aemaise lava i pisinisi o faletupe ma inisiua. Sa maua sona tulaga aloaia o se tagata fai pisinisi faamaoni ma le galue malosi. Na maitauina e Heber M. Wells, le uluai kovana o le setete o Iuta, “E mafai ona ia savali atu i totonu o ofisa o faatonu ma pule o ofisa tetele o mea tau tupe ma fale gaosimea i Amerika ma e faafeiloaia lelei o ia e tagata o e mitamita i lo latou iloaina o ia o se uo ma o se taitai o mea tau tupe ma pisinisi.”⁷ O se faasalalauga o mea tau tupe i le 1921 na aofia ai se faaaloalo ia Peresitene Grant: “O loo i ai i le Susuga a Grant ia uiga o se taitai moni—e malosi i le faamoemoega, e faamaoni ma lotomaualalo ona uiga, e maelega i galuega uma e oo atu i ai, ma e tumau foi lona naunautai. Ua lauiloa o ia ma faaaloalogia e tagata fai pisinisi o sisifo lona tolu o le Iunaite Setete, e tusa lava po o a o latou talitonuga faalelotu.”⁸

E le faamanuiaina pea ia Heber J. Grant i ana taumafaiga i pisinisi. Mo se faataitaiga, i le faaletonu o le tamaoaiga i le tele o vaega o le Iunaite Setete i le 1893, na tuua ai le fiaselau o faletupe, auala o nofoaafi, maina, ma isi pisinisi i se tulaga leaga o mea tau tupe. Sa taua lea tulaga faaletonu o Popolega o le 1893, na maofa ai ia Elder Grant, a o avea lena ma se sui o le Korama a Aposetolo e Toasefululua. Na tuua ai o ia ma ni aitalafu na alu ni tausaga o tau totogi. I le gasologa o na taimi faigata, na tuufaatasia ai le aiga atoa o Grant ina ia fesoasoani e tuuitiitia le faigata tautupe o le aiga. “O le taimi lava na lava ai lo matou matutua e faigaluega ai, ” e manatua lava e se tasi o afafine, “sa amata ai foi ona matou faigaluega …, ma o se tulaga sili lea ona faamalieina ai o matou olaga talavou ina ua matou lagona o loo matou fesoasoani ia te ia i le tausiga o i matou.”⁹

Ae o le faaiuga, na faamanuiaina lava ia Peresitene Heber J. Grant i mea tau tupe, ma sa ia faaaogaina mea na ia maua e fesoasoani ai i tagata taitoatasi, o aiga, o le Ekalesia, ma le nuu. Na ia saunoa mai: “E ui lava sa ou galue malosi mo le Tupe, ua outou iloa, e pei foi o au uo uma o loo i ai se malamalama atoatoa i o’u lagona i totonu o lo’u loto, ae lei avea lena Tupe ma o’u atua ma e lei naunau foi i ai lo’u loto, ae na o le faia o mea lelei mai mea ou te mauaina. Sa ou matuai manao lava ina ia tumau ai faapena o’u lagona.”¹⁰

Sa fiafia tele ia Peresitene Grant e foai atu tusi. Na ia foaiina atu le faitau afe o tusi, o le tele lava o tusi na ia tusia. Na ia saunoa mai faapea na ia faatauina nei tusi i “tupe o lana tapaa, ” na ia mafaufau o le aofaiga o le tupe na ia faaaluina e lagolago ai lana amioga lea o le foai atu o meaalofa, e tutusa lelei lava ma le aofaiga e faaalu e se tagata ulaula e lagolago ai lona manao i ni tapaa.¹¹ I le foaiina atu o le tele o meaalofa, o nisi taimi sa ia le mailoa ai le mea na ia faia. “sa ou tuuina atu i se tagata se tusi i se tasi taimi, ” na ia saunoa ai, “ma sa ia faafetai mai ma le agalelei, ma faapea mai, ‘Le Uso e Grant, ua ou talisapaia atoatoa lenei tusi. O le kopi lona tolu lenei ua e tuuina mai ia te au.’ ” Ina ua mavae lena feutagaiga, sa amata loa ona tausia e Peresitene Grant se faasologa o tusi ua ia foaiina atu.¹²

Na ta’ua faapea o Peresitene Grant e “foai atu aua e fiafia i ai, —e foliga mai o faanaunauga na a se loto e tele ma matamau.” ¹³ Na ta’ua e lona afafine o Lucy Grant Cannon e faapea o ia “o le tagata sili ona matamau i le lalolagi” ma sa ia faamatalaina le atugalu tele [o lona tama] mo tina ua oti a latou tane ma ni tama—“na ia totogiina uma mokesi o o latou fale, ma tuu a latou fanau i ni pisinisi, ma sa ia vaai ina ia maua e i latou o loo mama’i le tausiga faafomai lelei.” E oo lava “i le vaitaimi o na tausaga sa utiuti ai le seleni lea na sosoo ma le popolega o le 1893, ” na ia faamatala mai ai, “o le foai atu o se limasene sa matuai faigata lava nai lo le foaiina atu o se lima tala po o se sefulu tala, sa fesoasoani pea tama ia i latou o e sa feagai ma tiga.”¹⁴

“O Se Tagata Maoae o le Aiga”

Na faamatala mai faapea e le afafine o Peresitene Grant o Frances Grant Bennett, “E ui lava i le malosi o uiga o [lo’u tama] e pei ona lauiloa ai, ae toaitiiti lava ni nai tagata e iloaina o ia o se tagata maoae o le aiga.”¹⁵ O ona tiutetauave i le Ekalesia na moomia ai lona malaga soo, ae tumau pea lona vavalalata i tagata o lona aiga e ala lea i le tusiina atu o le fiaafe o tusi ma faamatalaga ia i latou. Na toe ta’ua e le tama a lona afafine o Truman G. Madsen: “O lana auala e taulimaina ai le mamao e mafua mai i le malaga soo, o le tusitusi atu lea. … I luga o nofoaafi, i potu faatalitali, i faletalimalo, ma le nofonofo ai i luga o le tulaga o le pulelaa i le va o sauniga, e na te tusia ai ni savali i lalo e faasoa atu ai ni ona aafiaga ma tali atu ai i tusi na auina atu e lona aiga.”¹⁶

E manatuaina e lona afafine o Lucy ia taimi matagofie na latou faaaluina ma ona uso ma tuagane ma lo latou tama, pe a ia taliu mai sana auaunaga i le Au Paia:

“O se taimi fiafia tele matou te maua pe a foi mai o ia i le fale! Matou te faapotopoto faatasi ma faalogo atu i mea na ia oo i ai. E mafai ona ou vaai faalemafaufau atu nei ia te ia o savalivali solo i le fale e tofu le tamaitiiti ma lona vae o loo pipii ai, po o le faalue o tamaiti i luga o lona tuli. …

“O mea e manatuaina e toe foi ai lo’u mafaufau i tietiega matou te masani ona faia i la matou solofanua o Ioane. E ui lava o nofoa e lua o le matou taavale solofanua ua tumu ae tatau lava ona matou o uma. E ave e tama le matou tietiega, e agai atu i le Auala i le Itu i Sisifo o le Malumalu ona agai atu lea i le Paka Saoloto. O auala i le Itu i Sisifo o le Malumalu e laina ai laau o le vavae. Afai o le tau amataga o le tautotogo ma o loo tafe mai le sua i le laau, e faatu e tama le taavale ae tipi mai se lala mai le laau ona fai ai lea o ni a matou faaili. O se mea manaia ia i matou lona aveeseina o le pa’u ona faapu lea o le laau; ona toe tuu lea i ai o le pa’u ona maua ai lea o a matou faaili. Ma e maeu foi leo o na faaili a o matou tietie agai atu i le fale. Na foliga mai e tofu lava le tagata ma le leo o lana faaili.”¹⁷

Na mafaia e Peresitene Grant ona faatumauina le amio pulea i totonu o le fale e aunoa ma le faaaogaina o le sasa. Na faapea mai lona afafine o Lucy: “Sa ou fefe aua e lei matuai faaaogaina e lo matou tama le poloaiga o le ua ‘tuuna lana sasa [ona] ua inoino i lona atalii’. … Ou te manatu na sili atu ona matou tiga i le iloaina lea ua matou faaonoono i o matou matua nai lo lo matou lagonaina o le maini o le sasa.”¹⁸

Na uunaiina e Peresitene Grant ia matua ina ia “faatulagaina o latou olaga ina ia avea a latou faataitaiga ma musumusuga i a latou fanau, ”¹⁹ ma sa ia ola e tusa ai ma lenei aoaoga. Sa faamatalaina e lona afafine o Frances se taimi sa ia aoao mai ai i le faataitaiga [a lona tama]:

“Na i ai se mea na tupu na matuai loloto ai lava sona aafiaga ia te au ma na ou manatuaina i lo’u olaga atoa. Sa ou faaaogaina se gagana e le faatagaina e tama, ma sa ia ta’u mai ia te au e ao ona ia fufuluina ese na upu mai lo’u gutu. Sa ia oloina lelei lo’u gutu i le fasimoli ma faapea mai, ‘O lena ua mama lou gutu. Ou te le toe manao lava e te toe faia ni upu palapala faapena.’

“I ni nai aso mulimuli ane i luga o le laulau a o faia le ti o le taeao, sa faamatala ai e tama se tala, sa ia ta’ua ai se igoa o se isi tagata ma na ia faaaogaina se faaupuga mamafa. Sa vave ona ou amanaiaina.

“ ‘Papa, ’ sa ou fai atu ai, ‘na e fufuluina lo’u gutu ona o le faia o upu faapena.’

“ ‘Sa ou faia, ’ o lana tali mai lea. ‘Ma e le tatau ona ou toe faia e sili atu nai lo oe. E te manao e te fufuluina lo’u gutu?’

“O le a ou faia. Sa ou aumaia le fasimoli ma ou faia se galuega maeaea lelei.

“Na mafai lava e lo’u tama ona fai mai e leai. Na mafai lava ona ia fai mai e lei palauvale o ia, aua o le mea moni lava lena e lei palauvale; ae le o lana auala lena. E le mafai e se tamaitiiti laitiiti ona faamatalaina le eseesega i le va o se upusii ma le mea moni, ma sa ia iloaina. Mai lena taimi na ou iloaina ai o lo’u tama e matuai tonu i ana feutagaiga uma ma au, ma ou te leiloa lava pe na ia faia se isi mea e ese mai ai. Ina ua uma lena, ou te lei toe faalogo lava o ia toe sii maia ni mea mataga. E fiafia o ia e faamatala ni tala ola ma e faapea mai o ia, ‘Na fai mai Ioane, ma le faamamafa, o lea ma lea, ’ ae na te le ta’uina mai ia upu. O ia o se tagata e matuai talitonu tele i le aoao atu e ala i faataitaiga ma na te le fai mai lava ia i matou e faia soo se mea na te le faia e ia lava.”²⁰

E manatua e Lucy le alofa faapelepele o lona tama mo lona tina, o le na maliu i le 34 o tausaga: “I le taimi o le ma’i o lo’u tina, lea na umi lava se taimi na ma’i ai, sa tumau pea lona faamaoni ma lana tausiga i ai e pei ona talanoa i ai lona aiga ma ana uo ae faapea foi i tagata ese o e na iloaina le iloga mai o lenei faamaoni. Mo le ono masina sa ma faatasi ai ma lo’u tina a o faia ni ona togafitiga faapitoa i se falemai i Kalefonia, ma e masani lava pe a mafai ai ona matou faatasi ma ia. E masani ona oo atu ma ni teufugalaau; o fualaau aina mata, o ni mea suamalie, o lavalava fou—o mea uma lava e mafai ona ia auina atu mo ia. E toetoe lava o aso uma e taunuu atu ai se tusi, ma o nisi taimi e iloagofie lava ua tuai atu se tusi, ma e oo lava i tamaitai tausimai e maitauina. Ou te manatuaina le faapea atu o le Tamaitai Pule (sa ma i ai i se Falemai o le Katoliko) ia tina ona o tausaga uma sa tausimai ai e na te lei vaai lava i se alii o tausia faapea lana ava ma le manatu tele i ai e pei o le tausiga o tina.”²¹

Sa faamatalaina foi e Lucy le tausiga faifai pea a lona tama i lona lava tina: “Na toetoe lava a ou le vaai i se atalii ua sili atu ona manatunatu ma alofa. O lona popole ina ia faafiafia o ia i le matua o lona soifua, o lona naunau e fetufaai atu mea uma sa ia te ia ma tausia faalelei o ia na toetoe lava o se fiafiaga lea ia te ia. O aso uma lava e faia ai a matou tatalo faaleaiga ma a faapea ua oo ia te ia le faasologa, e tootuli o ia i tafatafa o tinamatua ma tatalo ina ia mafai ona ia lagonaina mai, e ui lava ina tutuli. E talanoa atu o ia ia te ia ma e mafai ona ia lagonaina mai lona leo ae na te le mafaia ona lagona isi. … Mo le fitu tausaga mulimuli o le soifua o tinamatua sa nofo ai i lo’u fale, ma e le mafai ona ou manatuaina se aso e lei alu atu ai tama i le fale pe le telefoni atu foi pe le maua mai se upu mai ia tinamatua. E mitamita lava o ia i lona tina ona o ana auala agaalofa, o le maoae o lona faaleagaga, ma ona foliga aulelei ma le susulu—o se foliga na faaalia mai ai le faamalieina ma le filemu sa ia te ia.”²²

O Se Soifua Maelega ma le Soifua Tautua i le Ekalesia

Peresitene o le Siteki

Na toeitiiti lava atoa lona 24 tausaga, ae valaauina loa ia Heber J. Grant e tuua lona aiga i le Aai o Sate Leki ae siitia atu i Tooele, Iuta, lea o le a avea ai o ia ma peresitene o le siteki. O le taimi lea i lona olaga, na ia toe faamatalaina, “Sa leai ma so’u iloa, ma sa ou lagonaina le faateteleina o lo’u vaivai.”²³ Ae peitai, na ofoina atu atoa o ia lava i lona tiutetauave fou. Na ia ta’ua mulimuli ane: “E lei tau lava i ai lo’u mafaufau i lo’u nofo ai [i Tooele] i aso uma o lo’u olaga. E leai lava se isi mea na ou mafaufau i ai.”²⁴

I le aso 30 o Oketopa 1880, na faateia ai tagata o le au paia i le Siteki a Tooele Iuta, ina ua tuuina atu ia Heber J. Grant e 23 tausaga le matua, o se tagata foi e fou atu, e avea ma o latou peresitene fou o le siteki. Na ia faailoaina atu o ia lava i le aofia e ala i sana saunoaga puupuu. E ui lava ina puupuu le lauga nai lo le mea na manao i ai, ae na tuu atu ai i tagata se faailo o le tagata o le a avea ma o latou taitai perisitua. I tausaga mulimuli ane, na ia toe manatuaina ai le savali autu o le lauga:

“Sa ou faasilasilaina atu i se lauga e fitu ma le afa minute le umi e faapea o le a ou le fai atu lava i se tagata i Tooele ina ia avea ma se tagata totogi sefuluai faamaoni e sili atu nai lo au; o le a ou le fai atu lava i se tagata ina ia sili atu ona foai atu ana mea e tusa ma mea ua ia maua nai lo mea ou te foaiina atu; o le a ou le fai atu lava i se tagata ina ia ola i le Upu o le Poto e sili atu nai lo lo’u ola ai, ma o le a ou tuuina atu mea silisili o loo ia te au mo le manuia o tagata i lena siteki o Siona.”²⁵

Sa auauna atu ma le faamaoni ia Peresitene Grant a o avea ai ma peresitene o le siteki mo le lua tausaga a o lei valaauina o ia i le tofi paia o le Aposetolo.

Aposetolo

O le aso 16 o Oketopa 1882 na faauuina ai ia Elder Heber J. Grant o se Aposetolo e Peresitene George Q. Cannon, le Fesoasoani Muamua ia Peresitene Ioane Teila. I le gasologa o lona 36 tausaga i le Korama a le Toasefululua, sa tuuina atu ai le sao o Elder Grant i le Ekalesia i le avea ai ma se taitai, faiaoga, tagata faipisinisi, ma se faifeautalai. Na auauna atu o ia o se sui o le au faatonu aoao o le faalapotopotoga o alii talavou i le Ekalesia ma o se tasi o tagata na faavaeina le mekasini a le Ekalesia na faaigoaina o le Improvement Era. Na avea foi o ia ma pule o le Improvement Era.

I le avea ai o ia ma se Aposetolo, sa faaaluina ai e Elder Grant le lima tausaga i le auaunaga faafaifeautalai. O le tali atu i valaau mai le Au Peresitene Sili, na ia faatulagaina ai ma pulefaamalumalu i le uluai misiona i Iapani ma mulimuli ane pulefaamalumalu i le Misiona a Peretania ma Europa. I lana fautuaga i faifeautalai o e sa auauna atu faatasi ma ia, e masani ona ia taulotoina soo atu ia ni autu se lua. Muamua, na ia apoapoaiina i latou ina ia tausisia faatulagaga a le misiona ma tausi poloaiga. Lona lua, na ia uunaia i latou ina ia galulue malolosi. I le Misiona a Peretania, na ia faavaeina ai le saoasaoa e ala lea i le galue i ni itula e sili atu nai lo se isi lava taimi muamua. I lena misiona atoa, na matuai alualu i luma le galuega e ui lava sa tuuitiitia le aofaiga o faifeautalai mai lea tausaga i lea tausaga.²⁶

Peresitene O Le Ekalesia a Iesu Keriso o le Au Paia o Aso e Gata Ai

Na maliu ia Peresitene Iosefa F. Samita i le aso 19 o Novema 1918, sa ia silafia o Heber J. Grant o le a suitulaga ia te ia e avea ma Peresitene o le Ekalesia, ma o toe upu ia a Peresitene Samita ia Peresitene Grant: “Ia faamanuia oe e le Alii, lo’u atalii e, ia faamanuia oe e le Alii; e tele naua ou tiutetauave. Ia e manatua pea o le galuega lenei a le Alii ae le o le tagata. E silisili atu le Alii nai lo soo se tagata. Na te silafia le tagata ua Ia finagalo e taitaia Lana Ekalesia, ma e le faia lava se mea sese. Ia faamanuia oe e le Alii.”²⁷

Na faataape le Au Peresitene Sili, ae tuu ai le Korama a Aposetolo e Toasefululua e avea ma pule taitai i le Ekalesia, faatasi ai ma Peresitene Heber J. Grant o loo avea ma Peresitene o lena Korama. O le aso 23 o Novema 1918 na faamanuiaina ai Peresitene Grant e avea ma Peresitene O Le Ekalesia a Iesu Keriso o le Au Paia o Aso e Gata Ai. Sa ia faatumauina pea ia fesoasoani o e sa auauna faatasi ma Peresitene Samita: o Peresitene Anthon H. Lund e avea ma Fesoasoani Muamua ma Peresitene Charles W. Penrose e avea ma Fesoasoani Lua.

O le uluai konafesi aoao a Peresitene Grant i le avea ai ma Peresitene o le Ekalesia na faia lea ia Iuni 1919, ina ua mavae se lua masina na tolopoina ai ona se faamai sa laugatasia ai le lalolagi lea na aafia ai soifua i le Vanu o Sate Leki. O se vaega o lana uluai saunoaga i le konafesi i le avea ai ma Peresitene o le Ekalesia na toe lagonaina ai lana uluai lauga i le avea ai ma peresitene o le Siteki a Tooele:

“Ua ou lagonaina le lotomaualalo, e sili atu nai lo soo se gagana ua tuuina mai e le Atua ia te au e faailoa atu ai, i le tulai atu ai i o outou luma i lenei taeao, e faatumuina le tofiga lea faatoa outou palota e lagolagoina ai au. Ou te manatua ai lo’u tulai ai i luma o se aofia i Tooele, ina ua uma ona lagolagoina au e avea ma se peresitene o lena siteki, a o avea au ma se alii talavou e luasefulutolu tausaga, ma folafola atu i lena aofia le mea silisili sa i lo’u loto. Ua ou tulai atu iinei i lenei aso i le lotomaualalo uma, e faailoa atu lo’u lava vaivai, ma lo’u lava le malamalama ma le le iloa, ma lo’u le gafatia ona faatumuina le tofiga faaeaina lea na outou palota e lagolagoina i ai au. Ae pei ona ou fai atu a o o’u talavou i Tooele, ou te fai atu ai foi iinei i lenei aso: faatasi ai ma le fesoasoani a le Alii, o le a ou faia le mea silisili ou te mafaia ina ia faataunuuina ai matafaioi uma ua oo mai i o’u luga i le avea ai ma Peresitene O Le Ekalesia a Iesu Keriso o le Au Paia o Aso e Gata Ai, i le atoatoa o lo’u malosi ma lo’u malamalama.

“O le a ou le fai atu lava i se tagata ina ia sili atu ona foai atu ana mea e tusa ma mea ua ia maua nai lo mea ou te foaiina atu, mo le faaalualuina i luma o le Malo o le Atua. O le a ou le fai atu i se tagata ina ia sili atu lona tausia o le Upu o le Poto nai lo lo- ’u tausiaina. O le a ou le fai atu lava i se tagata ina ia sili atu ona faaeteete ma vave ona totogiina ana sefuluai ma taulaga nai lo au. O le a ou le fai atu lava i se tagata ina ia sili atu ona saunia ma naunau e vave sau ae tuai ona alu, ma ia galue ma le malosi atoa o le mafaufau ma le tino, nai lo la’u galue, ia faia pea i le lotomaualalo. Ou te faamoemoe ma tatalo mo faamanuiaga a le Alii, e faailoa atu ma le mautinoa ma le faamaoni, a aunoa ma faamanuiaga a le Alii o le a le mafaia e au ona faia se tulaga manuia i le valaauga maualuga ua tofia i ai au. Ae pei o Nifae anamua, ua ou iloa e le aumaia e le Alii ni poloaiga i le fanauga a tagata, seiloga na te saunia le ala mo i latou ia mafai ai i latou ona fai le mea ua ia poloaiina ai i latou [tagai 1 Nifae 3:7]. Faatasi ai ma lenei malamalama i lo’u loto, ua ou taliaina ai le tiutetauave tele, e aunoa ma le fefe i taunuuga, i le iloaina lea o le a lagolagoina au e le Atua e pei ona ia lagolagoina isi o e na i ai muamua i lenei tofiga, o loo tuuina mai pea, e ao ona ou galue i le lotomaualalo ma le maelega, i le sailia pea lea o le taitaiga a le Agaga Paia; ma o le mea lenei e ao ona ou faia pea.”²⁸

E toeitiiti 27 tausaga o auauna atu ia Peresitene Grant o se Peresitene o le Ekalesia—e umi atu nai lo se isi lava Peresitene o le Ekalesia e ese mai ia Polika Iaga. O le taimi lena, o tagata o le Ekalesia, faatasi ai ma le isi fia miliona i le lalolagi atoa, na mafatia ona o taunuuga o le Taua Muamua o le Lalolagi, o tulaga faaletonu tau tupe i le Pa’u o le Tamaoaiga, ma faigata ma matautia o le Taua Lona II a le Lalolagi. E ui lava o lea vaitaimi na iloga ai faigata, ae o se taimi fiafia foi lea. Na faamanatuina e le Au Paia o Aso e Gata Ai le 100 tausaga o le Uluai Faaaliga ma le faatuina o le Ekalesia a Iesu Keriso o le Au Paia o Aso e Gata Ai. Sa latou olioli i le faapaiaina o malumalu i Laie, Hawaii; Cardston, Alberta; ma Mesa, Arisona. Ma na amata ia Oketopa 1924, o i latou o e na le mafai ona auai atu i le konafesi aoao i le Tapeneko i Sate Leki po o fale na latalata ane na mafai ona faalogoina ia afioga a perofeta o aso e gata ai i luga o le leitio.

I ana savali i le Au Paia, na faamamafa atu ai pea lava e Peresitene Grant le taua o le tausiga o poloaiga. Na ia folafola atu, “Ou te folafola atu ia te outou, i le avea ai ma se auauna a le Atua soifua, o alii ma tamaitai uma o e usiusitai i poloaiga a le Atua e uluola, ma o folafolaga uma na faia e le Atua o le a faataunuuina i luga o o latou ulu, ma o le a latou alualu i luma ma faateleina le atamai, malamalama, iloa, poto, ae o le mea silisili lava, o le molimau i le Alii o Iesu Keriso.”²⁹ Ina ua ia saunoa e uiga i le moomia ona tausia o poloaiga, e masani ona ia taulai atu i le Upu o le Poto ma le tulafono o le sefuluai. I se tasi lauga o le konafesi na ia aoao atu ai:

“O loo sauni le tiapolo e faatauaso o outou mata i mea o lenei lalolagi, ma o le a fiafia lava e faoese mai ia i tatou ia le ola faavavau, le meaalofa sili o meaalofa uma. Ae leai se mana o le tiapolo, ma e leai lava se isi mana o le a tuuina atu ia te ia e faatoilaloina ai soo se Au Paia o Aso e Gata Ai o loo tausia poloaiga a le Atua. E leai se mana ua tuuina atu i le tiapolo e faaumatia ai agaga o tagata pe afai e faia lo tatou tiute. Afai tatou te le o faamaoni a’ia’i i le Atua, ona tatou faavaivaia lea o lo tatou malosi e tetee atu ai, ona tatou faaumatiaina lea o se vaega o puipuiga lea o loo puipuia ai i tatou, ma o le a mafai loa e le tiapolo ona oo mai. Ae leai se tagata ua leiloa sana molimau o le Talalelei, e leai se tagata ua liliu i le taumatau po o le tauagavale, o le ua i ai le malamalama o le upumoni, o le sa auai atu i ona tiute, o le sa tausia le Upu o le Poto, o le sa totogiina lana sefuluai, o le sa tali atu i valaau ma tiute o lona tofi ma le valaauga i le Ekalesia.

“E i ai nisi o loo fesili pea e fiailoa po o le a le finagalo o le Alii mo i latou, ma e foliga mai e tau le mautonu i le tulaga lena. Ua ou matuai talitonu lava o mea uma lava ua finagalo i ai le Alii ia te outou ma au po o soo se isi lava alii po o se tamaitai i totonu o le Ekalesia e mo i tatou ia faataunuuina lo tatou tiute atoa ma tausia poloaiga a le Atua.”³⁰

I le taimi o le Pa’u o le Tamaoaiga i le 1930, a o tauivi tagata uma i le lalolagi atoa ma le leai o ni galuega ma le mativa, sa popole ai lava ia Peresitene Grant ma ona fesoasoani, o Peresitene J. Reuben Clark Jr. ma Tavita O. Makei, i le soifua sololelei o le Au Paia o Aso e Gata Ai. O le aso 20 o Aperila 1935 sa latou taloina ai i le latou ofisa ia Harold B. Lee, o se peresitene talavou o le siteki, o lana siteki lea sa faamanuiaina i le tausia o e matitiva ma le le tagolima. Na toe faamatalaina e Peresitene Lee:

“Na saunoa Peresitene Grant … e leai se isi mea e sili atu ona taua mo le Ekalesia nai lo le tausia o ona tagata matitiva ma le le tagolima ma o lona popolega lena, o mea uma e tatau ona ositaulagaina [ina ia mafai] ona tuuina atu se faaolatotoga talafeagai i o tatou tagata. Sa ou maofa ina ua ou iloaina ua tele tausaga talu ona ia i latou, ona o se taunuuga o o latou mafaufauga ma fuafuaga faapea ma musumusuga mai le Atua Silisiliese le atamai o se fuafuaga sa faatalitali ma sauniuni mo se taimi, i le latou lava faaiuga, o le a mulimuli ai le Au Paia o Aso e Gata Ai i lo latou faatuatua i fautuaga a alii o e o loo taitai ma pulefaamalumalu i lenei Ekalesia.”³¹

IIa Aperila o le 1936, ina ua mavae ona feutagai ma Peresitene Lee ma isi Au Pulega Aoao, o tagata faipisinisi, ma isi, sa faalauiloa atu ai loa e le Au Peresitene Sili le Fuafuaga o le Saogalemu a le Ekalesia, lea ua lauiloa nei o le polokalama o le uelefea a le Ekalesia. O le konafesi aoao o Oketopa o le 1936, na faamalamalama atu ai e Peresitene Grant le faamoemoega o lenei polokalama: “O lo matou faamoemoega autu lava o le faatuina lea, i le mafai e gata mai ai, o se faiga e aveesea ai le fetuu lea o le paie, o le leaga o le faapalapala, ae ia toe aumaia le tutoatasi, limalima, magafagafa ma le faaaloalo o le tagata ia te ia lava i o tatou tagata. O le faamoemoega o le Ekalesia o le fesoasoani lea i tagata ina ia fesoasoani ia i latou lava. E ao ona toe faatauaina le galue e avea ma mataupu faavae autu o olaga o tagata o la tatou Ekalesia.”³²

Na tautino mai e Peresitene J. Reuben Clark Jr.: “O le Fuafuaga o le Uelefea e faavae lea i faaaliga. … O le faatulagaina o le uelefea i le Ekalesia o le taunuuga o se faaaliga mai le Agaga Paia ia Peresitene Grant.”³³ O Elder Albert E. Bowen, o le sa faauuina o se Aposetolo e Peresitene Grant, na faamatalaina le faalepo o le polokalama: “O le faamoemoega umi lava o le Fuafuaga o le Uelefea o le fausia lea o uiga i tagata o le Ekalesia, o e foai ma e taliaina, ia laveaiina uma mai mea lelei o loo i totonu ia i latou, ma aumai ina ia fuga mai ma fua mai ia ‘oa o loo natia o le agaga.”³⁴

O Fepuari o le 1940 na aafia ai Peresitene Grant i se ma’i oso na pe ai lona itu tauagavale ma faaletonu ai lana tautala mo se taimi e le tumau. E lei taofia ai o ia mai lona faaauauina o le galuega a le Alii. Sa ia galue i ni nai itula i le aso, ma ia faaauau ona tuuina atu ni lauga pupuu i konafesi aoao mo le isi lua tausaga na sosoo ai. O le aso 6 o Aperila 1942 na ia fofogaina atu ai lana saunoaga mulimuli i le konafesi aoao. Na sosoo mai ai lea ma ana saunoaga sa faitauina e isi. O lana saunoaga mulimuli i le konafesi aoao, sa faitauina lea e Joseph Anderson i le aso 6 o Aperila 1945, ma sa faaiuina i upu nei o le molimau:

“O le mea silisili ona mamalu ua tupu i le talafaasolopito o le lalolagi talu le soifua mai o le Faaola lava ia i le lalolagi, o le silasila mai lea o le Atua ua talafeagai ona asiasi mai i le lalolagi ma Lona Alo pele e toatasi, lo tatou Togiola ma le Faaola, ma faaali atu i le taulealea o Iosefa. E faitau afe ma faitau selau o afe i latou o e ua i ai se molimau atoatoa ma tupito o lenei upumoni e faavavau. O le talalelei i lona mama atoatoa ua toefuatai mai i le lalolagi, ma ou te fia faamamafa atu faapea o i tatou o tagata e tasi lava le mea silisili e faia, o le valaau atu lea i le lalolagi ina ia salamo i agasala, ma usiusitai i poloaiga a le Atua. Ma o lo tatou tiute e sili atu i lo isi tiute uma o le o atu lea i le aiga ma le lalolagi, pe a tusa ai ma le taimi ma tulaga, ma folafola atu le talalelei a le Alii o Iesu Keriso. O lo tatou tiute le mafaufau i fanau na a lo tatou Tama o e na muamua atu ia i tatou i le oti e aunoa ma se malamalama o le talalelei, ma ia tatalaina le faitotoa o le faaolataga ia i latou i totonu o o tatou malumalu, lea foi o loo i ai ni a tatou matafaioi e faataunuuina ai.

“Ou te molimau atu ia te outou ua ou iloa o loo soifua le Atua, e na te faafofogaina ma tali mai i tatalo; o Iesu o le Keriso, o le Togiola o le lalolagi; o Iosefa Samita sa avea ma perofeta ma o le perofeta a le Atua moni ma le soifua; ma o Polika Iaga ma i latou o e na sosoo mai ia te ia, o ni perofeta foi a le Atua.

“E leai se gagana o i la’u pule ou te faailoa atu ai le loto faafetai i le Atua mo lenei malamalama ua ou maua. O lea taimi ma lea taimi e nutimomoia ai lo’u loto, ma maligi o’u loimata i le faafetai mo le malamalama o loo soifua o ia ma o lenei talalelei ua taua o le FaaMamona o le fuafuaga moni lava o le ola ma le faaolataga, ma o loo i ai moni lava i totonu o le Talalelei a le Alii o Iesu Keriso. Ia fesoasoani le Atua ia te outou ma au ma tagata uma ina ia ola ai, ma ia mafai ona fesoasoani ia i latou e lei iloaina le upumoni, ina ia mafai ona latou maua lenei molimau, o la- ’u tatalo faatauanau ma le fai soo lea, ma ou te ole atu ai i le suafa o Iesu Keriso. Amene.”³⁵

Na faaauau pea ona faateteleina le leaga o le tulaga o le soifua o Peresitene Grant seia oo lava ina ua tuumalo i le aso 14 o Me 1945. O sauniga o le maliu na faataunuuina i le fa o aso na sosoo ai. Na toe faamatalaina e Peresitene Iosefa Filitia Samita: “A o molimoliina atu le pusa maliu, sa latou pasia le fiaafe sa tutu i magaala i le tele o poloka ma ulu o loo faagaugau. Sa faamamaluina o ia e sui o isi Ekalesia ma sa taina foi le logo o le Falesa o le Lotu Katoliko. … O tagata lauiloa mai nofoaga taumamao na oo atu e faailoa lo latou faaaloalo ia te ia, o le tele o faleoloa i le aai sa tapunia o latou faitotoa ma sa i ai se faavauvau tele aua ua aveina se tagata maoae ina ua mavae se olaga umi ma le aoga.”³⁶

Sa saunoa ia Peresitene J. Reuben Clark Jr. ma Peresitene Tavita O. Makei, o e sa auauna atu o le Fesoasoani Muamua ma le Lua ia Peresitene Grant i le sauniga o le maliu. O a la saunoaga na toe aumaia ai lagona o le fiaselau o afe o le Au Paia o Aso e Gata Ai o e na lagolagoina ia Peresitene Heber J. Grant e avea ma o latou perofeta.

Na saunoa ia Peresitene Clark e faapea o Peresitene Grant “na ola amiotonu ma aumaia mai lo tatou Tama Faalelagi ia faamanuiaga ia e oo mai ia i latou o e tausia ma usitaia ana poloaiga.”³⁷

Na faailoa mai e Peresitene Makei, “O le tumau ai i mea na ausia, faamaoni, sao i mea uma na te faia, lelei ona lagona, malosi i le faataunuuina, e le tuuaulafo i le tiapolo, e misialofa mo e ua pagatia, e loto foai i le tikeri sili ona maualuga, e faamaoni i le olaga i mea uma, e agamalu ma manatu tele i e pele ia te ia, e faamaoni i uo, i le upumoni, i le Atua—e faapena lo tatou peresitene mamalu ma le alofagia—o se taitai lauiloa, o se faataitaiga aoga i le Ekalesia ma tagata i le lalolagi atoa.”³⁸