Folasaga
Ua faatuina e le Au Peresitene Sili ma le Korama a le Au Aposetolo e Toasefululua le faasologa o Aoaoga a Peresitene o le Ekalesia e fesoasoani ai i tagata o le Ekalesia ia faalolotoina lo latou malamalama i mataupu faavae o le talalelei ma faalatalata atili ai ia Iesu Keriso e ala i aoaoga a perofeta o lenei tisipenisione. O lenei tusi o loo faalauiloaina ai aoaoga a Peresitene Heber J. Grant, o le sa auauna atu o le Peresitene O Le Ekalesia a Iesu Keriso o le Au Paia o Aso e Gata Ai mai ia Novema 1918 e oo atu ia Me 1945.
O le a faamanuiaina le Au Paia o Aso e Gata Ai a o latou faaaogaina ia aoaoga a Peresitene Grant i o latou olaga. Na ia faamamafaina mai: “O le a leai se aoga o le tele o le malamalama, o musumusuga ma le molimau i le paia o le galuega a le Atua ia i tatou se’i vagana ua tatou faatinoina lena malamalama i gaoioiga i o tatou olaga i aso taitasi. E le o le aofaiga e mafai e se tagata ona iloa o le a aoga ia te ia ma ona uso a tagata; ae o le faatinoina o lena malamalama.”1
E Faapefea Ona Faaaoga Lenei Tusi
O mataupu taitasi o lenei tusi o loo aofia ai ni vaega se fa: (1) o se faamatalaga amata lea e faailoa faapuupuu mai ai le mea o loo taulai atu i ai le mataupu; (2) “Mai le Soifuaga o Heber J. Grant, ” lea o loo faamatala mai ai le savali o le mataupu e ala lea i le faamatalaina mai o se mea se tasi pe sili atu foi mai le soifuaga o Peresitene Grant; (3) “Aoaoga a Heber J. Grant, ” lea o loo aumaia mataupu autu mai lauga ma tusitusiga a Peresitene Grant faapea ma savali a le Au Peresitene Sili a o avea o ia ma Peresitene o le Ekalesia; ma le (4) “Fautuaga mo Suesuega ma Talanoaga, ” lea o loo aofia ai fesili e uunaia ai iloiloga ma suesuega a le tagata lava ia, faaaogaina o mataupu faavae o le talalelei, ma talanoaga i le fale ma le lotu. O le faitauina muamua o fesili a o lei suesueina saunoaga a Peresitene Grant e mafai ona maua ai se isi malamalama faaopoopo i ana aoaoga.
O lenei tusi e ao ona faaaogaina i tulaga nei:
Suesuega a le Tagata Lava Ia po o suesuega faaleaiga. O le suesue ma le agaga tatalo ma le manatunatu i ai, e mafai ai e tagata taitoatasi ona mauaina se molimau a le tagata lava ia i upumoni na aoaoina e Peresitene Grant. O le a faaopoopo atu foi lenei lomiga i le potutusi faaletalalelei a tagata o le ekalesia, ma o le a avea ma se punavai taua mo aoaoga faaleaiga ma suesuega i le fale.
Talanoaga i sauniga i le Aso Sa. O lenei tusi e mo sauniga i le Aso Sa i vaega a faitaulaga sili, korama a toeaina, ma le Aualofa, e masani lava o le Aso Sa lona lua ma le tolu o masina taitasi. O nei sauniga i le Aso Sa e tatau ona avea ma ni talanoaga e faaautu i mataupu autu ma aoaoga faavae o le talalelei. E tatau i faiaoga ona taulai atu i le aano o le tusi ma fesoasoani i tagata ina ia faaaogaina nei aoaoga i o latou olaga. E mafai ona latou aumaia ni fesili o loo i le faaiuga o le mataupu e uunaia ai le talanoaga a le vasega. A talafeagai ai, e tatau i tagata o le vasega ona tuuina atu ia molimau ma fetufaai ni faataitaiga a le tagata lava ia e faatatau i lesona. Pe a sailia ma le lotomaulalo e faiaoga le Agaga i le sauniuniga ma le taitaiina o le lesona, o i latou uma lava e auai o le a faamalolosia lo latou malamalama i le upumoni.
E tatau i taitai ma faiaoga ona uunaia tagata o le vasega e faitau i mataupu ae lei talanoaina i le vasega i le Aso Sa ma aumai le tusi i le lotu. E tatau ona latou aloaia sauniuniga a tagata o le vasega e ala i le aoao atu mai i saunoaga a Peresitene Grant. Pe a faitauina e tagata o le vasega mataupu a o lei oo i le Aso Sa, o le a latou saunia e fea’oa’oa’i ma faamalamalamaina e le tasi le isi.
E le tau manaomia ma e le fautuaina foi le toe faatauina e tagata o ni tusi faaopoopo o faamatalaga ma tusi e maua mai ai faamatalaga e lagolago ai mataupu ua i ai i le tusi. Ua uunaia tagata e liliu atu i tusitusiga paia po o mau ua fautuaina atu mo le suesueina atili o le aoaoga faavae.
Talu ai o lenei tusi ua fuafuaina mo suesuega a le tagata lava ia ma o loo maua mai ai faamatalaga faaletalalelei, e tele mataupu ua uumi tele mo le aoaoina atoa i le vasega i le Aso Sa. O le mea lea, e taua ai lava le suesue i le aiga ina ia maua ai le atoaga o aoaoga a Peresitene Grant.
O Puna o Faamatalaga o loo Ta’ua i Lenei Tusi
O aoaoga a Peresitene Grant o loo i totonu o lenei tusi o ni upusii tuusao ia mai le tele o punaoa. O upusii o loo faatumauina pea ia faailoga, o le sipelaga, ma mataitusi lapopoa e pei ona i ai i uluai punaoa sei vagana ai o ni suiga i le toe iloiloina ma le taina na talafeagai ona faia ina ia faaleleia atili ai le faitauina. O le mafuaaga lea, atonu o le a maitau ai e le au faitau nisi o vaega laiti e le o tutusa ai i totonu o le tusi.