“Estera Mpanjakavavy,” Tantara ao amin’ny Testamenta Taloha (2022)
“Estera Mpanjakavavy,” Tantara ao amin’ny Testamenta Taloha
Estera 2–5; 7–9
Estera Mpanjakavavy
Sahy ao anatin’ny fotoana isian’ny loza
Ny sasany tamin’ireo Isiraelita dia nantsoina hoe Jiosy. I Estera dia Jiosy izay nipetraka tany Persia. Maty ny ray aman-dreniny, ka i Mordekay havany no nikarakara azy. Nasaina tao amin’ny lapan’ny mpanjaka izy niaraka tamin’ny zatovovavy hafa tao amin’ny fanjakana. Nila mpanjakavavy vaovao ilay mpanjaka.
Nanana mpanompo nantsoina hoe Hamana ilay mpanjaka izay nanana hery lehibe. Nanampy ny mpanjaka hitondra ny tany i Hamana. Nasain’ny mpanjaka hiankohoka amin’i Hamana ny olona rehetra.
Fa i Mordekay dia tsy nanaiky niankohoka tamin’i Hamana. Ny Tompo ihany no hiankohofan’i Mordekay. Nampahatezitra an’i Hamana izany. Naniry ny hanafay an’i Mordekay sy ireo Jiosy rehetra izy.
Eksodosy 20:5; Estera 3:5–6, 8
Nilaza tamin’ny mpanjaka i Hamana fa tsy nanaraka ny lalàn’ny mpanjaka ireo Jiosy. Koa dia navelan’ny mpanjaka hamoaka lalàna vaovao i Hamana: misy andro ireo Jiosy rehetra dia hovonoina.
Nangataka an’i Estera i Mordekay mba hiresaka amin’ny mpanjaka. Afaka nanova ny lalàn’i Hamana ny mpanjaka ary hanavotra ny Jiosy. Saingy natahotra i Estera. Indraindray ny mpanjaka dia mamono ny olona izay tonga miresaka aminy ka tsy nahazo fanasana.
Nangataka an’i Estera mba hieritreritra ny Jiosy izay hovonoina i Mordekay. Nilaza i Mordekay fa mety napetraky ny Tompo tao amin’ny lapan’ny mpanjaka mihitsy i Estera mba hanavotra ny Jiosy.
Fantatr’i Estera fa tsy maintsy miresaka amin’ny mpanjaka izy, na dia midika aza izany fa ho faty izy. Nangataka ny Jiosy sy ny mpanompony rehetra i Estera mba hiaraka hifady hanina aminy.
Rehefa avy nifady hanina nandritra ny telo andro dia niomana i Estera hahita ny mpanjaka.
Rehefa nanatona an’ilay mpanjaka izy dia naninjitra ny tehiny izy. Nidika izany fa faly ny mpanjaka nahita azy ka tsy hamono azy. Nanontaniany azy ny zavatra nilainy. Nilaza tamin’ny mpanjaka i Estera fa tandindomin-doza ny vahoakany. Noho ny lalàn’i Hamana dia hovonoina izy sy ny Jiosy rehetra tao amin’ny fanjakana.
Tezitra tamin’i Hamana ny mpanjaka ka nampamono azy. Nanao lalàna vaovao ny mpanjaka izay niaro ny Jiosy. Izao izy ireo dia afaka miaro tena raha misy olona manandrana mandratra azy ireo.
Nanavotra ny vahoakany ny finoan’i Estera ny Tompo sy ny herim-pony hiresaka tamin’ny mpanjaka. Tsy nisy fahafatesana sy alahelo, fa firavoravoana. Nankalaza izany ny Jiosy.