Temipale Peeni Suisalaní

ʻI he 1906, ko e temipale pē ʻe fā naʻe lolotonga ngāué, pea naʻa nau tuʻu kotoa ʻi ʻIutā. Naʻe kikiteʻi ʻe Palesiteni Siosefa F. Sāmita (1838–1918) ʻi he taʻu ko iá ʻi Peeni ʻi Suisalani ʻe “hokosia ha kuonga … ʻe fokotuʻu ai ha ngaahi temipale ʻo e ʻOtuá … ʻi ha ngaahi fonua kehekehe he māmaní, he kuo pau ke mafola ʻa e ongoongoleleí ʻi he funga ʻo māmaní.”¹ Hili ha vaeuaʻi senituli mei ai, ʻi he ʻaho 11 ʻo Sepitema 1955, ne fakatapui ʻe Palesiteni Tēvita O. Makei (1873–1970) ʻa e fuofua temipale ʻi ʻIulopé, ʻi he tuʻa kolo ʻo Pēní.

ʻOku tuʻu ʻa e temipalé ʻi ha ʻotu moʻunga fakaʻofoʻofa ʻi Solikofeni. ʻOku fanāfotu hono tauá ki he langí ʻi ha fute ʻe 140 (mita ʻe 43), mo ha ʻīmisi ʻo e ʻāngelo ko Molonaí ne tānaki atu ʻi he 2005.

ʻOku mahino naʻe mamata moʻoni ʻa Palesiteni Makei ki he temipalé ʻi ha meʻa-hā-mai peá ne fakamatalaʻi fakaʻāuliliki moʻoni ia ki he tokotaha tā mape ʻa e Siasí ko ʻEtuate O. ʻEnitasoni ʻo ne lava ke tā ia ʻi he pepá. ʻI he hokohoko atu ʻa e ngāue ki he tā palaní, naʻe kiʻi liliu ʻa e ʻuluaki mapé. ʻI he meʻa ʻa Palesiteni Makei ki he mape hono uá, naʻá ne pehē ange leva, “Misa ʻEnitasoni, ʻoku ʻikai ko e temipale ʻeni naʻá ta fakatou sio aí.” Ko hono moʻoní, ko e mape fakaʻosí, naʻe hā mei ai e ʻuluaki fakamatala ʻa Palesiteni Makeí.