O Tagata Lelei o St. George
Claudio Gonzalez, Antofagasta, Chile
Ata na tusia e Allen Garns
Pe tusa o le 12 o o’u tausaga, sa ou matamata ai i se ata tifaga a le Ekalesia na faaali mai ai Peresitene Lorenzo Snow (1814–1901) o tatalo mo le Au Paia o Aso e Gata Ai i St. George, Iuta, ISA, o e na mafatia mai le lamala matautia.
“Le Alii e,” sa tatalo ai Peresitene Snow, “faamanuia tagata lelei o St. George.”
O lena fasifuaitau, “o tagata lelei o St. George,” na tuua se uunaiga tumau i lo’u mafaufau talavou. Ona ou te nofo i Chile, sa ou taumafai lava e mafaufau po o a ituaiga Au Paia faamaoni e tatau ona i ai “tagata lelei o St. George.” Sa ou fia feiloai ia i latou.
E silia ma le 30 tausaga mulimuli ane, i le 2005, sa matou o ai ma lo’u aiga e ave le ma atalii lona lua i Provo, Iuta, e auai ai ma lona uso, o lē sa a’oga i le Iunivesite o Polika Iaga. O le afiafi ina ua matou taunuu, sa ou fai atu ai, “Ou te fia alu e vaai ia tagata lelei o St. George.”
“Ae, Papá,” sa tetee mai ai lo’u atalii matua, “e mamao tele St. George.”
“Vaai,” sa ou tali atu ai, “sa totogi e Papá pepa malaga o vaalele. O loo totogi e Papá ia meaai. O loo totogi e Papá le kesi. “E na o le tasi lava le mea lea e manao ai Papá mo ia lava. E fia manao o ia e feiloai i tagata lelei o St. George!”
“Ua lelei,” sa fai mai ai lo’u atalii ina ua ia iloa e mamafa ia te a’u.
O le aso na sosoo ai, sa matou malaga ai i le taavale mo le 260 maila (418 km). Ina ua taunuu atu i St. George, sa matou o atu i le nofoaga autu o tagata asiasi i le malumalu ma malaga taamilo i le maota o le taumalulu o Peresitene Polika Iaga (1801–77). Sa matou asiasi atu foi i le tapeneko, lea sa valaaulia ai a’u e lauga atu i lo’u aiga mo se minute mai le pulelaa lava e tasi lea na lauga atu ai Peresitene Snow i “tagata lelei o St. George.” Sa matou savalivali solo i le aai, ma matamata ma feiloai atu i tagata. Sa foliga mai i latou pei lava o tagata masani ma faamaoni o le Au Paia o Aso e Gata Ai.
Sa ou fiafia ua matou o. Ae ina ua matou toe foi atu i Chile, sa ou iloa ai se mea: Sa ou vaai muamua i “tagata lelei o St. George.”
Ona o la’u galuega ma o’u valaauga i le Ekalesia, sa ou faimalaga ai i Chile atoa. I Calama, ua ou vaai ai i talavou matutua o e tauivi e tausi ia poloaiga. I La Serena, ua ou vaai ai i matua tuuto o e taunuu vave mai ma a latou fanau mo sauniga a le Ekalesia. I Antofagasta, ua ou vaai ai i Au Paia o Aso e Gata Ai o e finau mo mea e sa’o i aso uma. I Vallenar, Copiapó, Caldera, Tocopilla, ma isi aai, ua ou vaai ai i tagata o le ekalesia e o i o latou tulivae e tatalo ona agai lea i luma e tusa lava pe le o faigofie [le olaga].
A ou vaai i tagata faamaoni o le Au Paia o Aso e Gata Ai o e usiusitai ma tumau—e tusa lava po o fea latou te nonofo ai ma po o a foi ni luitau latou te fetaiai—ou te faapea ifo ia te a’u lava ia, “O tagata lelei nei o St. George.”