Aua Ne’i o Tatou Toilalo e Lagonaina
Elder Jorge F. Zeballos
O Le Fitugafulu
O loo i ai se malosiaga sili atu ona malosi i lo mafuie, matagi matamataita, po o afi matautia. Ae e filemu ma itiiti, ma e tatau ona tatou gauai atu i ai pe afai tatou te mananao na te taialaina i tatou.
Ata na tusia e Irena Freitas
I le aso 27 o Fepuari, 2010, i le 3:34 i le vaveao, sa lulu ai ma le matautia se mafuie i le malosi e 8.8 i le fua o le malolosi o mafuie le tele o Chile, sa mafua ai le atuatuvale, fefe, ma le popole o le faitau miliona o tagata.
I ni nai aso mulimuli ane, sa tofia ai a’u ou te pulefaamalumalu i se konafesi faalesiteki i se nofoaga na latalata i le totonugalemu o lenei mafuie tele. Sa ou tomanatu pe faamata e ono aafia le auai mai o tagata i le konafesi ona o le mafuie ma aafiaga faifai pea ina ua mavae le mafuie. Sa faateia a’u ona o le auai i sauniga taitasi o le konafesi sa sili atu i lo isi konafesi sa faia muamua.
Sa manino lava, sa faamanatu atu e le mafuie i tagata o le siteki, i se tulaga le tumau, e uiga i le taua o le faalatalata atu i le Atua, faapaiaina o le Sapati, ma le auai i sauniga. I ni nai vaiaso mulimuli ane sa ou telefoni atu ai i le peresitene o le siteki. Sa ou fesili i ai pe o maualuga lava le auai i sauniga Lotu. Sa ia tali mai e pei lava ona faaitiitia le aofai ma le malolosi o aafiaga o le mavae o le mafuie, ua faapena foi le faaitiitia o le auai i le lotu.
E faapena foi se amioga na sosoo ma mea faanoanoa na tutupu ia na faatamaia ai le Nofoaga Autu o Fefaatauaiga i le Lalolagi i Niu Ioka, ISA, ia Setema o le 2011. E faitau afe tagata na liliu atu i a latou lotu e saili i ai mo le filemu o le mafaufau ma le mafanafana sa latou manaomiaina. Ae a o mou atu le taimi, sa faaitiitia lea sailiga ma toefoi ai lava mea i tulaga masani. E le o mafuie, matagi, po o faalavelave ma faafitauli, pe faalenatura pe faaletagata, e atiaeina le faatuatua, molimau, ma le liuaina tumau.
O Elia ma le Leo Lemu, ma le Itiiti
O aso o le perofeta o Elia, sa avea ai Aapo ma tupu o Isaraelu. Sa faaipoipo atu Aapo ia Iesepela, o se purinisese Fenisia (Phoenician [o se ituaiga o Kanana]). Sa ia faailoa atu i tagata Isaraelu ia auala FaaFenisia, e aofia le tapuai atu i tupua. Ina ua uma ona lu’iina e Elia ma faatoilalo faitaulaga a Paala o e na lauolaola i le maota o le Tupu o Aapo, sa faamatau e Iesepela le soifua o le perofeta ma sa ia sola ese atu ai i le togavao. (Tagai i le 1 Tupu 18:4, 13, 19, 21–40; 19:1–4.)
Ina ua mavae ona fafagaina ai e se agelu i le togavao, sa savali ai Elia mo le 40 ao ma le 40 po i le Mauga o Horepa (tagai i le 1 Tupu 19:5–8). I le togavao, na oo mai ai le afioga a le Alii ia Elia. Sa ta’u atu ia te ia e sau i fafo ma le ana lea sa ia nofo ai i le po. A o ia tu ai i luga o le mauga i luma o le Alii, sa tupu ai “o le matagi tetele foi ma le malosi,” sa matua malosi lava lea na nuti ai papa ma mauga, “[ae sa] lei i ai Ieova i le matagi.” Ona oo mai lea o se mafuie, “[ae sa] lei i ai Ieova i le mafuie.” Ona oo mai lea o se afi, “[ae sa] lei i ai Ieova i le afi” (1 Tupu 19:11–12). E ui i le matautia o le matagi, mafuie, ma le afi, sa le o ni faailoaga na o le siufofoga o le Alii i le perofeta.
I le mavae ai o nei faailoaga malolosi o malosiaga o le natura, sa oo mai ai “se leo filemu ma le itiiti” ia Elia, ma sa ia lagonaina (tagai i le 1 Tupu 19:12–13). O le siufofoga mālū o le Alii na ta’u atu ai ia te ia le tagata e faauu e avea ma tupu e sosoo ai o Suria, le tagata e faauu e avea ma tupu e sosoo ai o Isaraelu, ma e tatau ona ia faauuina Elisaia e avea ma perofeta o le a sosoo ia te ia.
Mauaina o le Siufofoga
O le siufofoga lava e tasi lea na oo mai ia Elia—le siufofoga lea na ta’u atu ia te ia le mea e fai i se taimi faigata i lona olaga ma le auaunaga—o loo avanoa pea mo fanau uma a le Atua o e mananao ma le faamaoni e fai le finagalo o le Tama. Ae i le lotolotoi ai o le tele o le mau leo malomaloā faalelalolagi o loo valaauliaina i tatou e o atu i ala pogisa ma fenumiai, o fea tatou te maua ai le leo filemu ma le itiiti lea o le a ta’u maia ia i tatou mea e fai, mea e ta’u atu, ma tagata e finagalo le Atua tatou te avea ai?
Ua fautuaina i tatou e Nifae ia “taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” (2 Nifae 32:3).
Ma o fea tatou te maua ai afioga a Keriso ina ia mafai ai ona tatou aai ai? E mafai ona tatou saili atu i tusitusiga paia, ae maise lava le Tusi a Mamona, lea sa tusiaina ma faasaoina lona mama a’ia’i mo i tatou, o e ‘ainā ai lenei tupulaga. Tatou te faalogo foi i upu a perofeta o aso nei, o e ta’u maia ia i tatou le finagalo o lo tatou Tama Faavavau ma lo tatou Faaola o Iesu Keriso i aso nei.
O upu a perofeta soifua e taialaina i tatou pe a tatou feagai ma ni luitau fou ma lavelave. I tausaga e lei mamao atu, mo se faataitaiga, a o saili atu e le fenumiai masani o le lalolagi ma ana filosofia ia suia tumau le manatu faavae o le faaipoipoga ma le aiga, sa faamamafa mai ma le mausali, lototele, ma le agaalofa e upu a perofeta le natura paia o le aiga, ma folafola mai ai e faapea “o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o fuafuaga a Le Foafoa, mo le taunuuga e faavavau o Lana fanau.”1
Ua faamamafa mai foi e perofeta ma aposetolo i aso nei le taua o le tausiga o le Sapati i le aiga ma i le lotu ma le ausiaina o le faaolataga o o tatou tuaa e ala i talafaasolopito o aiga ma galuega faalemalumalu. I konafesi aoao uma, latou te tuuina mai le taitaiga faaopoopo faaleagaga mo le Ekalesia.
O Le A Taitai Oe e le Agaga Paia
Ua aoao atili mai Nifae, “Afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia” (2 Nifae 32:5). O lea la, o le faamalosia o le taua o le saili atu i afioga a Keriso, ua faatonuina ai nei e Nifae i tatou e faatatau i le fesootaiga tuusao faaletagata lava ia e tatau ona tatou maua ma le Agaga Paia, le tagata lona tolu o le Aiga Atua.
Sa iloa lelei lava e Nifae le mea sa ia talanoa ai. Pe a ma se 30 pe 40 tausaga na muamua atu, a o i ai pea lona aiga i le toafa ma sa ia fauina se vaa lea o le a avatu ai i latou i le nuu folafolaina, sa aoai ai e Nifae ona uso ona o le solia o agasala, e ui lava ina ua uma ona faalogo atu i le siufofoga o se agelu.
Sa fai atu Nifae ia i latou, “Ua vave ona oulua fai o le amioletonu ae gese ona oulua manatua o le Alii lo oulua Atua. Ua oulua vaai i se agelu, ma sa fetalai mai o ia ia te oulua; ioe, sa oulua faalogo i lona siufofoga mai lea taimi i lea taimi; ma sa fetalai mai foi o ia ia te oulua i se leo filemu itiiti, peitai ua oulua teʼa atu ma le toe lagonaina, na oulua lē mafafai ai ona lagona ana fetalaiga; o le mea lea, na fetalai mai ai o ia ia te oulua e pei o le leo o le faititili, lea na mafua ona luluina ai o le eleele e pei a vaeluaina” (1 Nifae 17:45).
Aua Ne’i o Tatou Tuu le Lagonina
O fesootaiga a le Atua ma Lana fanau e masani lava ona oo mai e ala i le Agaga Paia, o le e tele ina faia fesootaiga ma i tatou i se leo e ulufale mai i o tatou mafaufau ma loto, “le leo itiiti ma le filemu, lea e musumusu mai ma ati i mea uma” (MF&F 85:6). Ia tatou faalogo atu i lena siufofoga mālū ma aua ne’i faatalitali seiloga e fetalai mai se tasi ia i tatou i se leo o faititili! Manatua, sa iloa e Elia o le siufofoga o le Alii sa lei i ai i le matagi, mafuie, po o le afi. Sa fetalai atu le Alii ia te ia e ala i le Agaga Paia, o se siufofoga filemu ma le itiiti.
“O le siufofoga o le Agaga e oo mai o se lagona nai lo o se leo,” sa saunoa ai Peresitene Boyd K. Packer (1924–2015), Peresitene o le Korama a Aposetolo e Toasefululua. “O le a e iloaina, e pei ona ou iloaina, ia ‘faalogo’ atu i lena siufofoga lea e lagonaina nai lo le faalogoina. …
“… O se leo faaleagaga e o’o mai i le mafaufau, e avea o se manatu po o se lagona e tuuina i totonu o lou loto.”2
Tatou te lagonaina upu mai le Agaga Paia, e sili atu i lo upu tatou te faalogoina i o tatou taliga, i o tatou mafaufau ma loto. Ia aua ne’i o tatou toilalo e lagonaina na uunaiga! Tau ina ia tatou tatalaina o tatou mafaufau ma loto e mauaina upu a perofeta. Tau ina ia tatou faatagaina le Agaga Paia e faaauau pea ona aoao i tatou e ala i le leo filemu ma le itiiti. I le aoaoina ai o Ona soo e uiga i le Agaga Paia, lea o le a auina ifo ia i latou pe a mavae ona Ia afio ese atu, sa fetalai atu ai le Faaola ia i latou, “A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma” (Ioane 14:26).
Ua i ai i tagata faatuatua uma o Le Ekalesia a Iesu Keriso o le Au Paia o Aso e Gata Ai, le aia tatau ma le faamanuiaga o le mauaina o le taitaiga patino, musumusuga, ma faaaliga patino mai le lagi e ala mai i le Agaga Paia.
Sa saunoa mai Peresitene Thomas S. Monson (1927–2018) e faapea: “Ia faatosinaina [oe] e lena leo filemu ma le itiiti. Manatua sa i ai se tasi ua i ai le pule, na tuuina ona lima i luga o lou ulu i le taimi o lou faamauga ma fai atu, “Talia le Agaga Paia.” Tatala o outou loto, e oo lava i o outou agaga, i le leo o lena siufofoga faapitoa lea e molimau mai i le upumoni. E pei ona sa folafola mai e le perofeta o Isaia, ‘E faalogo foi o outou taliga i le upu … o faapea mai, O le ala lava lenei, ia outou savavali ai’ [Isaia 30:21].”3