Victor Barbinyagra

Ata

Victor Barbinyagra sitting with mother

Sa vave fanau mai Victor toe tolu masina oo i le aso sa tatau ona fanau ai. I se taunuuga, sa tele ni ona le atoatoa faaletino, ma sa le mafai ai ona savali seia oo ina fitu tausaga le matua. E ui i luitau o loo feagai ma ia, ae ua filifili Victor ina ia avea ma se tagata fiafia. Ua ia mauaina le olioli i le aapa atu ma faaali atu le alofa i isi.

Leslie Nilsson, tagata pueata

Sa ou vave fanau mai toe tolu masina ma sa fai mai Fomai masalo o le a le mafai ona ou faia se mea, ae sa taumafai pea si o’u tina e saili ni punavai eseese e fesoasoani ai ia te a’u. Mo le tele o tausaga, sa ou maua ai ni togafitiga eseese, ae sa le mafai pea ona ou savali.

Mulimuli ane, sa maua e lo’u tina se togafitiga sa ono mafai ona fesoasoani ia te a’u e amata savali ai. Sa tonu ia te ia a o lei faia lena mea ia talosaga atu i faifeautalai e fai so’u faamanuiaga. Ina ua uma ona maua lo’u faamanuiaga, sa ma o loa i le fomai. O togafitiga o ni faamalositino eseese faaletino. I le mavae ai o na faamalositino, sa iu lava ina amata ona ou savali.

O nisi taimi e oso ai lo’u le fiafia i o’u le atoatoa faaletino, ae ou te taumafai lava ia aua nei faaalia. E masani lava o a’u o se tagata fiafia, ma ou te le faaalia ni o’u le fiafia i isi.

Peitai, a o ou talavou, sa i ai se taimi sa ou faanoanoa ai lava.

Sa ou le fia alu i le lotu. Sa ou ole atu i le Atua, “Aisea ua ou faapenei ai? Aisea e le mafai ai ona e faaleleia a’u? Aisea e leai ai ni a’u sootaga lelei ma isi?” Sa faalotovaivaia e nei fesili a’u ma sa ou lagona ai le faanoanoa tele, ma sa ou le iloa ai pe mafai faapefea ona suia lo’u tulaga, o lea na ou mafaufau ai atonu o le faamutaina o lo’u ola o le tali lea.

Ona ou mafaufau lea i lo’u tina ma le auala e ono faateia ai. Sa ou mafaufau e masalo o le a ia lagonaina le faanoanoa tele ma lagona sa ia faia se mea sese pe sa lei lava foi ni mea na ia faia e fesoasoani ai ia te a’u. O le taimi lena na ou filifili ai loa o le a ou ola pea ma faaauau pea.

I le faaiuga, ou te lagona o a’u se tagata fiafia tele.

E i ai ni o’u faafitauli, e pei lava o isi tagata uma. E le tetelē pe laiti tele, ma e ui atonu e le mafai ona tatou foiaina na mea i le 100 pasene, ae ou te iloa e mafai ona tatou taulimaina faatasi o tatou faafitauli ma mafai ona tatou agai i luma ma le mautinoa.

Ou te iloa o loo i ai se fuafuaga a le Atua mo tagata uma i lenei olaga e tusa lava pe o ai i latou.

E masani ona ta’u mai e lo’u tina ia te a’u o le tagata aupito sili ona aulelei e mafai ona avea ma tagata sili ona le fiafia, ma o se tagata auleaga foi e mafai ona fiafia moni lava.

Ona o le Ekalesia, ou te iloa e mafai ona e fiafia e tusa lava po o le a, ona o le fuafuaga a le Atua o se fuafuaga o le fiafia. Ou te talitonu o le fiafia o se mea e i ai i totonu o i tatou, e le o fafo.

O le fiafia e sau mai le mauaina o le faatuatua, faalagolago i le Atua, ma ola i le talalelei. Ua fesoasoani lenei mea ia i tatou ia maua le uiga sa’o ma faaaoga mea ua tatou maua e faaleleia atili ai i tatou lava.

Mo tagata uma, o loo i ai lava i taimi uma se mea lelei atu i le lumanai, ma afai e i ai se mea le lelei, e mafai ona e taulimaina.

O loo ou taumafai e alofa i tagata ona o le mea aupito sili ona taua i le olaga o la tatou fesootaiga ma tagata. Ou te taumafai e alofa i lo’u aiga ona o le aiga o lo tatou lumanai, o a tatou mea uma ia. Ma ou te faafetai i le Atua mo mea uma ua ou maua.

I soo se tasi o loo tauivi, ou te faapea atu: Taumafai e talia oe lava e pei ona i ai oe i le taimi nei, e oo lava i ou tulaga le lelei uma, ma talitonu e mafai ona e lelei atu.