O Lo Tatou Faasinomaga Autu
Faatasi ai ma la’u auaunaga o se Fitugafulu o le Pulega Aoao o le a vave ona faaiuina, sa ou manatunatu ma tatalo ia iloa le savali e finagalo le Alii ou te faasoaina atu ia te outou, o’u uso e ma tuafafine pele o le Pasefika. O le tali na oo mai i se vaega o se taunuuga o lo’u aafiaga i le aluga o lo’u sefululua tausaga o le auaunaga—lima i le Eria i Aferika i Sisifo, lima i le Laumua o le Ekalesia i le Aai o Sate Leki, lea ua faaiuina i le lua iinei i le Pasefika.
Ua faamanuiaina le Eria o le Pasefika i le eseese o tupuaga o tagatanuu ma aganuu. Ua faamaonia lenei mea i e tupuga mai Maikolenisia, Melenisia, ma le Polenisia, faapea ai foi ma faatosinaga sili ona lata mai a Europa ma Asia. E ui i le tele o le tuufaatasiga o tagata ma aganuu, e masani lava ona tumaoti pea tu ma agaifanua lea e faaalia ai e tagata o le Pasefika le faasinomaga. Peitai, e ese mai nei faasinomaga faaletagata, ua fia silafia e le Alii pe o faapefea ona tatou faailogaina i tatou lava faaleagaga i totonu o tatou loto ma agaga, faapea foi ma fafo atu i a tatou uo ma paaga. O lo tatou faasinomaga autu lenei, ma o le faasinomaga autu lenei ou te fia talanoa atu ai.
Ua talanoa mai le “O Le Aiga—O Se Folafolaga i le Lalolagi” i le faasinomaga i le faapea mai:
O TAGATA UMA—tane ma le fafine—ua foafoaina i le faatusa o le Atua. O tagata taitoatasi o se atalii po o se afafine agaga faapelepele o ni matua faalelagi… . O le tulaga tane po o le fafine o le tagata o se vaega taua lea o le mua’i olaga faitino ma le faasinomaga e faavavau ma le faamoemoega.
O le faasinomaga muamua lea ma le taua mo fanau a le Tama o loo o mai i le lalolagi: o atalii ma afafine agaga a ni matua faalelagi. Ae e tele atu isi mea.
Na pulefaamalumalu le Tupu o Peniamina i tagata o Saraemila, o se tuufaatasiga lea o tagata sa Moleka ma sa Nifae.1 E ui na faasoaina se tupuaga talitutusa lea na aveesea mai ai i latou i le na o ni nai selau tausaga, i se tamai taimi lava sa latou atiinae ai ni faasinomaga maoti. E oo lava ia latou gagana na eseese, seia oo ina aoaoina tagata sa Moleka i le gagana a Mosaea.2 Ina ua uma ona aoao atu i tagata le talalelei a Iesu Keriso, na iloa e le Tupu o Peniamina le manaomia e tagata o le mauaina o se faasinomaga e faavae i luga o le talalelei lea o le a tumau ai pea i o latou loto ma ia faailoa atu i fafo, i le faamuamuaina nai lo soo se isi lava faasinomaga faalelalolagi.
Ma o lenei, ona o le feagaiga lea ua outou faia, o le a ta’ua ai outou o le fanau a Keriso, o ona atalii, ma ona afafine … ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine. … Ua leai se isi lava suafa ua tuuina mai e mafai ona oo mai ai le olataga; o lea, ou te manao ai ia outou ave i o outou luga le suafa o Keriso … .3
Mo i tatou i le Ekalesia, o leisi lea a tatou faasinomaga sili ona taua: Fanau a Keriso, i le fanauina ai ia te Ia. Pe a manumalo lenei faasinomaga, o le a faamanuiaina tagata ma faamoemoega a le Alii. Afai o le a faatumulia e faasinomaga o faalapotopotoga po o aganuu lenei faasinomaga o ni fanau a Keriso, o le a faigofie lava ona tulai mai fefinauaiga ma o le a lafoai e tagata o le Atua faamanuiaga a le Agaga.
Sa faamaumauina e Mamona le tulaga faanoanoa nei na tulai mai a o lumanai ai le faaali mai o Keriso ina ua mavae Lona toetu lea ua le mafai ai e tagata ona faailoa atu i latou lava o ni atalii ma afafine agaga a le Atua ma o ni fanau a Keriso.
Ma sa fevaevaeai le nuu, o le tasi e faasaga i le isi; ma sa latou o eseese, o le tasi mai le isi, i ni ituaiga, ua taitasi le tagata ma alu e tusa ma lona aiga ma lona auaiga ma uo … ua latou tuu atu i latou lava i le mana o Satani … Ma sa latou faatupuina se finauga tele i le laueleele… .4
I totonu o le Ekalesia ma le malo o le Atua, afai e manumalo faasinomaga faaleaganuu po o le aiga foi i luga o o tatou tulaga faaleusoga faaleagaga ma i luga o lo tatou avea ai ma fanau a Keriso, e faanoanoa le Agaga. I totonu o tatou siteki, misiona, itu, uarota, ma paranesi, nai lo le muamua avea ma tagata Ausetalia, Niu Sila, Papua Niu Kini, Niu Kaletonia, Ni Vanuatu, Solomona, Maresala, Kiripati, Fiti, Toga, Samoa, Farani Polenisia, po o soo se isi lava faasinomaga faaleaganuu, e tatau ona avea muamua i tatou ma atalii ma afafine o ni matua faalelagi, uso ma tuafafine, ma fanau o Keriso, na fanau mai ia te ia.
Ou te alofa ia te outou, o’u uso e ma tuafafine pele, ma molimau atu o loo soifua Iesu Keriso ma o lo tatou Faaola. Tau ina ia tatou usitai i Lana fautuaga, “… ia tasi outou; ma afai tou te le tasi e le a a’u outou,”5 ma ina ia mafai ona ia fetalai mai e uiga ia i tatou “Ma sa ta’ua e le Alii lona nuu o Siona, ona sa tasi o latou loto ma tasi le mafaufau … .”6