Lagona le Motusia o Fesootaiga? Taumafai e Faalemu

O le mea e lelei ai mo i tatou, o le faatalitali ua tutusa moni lava ma se mea e fefe i ai: o se mea tatou te fefefe i ai, ae le o se mea tatou te oo i ai i aso uma. Ua tatou ola i se vaitaimi o le le fia manao e faatali. Ua matua faatelevaveina lava e tekinolosi mea uma lea e faapuupuu ai le tatou gauai atu i se mea nai lo se i’a auro (ioe, e moni).¹ A oo ina tulai mai se manaoga e faatali, tatou te taumafai lava e faatumu o tatou taimi—e masani lava o le liliu atu i se masini feaveai.

E leai se mea e masani ona sese i tekinolosi po o le mataalia, ae o se olaga saoasaoa atoa ai ma mea faalavefau faifai pea e mafai ona taofia i tatou mai se mea e sili atu ona taua.

E lei leva atu, sa ou lagona ai le see ese atu faaleagaga. Sa le mafai ona ou malamalama i ai. Sa ou alu i le lotu, fai ni tatalo pupuu, ma sioa i a’u tusitusiga paia. Sa ou lagonaina mai lea taimi i lea taimi ni uunaiga faaleagaga, ae o le aotelega lava, sa ou lagonaina sina motusia o fesootaiga.

E pei ona ou ta’u atu i le Tama Faalelagi o se tatalo naunautai lenei, o nei upu sa oo mai i le mafaufau: “Ia [filemu], ma ia outou iloa o a’u lava o le Atua” (Salamo 46:10).

Sa peisea’i o le upu filemu sa faamamafaina, vase lalo, ma i se ituaiga faamatamatatetele.

Atonu sa ou faia uma ni mea sa’o, ae sa ou faia na mea i se saoasaoa tele ma se taulaiga papa’u. Sa amata ona ou ola i le talalelei i se auala faalavefau.

Sa leai se gaoioiga faalelotu na mafai ona aumaia ia te a’u se fesootaiga loloto faaleagaga [ma le Atua] pe afai sa puupuu ma faalavefauina lo’u auai. Sa sili atu nai lo se mau mata’ina. Ina ia iloa le Atua ma ia fesootai ma le malamalama paia ma le loloto sa ou faananau tele i ai, sa ou manaomia ai le faalemu ma ia filemu.

O le faatinoga o lena uunaiga sa le i faigofie. Ae na faia ai se eseesega atoa.

Ua aoao mai Nifae, o i latou e “saili ma le filiga o le a maua e ia; ma o le a faaali ia te i latou mealilo a le Atua, e ala i le mana o le Agaga Paia” (1 Nifae 10:19; faaopoopo le faamamafa).

Se’i o tatou vailiiliina lenei fuaiupu: O le iloaina o mealilo a le Atua e manaomia ai le saili ma le filiga. O se faiga masani faifai pea ma le faamoemoe i ai, ae le o se sailiga e faatasi ona fai i le google. O le isi, o mealilo e le o ni mea e oso a’e faafuasei i luga; e faasolosolo lava ona faaalimai i latou. O lenei faagasologa e alu ai le taimi. Ma o lena taimi e taua tele! O le taimi tatou te faaaluina e mafaufau loloto ma saili atu ai, na te aumaia ia i tatou le taimi e fesootai atu ai i le Agaga, le e ana le mana lea e oo mai ai tali.

Na tautino mai e Peresitene Tavita O. MaKei (1873–1970) e faapea o le manatunatu loloto—“o mafaufauga loloto faifai pea i nisi o autu faalelotu”—o se “tasi lea o … faitotoa aupito sili ona paia lea tatou te oo atu ai i le afioaga o le Alii.”² E ala i le faalemu, e mafai ai ona tatou tatalaina se faitotoa i faaaliga. E mafai ona tatou vaai i talaatu o tulaga faatonuina le sa’o a le lalolagi ua salalau solo ma fesootai atu i tulaga faatonuina faalelagi. Tatou te manaomiaina lena faitotoa. E manaomia ona tatou faalemu.

Mo a’u, o le faalemu o lona uiga o le tootuli ma tautala atu ma le leotele a o ou tatalo. O a’u taga faaaloalo ma a’u lava ia upu na faaleoina sa fesoasoani ia te a’u e taulai lelei atili atu. O le faalemu o lona uiga o le suesueina o tusitusiga paia mai kopi lolomi ma le tusilimaina o faamatalaga i pepa. E faaalu atili ai nisi taumafaiga ma taimi, ma o lena taumafaiga ma taimi faateleina o se auala lelei lea e “ala mai ma fafagu [ai] o outou mafaufau,” o lea e faatagaina ai le Agaga ma le manao mo le upumoni e “galue i totonu ia te oe” ma lena fatu o le molimau ia “mauaa, ma tupu ae, ma fua mai” (Alema 32:27, 37).

E mafai ona tatou mauaina toetoe lava o soo se faamatalaga i le taina o ni mea i masini komepiuta, ae o le malamalama faaleagaga ma le liuaina e manaomia ai le taimi ma taumafaiga filiga. E le taua le auala e te faalemu ai ma tuuto atu taumafaiga i le talalelei, ae e taua lou faia! Afai na o le tuu mai lava o faamatalaga ia i tatou [e aunoa ma a tatou lava taumafaiga], ua tatou aveesea le tele o lo tatou auai i lo tatou lava aoaoina. Tatou te aveesea avanoa e fesootai atu ai i le Agaga.

E mafai lava ona tatou taliaina ma faaaoga ma le mautinoa tekinolosi ma mea faaonapo nei ia e faafaigofieina ai galuega i aso taitasi ma mafai ai ona tatou faaaogaina ma le mataalia atili o tatou taimi. Ae e le aoga lo tatou ola i se olaga faalavefauina atoa ma manatu papa’u ia e tele ina tatou oo i ai ona o le [faaaogaina o tekinolosi]. Nai lo le fefe i le manaomia ona faatalitali, e mafai lava ona tatou taliaina e avea ma se avanoa e faalemu ai, manatunatu loloto ai, ma faalolotoina ai i lo tatou sootaga ma le Agaga.