O Le Taua Pa’ia o Malumalu

O loo i ai le “faaeega paia” i le Malumalu, o se … sauniga lea e faatatau i le malaga faavavau a le tagata, atoa ma avanoa ma le alualu i luma e le gata mai, lea na saunia e le Tama amiotonu ma le alofa mo lana fanau o e na ia faia i lona lava faatusa—mo le fanauga atoa a tagata. Ma o le pogai tonu lea na fausia ai Malumalu.⁵

E fesoasoani le Atua ia i tatou ina ia talisapaiaina le talalelei toefuataiina a Iesu Keriso, lea e matuai atoatoa lelei. O loo aofia ai i totonu le manatu e uiga i le olaga, ma o totonu o o tatou malumalu o le a tuuina mai ai le faaeega paia, o le usiusitai lea o le a aveina atu ai le tagata (ma o la’u molimau lenei, aua ua ou iloaina) mai le tulaga faatufanua o le manatu faapito, mataua, faatautee, ma uiga inoino, i le tulaga sili ona maualuga ma le malo o le Atua.⁶

O se tasi o fesili autu e fesiligia e le au fai nusipepa, o tagata faasalalau ma le toatele o tagata, “O le a le eseesega i le va o le tou Malumalu ma isi o outou falelotu?” E pei ona silafia e tagata uma o le Ekalesia, o le tali e faapea, o Malumalu ua fausia mo le faataunuuina o sauniga paia—e le faalilolilo, ae ua paia. O se Malumalu e le o se fale faitele mo tapuaiga. Ua fausia mo faamoemoega faapitoa. O le mea moni lava, a maea ona faapaiaina se Malumalu e na o tagata lava o le Ekalesia o loo agavaa atoatoa e mafai ona ulufale atu i ai.

O se tasi o vaaiga e tulagaese ai le Ekalesia toefuataiina a Iesu Keriso o le natura lea e faavavau i ona sauniga. Mo se faataitaiga, o le tulaga lautele lava i sauniga faalemalo po o le ekalesia, e faaipoipoina ia ulugalii mo na o le “olaga nei, ” po o le “tetea pe a oo mai le oti.” Ae o le alofa e faavavau e pei o le agaga o le tagata; ma afai la e faaauau pea le tagata pe a mavae le oti, lea o le a ia oo i ai, o le a faapena foi la i le alofa.

O le mea lenei e naunau mai ai e toetoe lava o tagata sailiili atamamai uma, aemaise lava pe afai na te iloaina le upumoni, e faapea o le alofa—le uiga paia o le agaga o le tagata—o le a faavavau e pei o le agaga lava ia. E soo se taimi lava la e oti ai soo se tasi, o le a tumau pea le alofa, ma afai e talitonu soo se tagata sailiili i le ola pea o le agaga, po o le faaauauina pea o uiga faaletagata pe a mavae le oti, e tatau foi ona ia taliaina o le a faaauau ai foi le alofa. …

… O le apoapoaiga a le Faaola [ia] alolofa atu i o tatou tuaoi e pei o i tatou ia i tatou lava. Ae afai o mea faalelalolagi e tulagaese ai mea faalelagi, o le a tatou mafai i le lalolagi o agaga ona tatou iloaina e pele ia i tatou iina ma iloa i latou e pei ona tatou alolofa ia i latou iinei. Ou te alofa i la’u ava e sili atu nai lo lo’u alofa i isi tagata. Ou te alofa i la’u fanau. E mafai ona ou maua le malamalama; e mafai ona ou maua se manao ina ia fesoasoani i tagata uma, ae ou te alofa ia te ia o le sa ou nofo ai i ona autafa ma vaai se ma tamaitiiti pele a o ma’i, po o le maliu foi. O na aafiaga e fusia ai le loto i le loto, ma o se mafaufauga mamalu le faatauaina lea e le mafai e le oti ona tuueseeseina ia loto ua fusia faatasi; aua o le a iloaina e outou o tane lau ava i le isi lalolagi, ma o le a e alofa ia te ia iina e pei ona e alofa ia te ia iinei, ma o le a oulua oo mai i se ola faavavau fou i le toetutu. Aisea e tatau ai i le oti ona tuueseeseina oulua pe afai o le a faaauau pea le alofa pe a mavae le oti?

E le tatau, ma o le mea moni lava e le tatau, aua ina o i ai o Iesu i le lalolagi na ia tauina atu i ana Aposetolo: “Ou te avatu foi ia te oe ki o le malo o le lagi; o se mea foi e te fusifusia i le lalolagi, e fusifusia foi lea i le lagi: o se mea foi e te tala i le lalolagi, e tatalaina foi lea i le lagi.” (Mataio 16:19.) Faatasi ai ma le toefuataiina mai i le lalolagi o le Perisitua Paia, ua faamautuina ai e le Ekalesia faapea o lenei mana ua toe tuuina mai i tagata filifilia, ma o totonu o le maota o le Alii lea e faataunuuina ai le sauniga o le faaipoipoga e i latou o e ua faatagaina e avea ma sui o lo tatou Alii ma le Faaola o Iesu Keriso, o le tuufaatasiga i le va o le tane ma le ava, ma le va o matua ma fanau, ua faatinoina mo le olaga nei ma le faavavau atoa, ma o i latou ua faaipoipoina faapena o le a faaauauina ai pea le aiga e oo atu i le faavavau.⁷

O Iosefa [Samita] le tagata vaai … na faaalia le faavavau o le feagaiga o le faaipoipoga, o se mataupu autu manaia tele, e aoga, e loloto lona taua ma afai e taliaina atoatoa, o le tele o mea leaga o loo i le lalolagi o le a mafai ona aveeseina.⁸

O se tamaitiiti aoga mai Saina, na toe foi atu i lona atunuu, ua uma ona faauu mai se tasi o a tatou kolisi lauiloa, sa talatalanoa ma se faifeau Kerisiano, sa agai atu foi i Saina. Ina ua tausisi atu pea le faifeau lenei faapea o le upumoni e na o le taliaina lava o aoaoga a Keriso e mafai ai ona faasaoina soo se tagata, sa faapea atu loa le [tamaitiiti aoga]: “Ae faapefea la o’u tuaa o e latou te lei maua le avanoa e faalogo ai i le suafa o Iesu?” Sa tali le faifeau: “Ua leiloloa i latou.” Sa faapea atu le tamaitiiti aoga: “E leai ma sa’u mea e faia i se talitonuga faalelotu e le tonu i le faasalaina i se faasalaga e faavavau o alii ma tamaitai o e taua e pei o i tatou, ae latou te lei maua le avanoa e faalogo ai i le suafa o Iesu.”

O se tasi e malamalama i le upumoni lenei, e pei ona faaalia atu i le Perofeta o Iosefa e tusa ai ma lenei mataupu autu, o le a tali atu faapea: “O le a latou maua se avanoa e faalogo ai i le talalelei, ma usitai ai i mataupu faavae uma ma sauniga e fai ai nisi tagata ma sui. O tagata uma lava i le olaga lenei faapea ma le olaga a sau o le a faamasinoina ma tauia e tusa ma ana galuega.”⁹

Talu ai ona o le salamo ma le papatisoga i le vai e faapea foi i le Agaga e taua i le faaolataga, e faapefea la i le fia miliona o e e lei faalogo lava i le Talalelei, o e latou te lei maua lava se avanoa e salamo ai pe papatisoina, ona ulu atu i le malo o le Atua? E mautinoa lava o se Atua alofa e le mafai ona faamalieina pe afai o le toatele o Ana fanau o loo i fafo atu o Lona malo, o loo nonofo ai e faavavau i le le malamalama, faanoanoa po o seoli. O se manatu faapea e tetee tele i mafaufau atamamai. I le isi itu, afai o lenei fia miliona e maliliu e aunoa ma le faalogo i le Talalelei e mafai ona ulu atu i le malo o le Atua e aunoa ma le usiusitai i mataupu faavae ma sauniga o le Talalelei, o afioga la a Keriso ia Nikotemo [tagai Ioane 3:2–5] e le o se fetalaiga o se upumoni e faavavau ma lautele, ma o upu foi a Peteru i le Aso o le Penetekoso [tagai Galuega 2:38] e leai sona aoga lautele, e ui lava sa ia saunoa manino mai faapea, “Aua ua ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua.” [Tagai Galuega 2:39.]

O loo aoao atu e le Talalelei a Iesu Keriso e faapea e mafai ona faasaoina tagata uma e ala i le usiusitai i tulafono ma sauniga o i ai. [Tagai Mataupu Faavae o le Faatuatua 1:3.] E le o taua mai foi i le upu “uma” i lona uiga e faatapulaaina na o se vaega ua filiflia; o lona uiga o fanau uma a se Tama paia alofa. Ae peitai, e faitau selau miliona i latou o e na maliliu e aunoa ma le faalogo i se mea faapea o se fuafuaga o le Talalelei.

O atunuu uma ma ituaiga uma e faalagolago i le alofa tunoa o le Atua. Talu ai ona e na o le tasi lava le ata o le faaolataga, e mautinoa lava le tatau ona i ai o sina aiaiga lea e mafai ai e le “anoanoai ua maliliu” ona faalogo i ai ma maua le avanoa e talia pe teenaina ai. O sea fuafuaga o loo tuuina mai i le mataupu faavae o le faaolataga mo e ua maliliu. …

Na taua e Paulo [le] faiga o le papatisoga [mo e ua maliliu] i lana finau mai e faalagolago i le toetu. Na ia saunoa mai, “A faapea, pe faapefea e ua papatisoina ma sui o e ua oti, pe afai e le toetutu e ua oti?” (1 Korinito 15:29). … E le toatele ni tagata maitau na latou taumafai e faamatala le uiga moni [o lenei fuaiupu]; ae o loo faamaonia mai i lona uiga e faapea sa faia lava ia papatisoga mo e ua maliliu i taimi o aposetolo; o lona uiga, o tagata soifua sa faatofuina i le vai mo i latou o e ua maliliu—e le o i latou o e ua “oti i la le agasala” ae o e ua “pasi atu i le isi itu.“

I totonu o le Malumalu o Katelani, Aperila 3, 1836, na faaali atu ai le Perofeta o Elia ia Iosefa Samita ma Oliva Kaotui ma tuuina atu ia te i laua ia “mana o le perisitua” lea na faatagaina ai le faia o galuega mo e ua maliliu. O nei “ki” na toefuataiina mai i le faataunuuina o le valoaga a Malaki:

“Faauta, ou te auina atu ia te outou o Elia le perofeta, a o lei oo mai le aso o Ieova e sili ma le matautia: na te faaliliuina loto o matua i fanau, ma loto o fanau i o latou matua; ne’i ou alu atu, ma ou taia le nuu i le faafanoga” (Malaki 4:5–6). O loto o matua ma loto o fanau o le a liliu atu le tasi i le tasi pe a faalogo matua i le lalolagi o agaga, i le Talalelei o talai atu ma iloaina ai e tatau ona latou usiusitai i sauniga o i ai, ma iloaina o loo faataunuuina e a latou fanau i le lalolagi nei sauniga mo i latou.

O galuega uma faapea “mo e ua maliliu” o loo faatinoina i totonu o malumalu, ua faapaiaina ma faamanuiaina mo faamoemoega faapea, lea o loo tausia ai faamaumauga sao, ma o mea uma e i ai e paia ia.

Faatasi ai ma le tiutetauave ua tuu mai i o tatou luga ina ia tauaveina lenei vaega taua o le galuega o le Talalelei, ua avea ai le Au Paia o Aso e Gata Ai ma ni tagata fau malumalu.¹⁰

E mafai ona e maua le avanoa e ao mai ai igoa o ou augatuaa, o e e papatisoina e ala i le fai ai o nisi ma sui, ma mafai ai ona avea ma tagata o le malo o le Atua i le isi lalolagi e pei ona avea ai i tatou ma ni tagata o lea malo iinei.

Talu mai le toefuataiga o lenei mataupu faavae ma le faatinoina, ua matuai filiga ai tagata o le Ekalesia i le sueina o faamaumauga o le lalolagi mo le talafaasolopito o o latou augatuaa ina ia mafai e o latou augatama ona mauaina faamanuiaga o le talalelei a Keriso. I le fesootai ai ma lenei galuega ua faapea ona faatumauina ai e le Ekalesia se faalapotopotoga tele o mea tau gafa.¹¹

I totonu o lenei mataupu faavae o le faaolaina o e ua maliliu, o loo faaalia ai le loloto tele o le mana faaola o le Talalelei, ma le talafeagai lelei o aoaoga a le Faaola i tagata uma. E moni lava, “E leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.” [Galuega 4:12.] O sauniga uma e faataunuuina e ala i le Perisitua a le Silisili Ese e faavavau e pei o le alofa, e loloto ma tumau e pei o le ola, ma o le usiusitai i ai, e mafai ai e tagata uma, o e ola ma e ua oti, ona ulu atu ma mau faatasi ai e faavavau i le malo o le Atua.¹²

O i latou o e o atu i totonu o le malumalu o le a o atu ma pepa faataga e faailoa ai o i latou o ni Kerisiano moni; o i latou moni o ni tagata o le Ekalesia a Keriso; ma ua latou faamaoni i o latou uso a tagata; ma o loo latou ola e tusa ai ma aoaoga o le talalelei a Iesu Keriso.¹³

A o lei faataunuuina se faaipoipoga [faalemalumalu], e taua tele mo le alii talavou ma le tamaitai talavou ona maua muamua mai se pepa faataga mai le epikopo. … O iina, i luma o le perisitua, a o laua tauaveina i o laua luga ia matafaioi o le faaipoipoga, e maua ai e le autalavou ia faatonuga e uiga i le paia o le tiute o loo i o la luma; ae le gata i lea, la te fuafua ai pe ua la saunia pe leai la te o atu ma le paia ma le mama i le fata faitaulaga a le Atua ma faamauina ai a la tautoga ma le alofa.¹⁴

O le faaipoipoga i totonu o le malumalu o se tasi lea o mea sili ona matagofie i le lalolagi uma. E taitaiina atu ai se ulugalii iina e le alofa, o le uiga sili ona paia lea o le agaga o le tagata. … La te tutu faatasi ai iina i le maota o le Alii e molimau atu ma osi feagaiga i ona luma e faapea o le a la faamaoni i feagaiga na la osia i lena aso, ia pipii atu le loto o le tasi i le isi ae le o se isi tagata. O le faamoemoega sili lena o le faaipoipoga ua tuuina atu i le tagata. Afai e tausia na feagaiga ia paia e pei ona tatau ai ona tausia ia feagaiga paia, o le a le tele ni loto nutimomoia o ava ma o le a tau leai foi ni loto nutimomoia i loto o tane. O se feagaiga o se mea e paia. … Ia tausia ma le faamaoni, ia faamaoni i ai.¹⁵

O i latou o e osia feagaiga mo e pele ia i latou ma auai i le faatulagaga silisili o le faaipoipoga ua tuuina atu i le tagata o le a savavali i la le agaga ae le manao i mea e i la le tino. O le a e faamaoni i feagaiga na e osia i totonu o le Maota o le Atua.¹⁶

“E le faavavau ona finau o lo’u agaga ma tagata” (Kenese 6:3), o le fetalaiga lea a le Alii. “E le afio foi lo’u agaga i totonu o ni malumalu eleelea.” O le e taumafai ia ola i ni olaga se lua, o le na ola i ni olaga se lua i le solia lea o ana feagaiga, na tusia e se tasi o tusitala e faapea, “a le o se taufaa’ole’ole po o se tagata faavalevalea.” E masani lava e aafia ai o ia i vaega uma, aua ua ia faaaoga lona saolotoga e filifili ai e faamalie ai ona manaoga, e faamaimau ana mea i le ola faasausili, ina ia solia ai feagaiga na ia osia i totonu o le maota o le Atua.¹⁷

Na faatutuina o tatou malumalu mo le faaolataga ma le faaeaga o le aiga o tagata o le sao lea i le faataunuuina o le fuafuaga e faavavau o le faaolataga. O tulafono lava ia e tasi o le alualu i luma e faavavau e faatatau i fanau uma lava a lo tatou Tama o e o loo ola i se olaga faaletino po o le faaleagaga. O sea tulaga moomia aoao e atagia ai le faamasinoga tonu paia. …

O le Ekalesia toefuataia a Iesu Keriso o le fuafuaga lea na tuuina mai e lo tatou Tama Faalelagi lea e mafai ai e tagata uma ona mafaufau mo ia lava ina ia galulue faatasi ma le Atua mo le fiafia ma le faaolataga o lona lava agaga. O le mafuaaga ma le faamasinoga tonu o le a matuai moomia ai le faaaogaina uma o mataupu faavae e faavavau ma sauniga e tagata ola i la le tino, ma i latou o loo i le lalolagi o agaga.

Ona faatoa mafai lea ona maea le galuega ma le mamalu o le Atua e ala lea i le tino ola pea ma le ola e faavavau o le tagata.

O le fuafuaga e faavavau o le faaolataga na tuu sao mai i se faaaliga e le Tama ma lona Alo i le Perofeta o Iosefa Samita, ma o le pule paia ina ia faataunuuina ai ia mataupu faavae ma sauniga o loo i luga lea o alii o e o loo taitaia nei le Ekalesia na faaalia mai.¹⁸

O se tasi o tiutetauave silisili o le tuuina atu lea i tagata faamaoni o le Ekalesia i atunuu e mamao ia maota talafeagai o le Alii. E faitau fia sefulu o afe i latou e le o mafai ona o mai i mea o loo i ai ia malumalu, ma mea e mafai ona latou maua ai faamanuiaga o le faaeega paia, ina ia faamauina i o latou taitoalua ma a latou fanau mo le olaga nei ma le faavavau atoa. O lo tatou tiute le avatu o malumalu ia i latou.¹⁹

E maeu le mamalu o le talalelei! E maeu lo tatou tiutetauave ina ia faailoa atu i le lalolagi lona susulu ma lona matagofie, o lona loloto, ma lona paia! Ou te tatalo ma lo’u agaga atoa ina ia atagia atu i o tatou malumalu se isi naunau ma se manao ina ia iloa le finagalo o le Atua i le fiaafe ma le fiasefulu o afe o tagata lelei o e o loo mananao e fia iloa le upumoni. Ia fesoasoani mai le Atua ia i tatou ma ia faateleina lo tatou mafaia ona faasalalauina atu le upumoni ma fesoasoani i tagata ina ia iloaina.²⁰