Mataupu 20

O Le Faiaoga, o Se Galuega Tamalii

Ia fesoasoani le Atua i o tatou faiaoga ia lagona le tiutetauave e o’o mai ia i latou, ma ia manatua o le tiutetauave e le na o mea latou te fai atu ai e fuaina ai, a o mea foi latou te faia. … E maeu lava le mamana o le tiutetauave o se faiaoga!¹

Folasaga

Sa avea Peresitene Tavita O. MaKei ma se faiaoga i le tele o lona soifuaga. Sa ia faataunuu lona tiute i ni tofiga faapena i le avea ma se faifeautalai, faiaoga, taitai, Aposetolo, Peresitene o le Ekalesia, ma se tama.

I se savali sa faasino faapitoa i e umia le perisitua, sa ia faamatala ai se aafiaga lena e faatatau ia i latou uma sa maua le avanoa e faiaoga ai:

“I se tasi aso na ou maua ai se avanoa ou te alu atu ai i le taavale i totonu o laufanua i lo matou lava taulaga tuai. Sa ou pasi atu i totonu o ni faatoaga e lua e lata i le kanala o atumauga. Sa ou vaai i se tasi o faatoaga na fua tele mai ona sanavao lelei faapitoa. E ui lava i se lamala, o le malulu i le tautotogo ae, ma isi tulaga faigata, ae sa [maua] e lea faifaatoaga ni fua sili ona lelei na fuaina mai. I le isi itu o le pa sa i ai se tasi faatoaga sanavao, ae sa le manuia, pe a talanoa faatusatusa atu i ai. Na ou fai atu i lea alii: ‘Aisea, o le a le mea ua tupu? Atonu sa e totoina ni fatu e le lelei.’

“ ‘Leai, o fatu lava e tasi e pei o fatu a lo’u tuaoi.’

“ ‘Ia, ai sa tuai ona totoina, ma e lei lava le susu o le eleele e ola ae ai i luga.’

“ ‘Sa luluina i le aoauli lava e tasi sa toto ai lana faatoaga.’

“I ni fesili faaopoopo na faia, na ou iloa ai sa suotosina e le tamaloa muamua lona fanua i le tautoulu; ona ia sua feliua’i lea ma le faaeteete i le tautotogo, ufiufi le eleele i lau o laau, ma o lona galue ai faapena i le eleele na faasaoina ai le susu o le eleele i le taumalulu. O lona tuaoi la, i le isi itu, na tuai ona ia suotosina lona fanua i le tautotogo, ma tuua ai laina ma ‘autu e lei sua feliua’ia; na miti’ia ai le susu o le eleele ma liuausa. I le taumulia’iga o le luluina o fatu na oo mai ai vaiaso e fa po o le ono o le [lamala], ma sa le lava le susu o le eleele e ola ai fatu. O le tamaloa muamua sa faia ni ana sauniuniga, o se ituaiga sauniuniga tatau, ma sa oo ai ina fua tele mai fua faalenatura. O le tamaloa lona lua sa galue malosi, peitai sa faalelelei ana sauniuniga; o le mea moni, sa ia faia se sauniuniga ae le lava.”

Sa faaaoga e Peresitene MaKei lenei tala e faamanino mai ai faatosinaga a faiaoga. Sa ia saunoa mai: “I le faatoaga sili a le Atua na tuuina i ai ni ovasia e ta’u o faiaoga, ma ua poloaiina i latou e fafaga ma musuia fanau a le Atua. Ou te faatu atu le manatu e mafai e le Faifaatoaga Sili i lona silasila mai i ana faatoaga, e mafai ona ia silafia nisi o loo ola i gaoioiga amiotonu a o isi o loo matelaina ona o le lamala o le faatamala i le tiute, o le agaga malulu o le faamaualuga, po o le faama’i lea o le inu ava. Aisea? Atonu ona e sa le faia e le au faifaatoaga, e ovasia ia, ni sauniuniga tatau, pe fai lelei foi lo latou tiute.”²

Pe e faasino o ia i matua, o faiaoga i potuaoga, po o faiaoga o aiga ma faiaoga asiasi, sa faaaluina e Peresitene MaKei le tele o lana auaunaga, e fesoasoani i uso o le Ekalesia ia malamalama i le taua maoae ma faatosinaga o le lelei ona aoao atu.

O Aoaoga a Tavita O. MaKei

O le Ekalesia ua tatou maua ai avanoa e tele e aoao atu ai isi ma atiina ae le malosi patino.

O i tatou o se Ekalesia o ni faiaoga. I le aiga o le Au Paia o Aso e Gata Ai e manaomia e le tama ma le tina ona fai ma faiaoga o le upu—lea sa manaomia faapitoa mai lava i le faaaliga mai le Alii. O ausilali taitasi, faalapotopotoga, o korama taitasi, o se tino lea o ni alii ma ni tamaitai … ua faasino tonu lava i ai lona uiga o le upu, o faiaoga.³

Ou te faafetai mo le auai i se Ekalesia o lona faatuatuaga ua saunia ai ni alii mo tauiviga a ‘autau o le lalolagi ma, ua mafai ai e i latou ona ola i lenei tauiviga. O se tasi o nei ‘autau faatino o le tiutetauave lea o le faiaoga, atoa ma le avanoa ua tuuina mai i le toatele o lenei Ekalesia e fetufaai ai lenei tiutetauave. …

O lenei i le tuuina atu la o se avanoa i le toatele e maua ai le atinaega lena e oo mai i se faiaoga moni, ia manatu i le mea o loo faia e le Ekalesia e fesoasoani ai i lenei autau o faiaoga i le avea ma tagata taitoatasi, ina ia malolosi ai i le taua e faasagatau atu i autau a le lalolagi!

Muamua, ua tuu atu ai i o latou luga le matafaioi o le aoaoina o o latou uso a tagata e ala atu i faataitaiga; ma e leai se isi puipuiga sili faapei o lena e tuuina atu i se alii po o se tamaitai faamaoni.

Lua, na te faatupuina se uiga faaleatua o le alofa mo isi. Na fetalai atu Iesu i se tasi o ona Aposetolo, “Simona e, le atalii o Iona, pe sili mai lou alofa ia te au i lo i latou nei? … Ioe, le Alii e, ua e silafia ou te alofa ia te oe. … Ia e fafaga i a’u tamai mamoe.” (Ioane 21:15.) O le alofa e tatau ona muamua i le tiutetauave o le fafaga o na tamai mamoe. Ma e ao i nei fia sefulu o afe o faiaoga ona i ai i o latou loto le fiafia e faiaoga, o le alofa i uso a tagata, ma le naunautai e talia lenei tiutetauave faatasi ma le uiga faaleatua o le alofa.

Ia o loo i ai la se tulaga manaomia lona tolu, e igoa o le: mama o le olaga. E le mafai ona ou vaai atu i se tasi ua ia faaeleelea o ia lava, ae lelei ma manuia lona aoaoina atu o le mama atoatoa i tamaiti. E le mafai ona ou vaai atu faalemafaufau i se tasi o i ai se masalosalo i lona mafaufau e uiga i le i ai moni o le Atua, a o ia aoao atu ma le faagaeetia ia tama ma teine talavou faapea o loo soifua le Atua. E le mafai e ia ona fai. Afai na te faia ni uiga pepelo ma taumafai faapena e aoao atu, o lona uiga o le a sili atu ona leotele nai lo mea o ia fai mai ai—ma o se tulaga matautia lena o le i ai o ni alii masalosalo e fai ma ni faiaoga i a outou fanau. O le a goto i totonu le ’ona, ma o le a le iloa ona mama’i i latou i la le agaga, ona o le ’ona lea sa tuuina atu i o latou agaga e lea tagata sa latou faalagolagoina. O le manatu atu i le taumafai o faiaoga e aoao i le autalavou le faatuatua i le Atua, ae le o ia te i latou, e le tusa ai lea ma tulaga e tatau ona i ai, pe afai moni lava e lei manatu i ai. Ia o le tulaga agavaa lona tolu la, o le mama o le olaga ma le faatuatua i le talalelei a Iesu Keriso.

O le mea mulimuli, e tuuina atu ai ia te i latou se avanoa e auauna ai i o latou uso a tagata, ma faapena ona faalauteleina ai le valaauga ua oo mai ia i latou, ma faamaonia moni mai ai o i latou o ni soo moni o Keriso.⁴

I le faamatalaga e uiga i le amio ma le taitaiga o le fanau laiti, o faatosinaga a matua e pito sili lava; ona sosoo ai lea ma faatosinaga a le faiaoga. … “E i ai sona uiga tamalii moni i le agaga o lena alii po o le tamaitai, o le naunau ma le faamaoni ma taumafai e taitai ese mai fanau mai faatosinaga faatama’i, ma taitaiina atu i se siosiomaga o ni sini maualuluga ma ni taumafaiga sili.”⁵

O faiaoga lelei e saunia e ala i le suesue, faatuatua, ma le tatalo.

O le matafaioi maoae e i luga o se faiaoga, o le saunia lea e aoao atu. E le mafai e se faiaoga ona aoao isi i se mea na te le iloa. E le mafai ona ia faia ia lagona e tagata na te aoaoina se mea e le o lagona e ia lava. E le mafai ona taumafai o ia e taitai se alii talavou po o se tamaitai talavou ia maua se molimau o le talalelei a le Atua pe afai e le o maua e le faiaoga lava ia lena molimau.

E tolu ni mea e tatau ona taitaia faiaoga uma: muamua, ia malamalama ma iloa ma ola ai i lena mataupu; lua, ia avea lena mataupu ma vaega o lou olaga; lona tolu, taumafai e taitai tagata o loo e faiaoga ai ia avea lena mataupu ma vaega o latou olaga— e le o le sasaa atu i o latou loto, a o le taitai o i latou ia vaai i le mea o e vaai i ai, ia iloa le mea o e iloa, ia lagona le mea o e lagona.

E tatau i faiaoga uma ona saunia o ia i lana lesona mo le taimi e feiloai ai o ia ma na tama ma teine o le vasega; aua, ou te fai atu ia te outou, o le faiga e te tuuina atu ai lena lesona, o ou uiga faaalia i le upumoni o i lena lesona o le a tele ai se aafiaga o uiga faaalia o tama ma teine, faapea foi ma o latou uiga masani agai i le toaga i le Ekalesia. Afai e te faatuuaina i latou pe a uma le vasega ma se faalogona i o latou loto talavou e leai se mea sa latou maua i lo latou o mai i le vasega, o le a faigata ia te oe ona e toe faia se mea e toe foi mai ai i latou i le vaiaso o sosoo ai. Peitai i se tasi itu, afai sa e faia se mea e faagaeetia ai i latou, pe afai foi e le mafai ona e faia lena mea, afai sa e tuuina atu ia i latou se manatu e tasi sa latou fiafia i ai, o le a e iloa lo latou faamoemoe ma faanaunauga e toe foi mai pe a latou auai mai i le vaiaso e sosoo ai. …

O le na ona faitau o le tusi lesona a o lei oo i le taimi o le vasega e le lava lena. Afai e faapena ona fai, o lona uiga ou te le o avea lena lesona ma a’u lesona, ma seiloga ua avea ma a’u lesona, seiloga ua ou lagona ua ia te au se savali e tuuina atu i tagata o la’u vasega, a leai o lona uiga ou te le o saunia e pei ona fetalai mai le Alii ia te au ia ou saunia pe a ia valaauina au e tuuina atu lana afioga. E tatau ona avea ma a’u lesona; o se mea ou te manao e tuuina atu i tama ma teine o se mea lea e taulia pe a ou feiloai ma i latou. E mafai ona ou avea lena lesona i le tusi lesona mo a’u e ala i le suesue, faatuatua, ma le tatalo.⁶

Ina ia tuuina atu se lesona ua saunia lelei e pei lava o le alofa tunoa—na te faamanuia le na te tuuina atu faapea ma le na te talia mai. E moni i le aoao atu e pei foi ona moni i le olaga—“Ia tuuina atu i le lalolagi le mea sili o ia te oe, ma o le a toe foi mai lena mea sili ia te oe.”…

… Faiaoga e, ia amata sauniuniga o au lesona i le tatalo. Ia aoao atu au lesona ma le agaga tatalo. Ona tatalo ai lea ia faatamaoaigaina e le Atua lau savali i agaga o le fanau e ala mai i uunaiga a lona Agaga Paia.⁷

O le tulaga maopoopo ma le faaaloalo i totonu o potuaoga a le Ekalesia, e fesoasoani i tupulaga talavou e aoao ai le faaaloalo ma le pulea e le tagata o ia lava.

Ou te talitonu o le amio pulea i totonu o le potuaoga, lea e manaomia ai le pulea e le tagata o ia lava, ma manaomia ai le manatu i isi, o se vaega pito i taua lea o le aoao atu. …

O se lesona sili e mafai ona aoao e se tamaitiiti o le pulea lea o ia lava, ma lagona lona vafealoai ma isi i se tulaga e tatau ai ia te ia ona maua le faaaloalo i o latou lagona. …

O se siosiomaga e le maopoopo, lea e faaalia ai le le faaaloalo i le faiaoga ma tagata o le vasega, o se siosiomaga lea o le a ia faaumatia uiga e sili ona taua o le amio.⁸

O tatou potuaoga o nisi taimi o ni nofoaga e pisa ma tafulufulu. O le mea lea tatou te manaomia ai ni faiaoga lelei. O se faiaoga e mafai ona ia tuuina atu se lesona faatosina loto o le a maua e ia se tulaga maopoopo lelei, ma pe afai e ia te ia ni tamaiti aoga e le fia faalogo, e tau’ai ma faalele solo pepa, e le ano mai, e tautevateva, e kiki e le tasi le isi, o le a iloa e ia e le o lelei le faiga o le lesona. Atonu sa lei saunia lelei foi. …

I totonu o potuaoga e tatau ona aoaoina ai fanau, e tatau ona saoloto e talanoaina le mataupu, saoloto e tautala mai, saoloto e auai i galuega a le vasega, peitai e leai se tasi o le vasega e i ai se aia na te faatosina ese mai ai se tasi tamaitiiti aoga, i lona tuleia lea o se tasi pe na te faia foi ni ulaga ma ni faamatalaga faaulaula. Ma e ou te manatu o lenei Ekalesia, i totonu o korama a le perisitua ma vasega ma totonu o ausilali, e le tatau i faiaoga ma [taitai] ona faatagaina ai lena mea. O le amio le pulea e faamanu’aina ai le tamaitiiti o loo faia. E tatau ona iloa e ia a i ai o ia i le mea o i ai tagata, e i ai ni mea faapitoa e le mafai ona ia faia ma saoloto ai mai le faasalaina. E le mafai ona ia solia aia tatau a isi o lana vasega.

Ia tuu fanau e aoao lenei lesona a o talavou aua a o atu loa i latou i le mea o i ai tagata ma taumafai e soli le tulafono, o le a latou lagonaina le lima aoa’i ma e le taumate o le a puapuagatia i se faasalaga.

O le amio lelei i totonu o le potuaoga e taua e faatumauina ai i loto ma olaga o alii talavou ma tamaitai talavou le mataupu faavae o le pulea e le tagata o ia lava. E mananao i latou e talanoa ma mananao e taumusumusu, peitai e le mafai ona latou faia na mea aua o le a faalavelave ai i le isi. Aoao ia iloa le mana ma le lesona o le pulea e le tagata o ia lava.⁹

O loo tulimatai atu le Aoga Sa i se taimi i totonu o vasega uma i le Aoga Sa, i mataupu faavae o le tausisi i le taimi, faaaloalo, pulea e le tagata o ia lava, faaaloalo i e pule, maelega, tali vave atu, aemaise lava, o le migao ma le tapuai, o le a [faatumulia ai] le siosiomaga.¹⁰

I a tatou taumafaiga e aoao atu le upumoni, o Iesu Keriso o lo tatou Faaa’oa’o Sili lea.

I le lalolagi o uiga patino, i le malo o amioga, sa silisili lava Keriso. I le itu tau le uiga patino, o lona uiga o la’u tala o mea uma lava ia e aofia i se tagata. O se uiga patino, o se meaalofa lea mai le Atua. O se penina tau tele moni lava, o se faamanuiaga e faavavau.

Uso faiaoga e, e le mafai e oe ma a’u ona faamoemoe e faailoa atu i sina tikeri itiiti lava, le uiga patino o lo tatou Faiaoga Sili, o Iesu Keriso. O uiga patino o tagata taitasi atonu o se ’ave itiiti lea e tasi o le la malosi, o le Faaola lava ia; peitai, e ui e matua itiiti naua le tikeri o le malosi, ae tatau lava i uiga patino o faiaoga taitasi ona tutusa ma uiga patino o le Faaola. I le lalolagi o le amio, e mafai ona sili atu faiaoga taitasi, ma avea ai ma maneta e tosina mai ai ia te ia i se auala e le mafaamatalaina, i latou na te aoaoina.

Ae tusa pe o le a le matagofie o ona uiga patino i le vaaiga a tagata o le vasega, o le a toilalo lena faiaoga i lana galuega pe afai na o uiga patino lava o le faiaoga na te taitaiina mai i ai le alofa po o le fiafia o le tamaitiiti. O se tiute o le faiaoga le aoao o le tamaitiiti ia alofa (fiafia)—ia le na o le faiaoga lava, a o le upumoni foi. E le aunoa lava, i soo se mea, ona tatou maua ai le gauai atu o Keriso lava ia i le finagalo o le Tama; ma e faapena foi la i le faiaoga, e tusa ai ma ona uiga patino, e tatau ona gauai atu o ia lava i le upumoni o manao o ia e aoao atu.¹¹

E tatau i le faiaoga ona iloa i latou o loo ia aoaoina, ia mafai ona malamalama, i le itu faalemafaufau ma le tulaga gafatia o tagata o lana vasega. E tatau ona mafai e ia ona faitau foliga faaalia ma tali atu i uiga faaalia o le atamai ma le faaleagaga o i latou o ia aoaoina. E i le Faiaoga Sili lenei mana e malamalama ai atoatoa. E mafai ona Ia faitauina mafaufauga lilo ma faamatala lagona tonu o tagata sa Ia aoaoina. Ina ia ausia lenei mana e mafai e le faiaoga ona latalata atu ia te Ia i le na o sina vaega lava. Ua toaitiiti naua faiaoga ua latou atiina ae lenei meaalofa, i se tulaga e tatau ai; e ui lava e i ai i faiaoga uma le tiutetauve o le filifili pe o le a se auala sili e faalatalata atu ai i tagata o le vasega, ina ia mafai ai ona faia faatinoga e tumau.¹²

Faaaoga mea o siomia ai oe. Faailoa atu le faataitaiga a le Faiaoga sili o Le na nonofo i lalo ma ona soo ma vaai atu i lalo i faifaatoaga o totoina a latou fatu o le tautotogo. Na ia fetalai, “Ua pau isi i le eleele lelei, o nisi ua pau i le mea papa.” [Tagai Mareko 4:3–8.] Sa i ai iina se lesona o le olaga. O le tamaitai Samaria na sau e faamalieina lona fia inu i le vaieli, o se tasi lea faataitaiga. Na fetalai atu Iesu ia te ia o le vai na te avatu ia te ia o le a avea ma vaipuna e puna i luga i le ola e faavavau [tagai Ioane 4:14]. Ia ao mai aafiaga, ona faapupula atu lea o manatu taitasi. Ou te manatu o se lesona lena i faiaoga taitasi, o oe o le ua i ai se lesona e saunia—e le o se lauga, a o se savali.¹³

O ni auauna agavaa a Keriso, outou! Faiaoga e! O ni soo o le Faiaoga moni, le Faaa’oa’o sili o tagata uma! Faaauau la outou galuega tamalii! E leai se tasi mea e sili atu; leai se mea e sili ona amiotonu! E fai mo outou le olioli na folafola mai e le Faaola.¹⁴

Fautuaga mo Suesuega ma Talanoaga

O a tiutetauave o se faiaoga? (Tagai itulau 210–11.) Aisea e taua ai ona i ai i faiaoga o le talalelei ni molimau patino?
O a faamanuiaga sa e maua a o e aoao atu le talalelei? Sa faamanuiaina faapefea lou olaga pe na suia foi e ni faiaoga faamaoni ma lelei?
O a ni auala e mafai ona faatosinaina ai uma e se lesona saunia lelei ia le faiaoga faapea ma le tagata aoga? (Tagai itulau 211–12.) O a nisi o auala e mafai ona saunia ai faiaoga? (Tagai itulau 211–12.) O a punaoa o loo maua i le Ekalesia mo le faaleleia atili o le aoao atu?
O le a se mea e mafai ona tatou fai e faatupuina ai le pulea lelei ma le faaaloalo i totonu o potuaoga a le Ekalesia? (Tagai itulau 212–14.) E faapefea ona maua e tagata talavou se mea aoga pe a i ai le pulea lelei i totonu o le potuaoga? O a mea e mafai e matua ona fai e lagolago ai faiaoga i a latou taumafaiga e faatumauina le pulea lelei i totonu o potuaoga?
O le a le eseesega i le va o le “aoao atu o se lesona” ma le aoaoina o tagata? Sa faaaoao mai faapefea e le Faaola lenei tomai? O se a se isi mea e mafai ona tatou aoao mai i le faataitaiga a Iesu Keriso i le avea ai ma Faiaoga Sili? (Tagai itulau 214–15.)
O le a se mea e mafai e se faiaoga ona fai ia mautinoa ai e fiafia tagata o le vasega “ia le na o le faiaoga, a o le upumoni foi“?
E mafai faapefea ona tatou faaaoga le fautuaga a Peresitene MaKei e faaleleia ai aoaoga i totonu o tatou aiga? O a ni auala ua e maua e aoao faalelei ai lau fanau?

O Mau e Faatatau i ai:Ioane 21:15–17; 3 Nifae 27:21; MFF 11:21; 42:14; 88:77–80, 118; 132:8