O Faamanuiaga o le Lotogatasi

“Le Tama Paia e, ia e tausi ia i latou i lou suafa o e na e foai mai ia te au, ina ia tasi o i latou, faapei o i taua.

“E le faapito lau tatalo mo i latou nei, a o i latou foi e faatuatua ia te au ona o la latou upu;

“Ina ia tasi i latou uma, faapei o oe le Tama o i totonu ia te au, o au foi o i totonu ia te oe ina ia tasi i latou i totonu ia te i taua ina ia talitonu le lalolagi ua e auina mai au.” (Ioane 17:11, 20–21.)

O le mea lea, i se tasi o tatalo e sili ona mamalu o tatalo uma ua ofoina atu mo tagata, sa avea e Iesu le lotogatasi ma vaega e sili ona taua i e mulimuli atu ia te ia.

O le lotogatasi ma ona upu uiga tutusa—feauga lelei, logolelei, filemu, auaufaatasi, femalamalamaai— e faaali atu ai se tulaga e faananau pea i ai le loto o le tagata. O lona faafeagai o le feeseeseai, finauga, feupuai, fenumiai …

Ia avea le faalatalata atu o lo tatou Alii i lana tatalo faatoga mo le lotogatasi ma mea moni e tupu i totonu o o tatou aiga, o tatou uarota ma siteki, ma lo tatou lagolagoina o mataupu autu faavae o le saolotoga.⁵

O le tasi o le faamoemoega, atoa ai ma le galulue faatasi o tagata uma ia feauga lelei, e manaomia i le faataunuuina o le galuega a le Alii. I se faaaliga na tuuina atu i le perofeta o Iosefa Samita pe tusa ua tasi le tausaga talu ona faatuina le Ekalesia, sa faalauiloaina ai e le Alii i se tulaga lautele le mafuaaga o lana galuega tele, o le a faataunuuina, ua toefaatuai mai mo le lelei o tagata ma ia saunia ai le ala mo lona afio mai faalua. Na ia fetalai:

“Ua faapea lava ona auina atu lau feagaiga e faavavau i le lalolagi, e fai ma malamalama o le lalolagi ma e fai ma tagavai mo lou nuu, ma nuu ese e saili i ai, e avea ma avefeau mo au e teuteu le ala i ou luma.” (MFF 45:9.)

O iina tatou te aoaoina ai le galuega tele ua tuuina i luga o nei tagata e fesoasoani ai i le Alii i le faataunuuina o nei mea i le fanauga a tagata. E manaomia ai le lotogatasi ma le maelega i ona faamoemoega. Na tuuina mai e le Alii le lapataiga lenei e faatatau i lenei tulaga manaomia:

“… O malo uma ua fevaevaeai e faaumatia ia; o aai uma foi po o aiga e fevaevaeai e le tumau ia.” (Mataio 12:25.)⁶

O se tasi o tulaga muamua lava e aumaia ai le fevaevaeai o le manatu faapito, o le isi o le lotovale: “Na ui mai lava i ou tafatafa ia Tui ma Seve ae lei fai mai ia te au e uiga i le mataupu.” “Na tofia e le au epikopo ia Pai ma Lafai e avea ma ta piano, ae sili mamao ai lau ta piano” “Ou te le toe alu i se sauniga perisitua aua na tofia e le au epikopo se tasi alii e avea ma faatonu o le au ositaulaga.” “Na filifilia e le Aoga Sa ia Pai ma Lafai e avea ma faiaoga.” … “E le iloa lava au e le au peresitene o le siteki ma ua ou le fiafia ai lava.” “E le ioe le Au Pulega Aoao i taimi uma.” Oka! e selau ma le tasi mea iti faapena e oo mai—o mea iti, e faatauvaa lava pe a tatou faatusatusaina i mea lelei ma sili atu ona aoga o le olaga. Ae ui i lea, ou te iloa mai mea na tutupu, e mafai e le tiapolo ona ia faalauteleina ia mea ma avea ma ni mauga i o tatou olaga, ma tatou faatausuai ai, ma matelaina ai lo tatou faaleagaga aua ua tatou amanaiaina na lagona.

E i ai se isi elemene—o le sailiili masei—e auaiga ma le agaga o le lotovale. Tatou te saili masei i o tatou tuaoi. Tatou te talanoa i mea leaga e uiga i isi. Pe a oo mai lena lagona, o se mea lelei le usuusuina o le viiga faigofie [a le Ekalesia], “Nay, Speak No Ill.”

Ina tatou o atu ia i luma ma le naunautaiga tele e taufai puipui e le tasi le isi i le faia o le mea tonu, ia puipuia le Ekalesia, ia aua nei o tatou faia ni tala leaga e uiga i o tatou tuaoi, faapea taitai o le Ekalesia, alalafaga, siteki, po o soo se tulaga lava. Ia tatou aloese mai le tautala leaga; ia tatou aloese mai le faia o tala faatupu i isi, ma le faitala. O nei mea e oona i le agaga ia i latou o e faia. O le tautala leaga e sili atu ona faamanualia ai le tagata o loo faia nai lo le o loo faia i ai.⁸

E i ai manu ninii faalafua o aiga, e faapea foi i fale, ma o nisi o nei manu ninii o le taumuimui, fai o tala taufaaleaga, sailiili masei o matua po o fanau foi. O le faia o tala pepelo taufaaleaga e oona i le agaga. “O tagata faitala pepelo taufaaleaga ua pei lava o ni lago e feleleai i luga o se vaega lelei o le tino o le tagata ae faatoa tutu lava i ona manu’a.” I totonu o se aiga lelei, e leai se faitala pepelo taufaaleaga e uiga i … faiaoga o le aoga, e uiga i taitai o le malo, po o taitai o le Ekalesia. Ou te matuai faafetai lava i lenei aso i lou tama, ao agai mai tausaga ma toe mou atu, sa sisii ona lima ma faapea mai, “O lenei, aua nei outou vaavaai masei i o outou faiaoga po o soo se isi lava.”⁹

E i ai i le tamaitiiti se aia tatau na te lagona ai o loo i ai i totonu o lona aiga se nofoaga o le sulufaiga, se nofoaga o le puipuiga mai le matautia ma le leaga o le lalolagi i fafo atu. O le lotogatasi ma le amiosa’o, o mea ia e tatau ona i ai e maua ai lenei tulaga manaomia.¹⁰

E mafai ona ou mafaufau i ni mea laiti, pe afai e i ai, e sili atu ona taua i le aiga pe a le i ai le lotogatasi ma le tulaga feauga lelei o mea. I se isi itu, ou te iloa o se aiga e i ai le lotogatasi, o le fesoasoani ma le alofa, o se vaega lea o le lagi i le fogaeleele. Ou te matea toeitiiti lava o outou uma e mafai ona molimau i le suamalie o le olaga i totonu o se aiga e faamuamua ai nei uiga tausaafia. Ou te talisapaia ma le agaga faafetai ma le lotomaualalo le manatuaina o le leai o se taimi se tasi a o ou tamaitiiti i totonu o le aiga o se talavou, na ou vaaia ai se faataitaiga o le fevaevaeai i le va o lou tama ma lou tina, ma o lena uiga lelei ma le femalamalamaai lelei na avea ma sootaga e fusia faatasi ai se vaega o uso ma ni tuafafine faamanuiaina. O le lotogatasi, fealofani, lagona lelei mo isi o ni uiga tausaafia e tatau ona faafailele ma teuloto i totonu o o tatou aiga taitasi.¹¹

E masani lava ona tutupu mai fevaevaeaiga i totonu o le aiga ona ua manao tane e tauave o latou lava mamalu ma faia i a latou lava ala, ma tusa ai foi ma o latou lava manao. E manaomia foi e ava lea mea e tasi. E i ai nisi ua faumalo faapea o latou e faia le faaiuga. O nisi taimi e sili atu ai le naunau o tane faapea o latou e faia ae le o fafine. O le mea moni o loo taumafai lava le tagata ia e faasaoina ia lava, ae nai lo le i ai o se tulaga feauga lelei ma le filemu i le aiga, o le a tulai mai fevaevaeaiga. Nai lo le faasaoina o le ola feauga lelei i totonu o le aiga, ae o le a le maua, aua ua e taumafai e saili e faasaoina lou lava ola na o oe, pe faia foi i lou lava manatu faapito. E sili pe a aveese lena faanaunauga. Aua nei e faia se tala, ma o le aveesea o lou faanaunauga ma le lagona o le ita, o le pule malosi, o le pulepuletutu ma lou le faia o se tala, o le a e faasaoina ai lou ola i totonu o lou aiga.¹²

Ia faamanuia outou uma e le Atua, ma ia taitaiina ma fesoasoani ia te outou ina ia i ai le amiotonu, tulaga feauga lelei, ma le alofa o le tasi i le isi i aiga taitasi.¹³

O le misiona a le Ekalesia a Iesu Keriso o le Au Paia o Aso e Gata Ai o le faatuina o le filemu. O le Keriso Soifua o lona ao lea. I lalo o lana taitaiga, e faitau fiasefulu afe ia alii i totonu o le Ekalesia ua faatagaina mai le lagi e fai ma ona sui i le tele o tofiga eseese ua tofia i ai. O le tiute o nei sui vaaia o le faaali atu lea o le alofa faauso, alofa muamua o le tasi i le isi, ona faaali atu ai lea i tagata uma; ia sailia le lotogatasi, fealofani, ma le filemu i faalapotopotoga i totonu o le Ekalesia, ma faalautele atu nei uiga tausaafia i le lalolagi atoa e ala i mataupu ma faataitaiga.¹⁴

I totonu o paranesi ma uarota a le Ekalesia, e leai se uiga tausaafia e sili atu ona fesoasoani i le alualu i luma ma le faaleagaga nai lo le i ai o lenei mataupu faavae. Pe afai e suitulaga le loto leaga, faitala, [ma le] tautala taufaaleaga, i le fetalitonuai, lotogatasi, ma le fealofani, o le a taofia le agai i luma o le faalapotopotoga …

O le vaivaiga i totonu e sili atu ona matautia ma leaga nai lo feteenaiga i fafo. E laitiiti le Ekalesia pe afai e faaleagaina e ala i sauaga ma le tuuaifuaina [po o le tuuai pepeloina] mai le valea, le malamalama, po o fili saua; ae sili atu ona faalavelavea lona alualu i luma i le faipona, paie, tagata solitulafono, ma le liliuese o tagata i totonu lava o le Ekalesia.¹⁵

O le mataupu faavae o le lotogatasi na mafai ai e uarota, siteki, paranesi, ma misiona a le Ekalesia ona alualu i luma ma faataunuu faamoemoega na faatuina ai le Ekalesia. Semanu e le mafai ona faatinoina e ala i feeseeseaiga ma le ita. Sa i ai faafitauli. E tofu lava le tagata o le Ekalesia ma ona lava manatu. O nisi taimi e le tutusa ma manatu o le au epikopo, ma e le tutusa ma e o i le au peresitene o le siteki, ma e le tutusa foi ma manatu o le Au Peresitene Sili o le Ekalesia; ae o tagata taitoatasi e ao ona lolo o latou manatu mo le lelei o le mea atoa, ma o lena faamoemoega autasi tatou te ausia ai se mea matagofie.

A o ou mafaufau i le lumanai o lenei Ekalesia ma le lelei o alii ma tamaitai talavou, faapea foi tina ma tama, sa uunaia au e leai se isi savali sili atu ona taua e tuuina atu nai le “ia tasi, ” ma aloese mai mea e tupu ai le fevaevaeai i tagata lotu. Ou te iloa e leai se auupega e sili atu ona malosi a le fili e faasagatau ai i soo se faalapotopotoga a alii ma tamaitai i totonu o lenei Ekalesia nai lo le sunuiina i totonu o le fevaevaeai, masalosalo, ma le ita. …

O le luitau o loo i o tatou luma, e le mafai ona tatou toilalo i le tautinoga mamana na tuuina mai ia i tatou o se nuu. O le tasi o le faamoemoega, faatasi ai ma le galulue o tagata uma e feauga ma le faatulagaga a le Ekalesia e pei ona faailoa mai e le Alii, e tatau ona avea ma o tatou faamoemoega. Ia lagona e tagata lotu taitoatasi, o faiaoga, ma taitai le taua o le tofiga ua latou maua. E taua tagata uma i le faataunuuina manuia o le galuega a le Atua, o la tatou galuega foi lea.¹⁶

O le puipuiga silisili o loo ia i tatou mo le lotogatasi ma le malosi i totonu o le Ekalesia e maua i le perisitua, e ala i le faamamalu ma le faaaloalo i ai. Ioe, ou uso e—Peresitene o siteki, epikopo o uarota, ma i latou uma o e umia le perisitua—ia faamanuia le Atua ia te outou i la outou taitaiga, o a outou matafaioi i le taialaina, faamanuia, ma faamafanafana tagata ua tofia outou e pulefaamalumalu ai ma asia. Ia taitai i latou e o i le Alii ma saili musumusuga ia ola ina ia mafai ona latou tu maualuga a’e mai mea maualalo ma le leaga, ma ola ai i se malo faaleagaga.

Ia iloa i latou o e pulefaamalumalu ia te outou, ma saili a latou fautuaga pe a tatau ai.¹⁷

Talosia le [faalapotopotoga i totonu] o le Ekalesia ia faamanuiaina i le agaga o le lotogatasi ma le tulaga feauga lelei. Ia tuliesea mai o latou loto le agaga o le feitagai, fefaitalaai, ma le tautala taufaaleaga, ma ia tausia i o latou loto le upumoni sa faamalamalama mai e Iesu ina ua ia fetalai, “… a le tasi outou e le a au outou.” (MFF 38:27.)¹⁸

Ia avea lena agaga o le lotogatasi ma le tasi lea na faatoga atu ai lo tatou Alii ma le Faaola i le po na faalataina ai o ia, e fai ma faailoga o lana Ekalesia lenei: Le Tama e, ia e tausi ia i latou ina ia tasi i latou faapei o i taua [tagai Ioane 17:11].¹⁹

O se tusitala tautaua sa … [na faamatalaina]: “E toatele tagata lelei i le lalolagi i ona po nei, e toatele atu ua saunia e talitonu nai lo se isi lava taimi muamua, ae peitai e le o i ai i nei tagata ni tulaga manaomia autasi, leai ni mataupu faavae faatulagaina, leai se manatu manino o le olaga, leai se polokalama faataatia o gaoioiga. Ua amata ona malamalama le lalolagi, ma ua amata ona faamaumauina ona faafitauli ma ona manaoga, ae peitai e leai se lagona mautinoa o taitaiga, leai se lagona faavaeina, leai ni manatu taua, leai ni uunaiga maoae … Pe i ai ea se mea e mafai ai e lo tatou natura ona maua sona lotogatasi; e faailoa ai e lo tatou ituaiga tagata lana usoga, pe faatonutonu ai e le tagata soifua ana mataupu uma?”

Tatou te tali atu, ioe—o lea mana tuufaatasi, o lena mataupu o le Talalelei a Iesu Keriso e pei ona toefuataiina e ala mai i le Perofeta o Iosefa Samita. O loo faamatalaina ai le olaga o le tagata ma lona faamoemoega, ma e i ai i totonu elemene faaola taua, manatu tamalii, ma uunaiga faaleagaga o loo faananau i ai le loto o le tagata i ona po nei.²⁰

“O le tala lelei e olioli tele ai” [Luka 2:10]—O le Talalelei a Iesu Keriso o le tala lelei lena. O le upu “Evagelia” o lona uiga, “o le tala lelei, ” ma e faapea le tala e sau mai luga. …O lo o i ai pea i tisipenisione uma, avanoa mo tagata e maua ai lena tala lelei, ma o nei perofeta o e na iloa le Faavavau ma e na faalogo muamua ma auala mai ai lena tala lelei, ua faaeeina i o latou luga le matafaioi e talai ai lena tala lelei i isi o latou uso a tagata, ina ia mafai e i latou o e o loo popole i mea o le lalolagi ona maua le savali fiafia ma toe aumaia i totonu o le siosiomaga o le filemu, feauga lelei, ma le logolelei.²¹

Po o motu o le moana, po o Iapani, po o totonu o Suria, po o totonu o atunuu o Siketinevia, po o Egelani, Siamani, Farani, po o Olani—soo se mea lava e fetaui ai se tasi i se vaega o Au Paia o Aso e Gata Ai, o e e le maluelue lo latou faatuatua i le talalelei a Iesu Keriso, o iina e maua ai e se tasi le agaga o le tasi, le agaga o le alofa, le agaga o le malie e ositaulaga mo le lelei o le fanauga a tagata. Ia faamanuia le Atua i le Au Paia o Aso e Gata Ai i le lalolagi atoa ina ia mafai ona latou faaauau ai pea i lena agaga e tasi.²²