O Le Mana o le Tatalo

Na ou faatauaina mai lo’u laitiiti le upumoni faapea o le Atua o se tagata lava ia, ma o le mea moni lava, o lo tatou Tama o le e mafai ona tatou faalatalata atu i ai i le tatalo ma maua mai ai tali i talosaga. Ou te faatauaina o se tasi o aafiaga sili ona pele o le olaga le iloaina lea e faafofogaina e le Atua ia tatalo o le faatuatua. E moni lava o tali i a tatou talosaga e le mafai ona tuusao maia i lena lava taimi, po o le mea foi o loo tatou naunau i ai; ae e oo mai lava, i se taimi ma se tulaga e sili ona lelei mo le na ole atu.

Ae peitai, e i ai taimi na ou maua ai ni tali tuusao ma le vave e faamautinoa mai ai ua talia mai la’u olega. Aemaise lava, ona sa i ai se taimi na matuai manino mai ai lava le oo mai o le tali e pei lava o loo tutu ai lo’u Tama Faalelagi i o’u autafa ma fetalai mai ia upu. O nei aafiaga o se vaega o lo’u lava tagata ma e tatau ona tumau pea i le umi e i ai lo’u malamalama. Ua moni ai lava ma faamaonia le latalata mai o le Faaola o le lalolagi ia te au.

Ua ou faalogoina ai se lagona ou te lei lagonaina muamua faapea o le Atua o lo’u Tama. E le gata o Ia o se mana e le mafai ona tago atu i ai, o se malosiaga i le lalolagi, ae o se Atua e i ai ni mana foafoa, o le puleaoao o le lalolagi, o le taitai o o tatou agaga. Ou te uunaiina tagata uma, aemaise lava i le autalavou o le Ekalesia, ina ia lagonaina le latalata atu i lo tatou Tama o i le lagi a o latou faalatalata atu ia te Ia i aso taitasi—e le o nofoaga faitele, ae o le mea lilo. Afai o le a maua e o tatou tagata lenei faatuatua, o le a faapea ona oo mai faamanuiaga silisili ia i latou. O le a faatumulia o latou agaga i le faafetai mo mea ua faia e le Atua mo i latou; o le a latou iloaina lo latou faatamaoaigaina i mea lelei ua tuuina atu ia i latou. E le o se mea e na ona vaai faalemafaufau i ai faapea e mafai ona tatou faalatalata atu i le Atua ma mauaina le malamalama ma le taitaiga mai ia te ia, ma o o tatou mafaufau o le a faamalamalamaina ma o o tatou agaga o le a faagaeetiaina e lona Agaga.³

Pe a e tootuli i lalo e tatalo i le po, pe e te lagonaina ea lona latalata mai, pe e te lagonaina ea se mana lea e faagaoioia ai e pei o se leitio po o se mana silisili ina ia e lagonaina ai o loo e talanoa ma ia?⁴

Ou te manao i alii talavou uma o Isaraelu ina ia lagonaina le latalata atu i le [Atua] ma o le a latou faalatalata atu ia te Ia i aso taitasi, e le o nofoaga faitele, ae o le mea lilo. Ou te manao ia latou maua le faatuatua ia te Ia e pei o le teineitiiti tauaso i lona tama. Sa nofo o ia i luga o ona vae, ae o se uo sa nofo i ona tafatafa ane sa faapea atu: “Tuu mai ae sei e malolo, ” ma aapa atu ma avatu le teineitiiti i luga o ona vae. Sa faapea atu le tama ia te ia: “E te iloa o ai lena e siiina oe?” “Leai, ” o lana tali atu lea, “ae e te iloaina.” O le faatuatua o lena teineitiiti i lona tama. … e faapena uma lava le faatuatua e tatau ona i ai i tama ma teine o le Au Paia o Aso e Gata Ai i lo latou Tama o i le lagi.⁵

O se mea lelei mo teine ma tama le aoaoina faapea e mafai ona latou o atu i le Atua i le tatalo. O le a aoaoina e outou tamaiti aooga o loo i le iunivesite, e pei ona tatau ai i tamaiti aooga uma i soo se aoga ona aoaoina, afai tou te oo i ni faigata e mafai ona outou maua le fesoasoani ma le taitaiga pe afai tou te sailia ma le faamaoni. Atonu o le a e tulai e pei ona fai e nisi o i matou i lo matou talavou ma lagonaina faapea e le o taliina mai au tatalo, ae e i ai se aso o le a e iloaina moni ai lava na tali mai e le Alii au tatalo e pei lava ona faia e se matua poto. O se tasi lena o meatotino silisili a le talavou o le lagonaina lea e mafai ona ia alu atu i lo tatou Tama ma sasaa atu i ai lona loto ia te ia.⁶

O le tatalo o le pese lea a se loto naunau, ma alofa e gauai atu i le Silisiliese. O se savali a le agaga e auina sao atu i se Tama alofa. O le gagana e le na o ni upu. …

O le vaega sili ona faamuamua ma taua i le lelei o le tatalo o le faatuatua lea. O se talitonuga i le Atua e aumaia ai le filemu i le agaga. O se faamautinoaga o le Atua o lo tatou Tama, lea e mafai ona tatou o atu i ai i lona afioaga mo le faamafanafanaga ma le taitaiga, o se punavai lea e le mate o le faamafanafanaga.

O se isi vaega taua tele o le faaaloalo lea. O lenei uiga taua o loo faataitaia mai i le tatalo faataitai na tuuina mai e le Faaola i ana upu “Ia paia lou suafa.” [Mataio 6:9.] O lenei mataupu faavae e tatau ona faataitaia i totonu o potuaoga, aemaise lava i totonu o o tatou maota tapuai.

O le vaega taua lona tolu o le faamaoni. O le tatalo o le olega lea a le agaga. O le tatalo faamaoni e atagia mai ai afai tatou te ole atu mo soo se mea taua po o se faamanuiaga e tatau ona tatou galulue mo le faamanuiaga ma totoina lea mea taua.

O le isi vaega taua o le tumau mausali. Aisea e tatalo ai mo le Malo o le Atua ina ia oo mai sei vagana ua i ai i lou loto se manao ma se naunautaiga ina ia fesoasoani i lona faatuina? O le tatalo mo Lona finagalo ina ia faia ona taumafai lea e aua nei ola ai, e te maua ai se tali e ese mai ai i se taimi. E le tatau ona e tuuina atu se mea i se tamaitiiti e faaali atu lena uiga i se mea na ia talosagaina mai ia te oe. Afai tatou te tatalo mo le manuia o se faalapotopotoga po o se galuega, ia matuai manino atu o loo tatou manatu i ai. O se matuai le faamaoni lava le tatalo atu i le Atua ina ia faia lona finagalo, ae tatou toilalo e liuaina o tatou olaga i lena finagalo.

O le vaega taua mulimuli o le lotomaualalo. … O le mataupu faavae o le lotomaualalo ma le tatalo e taitaiina atu ai se tasi ina ia lagonaina le manaomia o le taitaiga faalelagi. O le ola faalagolago o le tagata ia te ia lava o se vaega taua, ae e tatau ona o faatasi ai ma se malamalama o le manaomiaina lea o le fesoasoaniga e sili atu—o se manatu lelei faapea a o e savali ai ma le mausali i le auala o le faia o le tiute, e i ai se avanoa e sese ai lau laa; faatasi ai la ma lena malamalama o se tatalo, o se olega ina ia musuia oe e le Atua ina ia aloese mai le uia o lena laasaga sese.⁷

Afai e te fesili mai ia te au po o fea na ou maua muamua ai lo’u faatuatua le maluelue i le i ai o se Atua, ou te tali atu ia te oe: o totonu o le fale na ou ola ae ai i lo’u laitiiti—lea e valaauina atu ai pea e Tama ma Tina le la fanau i o la autafa i taeao ma afiafi uma ma talosagaina faamanuiaga a le Atua i luga o le aiga ma luga o tagata uma. Sa i ai se faamaoni i le leo o lena peteriaka lelei lea na tuua ai se lagona e le mate i agaga o lana fanau, ma e le faatusalia foi le faagaeetia o talosaga a Tina. Ou te talosaga atu i le afiafi nei i tama uma o i totonu o le Ekalesia ina ia vaai ua ia faagaeetiaina ma le faamaoni uma ia lana fanau i le moni o le i ai o le Atua ma le mea moni faapea o le a taitaiina e le Atua ma puipuia ana fanau. Ia e tauaveina lena tiutetauave. O le fale o se tasi lea o iunite—o le iunite faavae—o le lalolagi. Ae ou te lei faalogo i lo’u Tama o molimau atu faapea na ia faalogo i se siufofoga mai le lagi, na ou iloa sa ola latalata o ia i Le na faia o ia.⁸

Ua aoaoina fanau a le Au Paia o Aso e Gata ai ina ia iloa le [Atua], ma tatalo atu ia te ia o le e mafai ona faafofoga mai ma lagona ma faalogoina e pei lava ona mafai e tama faalelalolagi ona faalogo, lagona, ma mafaufauina, ma ua latou taliaina i o latou lava tagata, mai o latou tina ma o latou tama, le molimau moni faapea o lenei Atua ua fetalai mai i lenei tisipenisione. E i ai se mea moni e uiga i ai.⁹

Ou te fautua atu faapea o nofoaga o loo tausia ae ai fanau ia fesootai vavalalata ma lo tatou Tama Faavavau o le a le mafai ona tele se agasala po o se amioleaga i totonu o lena fale. Afai e mafatia se tamaitiiti i le fiva, o le a tepa ae o ia i lona tama ma sina faatuatua faigofie ma faapea atu, “Papa, faamanuia au, ” ou te fia tauina atu ia te outou e faapea, mai na aiga faapena o le a tulai ae ai le malosi ma le mamalu o soo se malo. E faapena fale o le Au Paia o Aso e Gata Ai.¹⁰

“Le Alii e, ia e aoao mai ia te i matou i tatalo” o le olega faaaloalo lea a soo o le Matai [tagai Luka 11:1]. O lo latou faamaualalo e pei o tamaiti sa latou sailia ai le taitaiga sao, ma e lei faapea na le aoga le latou augani.

E pei lava o le naunautai o le au soo, e i ai foi taimi e mafai ai e fanau ona lagonaina le manaomia o le taitaiga faalelagi ma le faamafanafanaga, ae peitai e le faaleoina lo latou naunautai i se talosaga e tautalagia. O lea ua tuuina atu ai e le Alii i luga o matua le tiute “ia aoao atu foi a latou fanau ia tatalo.” [MFF 68:28.]

O popolega, o faafaigata, ma faanoanoaga e matuai moni lava i le olaga o se tamaitiiti e pei ona i ai i le olaga o se tagata matua, e i ai foi i tamaiti le aia tatau e maua ai le faamafanafanaga, faalaeiauga, ma le taitaiga lea e maua mai le Atua e ala i le tatalo.

E le gata o lena, ae mai le tulaga o le faatuatua, faamaoni, ma le faalagolago mausali, o le tatalo a se tamaitiiti mama o le a mautinoa lava le mauaina o se tali ua sili ona saunia mai se Tama alofa.¹¹

O musumusuga a le Atua o loo vaaia i le moomia lea ona tausia e le Au Paia o Aso e Gata Ai o o latou aiga ina ia maopoopo, ma ia aoaoina a latou fanau i mataupu faavae o le talalelei a Iesu Keriso. O lea, ou te le o faapea atu e tatau ona tatou faia lena aoaoga ia matuai aloaia lelei po o soo se auala e le manaia. O le uiga o lau faamatalaga o le talalelei a Iesu Keriso e tatau ona pupula i totonu o fale uma; e tatau ona faia tatalo i le po ma le taeao i le faamaoni; ia iloa e tamaiti i aso uma o loo tatou mananao ia i ai le Atua i totonu o lo tatou fale. Afai e mafai ona tatou valaauliaina atu ai iina le Faaola, o le a mafai ona tatou iloa o le a le gata e mananao ae o le a naunau foi ia agelu e puipuia o tatou atalii ma afafine. Ou te talitonu o le tele lava o aiga o loo aoaoina ai tama ma teine ina ia tatalo i le po a o lei momoe. Ae peitai, ou te talitonu, i lona tulaga lautele, o loo teenaina ia tatalo i le taeao. Afai tatou te mafaufau i ai, e ui lava o taimi faatoa feala mai ai ae e moomia lava e tama ma teine le puipuiga a le Atua, ma le taitaiga a lona Agaga Paia, e sili atu nai lo le taimi o le a latou momoe ai.¹²

Po o e mulimuli ea i le apoapoaiga a Keriso ina ia tatalo atu i le Tama ma aoaoina lau fanau ia tatalo, ma o le amioatua, le faaaloalo mo le Atua ma lana galuega, ia faagaeetia ai loto o lau fanau i aso uma? O le mea lena e tatau ona i ai i fale uma. Aua le tatalo mo na o i tatou lava, ae ia tatalo foi mo o tatou fili.¹³

Matua, afai e leai se isi mea e te faia, tootuli i lalo faatasi ma lau fanau i le taeao. Ou te iloa o ou taeao e masani lava ona pisi, … ae ia maua se taimi e te mafai ai ona tootuli ma valaaulia atu le Atua i totonu o lou fale. O le tatalo o se malosiaga e le mafaatusalia.¹⁴

O le tatalo faaleaiga e mafai ai e matua ma fanau ona oo atu i le afioaga o le Atua.¹⁵

O le aoga o … tatalo i le Ekalesia aoao na oo mai ia te au ananafi ina ua ou maua se tusi mai se tuaoi i lo’u nuu ua leva. Sa tatau e ia susu o ana povi i le taimi na ta’u mai ai i le leitio lea sa i lona falesaito, ua maliu Peresitene [Siaosi Alapati] Samita. Sa ia lagona le uiga o lena mea i lona uso a tagata mai lo latou nuu, ona ia tuua lea o lona falesaito a e alu atu i le fale ma ta’u i lana ava. O le taimi lava lena sa la valaauina ai le la fanau laiti, ma o iina i totonu o lena fale faatauvaa, na taofia ai a latou galuega, a e tootutuli ifo i latou i lalo o se aiga ma faia se tatalo. O le taua o lena tatalo ou te tuu atua ia te outou ia malamalama i ai. Ia faatele lena mea i le selau o afe, i le afa miliona o aiga, ona tagai lea i le mana o le aufaatasi ma talosaga, ma le aafiaga lagolago o le tino o le Ekalesia.¹⁶

Afai e mafai ona tatou uunaia o tatou tagata ina ia … maua le faatuatua e faalatalata atu ai i le Atua i le mea lilo, e le itiiti ifo ma le fa ni faamanuiaga silisili o le a oo mai ia i latou iinei i le taimi nei. O le faamanuiaga muamua o le lotofaafetai—faafetai mo faamanuiaga ia latou te leiloa latou te faafetai atu ai. O le a faatumulia o latou agaga i le faafetai atu mo mea ua faia e le Atua mo i latou. O le a latou iloa ona faatamaoaigaina i latou i mea e mananao i ai. O le alii talavou e tapunia le faitotoa i ona tua, o le na te tosoina ia pupuni, ma saunia ai ma le filemu o ia iina e aioi atu i le Atua mo le fesoasoani, e tatau ona muai liligi atu lona agaga i le faafetai atu mo le ola maloloina, mo uo, mo e pele, mo le talalelei, mo faaaliga o le i ai o le Atua, e pei ona vaaia i papa ma laau ma maa ma fugalaau, ma mea uma o loo siomia ai o ia. E tatau ona ia muai faitauina le tele o ona faamanuiaga, ia taitasi, ma o se mea o le a ofo ai o ia i mea ua faia e le Alii [tagai i le “Faitau Ou Manuia, ” Viiga, nu. 151].

O le faamanuiaga lona lua o le tatalo o le taitaiga lea. E le mafai ona ou mafaufau i se alii talavou e se ese o le e tootuli i lalo i autafa o lona moega i le taeao ma tatalo atu i le Atua ina ia fesoasoani ia te ia ina ia tausia o ia ia mama mai agasala a le lalolagi. Ou te manatu o le a le mamao ese atu le sese o le teineitiiti talavou o le e tootutli i le taeao ma tatalo atu ina ia mafai ona tausia o ia ina ia mama ma atoatoa i le gasologa o le aso. E le mafai ona ou mafaufau i se Au Paia o Aso e Gata Ai o le na te taofia ni lagona leaga i lona loto pe afai o le a ia tatalo atu ma le faamaoni i le mea lilo i le Atua ina ia aveesea mai lona loto lagona le fiafia uma e faasaga i soo se tasi o ona uso a tagata. Taitaiga? Ioe, o le a i ai iina le Atua ina ia taitaiina ma faatonutonuina le “o le a saili atu ia te Ia i le faatuatua ma lona malosi atoa ma lona agaga atoa.“

O le faamanuiaga lona tolu o le talitonu lea o le tagata ia te ia lava. I lenei atunuu atoa o loo i ai le faitau fiaafe ma le fiasefulu o afe o tamaiti aooga o e o loo tauivi ina ia maua se aoaoga. Ia tatou aoaoina nei tamaiti aooga afai latou te mananao ina ia faamanuiaina i a latou lesona, e tatau ona latou saili i lo latou Atua, ma o loo tu latalata atu le faiaoga silisili ua lauiloa i le lalolagi i o latou autafa e taitaiina i latou. O le taimi lava e lagona ai e le tamaitiiti aoga e mafai ona ia faalatalata atu i le Alii e ala i le tatalo, o le a faapea ona maua loa e le tamaitiiti lona talitonuina o ia lava e mafai ona faamaeaina ana lesona, e mafai ona ia tusia lana tautalaga, e mafai ona ia tu atu i luma o isi tamaiti aooga ma tuuina atu ai lana savali e aunoa ma le fefe po o le popole. O le talitonu o le tagata ia te ia lava e oo mai e ala i le tatalo faamaoni.

O le vaega mulimuli o le a ia maua musumusuga. E le o vaaiga faalemafaufau, faapea e mafai ona tatou faalatalata atu i le Atua ma e mafai ona maua lona malamalama ma le taitaiga mai ia te Ia, ma o le a faamalamalamaina o tatou mafaufau, e faagaeetiaina o tatou agaga e ala i Lona Agaga. … Na iloa e Iosefa Samita; ma o le molimau, o le faamaoniga o musumusuga na oo i le Perofeta o Iosefa o le faaaliga lea i tagata uma lava o e o le a tatalaina o latou mata e vaai ai ma o latou loto ina ia malamalama.¹⁷