O Le Soifua Auauna o Tavita O. MaKei

I le masina o Aperila i le 1951, ina ua 77 tausaga o lona soifua, sa avea ai Tavita Omani MaKei ma Peresitene lona iva O Le Ekalesia a Iesu Keriso o le Au Paia o Aso e Gata Ai. Toeitiiti atoa le 20 tausaga o avea ma Peresitene, ma sa faaaloalogia e tagata o le Ekalesia ma le toatele lava o isi i le lalolagi atoa, o se perofeta a le Atua. A o ia uunaia tagata o le Ekalesia e atiina ae uiga faaKeriso ma fetufaai atu le talalelei e le gata i le aoao atu ae faapea foi i faataitaiga, sa matauina le vave faatupulaia o le Ekalesia i le lalolagi atoa. E le gata i ana aoaoga, ae o ona foliga tino mai sa matua malosi ai foi se uunaiga. E toatele tagata latou te feiloai ma latou faapea mai, e le gata ina saunoa o ia ma aga i aga a se perofeta, ae o foliga uma lava foi o se perofeta. E oo lava i toe tausaga o lona soifua, e umi ma e faasasa’o aulelei lona fuaitino, ma lona lauao mafiafia, migimigi sinasina. E susulu mai i ona foliga le soifua amiotonu na ia soifua ai.

O Se Tofi ma Tulaga Faatonuina Maualuluga a o Laitiiti

I ana aoaoga a o avea ma Pulega Aoao, e masani ona ta’ua ma le loto faafetai e Tavita O. MaKei le tofi ma faataitaiga sa ia maua mai ona matua. O le aiga o lona tama, o Tavita MaKei, sa auai i le Ekalesia i Thurso, i Sikotilani i le 1850. I le 1856, sa malaga ai le aiga i Amerika, ma ina ua maea ona faigaluega ma teu a latou tupe mo le tolu tausaga, sa latou laasia ai loa laufanua valevalenoa agai i Iuta, ma taunuu ai i le Aai o Sate Leki ia Aokuso i le 1859.¹

O le tausaga lava foi lena na auai le aiga o le au MaKei i le Ekalesia i Sikotilani (1850), na talia ai e le aiga o le tina o Tavita O. MaKei o, Jennette Evans, le talalelei toefuataiina e latalata i Merthyr Tydfil i Uelese i Saute. E faapei foi o le aiga o le au MaKei, sa malaga le aiga o Evans i Amerika i le 1856 ma taunuu ai i Iuta i le 1859. E lei pine ae mautu aiga uma nei e lua i Ogden, i Iuta, ma o iina na feiloai ai Tavita MaKei ma Jennette Evans ma alofa ai le tasi i le isi. Sa faafaaipoipoina i laua e Elder Uilifoti Uitilafi, i le aso 9 o Aperila i le 1867 i le Fale mo Faaeega Paia.²

I le aso 8 o Setema, 1873 i le taulaga itiiti i Iuta o Huntsville, sa soifua mai ai Tavita O. MaKei—o le lona tolu o le fanau a o le tama tama muamua lea a Tavita ma Jennette Evans MaKei. Sa fiafia lona olaga faatamaitiiti ae le faapea e lei fetaiai ai ma ni faigata. I le 1880, sa i ai ni mea na tutupu ma sa tofotofo ai ma faamaonia le faatuatua o le aiga ma vave ai ona faatagata matua Tavita O. MaKei a o laitiiti lava. Sa maliliu felata’i ona tuafafine matutua e toalua o Margaret ma Ellena, na maliu le tasi i le fiva rumatika a o le isi o le nimonia. Pe tusa ma le tausaga mulimuli ane, ae maua le valaauga o lona tama e faamisiona i Sikotilani. Sa fai si faaletonu o Tavita MaKei pe talia le valaauga aua o lona uiga o le a tuua na o lona toalua (o loo maitaga) e tausi ma vaai le aiga ma le faatoaga. Peitai, ina ua faalogo Jeannette e uiga i le valaauga, sa mausali lana tali: “E tatau ona e taliaina; e leai se mea e te popole ai fua ia te au. O le a faitalia ma’ua ma Tavita O. ona vaai faalelei mea!”³ Ona o lenei faamalosiau ma le mautinoa o le fesoasoani mai o tuaoi ma aiga, na talia ai e Tavita MaKei le valaauga. O ana upu faamavae ia Tavita O. faatoa fitu tausaga le matua o le “vaai faalelei Mama.”⁴

O le faatautaiga poto a Jennette MaKei, o le galulue malosi a le toatele, faapea foi faamanuiaga mai le Alii, na matua manuia ai le faatoaga a le aiga o MaKei, e ui lava ina toesea Tavita MaKei mo le lua tausaga. O lenei taimi atoa, ma i le soifuaga atoa o Jennette MaKei, sa matua mataalia ai o ia i le taulimaina o le uelefea faaleagaga o le fanau: “O tatalo faaleaiga o se faiga mautu i le aiga o MaKei, ma ina ua tuua na o Jennette ma si ona aiga laiti, sa foliga o se mea aupito taua o mea e fai i le aso. Sa aoaoina Tavita [O] e tatalo i taeao ma afiafi ma sa ia aoaoina foi le taua o faamanuiaga o le lagi i totonu o le aiga.”⁵

E tele taimi e ta’ua ai e Peresitene MaKei lona tina o se faataitaiga e tatau ona mulimuli ai tagata. I se tasi saunoaga sa ia ta’ua ai e faapea: “Ou te le iloa po o le a se amioatua faatamaitai e le o i ai i lo’u tina. … E manatu lana fanau, ma isi tagata uma e iloa lelei o ia, o ia o se tamaitai lalelei tele ma le mamalu. E ui i lona loto naunautai, ae o se tagata e toafimalie ma loto pulea. E vave lava ona iloa i ona mata lanu enaena malosi se lagona ua fana’e, ae e matua lelei lava lona faafoeina. … O lona agamalu, tausiga mataalia, alofa ma le onosai, faamaoni i le aiga ma aia tatau, na foliga mai ai ia te au a o ou laitiiti, faapea foi ma le taimi nei, e matua silisili lava o ia.”⁶

Ina ua fesiligia Tavita O. MaKei e ta’u mai le igoa o le tamaloa aupito sili ua ia feiloai i ai, sa ia tali mai e aunoa ma se faatuai, “O lo’u tama.”⁷ Ina ua taliu mai lona tama i lana misiona, sa avea o ia ma epikopo o Uarota a Eden ma Huntsville mai le 1883 seia oo i le 1905.⁸ Sa fetufaai e Tavita MaKei le Matua le tele o aafiaga ma lana molimau i lona atalii laitiiti. Sa manatua e Peresitene MaKei: “A o ou laitiiti, sa ou nofonofo ai ma faalogo i lena molimau mai se tasi sa ou faapelepele i ai ma faamamaluina e pei ona outou silafia e leai lava se isi tamaloa na pele i lo’u loto i lenei lalolagi, ma sa faamautuina lena talitonuga i lo’u talavou.”⁹ Sa avea le malosi o faataitaiga ma le molimau a lona tama, na lagolagoina ai o ia a o tuputupu ae lona malamalama i le upumoni.

O le olaga i aso faisoo, sa aoaoina ai Peresitene MaKei e lona tama, i ni lesona e faamalosi ai o ia ma sa ia faaaogaina i aoaoga ina ua avea ma Aposetolo. Sa ia faamatalaina i se tasi aso sa la aoina ai ma lona uso ia vao mago. O le uta lona sefulu sa tatau ona ave e fai ma sefuluai i le Ekalesia. Sa fai atu le tama o Tavita O. MaKei i ona atalii, e ao mai le uta lona sefulu mai le vaega e sili atu ona lelei nai lo le mea lea sa ao mai ai isi vao. Fai mai lona tama, “O le uta lona sefulu lena, ma e leai se isi uta e sili ona talafeagai mo le Atua.” I ni tausaga mulimuli ane, fai mai, Tavita O. MaKei o le “lauga aupito sili lenei ona taua ua ou faalogo i ai talu ona ou ola e uiga i le sefuluai.”¹⁰ Sa aoaoina foi o ia e lona tama ina ia faaaloalo i tamaitai. Sa faamatala e Peresitene MaKei i le autalavou, “Ou te manatua le apoapoaiga a lo’u tama ina ua amata ona ou tafao faamasani i se teineitiiti i lo’u talavou: ‘Tavita, fai faalelei lena tamaitai talavou e faapei ona e manao e fai e se tama talavou i lou tuafafine.’”¹¹

I se taimi mulimuli ane, a o avea ai ma Peresitene o le Ekalesia, sa ia tulei ai i le saafiafiga lenei e uiga i ona matua: “Ou te faafetai tele ona o le tausiga ma aoaoga a ni matua tamalii … o se tausiga na taofia mai ai au mai le liliu atu i ala semanu e tau atu ai i se olaga e matua ese lava! O tausaga taitasi e faateleina ai lo’u agaga talisapaia ma le alofa mo se tina mataala, ma le faapelepele, ma se tama tamalii.”¹²

Talavou

A o talavou, sa tofia Tavita O. MaKei e galue i le au peresitene o le korama a tiakono. O aso na, sa vaai ai e tiakono o le uarota le falelotu ma faamama, tata fafie mo ogaumu o le falelotu, ma mautinoa o tofu fafine o le uarota ua oti a latou tane ma ni fafie.¹³ Sa ia faamatala i uso o le korama, na te “lagona na te le mafai ona faatumu lena tulaga aua o loo i ai isi na te iloa e agavaa atu nai lo ia, … [peitai] ua ia lagona o le a fesoasoani mai le Alii.”¹⁴ O lona uiga masani lea o le lotomaualalo sa ia taliaina ai valaauga i lona soifuaga atoa.

Ona o ia o le atalii o le epikopo, o lea sa ia maua ai le avanoa e feiloai ai ma taitai o le Ekalesia sa asiasi atu i lo latou aiga. Sa i ai se taimi sa asiasi atu ai Peteriaka Ioane Samita i le masina o Iulai, 1887, ma tuuina atu ai ia te ia lona faamanuiaga faapeteriaka. (O le taimi lena ua 13 tausaga o Tavita O.). Ina ua uma le faamanuiaga, sa tuu e Peteriaka Samita ona aao i tauau o le taulealea ma faapea atu, “Alii, e i ai se isi mea e tatau ona e faia e ese mai le pele mapu.” Sa alu Tavita i se taimi mulimuli ane i le umukuka ma fai i lona tina, “Afai ua manatu o ia e tuu lo’u pele mapu, ua sese lona manatu.” Sa tuu e le tina ana feau, ae taumafai e faamalamalama le uiga o le tala a Uso Samita. E ui lava ina sa le i iloa lelei e Tavita O. MaKei po o lona tina foi le mea o loo faatalitali mai mo ia i le lumanai, ae na faaalia i lea aafiaga, e i ai ni matafaioi tetele mo le taulealea, o loo faatalitali mai le Alii.¹⁵

I tausaga uma o lona talavou, sa tumau lona toaga e auauna i le Ekalesia ma saga maua ai e ia le malamalama ma le poto masani. I le tausaga e 1889, ina ua 15 ona tausaga, sa tofia ai o ia e failautusi i le Aoga Sa i le Uarota a Huntsville, o se tofiga na ia umia seia oo i le 1893, ina ua tofia o ia e avea ma faiaoga o le Aoga Sa.¹⁶ Na faaauau pea lona fiafia tele i le Aoga Sa ma le avea ma faiaoga i lona soifuaga atoa.

Aoga, Auaunaga Faafaifeautalai, ma le Faaipoipoga

Sa tusia i se taimi e Tavita O. MaKei, “E tolu lava vaitau sili i le olaga o se tagata i le lalolagi, e faalagolago i ai lona fiafia iinei ma le faavavau, [o ia mea o] lona fanau mai, o lana faaipoipoga, ma lana filifiliga o se galuega.”¹⁷ Ona ua manuia o ia i lona soifua mai ma tausia i se aiga amiotonu, o lea na faaauau ai pea lava ona manuia ona o ana faaiuga poto e tusa ai ma ana a’oga, o galuega, ma oo ai i lana faaipoipoga.

Ina ua maea ana aoga i le vasega valu i Huntsville, sa aoga o ia i le Aoga Tumaoti a le Siteki o Weber i Ogden mo le lua tausaga. Ona toe foi ai lea o ia i Huntsville i le 1893–94, ina ua 20 tausaga o lona soifua, ma galue ai o se faiaoga i le aoga tulagalua a le aai. O le taimi foi lea, sa tuuina atu ai e Tinamatua Evans se meaalofa tupe e $2, 500 i ana fanau taitoatasi sa soifua. Sa utiuti tupe mo le aiga o MaKei, ma sa fautuaina e o latou tuaoi le tina o Tavita O. MaKei, o Jennette, e teu faavaitaimi ana tupe. Peitai, sa ia tautino mai, “O sene taitasi uma o lenei tupe e alu i le faaaoogaina o le ma fanau.”¹⁸ O le mea lea, i le tautoulu o le 1894, na malaga ai o ia [Tavita O.] ma nai ona tei e toatolu (o Thomas E., Jeanette, ma Anne) i se taavale solofanua i le Aai o Sate Leki, e aooga i le Iunivesite o Iuta. O lea taavale sa tumu i falaoamata ma fagu fualaau aina ma sa i ai foi ma se povi taususu sa mulimuli atu ai i tua.¹⁹

I le faamatalaina o le mea na oo i ai Tavita O. MaKei i le iunivesite, na tusia ai e lona atalii o Llewelyn e faapea: “Sa taua le aoga. Sa faatuputeleina le fiafia e aoao; sa faia ni faauoga mafana; ma sa faatupulaia foi ona tulaga tausaafia lelei. Na avea o ia ma Peresitene o lana vasega ma sa filifilia e faaao i ai le vasega faauu. … O lona auai ma le naunautai i taaloga, na avea ai o ia ma tama taalo puipui i le itu taumatau o le au lakapi faa-Amerika a le iunivesite. O le mea aupito sili na tulai mai i lea taimi, o le la masaniga lea ma Emma Ray Riggs.”²⁰

I le tausaga lona lua o a latou aoaoga faaiunivesite, sa mautotogi ai le au aooga a le au MaKei i se fale o Emma Robbins Riggs, le tina o Emma Ray Riggs. I se tasi aso, sa tutu ai le tina ma lana tama teine lea i le faamalama ma tilotilo atu i le taunuu ane o Tavita O. ma Thomas E. MaKei ma lo laua tina. Sa faapea le tala a le tina o Emma Ray: “Ua i ai ni taulelea talavou se toalua o le a avea ma ni tane lelei i ni teine laki. Vaai foi e ese le alolofa i lo la tina.” Ona faapea lea o le tala a Emma Ray, “Ou te manao i le la e enaena lona lanu, ” o Tavita O. MaKei lena. E ui lava ina sa na o ni nai taimi itiiti sa la’ua fevaaia’i ai ma Emma Ray Riggs, ae e lei i ai se la sootaga vavalalata vagana ai ina ua mavae ni nai tausaga mulimuli ane.²¹

Ina ua maea ana aoga i le iunivesite i le tautotogo o le 1897, sa ofoina atu ia Tavita O. MaKei se galuega e faiaoga ai i le Itumalo o Sate Leki. Sa fiafia o ia i lea galuega ma sa ia manao loa e amata ona faigaluega ia maua ni tupe e fesoasoani ai i le vaega o totoe o lona aiga. Peitai, o le taimi foi lea sa ia maua ai ma talia se valaauga e faamisiona i Peretania Tele.

O le aso 1 o Aokuso i le 1897, sa faamanuia ai o ia e Peresitene Seymour B. Young ina ia galue auauna o se faifeautalai i Atumotu o Peretania. O le vaega muamua o lana misiona sa faaalu i Stirling, Sikotilani, i le vaega sa telegese ai ma faigata le galuega. Sa ia faataunuuina i le maelega atoatoa lana galuega ma o le aso 9 o Iuni 1898, sa tofia ai o ia e pulefaamalumalu i faifeautalai i Sikotilani. Ina ua maua lea valaauga, sa ia liliu atu i le Alii mo se fesoasoani. O ona tiutetauave i lenei valaauga na ia maua ai le atamai ma le poto masani e sili atu nai lo tausaga o lona soifua, ma saunia ai o ia mo le galuega i le lumanai.

Toe tolu masina ona taliu lea o ia i le fale, ae tupu le isi aafiaga taua tele. A o talavou o ia, sa masani ona ia tatalo mo se faamautinoaga faaleagaga o lana molimau. O le aso 29 o Me 1899, sa auai o ia i se sauniga faamanatu faafaifeautalai. Sa ia faamatalaina: “Ou te manatua, e pei o ananafi lea na faatoa tupu ai, le o’oo’o o musumusuga i lena sauniga. Sa tasi le loto ma tasi foi le mafaufau o i latou uma sa auai. E leai se taimi muamua na ou oo ai i se lagona faapea. O se faaaliga na oo mai ao ou talavou, sa ou tatalo faalilolilo ai ma le pulunaunau i tafãmauga o le lotoa manu. O se faamautinoaga mai ia te au, o tatalo faamaoni, ‘e i ai le taimi, e i ai foi le nofoaga e tali mai ai.’ A o faagasolo le sauniga, sa tulai se alii faifeau i lona lava lotofuatiaifo ma faapea mai, ‘Uso e, o loo i ai agelu i lenei potu.’ Sa foliga e ese lava, ae o lea faasilasilaga sa le o se mea na ofo ai se isi; ae moni lava, sa foliga na matua faatumulia, e ui lava ina ou te le i vaaitino i le auai mai o au o le lagi. Na pau le mea sa ou iloa, sa lofituina au i le loto faafetai ona o le mafuta mai o le Agaga Paia.”²² Sa maea ma le mamalu le misiona a Elder MaKei, ma sa faamalolo mai i le masina o Aokuso i le 1899.

I le taimi o lana misiona, sa la fetusiai ai ma Emma Ray Riggs, po o “Ray, ” lea sa ia valaau ai ma le faamamai o ia (o le igoa sa faaigoaina ai o ia e ona matua o se ave o le la). Sa amata ona fuga tele la la’ua masaniga e ala i fetusiaiga i le meli i le va o Sikotilani ma le Aai o Sate Leki. Sa vaaia e [Tavita O.] ia [Ray] o se tagata e tutusa lelei lava ma ia i soo se itu, e aofia ai ma le atamai, o aga faatamalii, ma uiga tausaafia faaleagaga.

Sa faaauau e [Ray] lana aoga a o faamisiona Tavita O. MaKei, ma ina ua uma ona faauu o ia i lona faailoga o le B.A. i mea tau aoaoga, sa galue o ia i le Aoga a Madison i Ogden, i Iuta.²³ O le taimi foi lea, i le tautoulu o le 1899, sa avea o ia o se tasi o faiaoga i le Aoga Tumaoti a le Siteki o Weber. I lena tausaga faaleaoaoga, sa tele lava ina la’ua feiloai i se paka e i le va o aoga sa faiaoga ai. O iina, i le masina o Tesema i le 1900, na faamalamalama ai [Tavita O.] ia [Ray] la te faaipoipo. Sa fesili [Ray] ia te ia, “Pe ua e talitonu o a’u tonu lava?” Sa ia fai mai ua tonu lava.²⁴ O le aso 2 o Ianuari 1901, na avea ai Emma Ray Riggs ma Tavita O. MaKei ma uluai ulugalii i le senituri e 20 sa faaipoipoina i le Malumalu o Sate Leki.

O Se Faiaoga Tautaua

I le 1902, ina ua 28 tausaga o lona soifua, sa avea ai o ia ma puleaoga o le Aoga Tumaoti a le Siteki o Weber. E ui lava ina tele tiutetauave faaletaitaiga, ae sa faaauau pea lava ona tu malosi i le aoaoina o tamaiti aoga. Sa tumau lona naunautai i tulaga faaleaoaoga i lona olaga atoa, ma lona talitonuga “o aoaoga moni, e le gata ina saili ia avea alii ma tamaitai ma tagata faamatematika lelei, o tagata tomai i gagana, o saienitisi maoae, po o tusitala ma tusisolo tulaga ese, ae faapea foi ni alii faamoni, e amioatua, faapalepale, ma le alofa faauso. E saili foi ia aoaoga ina ia avea alii ma tamaitai e avea le upumoni, faamasinoga tonu, poto, agalelei, ma le amio pulea e fai ma mea aupito silisili e mauaina i se olaga manuia.”²⁵

Sa talitonu o ia e taua aoaoga mo tagata uma. Sa galue o ia o se puleaoga i se vaitaimi sa matua toaitiiti ai tamaitai e oo i ni aoga maualuluga. I le talanoaina o le matafaioi a tamaitai, sa ia tusia ai mea nei: “E lei tele se faatauaina o le vaega sa faia e tamaitai i le atinaega o le Malo i Sisifo. O lea tulaga sa faaalia ai lo tatou mulimuli i faiga masani a tagata i augatupulaga ua mavae. E gafa tamaitai ma le tauaveina o tiute faaleaiga, e tauaveina le tele o tiute i le tausiga o se aiga, e uunaia a latou tane ma atalii ina ia manuia; ma pe a faaeaina ma faamamaluina tane ma atalii ina ua faamanuiaina, ona na ona soisoi fiafia ai lea o ava ma tina e aunoa ma se faalauiloaga, ae o latou tonu ia e tatau ona aloaia ma ave i ai le faamalo.”²⁶ A o galue ai o ia i le Aoga Tumaoti a le Siteki a Weber, sa ia faamamafaina le taua o aoaoga mo itupa uma e lua, ma sa matua faatoateleina tamaitai sa lesitala mo aoga i lona taimi.

I tausaga sa galue ai o ia o se faiaoga faapolofesa ma se taitai pule i le Aoga Tumaoti o le Siteki a Weber, sa galue foi o ia i le au peresitene o le Aoga Sa a le Siteki a Weber, ma sa ia faatuina ai foi ni polokalama fou. I le taimi sa tofia ai o ia i le au peresitene o le Aoga Sa, sa lei tele ni faatonuga aloaia na maua mai e le faalapotopotoga mai le taitaiga aoao a le Ekalesia. I le avea ai o Tavita O. MaKei ma fesoasoani lua i le faatonusili—na tofia e galue i le potuaoga—sa amata loa lava ona ia galue i le faaleleia o le faiga o aoga i le potu aoga ma aoaoga e ala i le faaaogaina o metotia sa ia aoaoina mai ma avea ai ma faiaoga faapolofesa. Sa faamatalaina e se tasi taitai o le Aoga Sa lana galuega e faapea:

“Sa ia muai faia ni fonotaga faalevaiaso a sui o le au faatonu a le siteki. Sa ia aoaoina ia sui nei i le faataatiaina o se otootoga o lesona ma le filifilia o se mea e tulimatai (lea ua faaigoa nei o le faamoemoega) mo lesona taitasi. Sa ia aoaoina i latou i le faatulagaga ma le faamalamalamaina o le faamoemoega. Sa ia faamamafaina le tuuina atu o le lesona ma le faaaogaga o le faamoemoega i olaga o tamaiti taitasi. Sa sosoo ai ma se fonotaga … faalemasina lea sa valaaulia ai faiaoga uma o le Aoga Sa ma taitai o uarota, a ua uma ona faitau ia lesona o le a talanoaina. … O le iuga la o nei … fonotaga, e taape faiaoga ma se ‘afisiga o faamatalaga tusitusia’ e uiga i lesona taitasi e fa mo le masina o lumanai. … [O nei] fonotaga sa matua faatauaina ma e tai 90 pasene e oo lava i le 100 pasene le auai i fonotaga taitasi.”²⁷

Sa vave ona salalau le ala i le matua faamanuiaina o le Aoga Sa a le Siteki o Weber. Sa matua faagaeetia ai Iosefa F. Samita, o le sa avea ma faatonusili aoao o Aoga Sa, i manatu po o metotia fou a Tavita O. MaKei e faatatau i le aoaoina atu, ma sa ia valaaulia ai o ia e fai sana tusiga i le Juvenile Instructor, o se mekasini a le Aoga Sa.²⁸

Aposetolo a le Alii

Faamamafa mo le Aoao Atu ma le Aoao Mai

I le aso 9 o Aperila 1906, ina ua mavae tausaga e ono sa galue ai i le Aoga Sa a le Siteki o Weber, sa faauuina o ia e fai ma Aposetolo ina ua 32 tausaga o lona soifua. E lei leva, ae lagolagoina foi o ia e fai ma fesoasoani lua i le au faatonusili o le Aoga Sa Aoao. Ona avea ai lea o ia ma fesoasoani muamua i le 1909, ma faatonusili aoao mai le tausaga e 1918 i le 1934. O metotia fou lava ia sa ia faaaogaina i le Aoga Sa a le Siteki o Weber, sa vave foi ona faaaoga e le Ekalesia atoa. Ina ua vaaia le tulaga manaomia o le ogatusa o lesona, o lea sa ia tusia ai le tusi e ta’ua O Aposetolo Anamua [Ancient Apostles], lea sa saunia e fai ma se tasi o uluai tusi lesona a le Aoga Sa.

Sa lauiloa le igoa o Elder MaKei i le Aoga Sa i tausaga sa ia galue auauna ai i le Korama a le Toasefululua, ma sa ia tusia pea lava foi lesona mo le Aoga Sa ina ua avea ma Peresitene o le Ekalesia. A o galue ai mo le faaleleia atili o aoaoga faaletalalelei, e masani ona tulimatai atu lana faamamafa i tamaiti. I ana saunoaga, o tamaiti e o mai “mai le Tama e mama atoatoa ma le le pona, e aunoa ma se ila po o ni vaivaiga. … O o latou agaga e faapei o se pepa paepae e leai se pisia o le a tusia ai faanaunauga po o faataunuuga o le olaga.”²⁹ Sa ia vaavaai atu i le Aoga Sa, o iina o loo tauaveina ai se matafaioi autu i le aoaoina ma le atiina ae o fanau ma le tupulaga talavou.

Malaga Taamilo i le Lalolagi ma o le Peresitene foi o le Misiona i Europa

E i ai isi aafiaga sa saunia ai Tavita O. MaKei na te taitaia se Ekalesia i le lalolagi atoa i se taimi mulimuli ane. O le masina o Tesema i le 1920, sa faamanuia ai i laua ma Elder Hugh J. Cannon, o le faatonu o le mekasini o le Improvement Era, i ni tofiga e Peresitene Heber J. Grant ma lona fesoasoani muamua, o Peresitene Anthon H. Lund, e malaga taamilo e asiasi i misiona uma ma aoga a le Ekalesia i le lalolagi atoa. O lea malaga taamilo, lea na atoa le tausaga o fai, sa la faimalaga ai i le tusa o le 60, 000 maila (e sili atu ma le faaluaina o le fua faataamilo o le lalolagi mai le Ekueta), ma sa la aoao atu ai ma faamanuia ia tagata o le Ekalesia i le lalolagi atoa. E ui lava i faigata e pei o le ma’ivasa, ma’i manatu, ma isi luitau i le faigamalaga, ae sa faamanuiaina la la’ua misiona ma toe taunuu manuia ai i o laua aiga i le Po a o le ao le Kerisimasi, 1921. Ina ua mavae nai aso talu ona la’ua taunuu, sa la tauaaoina atu loa se lipoti atoa ia Peresitene Grant ona faamalolo faamamaluina ai lea o i laua.³⁰ I le konafesi aoao muamua talu ona la toe taliu mai, sa tautino mai ai e le Peresitene e faapea:

“Ua ou olioli ina ua tatou mafuta faatasi ma le Uso ia MaKei i le aso. Sa taamilo Uso MaKei i le kelope talu le taimi mulimuli na vaaia ai o ia i se konafesi—sa asia a tatou misiona i le toetoe o vaega uma o le lalolagi, ma ua toe taliu mai, e faapei foi ona taliu mai faifeautalai uma e malaga atu mo le talaiga o lenei talalelei ma feiloai ai ma tagata i le lalolagi i ituaiga faatuatuaga eseese o i ai i le lalolagi, ma le malamalama ua faateleina, o le atamai ma molimau e uiga i le paia o le galuega o loo tatou feagai ai.”³¹

Ina ua oo i le taimi e saunoa ai Elder MaKei i le konafesi, sa ia faia ma se molimau malosi se aotelega o lana faigamalaga: “Ina ua ma tuua o ma aiga, … sa ma sagisagi atu ma le popole tele ma le atuatuvale i le malaga o loo ma agai atu i ai. … O le lagona naunautai i lo ma tiutetauave, o le faataunuuina lelei o le finagalo o Peresitene Grant ma ona fesoasoani ma le Toasefululua, o e ua latou faamamaluina i ma’ua i lena valaauga, na mafua ai ona ma saili i le Alii e pei ou te le i sailia lava o ia i se taimi muamua i lo’u olaga, ma ou te fia fai atu i lenei afiafi, o le folafolaga na tuuina atu e Mose i le fanauga a Isaraelu ina ua toe o ni aga ona latou laasia lea o le Vai o Ioritana i le nuu na Folafolaina, ua taunuu i mea ia na ma oo i ai. A o ma saili atu i le Alii ma o ma’ua agaga atoatoa, sa Ia taitai ma fesoasoani ia te i maua.”³²

E lei umi ona taliu mai o ia mai lana malaga taamilo i le lalolagi, ae tofia e avea ma Peresitene o le Misiona i Europa. Sa malaga atu o ia i Livapulu ia Novema 1922. O le valaauga lenei sa amata ai e ia ona aoao atu le manatu faavae o le “o tagata uma o le ekalesia o se faifeautalai, ” o se faamamafa sa ia faaauauina pea mulimuli ane ina ua avea ma Peresitene o le Ekalesia. A o avea o ia ma Peresitene o le misiona, sa ia toe faatulagaina faifeautalai i ni vaega, e i ai ni faifeautalai sa fai ma toeaina e malaga e fesoasoani i le aoaoina o isi faifeautalai i auala po o metotia e sili atu mo le faia o aoaoga. O se tasi o ona luitau tele o le fetaiai lea ma lipoti le lelei a nusipepa. O lana metotia la, o lona faafesootaia lea e ia lava o faatonu o nusipepa ma talanoaina ai, ma talosagaina ai se avanoa tutusa e tuuina atu ai le upumoni e uiga i le Ekalesia. E toaitiiti ni faatonu sa teena ana talosaga, ae toatele lava sa tali lelei atu ia te ia.³³ O ona tomai tau i le va fealoai, sa faamaonia o se faamanuiaga tele i le Ekalesia i le taimi o peresitene ai i misiona ma faapea foi i lana galuega.

Lagolagoina i le Au Peresitene Sili

I le tautoulu o le 1934, sa lagolagoina ai o ia e fai ma fesoasoani lua ia Peresitene Heber J. Grant. O Peresitene J. Reuben Clark Jr., o le sa avea ma fesoasoani lua ia Peresitene Grant, ua avea nei ma fesoasoani muamua. E ui ina sa oo mai Peresitene MaKei i le Au Peresitene Sili ma sona silafia tele i le Ekalesia, ae i le aso sa lagolagoina ai o ia, sa maua pea e ia le lotomaualalo ona o le valaauga. Sa ia saunoa: “Ou te le tau ta’u atua ua lofituina lava au. I nai aso ua tuanai atu, sa faigata tele ia te au ona faafoe ou manatu ma lagona. O le fiafia o le loto, ma lagona lelei o le agaga e tatau ona o faatasi ma le tofiga maualuga ua aumai ia te au, e foliga mai sa aveesea i le iloaina o le mamafa o le tiutetauave tele o le valaauga i le Au Peresitene Sili.”³⁴ E oo lava ina ua mavae le tele o tausaga o galue auauna o se Pulega Aoao, ae sa ia tautino mai lava o se mea faigata lava ia te au i taimi uma le lauga atu i se aofia, ” aua ua ia silafia le tele naua o ona tiutetauave.³⁵

I uluai tausaga o Peresitene MaKei i le Au Peresitene Sili, sa feagai tagata o le Ekalesia ma le Pau Tele o le Tamaoaiga. I le 1936, sa fofoga aloaia mai ai e le Au Peresitene Sili le Polokalama o le Puipuiga a le Ekalesia, lea na avea mulimuli ane ma Polokalama o le Uelefea a le Ekalesia. Ona o ia o se lagolago malosi o le uelefea, o lea sa faamamafaina ai e Peresitene MaKei e uiga tutusa lava le faaleagaga ma le uelefea: “E taua le auina atu o lavalava mo i latou e tau leai ni lavalava, [e taua] le auina atu o meaai ia lava mo i latou e tau leai ni meaai, [e taua foi] le fesoasoani ia i latou o loo tauivi ma le faanoanoa ona ua le faigaluega, ae o le mea e aupito sili ona taua, o faamanuiaga silisili e maua mai le Fuafuaga a le Ekalesia mo le Puipuiga, e faaleagaga. E tele atu le faaleagaga e faaalia i le foai atu nai lo le talia mai. O faamanuiaga aupito silisili faaleagaga e maua mai le fesoasoani atu i isi.”³⁶

Ina ua mavae le maliu o Peresitene Grant i le 1945, sa avea ia Siaosi Alapati Samita ma Peresitene o le Ekalesia, ma sa tofia ai Peresitene MaKei e avea ma ona fesoasoani lua. Sa faaauau pea foi ona tiute e pei ona sa i ai muamua, ae ua i ai foi avanoa ma luitau fou e tulai mai pea lava pea. O se tasi o galuega sa aupito sili ona faigata na ia tauaveina, o se tofiga lea e fai ma taitaifono o le faamanatuina o le selau tausaga o Iuta, lea sa tele ni masina sa fuafua ai ae o loo feagai foi o ia ma le mamafa o ona tiute fai. O lea faamanatuga a le setete atoa sa faaiuina ia Iulai 1947, sa faalauiloa aloaia lona faamanuiaina tele. Sa ta’ua i se nusipepa a le setete e faapea:

“Sa sau i le Aai o Sate Leki le alii o Rodney C. Richardson, o le Taitai Faamaopoopo o le selau tausaga o Kalefonia, ma sa ia saunoa ai ua ia faamaonia o lenei faamanatuga ua matua sili atu lona fuafuaina lelei i le atunuu atoa. ‘O le leai o ni gaoioiga faapisinisi pe saili ai ni tupe, o se tasi lea o vaaiga na tulaga ese ai le Faamanatuina o le Selau tausaga o Iuta. O se faamanatuga moni lava faasolopito.’” O se faaopoopoga i tala faaviivii mai Kalefonia, sa tele foi nisi setete sa tusi mai ma talosagaina ia fuafuaga ma isi tusitusiga e faatatau i lea lava faamanatuga.³⁷

Ina ua amata ona fai ifo le soifua o Peresitene Siaosi Alapati Samita, sa faateleina ia tiutetauave o ona fesoasoani e toalua. I le tautotogo o le 1951, sa tonu ai ia Peresitene MaKei ma lona faletua,o Emma Ray, o le a malaga i le la taavale mai le Aai o Sate Leki i Kalefonia mo se malologa sa matua manaomia. Ina ua malolo i St. George, i Iuta, i le po muamua, sa ala mai Peresitene MaKei ma se uunaiga manino ua tatau ona toe foi i le Aai o Sate Leki. I ni nai aso mulimuli ane, sa oso faafuasei ai se gasegase o Peresitene Siaosi Alapati Samita, ma maliu ai lava i le aso 4 o Aperila, 1951.

Perofeta o se Ekalesia i le Lalolagi Atoa

Galuega Faifeautalai ma le Tuputupu Ae o le Ekalesia

Ina ua maea tausaga e 45 sa galue ai o se Aposetolo, sa avea ia Tavita O. MaKei ma Peresitene lona iva o le Ekalesia i le aso 9 o Aperila 1951, ae avea Stephen L. Richards ma J. Reuben Clark Jr. ma ona fesoasoani. I le 1952, sa faatoa fofoga mai ai e le Au Peresitene Sili le uluai fuafuaga faatalaiga aloaia mo faifeautalai faamisiona. Sa fuafua le polokalama e faateleina ai le lelei o faifeautalai faamisiona e ala lea i le saunia o se otootoga faatonuina o lesona e faaaoga e aoao ai tagata sailiili. O lea otootoga sa aofia ai ni lesona se lima sa faaautuina “O Le Tusi a Mamona, ” “Faavae Faasolopito mo le Toefuataiga, ” “Aoaoga Faavae Manino a le Ekalesia, ” “O Tiutetauave o Tagata o le Ekalesia, ” ma le “Avea ma se Uso o le Ekalesia.”³⁸

Ina ua mavae le iva tausaga mulimuli ane, i le 1961, sa ia taloina le uluai semina mo Peresitene o Misiona uma, o e sa aoaoina ina ia faamalosiau i aiga e faaaumea a latou uo ma tuaoi ona tuu atu lea o nei tagata e aoao e faifeautalai i o latou aiga.³⁹ I le faamamafaina o le manatu autu “o tagata uma o le ekalesia o se faifeautalai, ” sa ia uunaia ai tagata uma o le au paia e faia se tautinoga a laitiiti e toatasi se uso fou e aumaia i le Ekalesia i tausaga taitasi. O nei gaoioiga fou sa faatupulaia vave ai le faitau aofai o le Ekalesia faapea foi ma faifeautalai. I lalo o lana taitaiga, sa sili atu ma le faaluaina le tele o siteki (pe tusa ma le 500) a o faatulagaina siteki fou i vaega eseese o le lalolagi i atunuu e pei o Atenitina, Ausetalia, Pasila, Egelani, Siamani, Kuatemala, Mekisiko, o le Atu Netalani, Samoa, Sikotilani, Suitiselani, Toga, ma Urukuei. O le 1961 foi, ina ia taulimaina le tulaga maoae ua i ai le olaola o le Ekalesia, o lea na faa-faitaulaga sili ai uso o le Korama Muamua a Fitugafulu ina ia mafai ai ona latou pulefaamalumalu i konafesi a siteki, ma sa faatuina ai foi le tofi fou o sui risone o le Toasefululua i le 1967.

Malaga a o avea ma Peresitene

E sili atu le tele o maila sa faimalaga ai Peresitene MaKei nai lo isi perofeta na muamua atu ia te ia pe a tuufaatasi maila na femalagaai ai. I le 1952, sa amata ai lana malaga muamua o ana mau malaga taua—o se malaga e iva vaiaso i Europa, lea na ia asiasi ai i atunuu e iva ma ni misiona. I le uluai malologa i Sikotilani, sa ia faapaiaina ai le uluai falelotu o lena atunuu, lea sa fai i Glasgow. O le vaega na totoe o lana malaga lena, sa ia faia ai ni sauniga se 50 faatasi ma tagata o le Ekalesia; sa ia faia foi se anoano o faatalanoaga, ma feutagai ma taitai mai le tele o atunuu.⁴⁰ I le 1954, sa malaga ai o ia i se misiona e motutasi i Aferika i Saute, ma o ia o le uluai Pulega Aoao na asiasi atu i lena vaega o le lalolagi. O le vaega lona lua o lana malaga lena, sa ia asiasi atu ai i le au paia i Amerika i Saute. I le 1955, sa ia asiasi ai i le Pasefika i Saute, ma i se taimi mulimuli ane i le taumafanafana o lena lava tausaga, sa ia toe taliu faatasi atu ai ma le Aufaipese a le Tapeneko i Europa.

Sa ia lagona ua avea ana malaga ma mea “ua iloa ai e tagata o le Ekalesia e le o i latou o ni tagata e faaesea, ae o i latou moni lava o se vaega o le Ekalesia e tasi.”⁴¹ O le taimi muamua lea ua salalau moni ai le Ekalesia i le salafa o le lalolagi. Sa tautino mai e Peresitene MaKei: “Ua faamanuiaina e le Atua le Ekalesia. Ua salalau i le lalolagi. Ua tatau ona lagona lana faatosinaga e atunuu uma. Ia faatosina e lona agaga ia tagata i soo se mea ma faaosofia o latou loto i mea e lelei ma le filemu.“⁴²

Ua faateleina Malumalu

A o i ai o ia i Europa i le 1952, sa ia faia ni fuafuaga e fausia ni malumalu fou, o le uluai malumalu lea o le a fauina i fafo atu o le Iunaite Setete ma Kanata. Sa faapaiaina le Malumalu o Bern Suitiselani i le 1955, ae sa faapaiaina le Malumalu o Lonetona Egelani i le 1958. Sa faapaiaina foi i le taimi o i ai o ia i le au peresitene ia Malumalu o Los Angeles Kalefonia (1956), o le Malumalu o Hamilton Niu Sila (1958), ma le Malumalu o Oakland Kalefonia (1964). I lalo foi o lana taitaiga, sa faaaoga ai lipine filema mo faaeega paia i le malumalu, ua mafai ai ona maua le sauniga i gagana eseese.

Faamaopoopoga ma le Tuufaatasiga

I le 1960, sa tofia ai e le Au Peresitene Sili ia Elder Harold B. Lee e faavae le Fono Faamaopoopo a le Ekalesia, ma le faamoemoe e faamaopoopo ai ma tuufaatasi ia polokalama a le Ekalesia, e faaitiitia ai le aoao o mea e tasi i ni polokalama eseese, ma ia faateleina ai le maeaea ma le lelei. I se saunoaga i se tasi o konafesi aoao sa fofogaina mai ai lenei uluai faiga, ma sa ta’ua ai e Elder Lee e faapea: “O se faiga lenei, na … tau mafaufau i ai Peresitene MaKei, ae o lea ua avea nei ma Peresitene o le Ekalesia, ma ua ia faatonuina ai i tatou e agai i luma, ma tuufaatasi ina ia sili atu ai ona maeaea, ma lelei le galuega a le au perisitua, o ausilali, ma isi iunite ina ia mafai ai ona tatou faasaoina o tatou taimi, o lo tatou malosi, ma a tatou taumafaiga mo le faamoemoega autu na mafua ai ona faatulaga le Ekalesia lava ia.”⁴³

Amepasa mo le Ekalesia

Faatasi ai ma tagata o isi faatuatuaga, sa matauina ia Peresitene MaKei o se taitai faaleagaga taua. Sa latou fono soo ma taitai o le lalolagi ma taitai faalemalo o le lotoifale. Sa asiasi ane foi ia te ia Peresitene o le Iunaite Setete, e aofia ai Harry S. Truman, o John F. Kennedy, ma Dwight D. Eisenhower. Sa i ai se taimi, sa valaaulia ai o ia i Uosigitone, D.C. e le Peresitene o le Iunaite Setete o Lyndon B. Johnson, o le e telefoni soo ane ia Peresitene MaKei, mo ni ana fautuaga i ni mataupu sa popole ai o ia. I lea la asiasiga, sa ta’u atu ai e Peresitene MaKei ia te ia e faapea: “Ia taiala oe e lou mafaufau matala. Ia iloa e tagata e te faamaoni, ona latou mulimuli ai lea ia te oe.”⁴⁴

O se Taitai ma se Failauga e Pele

Na amata mai lava i lona talavou ma lona lava olaga atoa, sa suesue ai Peresitene MaKei i upu a tusitala maoae ma e tele lava ina ia aoao atu mai fuaitau sa ia taulotoina. Mo se faataitaiga, sa ia faamatala atu i tagata o le Ekalesia: “Sa osooso le fatu o Wordsworth ina ua ia vaaia se nuanua i le lagi. Sa tagi le fatu o Burns ina ua liai e lana suotosina se laau o le teisi (daisy). E mafai e Tennyson ona tau se fugalaau e oso mai i pa puipui maa, ma vaai pe mafai ona ia faitauina ai le mealilo, ‘o mea uma e a le Atua ia.’ O nei tagata uma ma isi foi tagata maoae, ua latou faaali mai ia te i tatou i galuega o le natura, o foafoaga matagofie a le Atua.”⁴⁵

E fiafia tele tagata o le Ekalesia e faalogologo pe a lauga Peresitene MaKei. O ana saunoaga ma aoaoga e masani ona aofia ai tala musuia mai le tele o ona aafiaga, ma na te talisapaia e le aunoa ia aga malie lelei. E fiafia o ia e faamatala le tala e uiga i se tamaitiiti tufa nusipepa sa la faatalofa ao lei oo atu i se eleveita. Sa tamoe mai le tamaitiiti i luga e faafeiloai le perofeta ua toeaina a o ulufafo atu i le fogafale i luga atu. Fai mai le tamaitiiti, “Ou te toe fia faatalofa tasi atu lava ia te oe ae e te lei oti.”⁴⁶

O ana saunoaga i konafesi aoao e faamamafaina ai le taua o le fale ma le aiga o punavai ia o le fiafia ma o le puipuiga aupito mautinoa lea mai tofotofoga ma faaosoosoga. O le faaupuga “e leai se isi tulaga faamanuiaina e mafai ona toe totogi pe toe suia ai le toilalo i le aiga” e masani ona ia faia soo pe a ia talosagaina matua e faaalu so latou taimi tele ma a latou fanau, ma aoao i latou i o latou uiga ma le amiosa’o. Sa ia aoao mai foi, “O loto mama i se aiga mama e vavalalata lava i taimi uma ma le lagi.”⁴⁷ Sa na ia faaigoaina le aiga o le “iunite faavae o nuu” ma sa ia tautino mai ai foi “o le tulaga faa-matua e pito atu i le tulaga faale-Atua.”⁴⁸

Sa ia saunoa foi i le paia o faaipoipoga ma ta’ua soo ai le alofa sa ia maua mo lona aiga ma lona faletua, o Emma Ray. Sa avea la la’ua faaipoipoga ua silia ma le 60 tausaga, ma faataitaiga autu mo augatupulaga i le lumanai o le Au Paia o Aso e Gata Ai. Sa ia apoapoai mai foi, “Ia tatou aoao le tupulaga o sootaga i faaipoipoga o se tasi lea o matafaioi aupito paia a le tagata, pe mafai foi e le tagata ona osia.”⁴⁹

Ina ua amata ona fai ifo lona malosi i le vaeluagalemu o le 1960, sa tele le taimi na ia faaaoga ai le nofoa faataavalevale, ma sa tofia nisi fesoasoani faaopoopo i le Au Peresitene Sili. E ui lava i lona tulaga augavaivai faaletino, ae sa ia faaauau pea ona taitai mataupu a le Ekalesia ma aoao atu, taitai, ma musuia. I se taimi e le mamao ma lona maliu, sa ia saunoa ai i se fonotaga ma le Au Pulega Aoao o le Ekalesia i le Malumalu o Sate Leki. Sa toe ta’ua e Elder Boyd K. Packer sa i ai i lena fonotaga, le mea lea:

“Sa talanoa [Peresitene MaKei] e faatatau i sauniga o le malumalu ma sii mai ni fuaitau uumi mai sauniga. Sa ia faamatala maia ia sauniga ia i matou. (E le faapea e le talafeagai lena mea, aua o la matou te i ai i totonu o le malumalu.) Ina ua maea sana saunoaga umi, ona tu lea o ia ma pulatoa i luga a o mafaufau loloto.

“Ou te manatua sa tuu i ona luma ona lima lapopoa a o felaveai ona tamatamailima. Sa tu o ia ma faataupupula e faapei ona faia e tagata i nisi taimi pe a manatunatu loloto e uiga i se fesili maoae. Ona ia saunoa mai lea: ‘Uso e, ou te manatu o lea ua amata nei ona ou malamalama.’

“O lenei, o ia o le perofeta—o se Aposetolo ua silia ma le afa senetuli ae o lea lava e aoao, ma o la lava e tuputupu ae. O lana saunoaga ‘Ou te manatu o lea ua amata nei ona ou malamalama, ’sa matua logoleleia ia te au.”⁵⁰ E ui lava ina tele lona silafia i le talalelei ma lona poto masani i le Ekalesia, ae sa lotomaualalo lava Peresitene MaKei ma ia silafia ai e mafai lava ona ia aoao ma iloa ia uiga loloto.

Ina ua maea lana tautua o se perofeta a le Alii mo tausaga toeitiiti atoa le 20, ona maliu ai lea o Peresitene Tavita O. MaKei i le aso 18 o Ianuari 1970 i le Aai o Sate Leki, Iuta, a o faatasi atu i ai lona faletua o Emma Ray, ma o la’ua alo e toalima. I se saafiafiga mo ia, sa saunoa ai Peresitene Harold B. Lee e faapea, ua “tuua [e Peresitene Tavita O. MaKei] le lalolagi a ua sili atu ona mauoa, a o le lagi foi ia ua sili atu ona olioli i oa maoae sa ia aumaia.”⁵¹ Sa tautino atu e Peresitene Iosefa Filitia Samita o le na suitulaga ai, e uiga i se measina e faasino ia Tavita O. MaKei: “O ia o se tagata e maoae lona malosi faaleagaga, o se tasi na soifua mai lava o ia o se taitai o tagata, ma o se tagata e alofagia e lona nuu ma faamamaluina e le lalolagi. O le a tutulai tagata i taimi uma ma faaamuia i lona igoa.”⁵²