O Le Taua o le Toetu

Pe tusa o le luaafe tausaga talu ai … sa i ai ni aposetolo sa le fiafia. Sa matuai faanoanoa lava ia Peteru; sa faavauvau ia Ioane; sa faapea foi ia Maria, le Tina o Keriso. O isi aposetolo na sosolaese. Na iloa e Iuta le agasala na ia solia. O se po na matuai faanoanoa lava!

O le taeao na sosoo ai na toetu ai Keriso. … Talu ai ona e moni lava lena mea, o le toetu na faavaeina ai le tino ola pea o le agaga, o le i ai o e pele o loo i le isi itu, e faaauauina pea i latou. E matuai moni lava lo latou i ai i lena lalolagi faaleagaga e pei o le agaga o Keriso ina ua Ia talai atu i agaga i le falepuipui.³

O le manatu moni faapea o i latou o ni molimau i le mea na tupu [le Toetu o Iesu] ua maua ai foi se faateleina taua i le faamaoniga na tuuina mai e Aposetolo. O se taua loloto o le latou molimau o loo i ai lea i le manatu faapea o le maliu o Iesu na maua ai e Aposetolo le lotovaivai ma le faanoanoa. E lua ma le afa tausaga o lagolagoina ma musuia i latou i le i ai o Keriso. Ae o lenei ua leai o ia. Ua tuua na o i latou, ma ua foliga mai ua fenumiai ma ua le mautonu i latou. …

“O le a le mea na faafuaseia ai lava ona suia nei soo ma avea ma ni tagata mautinoa, e le fefefe, o ni failauga totoa o le Talalelei a Iesu Keriso? O le faaaliga faapea ua toetu mai Iesu mai le tuugamau. Ua taunuu lava Ana folafolaga, ua faataunuuina Lana misiona faaMesia.” …

E le o faamatalaina mai e Mareko se tala i se faaali mai o le Alii toetu; ae na ia molimau mai faapea o le agelu sa i le tuugamau na faasilasilaina mai le toetu, ma folafola mai faapea o le a feiloai le Alii i ona soo. O Mareko tatou te faalogo ai i le folafolaga mamalu o le uluai tuugamau avanoa i le lalolagi atoa. Mo le taimi muamua i le talafaasolopito o le tagata ua suia ai ia upu “O loo lagomau iinei” e le savali paia “Ua tu o Ia.” E leai se isi e masalosalo faapea e lei talitonu ia Mareko i le moni o le tuugamau avanoa. Na ia iloaina lava o le toetu e le tuufesiligia—na matuai moni lava; ma o le faaali atu o le Alii ma le Matai i tagata o se mea moni na tupu i lona mafaufau e aunoa ma se masalosalo. I le folafolaina o lenei upumoni sa ia tuuina atu ai lona ola, ma afai e moni ia uputuu e uiga ia te ia, na ia faamauina lana molimau i lona lava toto.

O le isi tagata na faamaumauina le tautinoga a se molimau vaaitino o ia lea o Luka, o se Nuu Ese, pe manatu nisi faapea o se tagata mai Anetioka i Suria, lea sa ia galue ai o se fomai. (Kolose 4:14.) E oo lava i nisi o ana faitioga sili ona ogaoga na faapea mai ai o ia o se tagata tusi talafaasolopito sili ona lelei, ma o ana fegalegaleaiga ma uluai aposetolo na avea ai ana faamatalaga ma mea sili ona taua.

O le mea na ia tusia o le taunuuga o se suesuega ma se sailiiliga a le tagata lava ia, ma na maua mai lea i le tele o punaoa sa i ai. Aemaise lava sa ia faatalatalanoaina ma tusia ia faamatalaga a i latou o e “na avea ma molimau vaaitino ma auauna a le Upu.“ Na ia faapea mai na ia ”matua sue i mea uma talu le amataga, “ ina ia mafai ai ona ia ”tusi faasoloina.“ [Tagai Luka 1:1–4.] O le uiga o lenei mea faapea na maua e Luka le molimau a nei “molimau vaaitino” mai ia i latou lava ae le mai ni tusitusiga na muamua atu.

E tusa ai ma molimau uma faatuatuaina, ua tatou mauaina le Talalelei a Luka e pei ona tusia i lona lima. I le mataupu e 24, o loo molimau mai ai Luka i le paia o le savali: “Se a le mea tou te saili ai le ua soifua i e ua oti? E le o iinei o ia, a ua tu.” [Luka 24:5–6.]

I le tutusa ai o le mautinoaina o lo latou sa’o o lea e mafai ai ona tatou taliaina ana faamatalaga ma lana molimau e fuafua i le molimau a Peteru ma Paulo ma isi aposetolo e faatatau i le toetu. “Na faailoa atu foi o ia e ia ia te i latou ua soifua ia, ina ua mavae o lona tiga, ua faamaonia i faailoga faamaoni e tele; e fagafulu po ua iloa ai o ia e i latou, ma na fetalai atu i mea a le malo o le Atua.” [Tagai Galuega 1:3.] O ai e mafai ona masalosalo i le matuai mautinoa e Luka o le moni o le toetu?

E moni lava e leai se tasi o Mareko po o Luka na molimau mai faapea na vaaitino lava i le Alii toetu, ma o lea la, ua uunaia ai isi e faapea o a la molimau tusitusia e le mafai ona taliaina o ni uluai faamaoniga. La te lei molimau, ae peitai na la talitonu na vaai isi ia te Ia, o loo faaalia mai ai le malosi tele o le faamaoniga sa i ai i aposetolo ma isi soo e faapea o le toetu e moni lava.

Ae peitai, o le mea e lelei ai, o loo i ai se tusitusiga o loo tuuina mai ai le mau a se molimau vaaitino i le faaali mai a Iesu ina ua mavae lona maliu ma lona falelauasiga. O lenei molimau patino e lagolagoina foi e le gata i alii e toalua ia sa ou ta’ua ae faapea foi i isi. Ou te faatatau ia Saulo, o se Iutaia na fanau i Taso, sa aoaoina i le aoga a Kamalielu, o se Faresaio malosi, ma a o lei liuaina o ia, sa avea o ia ma se tagata faasaua i e uma na talitonu ia Iesu o Nasareta na toetu mai le oti. Ma o lenei o le tusitusiga moni sili ona leva o loo i ai e faatatau pe tautino mai i le toetu o Keriso, tatou te mauaina ai Paulo o loo tauina atu le mea lenei i tagata o Korinito:

“Aua na ou tuuina atu ia te outou mea muamua o mea foi ia na ou maua foi e au; na maliu Keriso ma sui o a tatou agasala, pei ona tusia, na tanu foi o ia, ma toetu mai i le aso tolu, pei o upu ua i tusi; na iloa foi o ia i Kefa, ona iloa lea e le toasefulu ma le toalua. Ona toe iloa lea o ia e le au uso e lima selau ma ona tupu ina ua faatasi; o le toatele foi o i latou o ola mai, ua oo i ona po nei, a o isi ua momoe. Ona toe iloa lea o ia e Iakopo, ona iloa lea e le au aposetolo uma. E mulimuli lava ona iloa o ia e au nei, e peiseai se tama fanau le au.” [1 Korinito 15:3–8.]⁴

Ua toatele tagata i aso nei e pei o tagata i Atenai i le luaafe tausaga talu ai o e na fausia se fata faitaulaga i le “Atua Na Leiloa, ” o e na tau leiloa po o le leiloa foi o se mea e uiga ia te ia. Tatou te faitau i ai i lena mea i lona agai atu i Areopako, na vaaia ai e Paulo ia tupua eseese o atua ua faatutuina. … O iina e masani ona faapotopoto i ai le au fiapopoto ma faamasino, o tagata mafaufau, o e sili ona atamamai i le lalolagi anamua, e manatunatu ai ma talanoaina mea lilo o le olaga ma le taunuuga o le tagata.

I le totonugalemu o nei atamai uma faalelalolagi, sa tutu toatasi ai iinei se tagata e enaena ona mata o le sa luitauina le tele o lo latou atamai faapea e sese ma o lo latou tapuai i faatusa o se mea matuai sese lava—e na o le pau lea o le tagata i lena aai tele o tagata atamamai o le na iloaina e ala i se aafiaga na oo i ai faapea e mafai e se tagata ona sopoia atu faitotoa o le oti ma ola ai. … A o tautala atu Paulo ma le malosi e faatatau i uiga o le Atua, sa matuai faalologo ma le fia iloa le au atamamai seia oo ina ua ia molimau atu faapea na toe faatuina mai e le Atua ia Iesu mai le oti.

Ina ua latou faalogo i le toetu, sa faatauemu nisi o i latou ma sa faapea ona latou o ese uma, ae tuua ai na o ia o le na faailoa atu le upumoni ma ua sili atu ai le tuua na o ia nai lo se isi taimi. [Tagai Galuega 17:22–33.] O aso nei, e pei ona i ai i Atenai, afai tatou te tautatala atu i le toetu o e ua oti, e i ai lava nisi o e tauemu mai ia i tatou ae o isi e masalosalo ma liliuese. O le taimi nei, e pei ona i ai, ua toatele naua alii ma tamaitai o loo i ai isi atua o e ua alu uma i ai o latou manatu nai lo le Alii toetu. …

I le faamautuina ai o se mea moni faapea na aveina a’e e Keriso Lona tino ma faaali mai o se Tagata mamalu, toetu, ma e taliina ai le fesili ua autausaga—“Afai e oti le tagata, e toe ola mai ea o ia?” [Tagai Iopu 14:14.]

O le toetu moni mai le tuugamau o se mea moni ma le mautinoa lea i le au soo o e na iloa lelei Keriso. E matuai leai lava se masalosalo i o latou mafaufau. O i latou o molimau na vaaitino i le mea na tupu. Na latou iloaina aua na vaai i ai o latou mata, na faalogo i ai o latou taliga, na tagotago i ai o latou lima i le tino o le Togiola toetu.⁵

O le a sopoia atu ma le manumalo e le agaga o le tagata ia faitotoa o le oti e oo atu i le ola faavavau o se tasi lea o savali mamalu ua tuuina mai e Keriso, lo tatou Togiola. Ia te ia, o lenei galuega faalelalolagi ua na o se aso ae faamaeaina i le goto ifo o le la. O le oti, ua na o se moe, e sosoo ma le alafa’i a’e ma le mamalu i le taeao o se olaga faavavau. Na vaai Maria ma Mareta i lo la tuagane e toatasi ua na o se tagata ua oti, ae na silasila Keriso ia te ia o se tagata o loo ola pea. O lenei mea moni na ia faamatalaina i ni upu se lua: “… O loo moe Lasalo. …” (Ioane 11:11.) Afai e iloa … e tagata uma na tu mai Keriso na faasatauroina i le aso tolu—ma ina ua uma ona faafeiloai i isi ma fefaamasaniai ma isi i le lalolagi o agaga, sa faapea ona toe faaolaina e lona agaga lona tino na fasia, ma ina ua mavae ona mafuta ai faatasi ma tagata mo le umi e fasefulu aso, na ia afio a’e o se agaga faamamaluina i lona Tama—e maeu se agalelei o le a oo mai i agaga o loo felafoaiina i le masalosalo ma le le mautonu!

E tutu faatasi le Ekalesia a Iesu Keriso o le Au Paia o Aso e Gata Ai ma Peteru, ma Paulo, ma Iakopo, faapea ma isi uluai aposetolo o e na taliaina le toetu e le gata o se mea moni lava, ae o le faatumutumuga foi lea o le misiona paia a Keriso i le lalolagi.⁶

O le faamaoniga sili ona lata mai ma le ofofoogia o le toetu o Iesu mai le tuugamau o le faaali atu lea o le Tama ma le Alo i le Perofeta o Iosefa Samita, i le afeivaselau tausaga talu ona mavae lena mea na tupu. … O lenei vavega o le ola e le gata lona taua ia te ia lava, ae o loo fusia uma ai lava ia mataupu faavae o le faaKerisiano moni.⁷

Ua silia ma le faafe tausaga, o vaai atu le tagata i totonu o le tuugamau ma iloa atu ai na o le mutaaga o le olaga. Mai le fia miliona ua tuuina i ai i totonu iina, e leai ma se tagata e toatasi ua toe foi mai ai o se tagata toetu, o se tagata ola pea. “E aunoa ma se tuugamau na avanoa i le lalolagi atoa. E leai se loto o se tagata na talitonu; e leai se leo o se tagata na folafolaina mai e i ai se tuugamau faapea—o se tuugamau na aveeseina e le mana o se Manumalo e sili atu le malosi nai lo le fili silisili o le tagata, o le Oti.”

O iina, lea na tuuina atu ai e le agelu se savali fou ma le mamalu i tamaitai o e na oo atu ma le fefefe ma le alolofa i le tuugamau na falelauasi ai Iesu: “… O loo outou saili ia Iesu le Nasareta o le na faasatauroina: ua tu o ia; e le o iinei; ina matamata ia i le mea na latou tuuina ai o ia.” (Mareko 16:6.)

Afai o se vavega o se mea na tupu e ofoofogia ma o ona malosiaga e sili atu nai lo le mea e gata ai le atamai o le tagata, o le toetu la o Iesu Keriso o le vavega silisili ona ofoofogia lea o taimi uma. O loo faailoa mai ai le silisiliese o le Atua ma le ola pea o le tagata.

Ae peitai, o le toetu o se vavega, i le na o le manatu lea faapea e sili atu nai lo le mea e iloa ma malamalama i ai le tagata. O i latou uma o e taliaina o se mea moni, o se faaaliga o se tulafono laugatasia o le olaga. Talu ai ona e le malamalama le tagata i le tulafono, o lea na te taua ai o se vavega.⁸

O le Toetu ma le Totogoae e tutusa lelei lava, e le faapea e i ai se mea e tutusa lelei ai lona natura i le toetu, ae e tele naua le vaega o loo fautuaina mai ai faapea o se manatu e toe FAFAGU ai. E pei o le malo o le Taumalulu Tuai e taofia uma ai le ola o laau faisua, ae o le taulalata mai o le tau Totogo e tuuina atu ai le mana ola o le mafanafana ma le malamalama lea e tuuitiitia ai le taumalulu ma faavaivaia ai lana uu, ma o le mea na foliga mai na mate ae ua toe tulai mai i le ola fou, ua faafouina, faamalosia, faaolaolaina, ina ua mavae se moe filemu.

E faapea foi i le tagata. O le mea tatou te ta’ua o le oti ae faatatau i ai ia Iesu o le moe. “O loo moe Lasalo, ” na ia fetalai atu ai i ona soo [tagai Ioane 11:11]. “O loo moe le teine, ” o ana afioga faamafanafana ia i matua faanoanoa ma le faavauvau o se teineitiiti [tagai Mareko 5:39]. O le mea moni lava ia, e leai se mea e tau o se oti i le Faaola o le lalolagi—e na o le ola—le ola faavavau. E moni lava na mafai ona ia fetalai mai, “O au nei o le Toetu ma le Ola. O le faatuatua mai ia te au, e ui lava ina oti, a e ola lava ia.” [Ioane 11:25.]

Faatasi ai ma lenei faamautinoaga, o le usiusitai i le tulafono e faavavau e tatau ona avea ma se fiafiaga, ae le o se avega, aua o le ola o le olioli lea, o le ola o le alofa lea. … O le usiusitai i a Keriso ma ana tulafono e aumaia ai le ola. Ia faamamafaina i Eseta uma lenei upumoni, ma ia faatumulia ai o tatou agaga i le faamautinoaga paia e moni lava na toetu mai Keriso, ma o ia ua mautinoa ai le ola pea o le tagata.⁹

E leai se mafuaaga e fefe ai fua i le oti; o se vaega lava o le olaga. E pei lava o le fanau mai. Aisea la tatou te fefefe fua i ai? O nisi e fefefe i ai aua latou te manatu o le mutaaga lea o le olaga, ma o le ola o le mea sili ona pele lea ua tatou maua. O le ola faavavau o le faamanuiaga silisili lea o le tagata.

Afai lava o le a “faia lona finagalo” e tagata [tagai Ioane 7:17], nai lo le vaai atu e aunoa ma se faamoemoe i le tuugamau pogisa ma le pouliuli, ae o le a vaai atu o latou mata i le lagi ma iloa ai ua toetu Keriso!

E leai se tagata e taliaina le toetu ma tausisi pea i lona talitonuga e aunoa ma le taliaina foi o le i ai o se Atua. O le toetu na faatoilaloina ai e Keriso le oti ma avea ai ma agaga ola pea. “Lo’u Alii e ma lo’u Atua e” (Ioane 20:28) sa le na o se faamatalaga paganoa a Toma ina ua ia vaai i le Alii toetu. O le taimi lava tatou te taliaina ai le paia o Keriso, e faigofie foi ona vaai atu i le Tama i le taua ai e pei o ia; aua, e pei ona fetalai Iesu, “… O le ua vaai mai ia te au, ua vaai o ia i le Tama. …” (Ioane 14:9.)¹⁰

E pei ona sa soifua Keriso ina ua mavae le oti, o le a faapea foi tagata uma, ma o tagata taitoatasi o le a maua sona nofoaga ua matuai talafeagai lelei mo ia. O lea la, o le savali o le toetu, o le savali sili lea ona mafanafana, ma sili ona mamalu ua tuuina mai i le tagata, aua afai e aveese e le oti se tasi e pele mai ia i tatou, o o tatou loto faanoanoa e faamafanafanaina e le faamoemoe ma le faamautinoaga paia o loo faailoa mai i upu:

“E le o iinei o ia: a ua toetu.” [Tagai Mataio 28:6.] Talu ai ona o loo soifua lo tatou Togiola o lea o le a tatou ola ai foi. Ou te molimau atu ia te outou e faapea o loo soifua o Ia. Ua ou iloaina, ma ou te faamoemoe o loo outou iloaina lena upumoni paia.¹¹

Na oo Iesu i aafiaga uma lava o le olaga faaletino e pei lava o outou ma au. Na Ia silafia le fiafia, na ia silafia foi le tiga. Na olioli foi o ia faapea ma le faanoanoa faatasi ma isi. Na ia iloa ona faauo. Na ia iloa foi le faanoanoa lea e auala mai ia i latou o e taupulepule leaga ma e tautuuai sese. Na maliu o Ia i se oti faaletino e pei foi ona o le a e oo i ai. Talu ai ona sa soifua mai Keriso ina ua mavae le oti, o le a faapea foi oe, ma o le a faapena foi au. …

O Iesu o le tagata atoatoa lea e toatasi ua soifua ai. I le toetu ai mai le oti, na ia faatoilaloina ai le oti ma ua avea ai nei ma Alii o le lalolagi. E maeu le vaivai, e maeu le matuai faavalevalea o se tasi o le a teenaina le ala a Keriso o le olaga, aemaise lava o le malamalama i le upumoni faapea o lena teenaina e tau atu ai i le na o le le fiafia, faanoanoa, ma e tau atu lava i le oti! …

Afai e maua e Kerisiano uma i le lalolagi atoa lenei faatuatua [ia Iesu Keriso] ua sosolo i o latou alatoto, afai latou te lagonaina se lotomau i totonu o o latou loto i le Keriso Toetu ma mataupu faavae o loo aofia ai, o le a laasia e tagata le laasaga muamua e agai atu ai i le filemu tumau lea o loo tatou tatalo i ai i aso faisoo.¹²

E toatele naua i latou ua taua o Kerisiano e le talitonu i le moni o le toetu, ma ua i luga o o outou tauau faapea ma tauau o … isi i lenei Ekalesia ia le tiutetauave o le folafolaina atu i le lalolagi lona tulaga paia o le Alo, o le moni o lona toetu mai le tuugamau, ma lona faaali atu i la le tino a o i ai le Tama i le perofeta o Iosefa Samita.¹³