O Faalogo Mai se Tasi ia te au Au?

Sa ou popole. Sa fai mai ia te au lou faiaoga o le Peraimeri e fai sau lauga i le vaiaso na sosoo ai i le taimi o fetufaaiga. “E mafai ona e fai atu lau molimau e uiga i le tatalo,” sa ia fai mai ai. Faatoa uma ona matou talanoa e uiga i le tatalo i le matou vasega.

Sa ou tatalo i le tele o taimi. Sa masani ona fai au lava tatalo, ma sa ou tatalo soo i le taimi o tatalo faaleaiga. Sa ou tatalo foi mo faamanuiaga i luga o meaai i le tele o taimi, ma sa ou tatalo muamua i le Peraimeri. Ae o lenei ua ou le mautinoa sa i ai sau molimau i le tatalo po o ou malamalama pe faapefea ona fesoasoani le tatalo ia te a’u. “Pe faalogo moni mai se tasi ia te au pe a ou tatalo?” Na ou mafaufau ai.

Sa ou alu i le umukuka, lea na saunia ai e lo’u tina le taumafataga o le afiafi.

“Mama,” sa ou fai atu ai, “e faapefea ona mafai ona ou molimau i le tatalo pe a ou le mautinoa o loo i ai sau molimau i ai?”

Sa opo atu au e lo’u tina. “Aisea e te le tuuina mai ai se lesona e uiga i le tatalo i le afiafi faaleaiga taeao, ma tatou talanoa faatasi ai e uiga i ai,” o lana tala lea.

Sa fesoasoani lo’u tina ia te au e sue tala ma lauga o konafesi e uiga i le tatalo. Ona ou amata lea ona saunia mo le afiafi faaleaiga ma la’u lauga i le Peraimeri.

Ina ua ou tuuina atu le lesona i le aso Gafua, na tau mai e lo’u tina ma lou tama ia te au le ala na fesoasoani ai le tatalo ia i laua. Sa ou tuuina atu foi lau lauga i le Peraimeri i le Aso Sa na sosoo ai, ae ou te lei lagona tele se eseesega. Sa ou mafaufau pea pe sa i ai sau molimau i le tatalo. Sa ou tatalo ma le faamaoni e uiga i o’u masalosaloga, ae lei oo mai le tali i le taimi lava lena.

I se tasi aso na sau ai lo’u tama i le fale ina ua uma ona sailia se galuega i le aso atoa ae lei faamanuiaina. Sa faanoanoa tele o ia sa leai sana galuega mo le tele o vaiaso. Sa ou tamoe atu ia te ia ma fusi ia te ia, e pei ona masani ai.

“Aua le faanoanoa, Papa,” sa ou fai atu ai. Ona faafuasei lea ona ou lagonaina se mea i lo’u loto. “E tatau ona ta tatalo,” sa ou fai atu ai.

“I le taimi nei?” le fesili a lo’u tama.

“Ioe, i le taimi nei,” sa ou fai atu ai. “Ou te talitonu o le a faalogo mai le Tama Faalelagi ia taua”

Sa ma tootutuli faatasi ma tatalo, ma fai atu i le Tama Faalelagi e faamafanafana ia i matou.

Ina ua uma le tatalo sa matou faitauina tusitusiga paia, e pei ona matou faia i po taitasi, ona nonofo faatasi lea ma talanoa. Sa ou matauina le faifaimalie lava o le suia o lo matou faanoanoa i le fiafia sa masani ona i ai i lo matou aiga. Sa ou lagonaina le ese—pei lava sa matou saogalemu ma malupuipuia, ma sa ou iloa o le a lelei mea uma.Sa o se faalogoga matagofie.

Sa matauina foi e tina. “E mafai ona e lagonaina, Lucas? o lana fesili mai ma le filemu. “O le Agaga Paia o loo faamafanafanaina i tatou, e fesoasoani ia i tatou ia iloa e le o tuulafoaia i tatou”

“Ioe, o loo ou lagonaina,” sa ou fai atu ai. Sa ou iloaina e faafofogaina e le Tama Faalelagi la matou tatalo.

O se po o le a le galo lava ia te au. O lenei ua i ai la’u lava molimau e uiga i le mana o le tatalo.