O Iesu KerisoO Lo Tatou Faaola

Sa taoto i lona moega se teineitiiti e 12-tausaga le matua, na matuai faateteleina lona mai. Na vaavaai atu ona matua ma le leai o se faamoemoe. E leai se mea la te mafaia e laveai ai o ia.

Ona la manatua lea o tala ofoofogia na la faalogo i ai e uiga i se tagata e nofo ma i latou e igoa ia Iesu. Na fai mai tagata e mafai ona Ia faamalolo i e mamai ma faapupula tagata tauaso. Atonu e mafai ona Ia faasaoina le ola o le la tama teine!

Na tamoe le tama o le teineitiiti, o Iairo, e saili ia Iesu. Na ia aioi atu i a Iesu e faamalolo i lona afafine. Ona oo mai lea o se avefeau ma se tala matautia. Ua tuai tele. Ua oti le teine. “Aua e te matau,” na fetalai atu ai Iesu ia Iairo, “tau lava ina e faatuatua” (Mareko 5:36).

Ina ua taunuu atu Iesu ma Iairo i le fale o Iairo, sa la o i totonu o le potu sa taoto ai le teineitiiti. Sa uu mai e Iesu le lima o le teineitiiti ma fai atu ia te ia e tulai mai. Ina ua ia tu i luga, sa ofo ona matua. Ua toe faaola mai e Iesu le la tama teine!

O lena aso na faaali atu ai e Iesu le tele o Lona alofa popole mo le teine ma lona aiga e ala i le auauna atu ia te i latou. E faaali mai e Iesu le tele o Lona alofa popole mo i tatou i le tele o auala matagofie ma le ofoofogia:

• Sa ia fesoasoani e foafoa le lalolagi matagofie ma ona meaola uma.

• Na ia ofo atu e sau i le lalolagi e avea ma o tatou Faaola, e ui lava na Ia silafia o le a matuai faigata lava.

• Sa ia faaaluina Lona soifua i le lalolagi i le faamanuiaina, faamaloloina, ma le aoaoina atu o isi.

• Sa Ia soifua i se olaga atoatoa.

• Sa Ia puapuagatia ma le loto i ai mo a tatou agasala i le Faatoaga o Ketesemane ma maliu i luga o le satauro ina ia mafai ona tatou toetutu ma toe foi atu i le lagi.