Sa Aveesea le Avega

Talu ai nei sa ou nofo ai i se lesona a le Aualofa lea na faitau ai e se uso se upusii e uiga i aafiaga o le faatautala faaletino ma faalefeusuai i fanau. O lou manatu muamua lava, “Matua faanoanoa.” Ona faatumulia lea o a’u i le Agaga, o le na molimau mai ia te au i le vavega o le Faaola. Sa ou afaina i le faatautala i feusuaiga a o i ai i tausaga talavou. I le taimi o lena lesona o Le Aualofa, sa ou iloaina ai sa ou le toe lagonaina se tiga ma le fefe lea e fesootai i se mea na faleagaina ma faafefeina ai au mo le tele o tausaga. O se vavega lava. I lo’u loto sa ou faafetai atu i le Faaola mo le faamaloloina o au.

A o laitiiti, sa ou tauivi ma lagona le maasiasi mo le tele o tausaga a o lei filifili e ta’u atu i se tasi o au na sauaina. Ina ua 13 ou tausaga, sa ou lagonaina se uunaiga o le taimi lea e talanoa loa i ai. Ina ua uma se gaoioiga auauna atu i le Mutuale, sa ou alu loa i se taitai faatuatuaina, o le na talanoa mai ia te au ma le agamalu, ma ave au e vaai le epikopo i le afiafi lava lea e tasi. Sa ou lagona le fiafia e ala i le foliga mafanafana o le epikopo a o ia valaaulia au i totonu o lona ofisa. Ou te manatua lou lagonaina o le mamafa o le tele o tausaga o mealilo ua tafiese a o faalogologo lo’u epikopo. Ou te manatua ona loimata mama a o ia faalogo i la’u tala. Sa ou lagonaina le alofa o le Tama Faalelagi, ma sa ou lagonaina le faamautinoaga, o le sauaina e le o so’u sese ma o loo tumau pea lou mama ma le amio mama. O le amataga lenei o lo’u ala i le faamalologa, o se ala o le a faaauau pea mo le tele o tausaga.

E le na o se tasi le taimi o le faamaloloina—o se faagasologa o le filemu, malamalama, ma tali e oo mai a o ou suesue i a’u tusitusiga paia, tatalo i aso uma, ma faamasani atili ai ma Iesu Keriso. A o ou suesueina le soifuaga o le Faaola, sa ou lagonaina le alofa faateleina mo Ia. Na molimau mai e le Agaga upumoni ia te au, e aofia ai la’u lava taua o se afafine o le Atua. A o ou tuuina atu lo’u loto i le Alii, usiusitai i Ana poloaiga, ma saili i Lona finagalo, na faatumulia au i le mafanafana ma le toafilemu. A o faasolo ina ou iloa o Ia, sa amata ona ou iloa o au lava ia. Na iu lava, ina le toe tiga lo’u olaga ua tuanai. Sa aveesea le avega. Sa faamaloloina e le Faaola au.

Ua i ai nei sou aiga e faavavau ma se tane lelei ma ni afafine lalelei e toatolu. Ua faamanuiaina a’u e galulue faatasi ma le autalavou, ma molimau atu o le Togiola a Iesu Keriso e mafai ona faamaloloina ai i tatou mai le agasala, o tiga faaletino, ma loto momomo. Ou te iloa lenei mea ona o le alofa mutimutivale lea na tuuina mai ia te au—aua sa “siosiomia au e faavavau i aao o lona alofa” (2 Nifae 1:15).