Lē Maluelueina

I le avea ai ma peresitene o le misiona o le Misiona a Sendai i Iapani, sa ou aoaoina faifeautalai ma tagata o le ekalesia mo le tele o masina e “liliu atu i le Alii” (Mosaea 7:33). O le taimi lenei, a o ou liliu atu ia te Ia mo le taitaiga faalelagi, na vave oo mai le musumusuga: “Tatala le faitotoa—fatu ai se ala e sosola ese ai.” Sa ou iloaina e tatau ona ou tatalaina le faitotoa a o lei solo i lalo le faalo, ma lokaina ai i matou i totonu. O lea na ou faanatinati atu ai i le faitotoa ma tatala. “O i fafo mai iinei!” Sa ou alaga atu ai.

Sa tautevateva atu faifeautalai i le fola o loo fealuai, maluelue, ma papatutui agai atu i le faitotoa o loo matala; ona latou agai atu lea i lalo o le faasitepu ma o ai i fafo o le falesa. O le taimi lava na oo ai i fafo, na matou lagonaina ua sili atu le saogalemu, e ui lava matou te lei saogalemu lava mai le mala. Na suia le tau i le matuai maatiati le malulu, ma na sasa o matou mata e le kiona.

I le isi itu mai le falesa, na palalasi i lalo maa faamanatu i le fanua maliu o se lotu Puta; na nuti lilii le puipui o le fanua maliu. Na foa se tae tele agai i luga o fogafale uma e 12 o se fale mautotogi i tua atu o le falesa. Na solo i lalo mai le puipui ni poloka sima tetele o luma o se aoga tulagalua i le isi itu. Na lelea ese faamalama, ma na otāotā le eleele i tioata taei. I le isi itu o le auala, na fola ua nuti ninii se taualuga lanumoana maa. Na ou faapotopotoina faifeautalai e 15 i le paka o le ekalesia, ma na matou tuuina atu le faafetai i lo tatou Tama Faalelagi mo lo matou puipuiga ma ole atu mo Lana fesoasoani faifai pea.

Na i ai le popolevale i le aai atoa. Sa fefefe i latou nei aunoa i latou ma ni meaai, na amata e tagata ona faatauina mea uma latou te vaaia. Na vave ona taulia uma falaoa ma le susu, ma i totonu o ni nai itula na le toe maua se falaoa i le aai atoa. Na iu ina tai maila le uumi o laina i pamu kesi.

E ese mai le atuatuvale o tagata i luga o alatele, sa matua toafilemu lava faifeautalai. Na matou ofoina atu tatalo o le faafetai, ma sa matou lagonaina se faamautinoaga toafimalie o le a lelei mea uma.

Na le mafai ona matou tuua le aai—sa faaleagaina auala ma na tapunia alatanu, ma sa leai ni nofoaafi po o ni pasi e feoai. O tagata sa faatalitali mo itula i laina uumi e faatau penisini na le taliaina. Na ulu atu leoleo o le malo i se faiga talafeagai i fale taitasi, e faasalaina nisi ae taliaina isi ona o fale e nonofo ai. O lea na matou nonofo ai i le po i ni nofoaga autu mo le faasaoina ma le isi toatele e pei o i tatou, e le mafai ona toe foi i o latou aiga.

O le aso na sosoo ai, o le Aso Toonai, na matou amata pei ona masani ai i le suesueina o tusitusiga paia ma le tatalo. O lena aso, na faapitoa lava lo matou manaomia o le fesoasoani a lo tatou Tama Faalelagi. Ina ua uma suesuega i tusitusiga paia, sa ou faatulagaina loa faifeautalai i ni vaega. O le tasi vaega e o i le falesa e fesoasoani e faamama ona galulue lea ma le peresitene o le paranesi e toe faaleleia fale o tagata lotu. Sa asiasi atu se tasi o vaega i leoleo o le aai ina ia iloa ai pe sa saogalemu le ulu atu i falemautotogi o faifeautalai. O le isi vaega na siaki pe o feoai nofoaafi ma pasi. E toatele isi sa tutu i laina e maua mai ai le vai a o isi na saili mo ni meaai. I se tasi soa na maua se tofiga faapitoa: saili se falaoa mo le faamanatuga i le aso Sa. Sa ou galue i le aso atoa e taumafai e faafesootai faifeautalai uma i le misiona.

O lena aso na matou lagonaina ai le taitaiga a lo tatou Tama Faalelagi i mea uma na matou faia. Na feiloai faifeautalai na tutu i le laina mo le vai i ni alii se toalua na la faasoa atu i ai le talalelei. Sa faasoa atu e faifeautalai a la molimau i le alofa o le Atua ma aumaia nei alii e toalua i la matou sauniga molimau i le afiafi, ma le lotu i le aso na sosoo ai.

Na vave aoaoina e tuafafine o e na sailia ni meaai mo i matou sa taialaina e le Atua o la tulagavae. Ina ua le mafai ona maua se mea i faleoloa, na latou maua ni meaai i nofoaga latou te lei mafaufauina, e pei o lalo i auala tuufua i se faleoloa e tasi le potu. Na tuuina mai ia i matou “meaai e tatau ma le aso” (Mataio 6:11).

I le faaiuga o le aso na matou toe lipoti atu i lo tatou Tama Faalelagi. E lei leiloa lava la matou taulaiga. Sa avea pea i matou “[ma] soo o Iesu Keriso,” o e na “ua Ia valaauina e talai atu lana afioga i totonu o ona tagata, ina ia mafai ona latou maua le ola tumau-faavavau.” (3 Nifae 5:13).

I lena afiafi sa matou lagonaina se manaomia tele atu mo le malosi ma le mana o lo tatou Tama Faalelagi. Sa matou manaomia Lona Agaga e faatasi ma i matou. O lea na fai ai la matou sauniga molimau i le falesa. Na faafetai atu faifeautalai i le Alii mo le tuuina mai o a matou meaai e tatau ma le aso, ma sa latou iloaina sa taitaia, taialaina, faatonutonuina, ma puipuia i matou. Sa latou iloaina e toatele isi sa matuai le faamanuiaina ma le a le toe vaai i se isi laoso. E moni lava sa matou “puapuagatia i mea uma, a e le faaatuatuvaleina; [sa] fememeai, ae le matua fememeai; … ua lafoina i lalo, a e le fano” (2 Korinito 4:8–9).

Na molimau mai uma faifeautalai i le filemu na latou lagonaina. Na latou molimau mai na puipuia i latou e le Atua ma faatoafilemuina o latou agaga. Sa lamatia i latou i le oti ae sa le fefefe. Latou te lei mauaina ni vai, meaai, po o le mafanafana na manaomia latou te ola ai mo se taimi umi, ae sa tausia i latou i le vai ola; sa fafaga i latou i le afioga a le Atua; sa faamafanafanaina i latou e le Agaga. I totonu o le matou vaega itiiti o faifeautalai, e leai se tasi sa fefe. Na lagona e faifeautalai taitoatasi le mana faamalosiau o le Atua i le po lena ma lagona le latalata atili atu i le Atua nai lo se isi lava taimi muamua.

A o faaiuiu lena aso, sa matou faafetai ua matou feola. Sa matou faafetai atu i le Alii mo le fesoasoani na Ia tuuina mai ia i matou i ni auala manino lava. Sa matou faia lea ni tofitofiga mo a tatou sauniga tapuai i le aso na sosoo ai ma tuua le falesa e auai i le tele o isi tagata ua leai ni aiga mo se taimi le tumau i le maota autu mo le faasaoina.

Ae na faapitoa lava le le fiafia o alii faifeautalai e toalua. Na talosagaina i laua ina ia aumai le falaoa mo le faamanatuga i le aso na sosoo ai ae na le faataunuuina le la galuega atofaina.

Ina ua matou taunuu i le nofoaga autu mo le faasaoina i le afiafi o le aso Toonai, na toe faafeiloaia i matou e tagata faigaluega o le aai. Sa latou faamalie mai sa latou tuuina mai ia i matou ni nai meaai laiti (20 masi) e aai ai i le aso ua tuanai ona ataata lea a o latou tuuina mai ia i matou le vaega o meaai o le aso na sosoo ai: se fagu vai ma le valu fasi falaoa.

Na tilotilo mai ia te au au alii faifeautalai e pei o loo faapea mai, “E faapefea ona mafai ona faamanuiaina e le Alii i tatou i se isi auala?”

O le Atua, o le e silafia le pa’ū o se manuiti, sa toe aapa atu, e peiseai o le faasaoina o matou ola e lei lava. Na faamautinoa e le Tama Faalelagi o lea matou mafai ona “manatua pea” Lona Alo (MF&F 20:77). Sa sili atu lo matou latalata atu i lo matou Faaola nai lo se isi lava taimi i o matou olaga.

Sa tuuina atu e faifeautalai se tatalo faapitoa i lena po. Na latou faapauu ifo i o latou tulivae e faafetai atu i lo tatou Tama Faalelagi mo se isi vavega i se faasologa o vavega faapitoa. Sa latou malamalama i le mea e faamuamua ua tuuina mai e le Atua i la tatou feagaiga e manatua pea Iesu Keriso, ma sa latou faafetai mo le alofa mutimutivale ma agalelei o se Atua alofa o le e faatagaina i tatou e tagofia le faamanatuga i vaiaso taitasi.

O nei faifeautalai ua molimau nei, ma le talitonuga maoae sili atu nai lo se isi lava taimi muamua, e finagalo le Atua ia i tatou ia manatua pea Lona Alo, o Iesu Keriso.