O Loto Mama ma Tino Mama

I le tele o taeao a o lei taina le 5:00, e laina vaega o talavou agavaa i le pogisa i tafatafa o le faitotoa o le Malumalu o Sate Leki, ua saunia e ulu atu i le potu mo papatisoga. Latou te laa mai i le pogisa o le lalolagi i le malamalama o le malumalu. A uma ona fai ofu papae, latou te faasolo atu loa ma le filemu i le vai papatiso matagofie, lea e papatisoina ai i latou mo e ua maliliu. A o latou ea a’e mai le vai mama, toe faafouina ai vai o le vai papatiso, o nei talavou e faamalosia, o le iloaina o latou auai i se galuega e faavavau mo isi.

Toe faafoi atu i le pogisa e alu i ai, nanati i le aoga—ae e le tutusa, aua latou te tuua faaauupegaina i le mana ma le mamalu (tagai i le MF&F 109: 22–23). O le faataunuuina o le malamalama ma le mama a’ia’i o le malumalu i o latou loto, latou te saunia ai e faasagatau atu i le pouliuli o lenei “teritori o le fili” ma ia tumau i le ola mama. O lenei vaaiga e le tulaga ese i le Malumalu o Sate Leki—e tupu soo a o tuua e le autalavou e ala i le lalolagi atoa le pogisa o le teritori a le fili ma filifili e ola agavaa mo, ma ulu atu i totonu o le malamalama o le malumalu.

Mo se faataitaiga, o se tuafafine ma se uso mai Colorado, ISA, na papatisoina taitasi mo le silia ma le 50 o o la tuaa i lenei tausaga ua tuanai atu ma ua lagonaina le mama a’ia’i o le malumalu. Fai mai le uso, “ou te maua se lagona lelei, ma le faaleagaga pe a ou i ai i totonu o le malumalu. Mulimuli ane, pe a ou feagai ma faaosoosoga, ou te manatua lena lagona ma e fesoasoani ia te au. I se taumafaiga e ola agavaa e auai atu ai i le malumalu, sa tusia e le tuafafine se lisi i lana api o talaaga o mea o le a ia faia ma o le a le faia pe a feagai ma faaosoosoga. Sa ia puipuia ona mataupu faavae, ma sa oo lava ina ia faasoa atu le lisi i ona matua ma uo ina ia mafai ona latou fesoasoani ia te ia. O nei tagata talavou e toalua ua fatuina se ofutau o le ola mama mamana mo o la loto, mafaufau, ma tino.

Faatasi ai ma faatinoga mama, o i ai ni ou manaoga mama?

O Tavita, o le fai salamo, na tatalo i le Salamo 139:23–24: “Le Atua e, ia e sueuse mai ia te a’u, ma ia e silafia lo’u loto: tofotofo mai ia te au, ma ia e silafia ou manatunatu: ma ia e silafia po o ia te au se ala e tiga ai.” E faatatau i nei fuaiupu, na fautua mai Peresitene Lorenzo Snow (1814–1901): “Ou te fautuaina ina ia faaaogaina e [tagata taitasi] lenei tatalo a Tavita.” … E toatele e lē gafatia le oo mai i lenei tulaga o le lelei atoatoa ona latou faia mea i le faalilolilo … ona … e faaesea i latou mai le Silisili Ese.”²

O le talosaga atu i le Tama Faalelagi e fatu se loto mama ia te oe o se faatinoga o le faatuatua. O loo ia te ia mana uma; liliu soo atu ia te Ia ma tatalo atu ma le lotomaualalo mo Lana fesoasoani e tausia ia mama ou lagona—e oo lava i le mama i feusuaiga.

«Savavali i la le Agaga, ona le faia lea e outou o le tuinanau o le tino” (Kalatia 5:16). Oka se mana o le a e maua pe a e savali i le Agaga! I aso Sa taitasi a o e tagofia le faamanatuga, e te molimauina ua e naunau e manatua pea Iesu Keriso (tagai i le MF&F 20: 77, 79). O le manatuaina o le Faaola e mafai ona e maua ai le mana faaleagaga e liliuese ai mai le le mama.

Aisea e avea ai le mama i feusuaiga o se poloaiga? Aua na tuuina mai e le Tama Faalelagi mana o le foafoaga i totonu o le faaipoipoga mo na o faamoemoega faaleatua lava. Na saunoa mai Elder David A. Bednar o le Korama a Aposetolo e Toasefululua, “O o tatou lagona e uiga i ai ma le faaaogaina o lena mana faalelagi, o le a fuafua ai se fuataga tele o lo tatou fiafia i le olaga nei ma lo tatou taunuuga i le faavavau.”³

O lagona vavalalata taufeusuaiga e maua mai ai le alofa, lagona alofa o le lotogatasi i le tane ma le ava. Ae ui i lea, ua lapatai mai Elder Richard G. Scott o le Korama a Aposetolo e Toasefululua, “Ae peitai o na uiga feusuai e le faatagaina e le Alii ona faaaoga i fafo atu o tautinoga tumau o le faaipoipoga aua e faaleagaina ai Ona faamoemoega. … E afua ai ni tiga ogaoga faalelagona ma le faaleagaga. E ui lava o i latou e auai latou te le iloaina o loo tupu i le taimi nei, o le a latou iloa mulimuli ane. O le le mama i feusuaiga e faia ai se pa pupuni i le uunaiga a le Agaga Paia.”⁴

Ua le tuuina mai le alofa molitino o feusuaiga e faamalie ai le tuinanau, lauiloa, po o le fia iloa. O na faaaogaina manatu faapito o lenei meaalofa ua tuuina mai e le Atua o le a oo mai ai pea le le fiafia ma faatapulaa ai le tuputupu ae faaleagaga.

A o e saunia oe lava ma faamama lou loto, e mafai e le Alii ona faia ma fesoasoani e faatumau lou mama. Afai e te lagona le tausalaina po o le maasiasi i totonu, saili atu i le mana o le Togiola. Ua na o le taulaga togiola a Iesu Keriso e mafai ai ona faamamaina i tatou. Salamo ma tatalo ma le faamaoni mo se faamagaloga. Alu i lou epikopo po o le peresitene o le paranesi pe a manaomia. Pe mafai ona avea oe ma tagata mama ma tumau i le mama i se lalolagi lē mama? Ioe, e te mafaia! E te iloa le upumoni ma maua le lagolago a le Agaga Paia, matua, taitai, ma le perofeta soifua. A o e vaai atu ia Iesu Keriso, e te mafaia ma o le a tumau i le mama i Ona luma.