Auaunaga ma le Ola e Faavavau

O le Faaola o lo tatou faataitaiga o le auaunaga lē manatu faapito. Sa tuuto atu Lona soifuaga atoatoa e auauna atu i le Tama Faalelagi ma fanau uma a Lona Tama. O le faamoemoega autasi a le Tama ma le Alo o le tuuina mai lea ia i tatou uma o le meaalofa o le tino ola pea ma le faamanuiaga o le ola e faavavau (tagai i le Mose 1:39).

Ina ia agavaa mo le ola e faavavau, e tatau ona suia i tatou e ala i le Togiola a Iesu Keriso — toe fanauina ma faamamaina mai le agasala. O fanau laiti i lalo o le valu tausaga, e ui i lea, e leai se agasala ma ua togiolaina e ala i le Togiola (tagai i le Mosaea 3:16, 21; Moronae 8: 10–12).

Mo i tatou uma e oo atu i le tausaga o le tali atu, o loo i ai se fuafuaga matagofie e mafai ai ona tatou faamamaina mai le agasala ma saunia ai mo le ola e faavavau. O lena sauniuniga e amata i le papatisoga e ala i le pule o le perisitua ma le mauaina o le Agaga Paia. Ona tatau lea ona tatou manatuaina pea le Faaola ma tausi i poloaiga ua Ia tuuina mai ia i tatou.

Na ta’u atu e le Tupu o Peniamina i lona nuu i le Tusi a Mamona e uiga i le olioli lea e oo mai ai le lagonaina o le faamagaloina mai le agasala e ala i le Togiola a Iesu Keriso. Ona ia aoaoina lea o i latou faapea, ina ia faatumauina se faamagaloga o a latou agasala, e tatau ona latou aoaoina a latou fanau e auauna atu le tasi i le isi ma e tatau ona latou agalelei i le mea sili latou te mafaia e taulimaina ai manaoga faaletino ma faaleagaga o i latou o siomia i latou. (Tagai Mosaea 4:11–16.)

Na ia aoao mai foi, “Ma faauta, ua ou taʼu atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso- a-tagata, ua nao lo outou auauna atu lava lea i lo outou Atua” (Mosaea 2:17).

Sa femaliuai Iesu ao aoaoina atu Lana talalelei ma faia mea lelei (tagai i le Galuega 10:38). Sa ia faamaloloina ē mama’i. Sa ia faatuina e ua oti. Faatasi ai ma Lona mana na Ia fafagaina le faitau afe o tagata ina ua latou fia aai, ma leai ni meaai (tagai i le Mataio 14:14–21; Ioane 6:2–13). Ina ua mavae Lona Toetu na Ia tuuina atu ni meaai i nisi o Ana Aposetolo ina ua latou tuvae i le matafaga o le Sami o Kalilaia (tagai i le Ioane 21:12–13). I le laueleele o Amerika, sa Ia faamaloloina ē mama’i ma faamanuia taitoatasi i fanau (tagai i le 3 Nifae 17: 7–9, 21).

Na aoaoina i tatou e Iakopo le Aposetolo pe faapefea ona oo mai ia i tatou le manao e auauna atu i isi ona o lo tatou agaga faafetai mo mea ua faia e le Alii mo i tatou:

“A o le na te matamata i le tulafono o le saolotoga ua aotoatoa ona lelei ma ua tumau i ai o ia, e le se faalogologo ma le faagalogalo lena tagata, a o le anaana i le galuega, e manuia o ia i lona lava anaana. …

“O lenei lava le amio Atua ma le faamaoni i luma o le Atua o le Tama lea, ina ia tauasiasi atu i e matua oti ma fafine ua oti a latou tane i o latou tiga, ia leoleo foi o ia ia te ia, ina nei pisia mai o ia i le lalolagi” (Iakopo 1:25, 27).

O se tasi o faamautinoaga o le faamamaina o oe o le faateleina lea o le naunau e auauna atu i isi mo le Faaola. O faiaoga o aiga ma faiaoga asiasi e avea ma se fiafiaga sili nai lo o se galuega. O le a atili ona e volenitia i le tele o taimi i se aoga i le lotoifale po o le fesoasoani e tausia e matitiva i lou nuu. E ui lava atonu e i ai sau tupe itiiti e tuu atu ia i latou e itiiti ifo mea latou te maua, e te moomoo maimau pe ana sili atu au mea ina ia sili atu mea e mafai ona e tuuina atu (tagai i le Mosaea 4:24). O le a e naunau e auauna atu i lau fanau ma faaali atu ia te i latou le auala e auauna atu ai i isi.

A o suia ai lau amio, o le a e lagonaina se manao e tuuina atu se auaunaga sili atu e aunoa ma le faafetaia. Ou te iloa soo o le Faaola o ē ua tuuina atu ni meaalofa o le tele o tupe ma le auaunaga ma se naunautaiga ina ia leai se tasi e iloa sei vagana ai le Atua ma a latou fanau. Ua taliaina e le Atua la latou auaunaga e ala i le faamanuiaina o i latou i lenei olaga, ma o le a Ia faamanuiaina i latou i le ola e faavavau o le a oo mai (tagai i le Mataio 6: 1–4; 3 Nifae 13:1–4).

A o e tausia le poloaiga e auauna atu i isi (tagai i le Mataio 22:39), na e lagonaina se suiga i ou lagona o le faamaualuga. Na faasa’oina e le Faaola Ana Aposetolo ina ua latou fefinauai pe o ai o le a sili ia te i latou. Na Ia fetalai:

“Aua foi nei taua outou o aoao: aua e toatasi la outou aoao.”

“A o le sili i a te outou e fai lea ma a outou auauna” (Mataio 23:10–11).

Ua aoaoina i tatou e le Faaola pe faapefea ona mafai ona tatou aoao e auauna atu i isi. Sa ia auauna atu i le atoatoa, ma e tatau ona tatou aoao e auauna atu e pei ona Ia aoaoina—lea alofa tunoa ma lea alofa tunoa (tagai i le MF&F 93:12–13). E ala mai i le auaunaga tatou te tuuina atu, e mafai ona avea atili ai i tatou e faapei o Ia. O le a tatou tatalo ma le malosi uma o o tatou loto ina ia tatou alolofa i o tatou fili e pei ona Ia alofa ia i latou (tagai i le Mataio 5:43–44; Moronae 7:48). Ona tatou mafai ai lea mulimuli ane ona agavaa mo le ola e faavavau faatasi ma Ia ma lo tatou Tama Faalelagi.

Ou te folafola atu e mafai ona tatou o mai e auauna atu ma le atoatoa e sili atu pe afai tatou te mulimuli i aoaoga ma faataitaiga a le Faaola.