O Le Usiusitai e Fanau mai i le Faatuatua i le Atua

O le faatinoina o le faatuatua o se naunautai lea e talia e aunoa ma se tau faamaoniaina atoatoa ma agai i luma e faatino ia galuega. “E mate le faatuatua pe a leai ni galuega” [Iakopo 2:26] ma o le a le taitaiina e se faatuatua mate se tasi e agai i luma e suia se olaga pe auauna atu foi ma le lototoa. O se faatuatua moni e uunaiina se tasi agai i luma i gaoioiga fuafuaina ma le manuia e pei ua ia iloa le atoatoa moni.²

E mafai e se tasi ona olioli i faamanuiaga o vavega i le lalolagi faaletino e aunoa ma le atamai atoatoa i mataupu faavae o loo i ai. E mafai ona ia oomiina se ki e sui ai le pouliuli i le malamalama ma faitau i le po sili ona pogisa. E le manaomia lona gaosia o le eletise, po o le tomai foi e uaea ai se fale. Ae tatau ona lava le faatuatua e maua mai ai ni matauila ma le faatuatua e oomi ai le ki. Ona mafai lea ona ia maua lea malamalama. … E mafai ona ia kiina le ki ma fiafia i musika mananaia mai se mea mamao e aunoa ma le taumafai e gaosi se leitio po o le malamalama atoatoa i lona gaoioiga, ae peitai o le a ia le mauaina faamanuiaga sei vagana ua ia suluina lana leitio i le eletise ma ki le nila ia sao. E faapea foi le tulaga e mafai ai e se tasi ona maua faamanuiaga faaleagaga ma musumusuga, e ala i le faamautuina o fesootaiga i le kiina o le nila. O le faatuatua e faaalia e ala i le tatalo ma galuega, o le ki lena.³

Tatou te tatalo mo se malamalama, ona tatou o lea ma lo tatou malosi atoa ma a tatou tusi ma o tatou manatu ma le amiotonu ina ia maua le musumusuga. Tatou te ole atu mo se faamasinoga tonu, ona faaaoga lea o lo tatou malosi atoa e faatino ai ma le poto ma atiina ae le atamai. Tatou te tatalo mo le faamanuiaina ia tatou galuega ona tatou suesue malosi lea ma taumafai ma lo tatou malosi atoa e fesoasoani e tali ia tatou tatalo. Afai tatou te tatalo mo le ola maloloina, e tatau ona tatou ola ai i tulafono o le soifua maloloina ma faia mea uma i lo tatou malosi e tausia ai o tatou tino ina ia maloloina ma malolosi. Tatou te tatalo mo le puipuiga ona tatau lea ona faia ni puipuiga talafeagai e aloese mai ai i tulaga matautia. E tatau lava ona i ai galuega faatasi ma le faatuatua.⁴

E tatau ona i ai se faatuatua i le Atua lea e mafua ai ona faamama e tagata o latou olaga; e faagalo ai o latou lava tagata ae auauna atu i o latou uso a tagata ma faatoilaloina ia vaivaiga uma o le tino; o se faatuatua e mafai ona aumaia ai se salamo atoatoa, ma faaauau ai seia oo atu i le papatisoga, le perisitua, ma sauniga o le malumalu.⁵

O iinei o loo taoto ai le atamai o le talalelei a Iesu Keriso, e na o mata faaleagaga e iloa atu ai. E tusa ai ma tulafono o faamanuiaga o le talalelei, o tagata uma lava—o le mauoa po o le mativa, aoaoina po o le le aoaoina—e muamua lava uuna’ia ina ia vaai i mata o le faatuatua, ona faia ai lea o se taumafaiga e faaalia lena faatuatua i se olaga maualuga atu, ma le faamamaluina.⁶

Tatou te avatu le usiusitai atamai, ma le faautauta, pe a tatou usiusitai i o tatou lava lotomalie, faamaualalo, ma le fiafia i tulafono a lo tatou Alii.⁷

Ina ia usitai! Ina ia faalogo ma faia! E maeu le faigata o lena mea! E masani ona tatou faalogo: “E le ta’u maia e se isi ia te au po o a o’u lavalava e ofu, ae po o a foi a’u mea e ‘ai ma inu. E le faatulagaina e se isi lo’u Sapati, pe faasoasoaina a’u tupe maua, po o se isi lava auala e faaitiitia ai lo’u saolotoga! Ou te faia lava le mea ou te manao au i ai! Ou te le tuuina atu se usiusitai tauaso!”

Usiusitai tauaso! Matuai laitiiti tele lo latou malamalama! …

Afai e usiusitai tagata i tulafono a le foafoa, e le o se usitai tauaso. E matuai ese lava le fefe o se tasi i lana pulega faalemalo, ma le usiusitai mamalu ma le naunautai e tuuina atu e se tasi i lona Atua. O le tagata e pule ma le saua e manao i mea, e manatu faapito, ma e i ai isi ona uiga natia. O tulafono uma lava a le Atua e amiotonu, o faatonuga uma e i ai lona faamoemoega, ma o mea uma e mo le lelei o le pulega. O le vaega muamua e mafai ona faapea o le usiusitai tauaso, ae o le vaega mulimuli e mautinoa lava o le usiusitai ma le faatuatua. …

Pe o se usitai tauaso ea pe a manatu se tasi i le faailoilo “Uaea Eletise Malolosi—Ia Sosoese” po o le usitai i le faatuatua i le faamasinoga tonu a le au atamamai latou te iloa le matautia?

Pe o se usitai tauaso ea pe a faamau e le tagata e malaga i le ea lona fusipau ao emoemo mai lena faailoilo po o le faatuatuaina o le tomai ma le atamai o i latou o e ua tele le silafia o mea faigata ma le matautia?

Pe o se usitai tauaso ea pe a oso fiafia mai se tamaitiiti laitiiti mai luga o se laulau i lima malolosi o lona tama o loo ataata atu, pe ona o le malosi o le faatuatua i se matua alofa o le ua lagonaina le mautinoa o lana sapo, ma e sili atu lona alofa i le tamaitiiti nai lo le ola lava ia? …

Pe o se usitai tauaso ea la, e ui i le itiiti o lo tatou iloa, papa’u lo tatou malamalama, manaoga manatu faapito, faamoemoega lililo, ma tuinanauga faaletagata, lo tatou taliaina ma mulimuli i le taitaiga ma usitai i faatonuga a lo tatou Tama alofa o le … na fausia se lalolagi mo i tatou, alofa ia i tatou, ma sa fuafuaina se polokalama faatulagaina lelei mo i tatou, i le atoatoa e aunoa ma ni faamoemoega lilo, o lona olioliga sili ma le mamalu o le “faataunuu lea o le faaofuina i le tino ola pea ma le ola e faavavau” o lana fanau uma? [Tagai Mose 1:39.]⁸

E le o se usitai tauaso le mulimuli i se Tama ua ia faamaonia o Ia lava, e tusa lava pe aunoa ma se malamalama atoatoa,.⁹

O o tatou matua amiotonu ma le atamamai, o Atamu ma Eva, o ni faataitaiga i le tulaga o le usiusitai e mafua mai i se faatuatua e pei o le faatuatua o se tamaitiiti;

“… Ma sa usiusitai lava Atamu i poloaiga a le Alii,

“Ma ina ua mavae aso e tele, ona alu ifo lea o se agelu a le Alii ia Atamu ma ua faapea atu ia Atamu: Se a le mea ua e osi atu ai taulaga i le Alii? Ona tali atu lea o Atamu ia te ia: Ou te le iloa, ae ua poloaiina ai au e le Alii.

“Ona fai mai lea o le agelu, ua faapea mai: O lenei mea, o se faatusa o le taulaga a le Alo e Toatasi na Fanaua e le Tama, o Le ua tumu i le alofa tunoa ma le upumoni.” (Mose 5:5–7.)

O se usitai tauaso? E mautinoa lava e leai. Sa la iloaina Ieova, sa faalogo i lona siufofoga, sa savavali ma Ia i totonu o le faatoaga o Etena, ma iloa lona agalelei, faamasinoga tonu, ma le malamalama. Ma i le “tele o aso” sa laua fasia ai mamoe e le pona ma ositaulaga atu ai e aunoa ma le iloa pe aisea, peitai na faia ma lo la’ua mautinoa atoatoa o loo iai le faamoemoe amiotonu i le tulafono ma o le a faailoa mulimuli ane le mafuaaga pe a maea ona faataunuuina.¹⁰

Na saunoa atu Paulo i tagata Eperu e faapea:

“O le faatuatua na fausia ai e Noa le vaa ina ua mata’u, e ola ai lona aiga, ina ua aoaoina e le Atua i mea e lei vaaia i ia ona po.” (Epe. 11:7.)

Ae lei i ai ni foliga vaaia o se timu ma se lolo. Sa faatauemu atu lona nuu ma faaigoa o ia o le vale. O ana lauga na pau atu i taliga e tutuli. O ana lapataiga na manatu i ai ua faavalevalea. E lei iai se mea faapea na tupu muamua; e lei iai lava se lologa ua mafai ona lilofia ai le lalolagi. O se mea faavalevalea le fauina o se vaa i luga o le eleele matutu a o la e susulu le la ma o loo agai i luma le soifuaga e pei ona masani ai! Ae peitai ua leai se taimi. Ua maea le vaa. Ua sau le lolo. Na malelemo le au le usiusitai ma le au tetee. O le vavega o le vaa na mafua mai ona o le faatuatua na faaalia i lona fausiaina.

Sa toe faapea mai foi Paulo:

“O le faatuatua foi na maua ai e Sara le malosi e fanau ai, na fanau foi o ia ina ua mavae tausaga o lona malosi, aua ua manatu o ia e faamaoni mai o ia na folafola mai.” (Epe 11:11.) …

E matua faigata ona talitonuina le faapea mai, e mafai ona fanau mai ni fanau i e ua tai selau tausaga le matutua, e oo lava ia Sara sa le talitonu i le taimi muamua. Ae peitai sa manumalo lava le faatuatua o se ulugalii faamamaluina, ma sa fanau mai ai le atalii o le vavega e avea ma tupuaga o nuu e tele.

Sa faaalia e Aperaamo le faatuatua tele naua ina ua tuuina i ai le tofotofoga sili faaletagata ia te ia. O lona “atalii o le folafolaga,” ua faamoemoe e avea ma tama o malo, ua tatau nei ona ofoina atu i luga o le fata faitaulaga. O se poloaiga a le Atua, ae ua foliga mai ua matua feteenai tele lava! E mafai faapefea e lona atalii, o Isaako, ona avea ma tama o ni fanau e le mafaitaulia pe afai o le a faamutaina lona olaga talavou? Aisea e tatau ai ia te ia, o Aperaamo, ona valaauina e faia lenei gaoioiga matautia? O se mea e le mafai ona teenaina, e le mafai! Ae peitai sa ia talitonu i le Atua. O lona faatuatua mausali na aveina atu ai o ia ma le loto momomo agai atu i le mauga o Moria faatasi ma lona atalii talavou. …

“E lei masalo vale ia ma le le faatuatua i le mea na folafolaina e le Atua, a ua malosi tele o ia i le faatuatua ua vivii atu i le Atua;

“Ua na mautinoa foi, e mafai ia te ia ona faia o le mea na folafolaina e ia.” (Roma 4:20–21.)

Sa iloa e Tama Aperaamo ma Tina Sara—sa iloa o le a faataunuuina le folafolaga. E faapefea—la te lei iloa ma la te lei fesiligia foi ia iloa. Sa mautinoa lava e ola Isaako e avea ma tama o se fanau toatele. Sa la iloa o le avea ia [ma tama o se fanau toatele], e ui lava atonu e manaomia ai lona oti. Sa la iloa lava e mafai ona faatuina mai o ia mai le oti e faataunuu le folafolaga, ma o lenei mea, na muamua le faatuatua i le vavega.¹¹

Ia manatua o Aperaamo, Mose, Elia, ma isi sa le manino lo latou iloa atu o le iuga mai le amataga. Sa latou … savavali i le faatuatua ma e aunoa ma le malamalama. Ia manatua foi e leai ni faitotoa na matala; e lei onā Lapana; ma e leai se faamoemoe faalelalolagi na faamaonia i lea taimi na faaaoga ai e Nifae lona faatuatua ma alu atu ai mo le taimi mulimuli e aumai papatusi. Sa leai ni lavalava e puipuia ai mai le afi po o nisi puipuiga masani mai le ogaumu aasa e puipuia ai [alii] Eperu e toatolu mai le oti; sa leai ni faagutu pa’u po o ni uamea mo gutu o leona ina ua lokaina Tanielu i le lua. …

… Ia manatua sa leai ni taulaga ma ni aai, leai ni faatoaga ma ni togalaau, leai ni fale ma ni fale teuoloa, leai se toafa lauolaola i totonu o Iuta ina ua sopoia e paionia na sauaina ia laufanua valevalenoa. Ma ia manatua sa leai ni tagata faalelagi i Palmyra, i le Susquehanna po o luga o Kumora i le taimi na alu atu filemu ai Iosefa ma lona agaga galala i le Togavao, ma tootuli e tatalo i luga o le auvai, ma a’e i tafamauga o le mauga paia.¹²

Tatou te toto le fatu e ala i le faatuatua, ma e le umi a e tatou vaai i le vavega o le fua mai. Ua tele ina le malamalama tagata ma ua latou fesuiai lenei ala. Ua latou faamuamua le seleselega nai lo le totoina, o le taui ae lei faia le auaunaga, o le vavega ae lei faaalia le faatuatua. … O le toatele o i tatou, tatou te fia maua le malosi e aunoa ma le tausia o tulafono o le soifua maloloina, manuia e ala i le tatalaina o pupuni o le lagi e aunoa ma le totogiina o a tatou sefuluai. Tatou te fia latalata atu i lo tatou Tama e aunoa ma le anapogi ma le tatalo; tatou te fia maua le suavai i le taimi tatau ai ma le filemu i le lalolagi e aunoa ma le tausia o le Sapati ma tausia isi tulafono a le Alii. Tatou te fia tauina le rosa ae lei totoina ia aa; tatou te fia seleseleina le saito ao lei totoina ma tausiaina.

Ana mafai ona tatou iloaina e pei ona tusia e Moronae:

“Aua afai e leai se faatuatua i le fanauga a tagata, e le mafai le Atua ona faia se vavega ia te i latou. …

“Ua le faia vavega e se tasi i se aso, ina seia muamua ona latou faatuatua; o lea na muamua ona faatuatua i latou i le Alo o le Atua.” (Eteru 12:12, 18.)¹³

Ana mafai ona tatou savavali nei i le faatuatua, ana mafai ona tatou talitonu i folafolaga e tele a le Atua, ana mafai ona tatou usitai ma faatalitali ma le onosai, o le a faataunuuina uma e le Alii ana folafolaga e tele ia i tatou:

“… O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou e alolofa ia te ia.” (1 Korinito 2:9.)¹⁴

E manaomia se faatuatua maoae e totogi ai sefuluai pe a utiuti le seleni ae tele mea e manaomia. E manaomia le faatuatua e anapogi ai ma faia tatalo faaleaiga ma tausia le Upu o le Poto. E manaomia le faatuatua e faia ai asiasiga faaleaiga, galuega talai [a tagata o le au paia], ma isi auaunaga, pe a manaomia le ositaulaga. E manaomia le faatuatua e faia ai galuega faamisiona. Ae ia iloa le mea lenei—o nei mea uma e mo le totoina, ao le faamaoni, aiga malolosi, puipuiga faaleagaga, filemu, ma le ola e faavavau o seleselega na. …

… E pei lava ona taofia e le faatuatua lototele ia gutu o leona, faaleaoga le afi aasa, tatalaina auala matutu i le vai ma le sami, puipuia mai lologa ma lamala, ma aumaia faaaliga faalelagi i olega a perofeta, ina ia mafai ona faamaloloina e le faatuatua ia ma’i o o tatou olaga taitoatasi, aumaia le faamafanafanaga ia i latou o e faanoanoa, faamalosia ia le naunau e tetee atu i faaosoosoga, [o le faatuatua e mafai] ona tatala ai mai noanoaga o amioga leaga, tuuina atu le malosi e salamo ai ma suia o tatou olaga, ma taitai atu i se malamalama mautinoa o le moni o Iesu Keriso. O le faatuatua malosi e mafai ona fesoasoani ia i tatou ina ia tatou ola ai i tulafono ma se agaga naunautai ma faapea ona aumaia ai faamanuiaga e le masino, ma le filemu, atoatoa, ma le faaeaina i le malo o le Atua.¹⁵