E Tatau ona Avea i Tatou ma ni Tagata Migao

O le migao ua faauigaina o se “lagona po o se uiga o le faaaloalo loloto, alofa, ma le mata’u, mo se mea paia.” O le faamatalaina o le tapuai i le Atua o le isi lea auala e faamatala ai le uiga o le migao.

O le toatele o o tatou taitai ua faaalia ni manatu e faatatau i le migao, o se tasi o uiga e sili ona maualuga o le agaga, ua ta’u mai ai faapea e aofia ai le faatuatua moni i le Atua ma lana amiotonu, o se aganuu maualuga, ma le alofa mo mea sili i le olaga. …

E pei foi o isi mataupu faavae o le talalelei, o le migao e taitai atu ai i le faateleina o le fiafia.

E tatau ona tatou manatua, o le migao e le o se amioga maualalo e le tumau tatou te mauaina i Aso Sa. O le faaaloalo moni e aofia ai le fiafia, faapea foi ma le alofa, migao, agaga faafetai, ma le mata’u faaleatua. O se uiga lelei e tatau ona avea ma se vaega o lo tatou olaga. O le mea moni, o le Au Paia o Aso e Gata Ai, e tatau ona avea ma tagata aupito sili ona migao i le lalolagi atoa.⁴

O le ava ma le migao i le Tama ma le Alo o se tulaga manaomia lea po o uiga o i latou o e maua le malo selesitila. I le vaega e 76 o le Mataupu Faavae ma Feagaiga, ua taua “O le Faaaliga,” sa tuuina mai ia Iosefa Samita ma Sidney Rigdon ia Fepuari 1832, ua tatou iloa ai:

“Ua faapea foi ona ma vaaia le mamalu o le selesitila, e sili ae lava i mea uma o i ai le Atua, o le Tama lava lea, e nofo tupu ai i lona nofoalii e faavavau faavavau lava;

“E ifo atu mea uma lava i le viiga loto maulalo i luma o lona nofoalii, ma avatu ia te ia le mamalu e faavavau faavavau lava.

“O i latou e nonofo i ona luma o le ekalesia lea a le Ulumatua; latou te vaai foi e pei ona vaaia i latou, ma latou iloa e pei ona iloa i latou, ona ua latou maua mai lona atoatoa ma lona alofa tunoa.

“Na te faatutusaina foi i latou i le mana ma le malosi ma le pule.” (MFF 76:92–95)

O se tasi faaaliga o aso nei ua faatonuina ai i tatou ina ia saunoa ma le migao i le suafa o le Silisiliese; ua tauina mai ia i tatou e aua le upuleaga i le suafa o le Tama, e oo lava i le aloese mai le faaaogaina soo. (MFF 107:2–4.) …

E foliga mai o le migao i le Atua ma lona suafa o se tasi o uiga aupito taua e mafai ona tatou atiina ae.⁵

I le falemai i se tasi aso, a o tosoeseina mai au mai le potu o taotoga e se tagata na tau sulu, sa sau mai ona laugutu faalii ni faaupuga fetuu matuia ma ta’u faatasi mai ai ma le suafa o le Faaola. E ui lava ina ou te lei ala lelei, ae sa ou minoi solo ma augani atu: “Faamolemole! Faamolemole! O le suafa lena o lo’u Faaola ua e upuleagaina.”

Sa matuai sāō mea uma, ona musumusu mai lea o se leo malu, “Ou te faamalie atu.” Na galo ia te ia mo sina taimi, sa matuai poloaiina e le Alii ona tagata uma, “Aua e te ta’u fua le suafa o Ieova lou Atua; aua e le faasaoina e Ieova o le ta’u fua lona suafa” (Esoto 20:7). …

I luga o tulaga faafiafia, i luga o telefoni, e matuai le fiafia lava taliga ma mata maaleale i le faaaogaina i aso uma, o suafa o le Alii lo tatou Atua i [upu] le talafeagai ma upuleaga. I totonu o kalapu, i faatoaga, i faatasiga faafiafia, i pisinisi, ma soo se galuega, e faaaogaina ai suafa o le Faaola i faiga le mafaufau ma le agasala. O i latou e leai ni mafaufau ma faatamala, ma i latou o e fia malolosi ma fia totoa, e tatau ona manatua e le mafai ona tatou tau fua le suafa o le Alii e aunoa ma le faasalaina. Pe tatou te le o valaauina ea le oo mai o le faafanoga i lo tatou faaleagaina o mea paia uma ma le mamalu, e oo lava i le faaaogaina soo ma le faaletatau o suafa o le Silisiliese i a tatou talanoaga o aso taitasi? …

O se mea leaga tele mo soo se tagata ola le faaaogaina ma le le migao o suafa o le Silisiliese. Ma e aofia ai le faaaoga o le suafa o le Alii e aunoa ma le pule, ma e toatele tagata ua tautino mai [ua latou maua] faaaliga ma le pule, ae latou te lei mauaina tuusao mai le Alii.

I le gasologa o tausaga, e lei tuua lava e perofeta le aoai mai e uiga i lenei agasala mamafa. Sa ta’u atu e le perofeta o Isaia e i luga o le tagata lava ia, ma ia salamo i latou “o e tauto i le suafa o Ieova ma tautau atu i le Atua o Isaraelu, ae le o le faamaoni ma le amiotonu” (Isaia 48:1). …

I le avea ai ma ni tagata o le Ekalesia, o le tauina ma le migao o le suafa o le Alii, e tatau ona avea o se vaega o o tatou olaga. Mo se faataitaiga, o i tatou, o ni tagata lelei o le Au Paia o Aso e Gata Ai, e le ulaula. Tatou te le inu ava malosi. Tatou te le faaaogaina lauti ma kofe. I lea lava foi tulaga, tatou te le faaaogaina gagana leaga. Tatou te le upuleaga pe ta’uleagaina foi. Tatou te le ta’u fua le suafa o le Alii. E le faigata ona atoatoa i le aloese mai le masani e palauvale, aua a loka e se tagata lona gutu mai upu fetuu uma, ua agai atu o ia i le atoatoa i lena vaega.

Peitai, e le gata mai ai iina la tatou matafaioi. O lena tulaga ua na o le taofia mai le faia o le agasala. Ina ia faia le amiotonu, e tatau ona tatou tauina le suafa o le Alii ma le migao ma le paia i a tatou tatalo, i a tatou lauga, ma a tatou talanoaga. …

Sa faaatoatoaina e Iesu lona soifuaga ma avea ai ma o tatou Keriso. Sa faamaligiina le toto taugata o se atua, ma avea ai o ia ma o tatou Faaola, sa tuuina atu lona soifua atoatoa, ma avea ai o ia ma o tatou Togiola; o lana taulaga togiola mo i tatou ua mafai ai ona tatou toe foi atu i lo tatou Tama Faalelagi, a o lenei, e ese le le mafaufau, e ese le le talisapaia e le toatele o tagata ua manuia ai! O le le loto faafetai o se agasala ua autausaga.

E toatele [tagata] e ta’uta’u lo latou talitonu ia te ia ma ana galuega, ae peitai e fai lava si toalaiti o i latou e faamamalu ia te ia. E faitau miliona i tatou ua tatou ta’ua i tatou lava o ni Kerisiano, ae seasea ona tootutuli i le agaga faafetai mo lana meaalofa silisili, o lona soifua.

Ina tatou toe faapaiaina ia i tatou lava i uiga migao, i le faaalia o le agaga faafetai i lo tatou Alii mo lana taulaga e le mafaatusalia. Ia tatou manatua le poloaiga o aso nei, “O lea, ia faaeteete ai tagata uma i le ala latou te faaaogaina ai lo’u igoa i o latou laugutu” (MFF 63:61).⁶

I se isi vaega e aupito sili ona taua, na fetalai mai le Alii e ala i faaaliga o aso nei, e tatau ona tatou migao lelei i lona maota paia. I le faaaliga taua sa tuuina atu ia Iosefa Samita ua ta’ua o le tatalo o le faapaiaga mo le Malumalu i Katelani, na tuuina mai ai se faatonuga e faapea o lenei [malumalu] e faapena foi i isi malumalu paia uma ua faatuina mo le Alii, e tatau ona avea o se nofoaga o le migao ia te Ia. (Tagai MFF 109:13, 16–21.)

I se tulaga moni, o le saunoaga e uiga i malumalu paia o le Ekalesia ua faatatau foi i soo se “maota o le Alii,” e tusa po o se falelotu po o soo se nofoaga e tapuai ai le Au Paia, po o le mea moni, so o se fale lava o se aiga o le Au Paia o Aso e Gata Ai.⁷

I le Au Paia o Aso e Gata Ai, o le falelotu e le o se vaega e motu ese po o se potu i totonu o se falesa tele, e le o se nofoaga foi e i ai ni fata faitaulaga auro ma maa taua. O se nofoaga e le papanu ni ona teuga pe faia ai se fia faalialia vale, e leai ni faatagata ma o le tele lava e leai ni ata, e faafaigofie foi ma laiti nai ona teuteu, e mama ma onomea mo tapuaiga. O se nofoaga e nonofo lelei ai tagata, i le usoga moni, e aoaoina ai lesona, e pepese ai aufaipese, e tatalo ai ma aoao atu ai tagata o le ekalesia, ma e maua uma ai e tagata le malamalama ma musumusuga—ma o se nofoaga e maua uma ai e tagata matutua ma tagata laiti ia le faamanatuga. O iinei e foafoaina ma faailoa atu ai ia amioga o mafaufauga ma galuega i totonu o olaga, ma o iinei foi e fanau ai le faatuatua, toe faamumu, ma faapaiaina.

E lei faapaiaina le falelotu mo se talitonuga faafiaamiotonu e i ai foliga faasiasia, o faiga pāū, po o le fifilemu ona o le le fia masani ma le fia mata’ese, ae peitai, e tatau ona maua ai iina i taimi uma le migao mo nofoaga paia, faamoemoega paia ma tagata faapaiaina.⁸

O i tatou ea o ni tagata migao? Po o faaalia ea i a tatou amio e faia i o tatou aiga ma le lotu le migao mo le na faia i tatou?

O nisi taimi tatou te ofo ai. Tatou te auai i sauniga faamanatuga ma konafesi e feoai solo ai tamaiti i auala savali e le taofiofia. I le taimi o le sauniga, tatou te vaaia ai tagata matutua o talatalanoa ma isi i o latou autafa, o tagata e tulemomoe, ma le autalavou e faapotopoto i faapaologa. Tatou te vaaia aiga e tuai mai ma soona savavali atu ma le pao i o latou nofoa, ma ni vaega o tagata e talanoa leo tetele i totonu o le falelotu pe a mae’a le sauniga.

E liliu atu o tatou manatu i tagata sailiili, o uo, ma i latou o loo maaleale ma tau atiina ae a latou molimau. Pe o avea ea a tatou sauniga ma mea faigaluega faafaifeautalai malolosi, e mafuta ai le Agaga o le Alii ma tuia ai le loto? A le o lea, pe le tatau ea ona tatou taofia muamua le tele o mea faasoesa e le manaomia ina ia lagonaina ai le Agaga? ⁹

O se tagata maoae e migao. O le a ia faaalia le faaaloalo i totonu o se maota tapuai, e tusa lava pe na o ia le tagata o loo i totonu. E lei i ai se aulotu na potopoto i le taimi na poloaiina ai e le Alii ia Mose: “ina to ese ia ou seevae i ou vae, aua ua sa le eleele o loo e tu ai nei!” [Tagai Esoto 3:5.] E tatau i taitai pulefaamalumalu ona fuafua ma le faaeteete ina ia leai se taumusumusu e ono faalogoina pe vaaia i luga o le tulaga [o loo alala mai ai]. E tatau i matua ona aoao ma aoai a latou fanau ma nonofo faatasi ma i latou (sei vagana ni vaega e vaavaaia e vasega). E tatau ona aoaoina le au faasino nofoa ia faasino ma le filemu ia nofoaga ma ia aua nei fai ma faalavelave. E tatau ona vavevave atu tagata auai, fai a latou feiloaiga faaleuo i ni leo filemu, laalaa lemu, sue ni nofoa i le pito i luma, ma nonofo loa ma le filemu ma se lagona mafaufau loloto. E tatau i tagata uma ona auai faatasi—pepese faatasi ma le au pepese, tatalo ma le o loo tatalo, taumamafa i le faamanatuga ma se agaga faafetai ma toe faia tautinoga i feagaiga na muai osia. E tuuina atu se avanoa e faafofoga lelei ai ma se agaga talisapaia o lesona o loo aoaoina, o lauga o loo laugaina ma molimau o loo molimauina, ae aua le faamasinoina i le susua o upu ae o le faamaoni mai le loto. O se avanoa lenei e aoao mai ai i se punavai autu, aua o le a tuuina mai e le faiaoga sili ona lotomaulalo po o le failauga se manatu e mafai ona atiina ae. Ao tatou ulufia ma le filemu ia faitotoa o le falelotu, e mafai ona tatou lafoa’i i fafo ia faitioga uma, popolega, ma atugaluga—o fuafuaga uma faalegaluega, faaupufai, fegalegaleaiga, ma mea faafiafia—ae tuuina atu i tatou ma le filemu i le mafaufau loloto ma le tapuai. E mafai ona tatou oo i se siosiomaga faaleagaga. E mafai ona tuuina atu i tatou lava ia aoaoina, salamo, faamagalo atu, molimau atu, talisapaia, ma alofaina.¹⁰

O fea la e amata ai le migao, ae faapefea ona tatou atiina ae?

O le aiga o le ki lea i le migao, e faapena foi i isi uiga uma faaleatua.

Sei ou faamamafaina atu le taua o le aoaoina o fanau i le tatalo. O le taimi o tatalo a le tagata lava ia ma tatalo faaleaiga e aoao ai e le fanau iti le punonou o o latou ulu, piilima, ma le moeiini o o latou mata, talanoa atu i le Tama o i le lagi. O le amio e aoaoina i le aiga, e iloa ai foi le amio [e faaalia] i sauniga faale-Ekalesia. O se tamaitiiti sa aoaoina e tatalo i le aiga e vave ona malamalama e tatau ona filemu ma nofo lelei i le taimi o tatalo i sauniga tapuai.

E faapena foi, pe a avea afiafi faaleaiga o se vaega o le olaga faaleaiga, e iloa e fanau o loo i ai taimi faapitoa, e le na o le lotu ae i le aiga foi, pe a tatou aoao e uiga i lo tatou Tama Faalelagi ma pe a manaomia e tagata uma ona faaalia lana amio e sili ona lelei.

O musika o se vaega e sili ona fiafia i ai tamaiti. O viiga e masani ona usuina i le lotu e mafai foi ona masani i ai i le aiga. E mafai ona faamanuiaina, aemaise lava le fanau iti, pe a fesoasoani i ai matua e aoao ia viiga faigofie i le fale. O lenei faiga, o le a fiafia ai le fanau e pepese i le faamanatuga ma isi sauniga.

Ioe, e tatau ona auai faatasi matua ma a latou fanau i sauniga o le Aso Sa.

E tatau ona galulue faatasi le tama ma le tina ina ia mautinoa o sauniuniga i le lotu o se aafiaga faagaeetia mo le aiga. O le faatatope i le taimi mulimuli e faamaopoopo mai le fanau, fai lavalava, ma topetope atu i le lotu, e faataumaoia ai le migao.

A masani ia aiga i lenei faiga o le tuai soo i le lotu, e masani lava ona i ai ni upu faatiga ma ni lagona faamanualia, ma e masani ona feita le fanau ma le lavava i le taimi o le sauniga. E sili atu ona migao se aiga e saunia mamao mo sauniga, e vave ona taunuu atu i le falelotu a o lei taitai amataina le lotu, ma nonofo faatasi ma faalogo i musika e muai tataina ma tuuese mai o latou mafaufau ia atugaluga o le lalolagi.

O matua e i ai fanau iti, o nisi taimi e faigata ai ia i latou ona fesoasoani ia latou fanau iti ia talisapaia ia sauniga ma taofiofi i latou mai le fai ma faalavelave. O le onosai, maua’i, ma le saunia i le aiga o ni vaega taua ia mo le faamanuiaina. Afai latou te le mautonu i le taulimaina o a latou fanau i le lotu, e tatau i matua talavou ona sailia se fautuaga mai se ulugalii o le uarota ua lava le poto masani [i tamaiti].

E masani lava, ao lei amataina po o le tuua foi o sauniga, e faapotopoto ai tagata o le Ekalesia i le falelotu ma faatalofa ma feofoofoai. E foliga mai o nisi aga o le le migao e mafua mai i le mea moni e faapea, o i tatou o ni tagata fefaauoai, ma o le Sapati o se taimi lelei lea e talatalanoa ai, e faaaumea ai, ma feiloai ai i tagata fou. E tatau i matua ona faia se faataitaiga mo o latou aiga e ala i le faia o a latou talatalanoaga i le faapaologa po o isi vaega i fafo o le falelotu ao lei amataina po o le tuua foi o sauniga. A maea se sauniga, e mafai e matua ona fesoasoani e aveina atu le agaga o le sauniga i le fale, e ala i le talanoaina faatasi ma le fanau i le fale o se manatu, se musika, po o se isi vaega lelei o le sauniga.¹¹

Ua tatou talanoaina le taua o le migao ma iloiloina nisi o ona uiga. Ua matou ofoina atu foi nisi o fautuaga e uiga i le faalauiloaina o le migao i le aiga ma le lotu. Ae peitai, o le alualu i luma moni i amioga a tagata, o le a oo mai a o tuufaatasia e taitai o le lotoifale ma aiga a latou taumafaiga e foia ai o latou faafitauli patino o le migao. Ua matou vaaia se taumafaiga a le Ekalesia aoao e faaleleia le migao. …

O le migao moni o se uiga taua, ae o se mea foi ua vave ona mou ese atu mai le lalolagi a o faalauteleina e malosiaga a le tiapolo o latou aafiaga. E le mafai ona tatou malamalama lelei i le mana mo le lelei e mafai ona tatou faaaogaina pe afai e avea le fia miliona o tagata o le ekalesia moni a Keriso ma ni faataitaiga o le amioga faaaloalo. E le mafai ona tatou iloa le tele o olaga e mafai ona tatou pa’i atu i ai. Ae atonu e sili ona taua, e le mafai ona tatou vave iloaina le aafiaga faaleagaga tele i luga o o tatou lava aiga, pe afai e avea i tatou ma tagata migao ua tatou iloa e tatau ona avea ai i tatou.¹²