“Aua Nei E Fai mo Oe ni Atua Ese i O’u Luma”

Ao ou suesue i tusitusiga paia anamua, ua saga faateleina ai pea lava lo’u talitonuga o loo i ai se taua i le mea moni e faapea, o le tulafono “Aua nei e fai mo oe ni atua ese i o’u luma” o le uluai tulafono lea o Tulafono e Sefulu.

E toaitiiti ni tagata ua filifili ma le iloa ma le mautinoa e teena le Atua ma ana faamanuiaga. Ae, ua tatou aoao mai tusitusiga paia e faapea, talu ai ona o taimi uma e foliga mai o le faatinoina o le faatuatua e sili atu ona faigata nai lo le faalagolago i mea e faigofie ona maua, e peiseai ai e liliu ese e le tagata o le lalolagi lona faatuatuaga mai le Atua agai i mea o le lalolagi. O le mea lea, i augatupulaga uma lava ina ua gauai atu le tagata i le malosi o Satani ma aveese ai le faatuatua, ua latou tuuina i lona tulaga se faamoemoe i le “mea faaletino” ma “atua o ario, ma auro, ma apamemea, ma uamea, ma laau, ma maa, e le vaai i latou, e le lagona, e le iloa ni mea” (Tanielu 5:23)—o lona uiga, o tupua. Ua ou iloa o le mea lenei o se autu taatele i le Feagaiga Tuai. Po o le a lava le mea ua matele ina tuu i ai le loto ma le faatuatuaga o se tagata o lona atua lena; ma afai foi e le o lona atua le Atua moni soifua o Isaraelu, ua galue lena tagata i le faia o tupua.

O lo’u talitonuga maumautu pe a tatou faitau i nei tusitusiga paia ma taumafai e “faatatau ia i [tatou],” e pei ona fautuaina e Nifae (1 Nifae. 19:24), o le a tatou vaaia le tele o le tulaga tutusa i le va o tapuaiga anamua i tupua ua ta ma mamanu i amioga i o tatou lava aafiaga.⁵

O le ifo i tupua o se tasi lea o agasala sili ona matautia. …

O tupua o ona po nei po o ni atua ese e aofia ai lavalava, fale, pisinisi, masini, taavale afi, vaa e na o le tafafao ai, ma le tele o isi mea a le lalolagi e faaseseina ai mai le ala e agai atu i le faaleatua. …

O mea e le vaaia e faigofie foi ona avea ma ni o tatou atua ese. O faailoga [tikeri] ma ni taui ma ni igoa faalagilagi e mafai foi ona avea ma tupua. …

E toatele tagata e muamua ona latou fausia ma faameaafaleina se fale ma faatau se taavale—ae iloa mulimuli ane latou te le “mafai ona gafatia” le totogiina o le sefuluai. O ai o loo latou tapuai i ai? E mautinoa lava e le o le Alii o le lagi ma le lalolagi …

E toatele e tapuai i tuliga manu, o fagotaga, o tafaoga, o le tafafao i faaiuga o vaiaso ma evaga. O nisi ua avea ma o latou tupua le taaalo i taaloga, pesipolo, lakapi, tauga povi, po o le ta polo. …

Ma o le isi lava tupua e tapuai i ai tagata o le malosi ma le lauiloa… O nei atua o le malosi, tamaoaiga, ma faatosinaga e sili ona tele le taimi e alu ai ma e tutusa lava ma povi auro a le fanauga a Isaraelu i le vaomatua.⁶

E ui i lo tatou fiafia i le faauigaina o i tatou o ni tagata o ona po nei, ma lo tatou matele e manatu faapea ua ia i tatou se malamalamaaga [e uiga i le lalolagi] lea e lei i ai i se isi tagata i le taimi ua tuanai—e ui lava i nei mea, o i tatou lava, i se tulaga lautele, o ni tagata ifo i tupua—o se tulaga e sili ona inosia i le Alii.⁷

Ua ou manatua ai se tala sa ou faitau i ai i nai tausaga ua mavae e uiga i se vaega o alii sa o atu i le vaomatua e pue manuki. Sa latou faaaogaina ni mea eseese e pue ai manuki, e aofia ai ma upega. Ae ina ua iloa o upega e ono faamanualia ai nei meaola laiti, o lea na latou maua se auala poto. Sa latou fauina ni tamai pusa laiti se tele, ma i le pito i luga o nei pusa taitasi ua i ai se pu e ofi lelei ai le lima o le manuki pe a tuu i totonu. Ona latou faatulagaina lea o nei pusa i lalo o laau ma o totonu o nei pusa taitasi sa latou tuuina i ai se pinati lea e fiafia tele i ai manuki.

Ina ua o ese nei alii, sa amata ona o mai i lalo manuki mai laau ma suesue ia pusa. I le iloaina o loo i ai ni pinati e ave ma latou, o lea sa latou aapa atu ai i totonu e aumai. Ae a taumafai se manuki e aveese mai lona lima ma le pinati, ua le mafai ona aumai i fafo lona lima ona o lana moto laitiiti, lea ua i ai le pinati, ua fai nei si lapoa.

O le taimi lea, e o mai ai alii mai faapuloulou sa lalafi ai ma tapue loa ma manuki. Ma o se mea lenei e le malamalama i ai: Ina ua iloa atu e manuki nei alii ua o atu, ona latou feei lea ma ausulusulu solo ma le manatu e sosola; ae o se mea semanu e matuai sili atu ona faigofie, sa le mafai ona latou faamamuluina ia pinati ina ia mafai ai ona aveese mai o latou lima mai pusa ma sosola ai. Sa faigofie i alii ona tapue i latou.

Ma e faapena foi i tagata, o le uumauina o mea a le lalolagi—o mea e faatelesitila—e le tele se faatauanauina ma e leai se malosi o le faafuaseia e mafai ona tauanauina i latou e lafoai ese ae saili mea faaselesitila. E faigofie lava ona uumau i latou e Satani. Afai tatou te naunau e faaaluina uma o tatou taimi ma mea tatou te maua e atiina ae ai mo i tatou lava se malo faalelalolagi, o le mea tonu lava lena o le a tatou maua.⁸

O le i ai o oa, e le faapea ua agasala ai se tagata. Ae e ono tulai mai le agasala i le ala na maua ai ma le faaaogaina o le oa. …

O le talaaga o le Tusi a Mamona o loo faaalia malosi ai aafiaga faataumaoi o le tuinanau i oa. O taimi uma lava e amiotonu ai tagata, e faamanuiaina i latou. Ona sosoo ai lea ma le suiga o le manuia i le mauoa, o le mauoa i le fiafia i oa, sosoo ai ma le fiafia i le le popole ma mea taugata. Ona latou see atu ai lea i le le malosi faaleagaga, sosoo ai ma le agasala inosia ma le amioleaga, ma agai atu ai i le toetoe a faatafunaina e o latou fili. … Ana faapea e faaaoga e tagata a latou oa mo ni faamoemoega lelei, semanu latou te olioli lava i le manuia faifai pea.⁹

Ua faamanuiaina i tatou e le Alii o se nuu i ni manuia e le mafaatusalia i taimi ua tuanai. O punaoa ua tuuina mai tatou te pule ai ua lelei, ma talafeagai mo la tatou galuega i luga o le fogaeleele. Peitai, ou te fefe ona o le toatele o i tatou ua matuai faamanuiaina i fagaga ma lafu ma fanua ma fale i faatoaga ma tamaoaiga, ma ua amata ai ona tapuai i ai e avea ma ni atua ese, ma ua latou pulea ai i tatou. … Ae ua galo ia i tatou le mea moni e faapea, o la tatou matafaioi o le faaaoga lea o nei punaoa e tele i o tatou aiga ma korama e fausia ai le malo o le Atua—e faalauteleina ai le galuega faafaifeautalai ma galuega faalemalumalu ma gafa; ina ia tausia a tatou fanau ia avea o ni auauna aoga i le Alii; ina ia faamanuiaina ai isi i soo se auala, ina ia uluuluola foi i latou. Nai lo lena, ua tatou faaaluina nei faamanuiaga i o tatou lava manaoga, ma e pei ona fai mai ai Moronae, “Tou te teuteuina i se a outou i mea e le i ai se ola, ae tuu o e fiaaai, ma e matitiva, ma e le lavalava, ma e mama’i ma e puapuagatia e o ane, a e le vaai atu outou ia te i latou!” (Mamona 8:39.)

E pei ona fetalai mai le Alii lava ia i o tatou aso, “Latou te le saili i le Alii ia faatuina lana amiotonu, a ua taitoatasi le tagata ma savali i lona lava ala, ma e tusa ma le faatusa o lona lava Atua, o lona faatusa lea e i foliga o le lalolagi, ma o lona autu o se tupua lava, o lea ua tauau ina leva ma o le a faaumatia i Papelonia, o Papelonia lava lea le sili, o lea lava o le a pau.” (MFF 1:16; faaopoopo le faatusilima.)¹⁰

Ua fetalai mai le Alii, “…ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.” (Mataio 6:33.) Ae peitai, o le tele o taimi, tatou te mananao muamua ai i “mea.”¹¹

Atonu o le agasala e le faapea o “mea” ua tatou sailia ae o o tatou uiga faaalia i ai ma le tapuai i ia “mea.” Sei vagana ai e mafai e se tagata manao mea ona faaputuina uma ma taofi ia oa, a o tuuina atu pea le faamaoni atoatoa i le Atua ma lana polokalama—sei vagana ai ua mafai ona tausia e le tagata mauoa le Sapati, tausia lona mafaufau ma lona tino ma le agaga ia le faaleagaina, ma tuuina atu le auaunaga agalelei i ona uso a tagata, e ala atu i le auala faatulagaina a le Atua—seiloga ua i ai i le tagata mauoa le puleaina atoa ma mafai ona faaaogaina ana meatotino mo le manuia o isi, e faalagolago i le valaau a le Alii e auala mai i ana auauna filifilia, ma o lena tagata, mo le lelei o lona agaga, e tatau ona mautinoa e “alu ma e faatau atu au mea, i le e avatu ai i e matitiva, …i le e sau ma mulimuli mai ia te au.” (Mataio 19:21.)

“Aua o le mea ua i ai lo outou oa, e i ai atoa foi ma o outou loto.” (Mataio 6:21.)¹²

O se tasi tamaloa ou te iloa sa valaauina i se tofiga e auauna atu i totonu o le Ekalesia, peitai, sa manatu o ia e le mafai ona ia taliaina ona o ana teugatupe sa manaomia ai le tele o lona taulai atu i ai faapea ma lona taimi, nai lo le taimi e mafai ona ia faaavanoaina mo le galuega a le Alii. Sa ia tuua le auaunaga mo le Alii ona o le sailiga o Mamone, ma o ia o se milionea i le taimi nei.

Ae talu ai nei lava sa ou aoaoina ai se mea moni faigofie: Afai e umia e se tagata ni auro e miliona tala le tau i le taimi nei, ua ia umia le tusa ma le tasi vae 27-piliona o auro uma o loo i ai i le manava manifinifi o le eleele i le taimi nei. O lenei aofai e laitiiti lava e le talitonuina e mafaufau o le tagata. Ae o loo i ai isi mea e sili atu nai lo lenei: O le Alii o le sa foafoaina ma e i ai [Lona] mana i le lalolagi atoa, sa foafoaina le tele o isi foi lalolagi, e pei foi o “lalolagi e le mafaitaulia” (Mose 1:33); ma ina ua maua e lenei tagata le tautoga ma le feagaiga o le perisitua (MFF 84:33–34), sa ia mauaina se folafolaga mai le Alii o “mea uma o loo i ai i lo’u Tama” (f. 38). Ina ia faataatia ese nei folafolaga maoae uma, ae talia se pusa auro ma se lagona o le puipuiga faaleolaga nei, o se mea sese tele lea e mafua mai ona o le leai o se uta ma se tofa. O le mafaufau e faapea ua malie o ia i se mea itiiti tele, o le mea moni, o se faanoanoaga ma se manatu faamomoiloto; e sili mamao atu le taua o agaga o tagata nai lo lenei mea.

O se tasi alii talavou, ina ua valaauina i le misiona, sa tali mai e faaletalenia tele o ia mo lena ituaiga mea. O le mea sa lelei ai o ia o le tausia lea o lana taavale fou manaia ia atoatoa le lelei. Sa fiafia o ia i lagona o le manaia ma le saoasaoa, ma pe a ia aveina, o le alu umi [o le taavale] sa ia maua ai se lagona faivavale e faapea, ua alualu lava i luma lona olaga.

Mai lava i le amataga, sa fiafia lava lona tama i le faaupuga, “E fiafia o ia e faifai mea i ona lima. Ua lava a lena mo ia.”

Pe ua lelei ea lena mo se atalii o le Atua? E lei iloa e lenei alii talavou, o le malosi o lana taavale ua na o si mea itiiti lava pe a faatusatusa atu i le mana o le sami, po o le la; ma e tele la, e faatonutonu uma lava e le tulafono ma le perisitua, o le faatumutumuga lava—o se mana o le perisitua semanu na te atiina ae i le galuega a le Alii. Sa malie o ia i se atua faatauvaa, o se mea na faia i uamea ma pa’u ma uamea iila.

O se ulugalii matutua ua malolo mai le lalolagi faigaluega, e le gata i lea, ae faapea foi mai le Ekalesia. Sa la faatauina se taavale pikiapu ma se fale feaveai ma vavaeeseina ai i la’ua mai matafaioi uma lava, ma o atu loa e matamata i le lalolagi ma fiafia i nai mea iti sa la faaputuina i le taimi o totoe o o la olaga. Sa leai so la taimi mo le malumalu, sa pisi tele mo le sailiga o gafa ma le galuega faamisiona. Sa le toe fesootai le tamaloa ma le tatai o lana korama o faitaulaga sili ma sa le lava lona taimi i le aiga e galue ai i lona lava talaaga. O o la’ua tomai ma tulaga faaletaitai sa matuai manaomia i la latou paranesi, ae peitai, sa le mafai ona “tumau seia oo i le iuga,” e lei avanoa i laua.¹³

E le lava lo tatou faailoa atu o le Alii e silisiliese ma aloese mai le tapuai i tupua; e tatau ona tatou alolofa i le Alii ma o tatou loto atoa, manatu, mafaufau, ma le malosi. E tatau ona tatou faamamaluina o ia ma mulimuli ia te ia i le galuega o le ola e faavavau. E matuai olioli o ia i le amiotonu o lana fanau!¹⁴

Ua manino lava la tatou galuega: o le lafoai o mea o le lalolagi o ni sini ia i latou lava; ia aloese mai le ifo i tupua ma fetaomi atu i luma i le faatuatua; ia aveina atu le talalelei i o tatou fili, ina ia le toe avea i latou ma o tatou fili.

E tatau ona tatou tuuese le tapuai i tupua o ona po nei ma le faalagolago i le “mea faaletino,” aua ua fetalai mai le Alii i le lalolagi atoa i o tatou aso, “Ou te le faasaoina foi ni e e totoe i Papelonia.” (MFF 64:24.)

Ina ua talai atu e Peteru lea ituaiga savali e pei o lenei i tagata i le aso Penetekoso, o le toatele o i latou sa “tuia o latou loto, ua latou fai mai ia Peteru ma le au aposetolo uma, Sema e, le au uso e, se a se mea matou te faia?” (Galuega 2:37.)

Ona fai atu lea o Peteru: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona … maua lea o le Agaga Paia.” (f. 38.)

… O la tatou savali e tutusa lava ma lea sa tuuina atu e Peteru. Ma e faapea foi, ona tuuina atu e le Alii lava ia “i tuluiga o le lalolagi, ina ia mafai ona lagona e i latou uma o e fia faalogo:

“Ina sauni ia outou mo mea o le a oo mai, aua ua latalata mai le Alii.” (MFF 1:11–12.)

Tatou te talitonu o le auala mo tagata taitasi ma aiga taitasi e saunia ai e pei ona faatonu mai e le Alii, o le amata lea ona faaaoga le faatuatua tele, ia salamo, ma ia ulu atu i le galuega o lona malo i le lalolagi, o le Ekalesia a Iesu Keriso o le Au Paia o Aso e Gata Ai. Atonu e fai sina faafaigata i le taimi muamua, ae a amata loa ona malamalama se tasi e uiga i le galuega moni, pe a amata ona ia vaaia sina vaega itiiti o le faavavau i lona tulaga moni, o le a amata ona sili atu faamanuiaga nai lo le tau o le tuua “o le lalolagi” i tua.¹⁵