Mataupu 20

O Tamaitai o le Ekalesia

O tamaitai amiotonu o e faataunuuina tiutetauave maoae ua tuuina atu ia i latou e le Atua ni faamanuiaga silisili i o latou aiga, i le Ekalesia, ma le lalolagi.

Mai le Soifuaga o Spencer W. Kimball

Sa tusia e Peresitene Spencer W. Kimball e faapea, “ou te maofa i le faatuatua o le toatele o o tatou tuafafine ma lo latou faamaoni maumaututu mo le faamoemoega o le amiotonu.” Ona ia faamatalaina lea o le tala lenei:

“O le api o talafaamaumau a si o’u lava tina maoae o loo tusia ai se olaga o le agaga faafetai mo le avanoa e auauna ai, ma na pau lona faanoanoaga, ona sa le mafai ona ia faia nisi mea se tele. Sa ou ataata ina ua ou faitauina lata mai nei se tasi o ana faamaumauga na tusia i le aso 16 o Ianuari, 1900. Sa tautua o ia o se fesoasoani muamua i la matou Aualofa i Thatcher, Arisona, ma sa malaga atu le au peresitene i le fale o se tasi tuafafine sa ma’i lana pepe lea na taofia ai le faiga o suisuiga a le tina. Sa ave e [lo’u] tina lana laau suisui, se meaai mama, lana pepe, ma se nofoa maualuga, ma amata loa ona latou galulue. Sa ia tusia i lena po, na matou ‘su’iina ni talieleele se fa, ofuvae vaeuumi se fa ma amata se ofutino mo se tasi o tamaiti.’ Sa taofi la latou [suisuiga] i le 4 i le afiafi ae o i se maliu, o lea ‘na le uma ai nisi mea se tele.’ Sa tatau ona ou fiafia i lena mea ua faataunuuina, nai lo le manatu, ‘E le tele ni mea na fai.’

Sa tusia e lo’u tina, “I le lua aso mulimuli ane, sa faatasi ai le Aualofa i lo matou fale mo le lotu galuega. ‘Sa fai si toatele o i latou na o mai, ma sa tele se galuega na faataunuuina.’ Ma ina ua mae’a lena lotu galuega, sa alu e aunoa ma se faitio i se fonotaga a le pulega.

“O le ituaiga aiga lena sa ou fanau mai i ai, o se aiga sa taitai e se tamaitai, o lē sa manavaina le faiva o le tautua po o le auauna atu i ana gaoioiga uma. O le ituaiga aiga foi lena ua faia e lo’u toalua. O le ituaiga aiga lena ua faia e le faitau afe o tuafafine lelei uma i le Ekalesia atoa.”¹

Sa aoaoina e Peresitene Kimball le taua o tamaitai amiotonu uma i le fuafuaga a le Tama oi le Lagi mo Lana fanau. Sa faapea mai o ia: “O le a i ai se aso, o le a faamatalaina ai le tala atoa o le augatupulaga lenei ma isi augatupulaga ua mavae, o le a faatumulia i tala e uiga i le lototetele o o tatou tamaitai, o lo latou atamamai ma lo latou faamaoni, o lo latou totoa, aua e lagonaina e se tasi atonu, e pei lava o tamaitai sa muamua i le tuugamau o le Alii o Iesu Keriso ina ua mavae lona toetu mai; e masani foi ona mataalia o tatou tamaitai amiotonu i mea e faavavau o latou taunuuga.”²

Aoaoga a Spencer W. Kimball

Ona o le eseese o tiutetauave ua tuuina mai, o lea e tatau ai i tamaitai ma alii ona galulue faatasi o se paaga tutusa ma le faaaloalo.

Ua aoao manino mai i tatou e tusitusiga paia ma perofeta e faapea, o le Atua o le e atoatoa i ona uiga o le faamasino tonu, “e le faailogaina tagata” (Galuega 10:34). … E tutusa i tatou uma i le avea ai o ana fanau agaga. E tutusa i tatou uma i le avea ai ma tagata e maua le alofa atoatoa o le Atua mo i tatou taitoatasi. Sa tusia e Elder John A. Widtsoe o le ua maliu:

“O le tulaga o le tamaitai i le Ekalesia, o le savali lea e i tafatafa o le alii, ae le o luma o ia po o ona tua foi. I totonu o le Ekalesia, o loo i ai se tulaga tutusa lelei i le va o le alii ma le tamaitai. O le talalelei … sa fuafuaina e le Alii ia tutusa ai alii ma tamaitai” (Improvement Era, Mar. 1942, p. 161).

Ae peitai, i totonu o na faamautinoaga maoae, e eseese ai o tatou tiute ma tofiga. O nei eseesega e faavavau—ua tuuina i tamaitai le tele o tiutetauave taua faaletina ma le faaleusoga ae ua tuuina i alii le tele o tiutetauave taua faaletama ma le faaleperisitua—peitai e le mafai ona i ai se tane e aunoa ma se tamaitai po o se tamaitai foi e aunoa ma se tane i le Alii (tagai 1 Kor. 11:11). E avea uma se tane ma se tamaitai amiotonu o se faamanuiaga ia i latou uma e pa’i atu i ai o latou olaga.

Ia manatua, i le lalolagi sa tatou i ai, ae tatou te lei o mai iinei, sa tuuina atu i tamaitai faamaoni ni tofiga faapitoa, a o alii faamaoni sa muai faauuina i galuega faapitoa i le perisitua. E ui ina ua tatou le manatuaina nei ia auiliiliga, ae le avea lena ma mea e suia ai le paia moni o le mea sa tatou malilie i ai.³

O nisi taimi tatou te faalogoina ai ni lipoti le lelei e uiga i le faiga o tuafafine. Atonu a tupu mai lenei mea, o se taunuuga o le le amanaiaina ma le le magafagafa, peitai e le tatau lava ona faapea, uso e. Ua i ai i tamaitai o lenei Ekalesia se galuega e fai, e ui lava ina ese, ae tutusa lava le taua ma le galuega o loo tatou faia. O le mea moni, o la latou galuega o le galuega autu lava lea e tasi ua poloaiina i tatou e fai—e ui lava ina eseese o tatou tiutetauave ma tofiga. …

E le mananao o tatou tuafafine e faamatanana ona fai i latou pe vaai maulalo foi [ia i latou]; latou te mananao ia faaaloalo ma ava ia i latou o ni o tatou tuafafine ma e tutusa i tatou. Ua ou ta’ua nei mea uma, o’u uso e, ona e le faapea ua le mautonu le tulaga o tamaitai i aoaoga faavae po o aoaoga a le Ekalesia, ae ona o nisi tulaga ua fesiligia ai le lelei o a tatou amioga.⁴

O le Aualofa o le faalapotopotoga lea a le Alii mo tamaitai. E soosoo tauau ma aoaoga faaleperisitua ua tuuina atu i le usoga. O loo i ai se mana i lenei faalapotopotoga lea e lei matua atoatoa ona faatinoina e faamalolosia ai aiga o Siona ma fausia ai le Malo o le Atua. …

… I lona poto ma lona alofa tunoa, sa faia ai e le Tama ia alii ma tamaitai ina ia faalagolago le tasi i le isi mo le atiina ae atoatoa o lo latou tulaga gafatia. Talu ai ona e fai si eseese o o la’ua natura, e mafai ona soosoo tauau le tasi ma le isi; aua e tele lava itu e tutusa ai, e mafai ona malamalama le tasi i le isi. Aua nei matau’a le tasi i le isi ona o o la’ua eseesega; ae ia la taufai iloa mea e le moni ma mea e matagofie moni mai na eseesega, ona galulue lea ia tusa ai ma lena. Ma talosia ia avea le usoga a le perisitua ma le usoga a le Aualofa o se faamanuiaga i olaga o tagata uma o lenei Ekalesia maoae, pe a tatou fesoasoani atu le tasi i le isi a o agai atu i le ala i le faaatoatoaina.⁵

Ua valaauina e le Atua tamaitai e fesoasoani e faatamaoaigaina, puipui, ma leoleo le fale ma le aiga.

O le avea ma se tamaitai amiotonu o se mea viia lea i soo se tupulaga. O le avea ma se tamaitai amiotonu i le taimi faaiu i lenei lalolagi, a o lumanai le afio mai faalua o lo tatou Faaola, o se valaauga e faapitoa lona tamalii. O le malosi ma aafiaga o tamaitai amiotonu i aso nei e mafai ona faasefuluina [le tulaga] e oo i ai i taimi e sili atu ona filemu. Ua tuuina mai o ia iinei e fesoasoani e faatamaoaigaina, puipui, ma leoleo le aiga—o le faalapotopotoga faavae aupito sili lea ona tamalii. E ono faavaivai ma toilalo isi faalapotopotoga i alalafaga, ae o le tamaitai amiotonu e mafai ona fesoasoani e laveai le aiga, lea e ono avea ma sulufaiga mulimuli e tasi e iloa e nisi tagata i le totonugalemu o afa ma faigata.⁶

E te faitau i nusipepa, e te matamata i le televise, e te faalogo i le leitio, e te faitau i tusi ma mekasini, ma le tele o mea e oo mai i lou mafaufau ua faamoemoe e taitaiseseina ai oe. … O nisi o mea o loo latou tauina atu ia te oe i nei aso: e le manaomia ona e faaipoipo; e le manaomia ona faaipoipo ina ia i ai ni fanau; e le manaomia le faia o ni fanau; e mafai ona e maua uma fiafiaga faalelalolagi e aunoa ma nei matafaioi ma tiutetauave. … E [tele] ni auala e te maua ai lenei saolotoga le taofiofia. O loo latou ta’uina atu ia te outou, ua saisaitia outou i o outou aiga, i a outou tane, i a outou fanau, i a outou feau i le fale. O loo latou talanoa ma tusi atu ia te outou e uiga i se saolotoga latou te le iloa se mea e uiga i ai. …

O Eva, lata mai nei lava mai le nofoalii e faavavau, sa foliga mai na malamalama i ala o le olaga, aua sa fiafia o ia—fiafia!—ona sa la aia le fua o le laau faasaina. … Sa amataina e lo tatou tina peleina o Eva le lalolagi o tagata ma le fiafia, manao i se fanau, fiafia mo le olioli latou te aumaia ia te ia, naunautai e faafeagai ma faafitauli e fesootai ma le aiga, ae faapena foi ma olioliga. …

Ua i ai i tina se tiute paia. O i latou e paaga ma le Atua, faapea foi ma a latou tane, muamua, i le fanauina o fanau agaga a le Alii ona oo ai lea i le tausiaina ma le aoaoina o na fanau ina ia latou auauna i le Alii ma tausi i ana poloaiga. … O le avea ma se tina o se valaauga paia, o le uai atu ma le loto atoa i le faatinoina o le galuega a le Alii, o le faapaiaina ma le uai atu i le tausiga ma le atinaega, fafagaina o le tino, mafaufau, ma agaga o i latou sa tausia o latou uluai tofi ma ua o mai i lenei lalolagi mo lo latou tofi lona lua e aoaoina ma tofotofoina ma galulue agai atu i le avea ma atua.⁷

Ua toatele naua tamaitai ua faaaluina o latou taimi i evaga, i faiga faaupufai, i auaunaga faalauaitele, ae sa tatau ona i ai i le aiga e aoao ma faasino ma talisapaia ma alofaina a latou fanau ia [lagona le] saogalemu.⁸

E leai se mamalu sili atu e mafai ona tuuina atu i se tamaitai nai lo le fesoasoani i le fuafuaga paia a le [Atua]. Ou te fia faapea atu ma lo’u le masalosalo, o le a le maua e se tamaitai se faamalieina ma se olioli ma se filemu sili atu, ma lē faia se taumafaiga sili atu mo le fanauga a tagata nai lo le avea ma se tamaitai atamai ma agavaa ma tausia se fanau lelei.⁹

Ua folafola mai e le Alii ia faamanuiaga o le ola e faavavau o le aiga i tamaitai faamaoni uma lava.

O nisi o outou ua toesea a outou tane e ala i le maliu, a o isi e ala i le tatalaina o faaipoipoga. O nisi o outou e lei maua le avanoa sili o le faaipoipo. Peitai, pe a fua atu i le faavavau, o le misia o nei faamanuiaga “ua na o sina ituaso itiiti lava” (tagai MFF 121:7). …

Ia manatua foi, a o tatou tulimatai atu i mamalu ma le taua o le olaga faaleaiga iinei, o i tatou uma lava e auai i le aiga e faavavau o lo tatou Tama oi le Lagi.

Ia mautinoa foi, o tamaitai faamaoni uma, o e, e le o so latou lava sasi, ua le maua ai le avanoa i lo latou tofi lona lua e faamau ai i se alii agavaa, o le a [latou] maua lena faamanuiaga i le faavavau. I taimi pe a oo ia te oe moomooga loloto mo lena taliaina ma le alofa lea e i ai le olaga faaleaiga i luga o le fogaeleele, faamolemole ia iloa, o loo silafia e lo tatou Tama oi le Lagi lou mafatia, ma e i ai se aso o le a ia faamanuiaina ai oe ma o le a le mafai ona e faamatalaina.

O nisi taimi ina ia tofotofoina ma faamaonia [i tatou], e manaomia ai ona taofia mai ia i tatou mo se taimi le tumau—peitai o le a i ai se aso e maua uma ai e tamaitai ma alii amiotonu—mafaufau i ai, tamaitai e, o mea uma o loo i ai i lo tatou Tama! E le gata ina aoga le faatalitali mo le mauaina; [ae] e aoga foi le ola mo le mauaina!

Ae o le taimi nei, e le faapea seiloga e faaipoipo pe avea se tasi ma se tina ona mafai lea ona tausia le tulafono muamua ma le sili—o le alofa lea i le Atua ma o tatou uso a tagata—lea na fetalai mai ai Iesu o loo faavae ai tulafono uma ma le au perofeta.¹⁰

O outou na o e le o iloa i le taimi nei ia matafaioi masani a le tamaitai, ona e le o sa outou filifiliga, ae ona o mafuaaga e le maalofia, e mafai lava ona outou faia ni mea se tele e fesoasoani atu ai i isi.¹¹

E tatau i tamaitai taitoatasi ona saili e faataunuu lona agavaa faaleatua.

Matou te fiafia ma maofa i le atinaega tatau ma le faaalia o le tele o taleni a o tatou tuafafine.¹²

Matou te faamalosiau atu i o tatou tuafafine uma ina ia faaaoga o latou avanoa ina ia maua ai le malamalama ma le poto i le aoga, i suesuega a le tagata lava ia, ma le Aualofa.¹³

E mafai e outou tamaitai talavou ona faatutu a outou sini, ia mafai ona outou ausia ma tauivi i ai. Ia tauivi pea i ai. Ia agaga tatalo ma loto maualalo i le sailia o le atamai ma le poto. O loo outou i ai i le taimi o o outou olaga e aoao ai ma sauniuni ai. Ia aoao mea uma tou te mafai. O le tuputupu ae e maua mai le faatuina maualuluga o sini ma le aapa atu i fetu.¹⁴

O teine uma, ma ou te fai atu o teine uma lava, e tatau ona saunia o ia lava mo le faaipoipoga ma tiutetauave faatausiaiga. Tou te le o faitauina na mea i mekasini i aso nei, ae ui i lea e moni lava. E tatau ona faamalosiauina o ia ina ia mitamita e sauniuni mo le tautua moni faaletamaitai. E tatau ona atamai o ia i mea e aoga ma faatamaoaigaina i lona olaga faaleaiga. E tatau ona ia atiina ae ana taleni, faamalosia lona malamalama ma lana molimau o le talalelei, ma ia naunau e auauna atu i isi. O nisi teine e ono valaauina e o atu e faamisiona, ma o le a maua e i latou uma le avanoa e aoga tele ai i le malo o le Atua pe afai ua saunia i latou lava. … Tatou te mananao i o tatou tamaitai ina ia aoaoina lelei, aua e le mafai ona alualu i luma le fanau pe a poimalae o latou tina.¹⁵

Matou te mananao ia te outou e faaauau ma ia ausia lena aoaoga … lea o le a saunia ai outou mo le faavavau ae faapea foi mo se tautua atoatoa i le olaga faaletino. E faaopoopo atu i na tomai faavae ma le taua lea e o faatasi ma le tausiaiga, o loo i ai foi isi tomai lea e mafai ona atiina ae faalelei ma o le a faateleina ai lou mataalia i totonu o le aiga, i le Ekalesia, ma le nuu.

E toe faapea atu, e tatau ona outou atamamai i filifiliga tou te faia, ae matou te le mananao i tamaitai o le Ekalesia ia le aoaoina pe le mataalia. O le a avea outou o ni tina ma ava sili atu, i lenei olaga faapea foi i le faavavau, pe afai tou te faaleleia atili ia tomai ua tuuina atu ia te outou ma faaaoga ia taleni ua faamanuiaina ai outou e le Atua.¹⁶

Matou te fiafia i le mauaina e o tatou tuafafine o mea lelei uma. Matou te talitonu i le mauaina o nei faamanuiaga uma—aganuu, alualu i luma, aoaoga, atamai, atoatoa—ina ia mafai e tina o a tatou fanau ona faafaileleina ma aoaoina i latou i le amiotonu.¹⁷

Ou te toe faamamafa atu le manaomia tele o le suesue o tamaitai taitoatasi i tusitusiga paia. Matou te mananao i o tatou fale ina ia faamanuiaina i ni tuafafine e silafia lelei ia tusitusiga paia—e tusa lava pe ua e faaipoipo pe leai, talavou pe matua, maliu le tane pe o nofo i se aiga.

E tusa lava po o a tulaga faapitoa o loo outou i ai nei, a oo ina lava lo outou silafia i upumoni o tusitusiga paia, o le a sili atu ona outou mataalia i le tausiga o le tulafono lona lua ma le sili, ia alofa atu i le lua te tuaoi ia pei o oe lava ia te oe. Ia avea [outou] ma tagata atamamai i tusitusiga paia—e le faapea ia tau faatauvaaina ai isi, ae ia siitia ai i latou i luga! Ia, o ai e sili atu ona manaomia ona “faaputuina” ia upumoni o le talalelei (lea e mafai ona latou tapa i ai i taimi e manaomia ai) nai lo tamaitai ma tina o e o loo faatinoina le tele o le faafailele ma le aoaoina?

Ia saili le atoatoa ia outou taumafaiga amiotonu uma, ma vaega uma o o outou olaga.

Ia manatua, tuafafine pele e, o faamanuiaga e faavavau ua fai ma outou e ala i le avea ma tagata o le Ekalesia a Iesu Keriso o le Au Paia o Aso e Gata Ai, e matuai silisili atu nai lo se isi lava faamanuiaga e mafai ona outou maua. E leai se isi aloaiaina e mafai ona oo atu ia te outou i lenei lalolagi nai lo le taua o se tamaitai o le Atua. E leai se isi tulaga sili e mafai ona faaeeina atu i o outou luga, nai lo le avea ma se afafine o le Atua o le ua o’o i le tulaga faaleusoga moni, tulaga o se ava, ma le faatina, po o isi galuega e faatosinaina ai olaga mo le lelei. …

… E tatau ia te outou uma ona matuai feinu i upumoni o le talalelei e uiga i le natura e faavavau o lou lava faasinomaga ma le tulaga ese o lou lava tagata. E manaomia pea lava pea ona outou lagonaina le alofa atoatoa o lo tatou Tama oi le Lagi mo oe ma lagona le taua ua ia tuuina i ou luga i le avea ai o se tagata toatasi. Ia mafaufau loloto i nei upumoni sili, aemaise lava i na taimi a o (i ai i le filemu o se naunautaiga faapena, e te ono oo i ai i le avea o se tagata toatasi) e te tau manatunatu ai ma le le mautonu. …

E leai lava nisi folafolaga e maoae atu ma sili atu ona mamalu ua tuuina atu i tamaitai nai lo na faamanuiaga e maua e ala mai i le talalelei ma le Ekalesia a Iesu Keriso. O fea se isi mea e mafai ona e iloa ai po o ai moni oe? O fea ea se isi mea e mafai ona tuuina atu ai ia te oe ia faamalamalamaga ma faamautinoaga tatau e uiga i le natura o le olaga? O fea se isi mea e mafai ona e aoao ai i lou lava tulaga ese ma [lou] faasinomaga? O ai se isi e mafai ona e iloa ai le fuafuaga paia o le fiafia a lo tatou Tama oi le Lagi? ¹⁸

O tamaitai amiotonu e mafai ona avea o ni tagata fai saofaga maoae i le lalolagi ma le malo o le Atua.

E lei i ai lava se taimi i le lalolagi ua sili ona le mautonu ai [tagata] e uiga i le tiute o tamaitai. E lei i ai lava se taimi i le Ekalesia ua mafai ai e tamaitai ona faia ni mea e sili atu, e faailoa atu ai mea e mafai ona faia ma e tatau ona i ai o latou matafaioi moni i le lalolagi. O aafiaga ma faatosinaga a tamaitai ma tina i lo tatou lalolagi e sili ona taua. O le manatu e faapea “o le lima e luelueina le moega pepe e pulea le lalolagi” ua sili atu le sa’o i le taimi nei nai lo se isi lava taimi muamua.¹⁹

Faauta i le faapitoa o tamaitai o le Au Paia o Aso e Gata Ai, ma le tuuina atu i ai o tofiga faapitoa ua tuuina atu ia i latou e lo tatou Tama oi le Lagi, aemaise lava outou na o e ua faamanuiaina e fananau mai i lenei vaega o le tisipenisione mulimuli. Tuu ai pea isi tamaitai e saili ma le le usiusitai … ia mea e fiafia i ai ma le manatu faapito. E mafai ona avea outou ma se malosiaga e sili ona manaomia mo le alofa ma le sa’o ma le amiotonu i luga o lenei fogaeleele.

… O’u tuafafine pele e, sei ou fautuaina atu ia te outou se mea sa lei taua muamua i se tulaga faapenei. O le tele o le faatupulaia ua oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi (o i latou ia o e masani ona i ai lea lagona loloto o le faaleagaga) o le a tosina mai i le Ekalesia i ni vaega toatele. O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga, atoa foi ma le maualuga o loo vaaia ai tamaitai o le Ekalesia o ni tamaitai iloga ma le tulaga ese—i ni tulaga fiafia—mai tamaitai o le lalolagi. … O lea la o le a avea ai faataitaiga a tamaitai o le Ekalesia ma se uunaiga taua i le tuputupu ae o le faitau aofai ma le faaleagaga o le Ekalesia i aso amuli.. …

Matou te alolofa ia te outou tamaitai. Matou te talitonu ia te outou. Matou te olioli i lo outou faamaoni. E matuai faagaeetia lava i matou i lo outou i ai … i lenei vaega o lenei tisipenisione, o loo faapea ona matuai manaomia ai a outou taleni ma [lo outou] malosi faaleagaga.²⁰

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau (v–ix).

Toe faitau le tala o loo i le itulau 239 ma le palakalafa muamua i le itulau 240. O a ni tala musuia e te manatuaina e uiga i tamaitai o lou aiga ma totonu foi o le Ekalesia?
Suesue le palakalafa atoa lona tolu o loo i le itulau 243. I le iloaina o o latou natura ma tiutetauave eseese, e mafai faapefea e alii ma tamaitai ona fesoasoani le tasi i le isi: E faapefea ona latou galulue i se faiga faapaaga i totonu o le aiga? i totonu o le Ekalesia?
Aisea ua avea ai le avea ma se tamaitai amiotonu i aso nei o se “valaauga faatamalii” ma faapitoa ona taua? (itulau 243). O a ni auala o loo taumafai le lalolagi e taitaieseina ai tamaitai mai lenei valaauga? E mafai faapefea ona tatou fesoasoani atu i alii ma tamaitai talavou ia talisapaia lenei valaauga faatamalii?
A o e faitauina le itulau 245 ma palakalafa muamua e tolu i le itulau 246, ia mafaufau loloto po o a ni aoaoga o loo ta’u mai ai e uiga i le alofa o le Tama oi le Lagi mo Lana fanau uma.
O a nisi o auala e mafai ai e tamaitai o le Ekalesia ona faataunuu o latou agavaa faaleatua? (Tagai itulau 245–247). E mafai faapefea ona lagolagoina e alii o le Ekalesia ia taumafaiga a tamaitai o le Ekalesia? (Tagai itulau 242–243).
Mafaufau loloto i le palakalafa e amata atu i le pito i lalo o le itulau (242). O le a se mea e faaosofia ai oe e uiga i lenei faamatalaga? O faapefea ona faataunuuina lenei valoaga e uiga i le tuputupu ae o le Ekalesia i le aso?

Mau e Faatatau I Ai: Faataoto 31:10–31; Efeso 5:22–29; Alema 56:41–48; MFF 25:1, 5–10; Mose 3:18, 21–25