O Le Soifuaga ma Galuega a Spencer W. Kimball

I se tasi afiafi o le tautotogo i le popofou o le 1900, na tu atu ai Orville Allen i le fale o Andrew Kimball e tiliva atu ni maukeni. A o la’ueseina ia maukeni e nei alii e toalua, sa la faalogo atu i le fale o le faatoaga o pese mai ai le atalii o Andrew, le alii o Spencer, a o ia tatauina ia susu o povi. Sa fai ia Uso Allen ia Andrew, “Ai lava se fiafia o lou atalii.” Sa tali atu Andrew: “Ioe, e fiafia lava o ia. O ia o se alii e tumama ma usiusitai ma e usitai o ia i soo se mea ou te faatonu ia te ia e fai. Ua ou tuuina atu o ia i le Alii ma Lana galuega. O le a avea o ia ma se alii malosi i le Ekalesia.”¹

I le gasologa o tausaga o sauniuniga, na avea ai lava Spencer ma se alii malosi. Sa le’i sauniaina e le Alii “se faipisinisi, se taitai faalemalo, po o se failauga, po o se tusisolo, po o se fai musika, po o se faiaoga—e ui e mafai ona ia mauaina nei mea uma. Sa Ia sauniaina se tamã, o se peteriaka mo lona aiga, o se aposetolo ma se perofeta, ma se peresitene mo Lana ekalesia.”²

Talatuu

E loloto aa o le aiga o Spencer W. Kimball i totonu o le Ekalesia toefuataiina. O ona tamamatutua i ona aiga uma e lua sa lauiloa i le popofou o le talafaasolopito o le galuega i aso e gata ai. Sa valaauina Heber C. Kimball i le Korama a Aposetolo e Toasefululua ina ua faavaeina i le 1835. Na ia auauna atu mulimuli ane o se Fesoasoani Muamua ia Peresitene Polika Iaga mo le silia i le luasefulu tausaga ma o se auauna faamaoni a le Alii i le taimi atoa o lana galuega. O Edwin D. Woolley, o le tamamatua o Spencer i le itu o lona tina, sa avea muamua ma Saaluu i Pennsylvania o le na taliaina le talalelei i taimi o Iosefa Samita. Sa avea o ia ma se epikopo faaaloalogia i le Vanu o Sate Leki. Sa auauna atu foi o ia mai lea taimi i lea taimi i le avea ai ma faatonu o mataupu patino faapisinisi a Polika Iaga. O le popolega o Epikopo Woolley mo e matitiva ma lona gauai atu e le faavaivaia i le talalelei, o ni measina mausali ia mo e tupuga mai ia te ia.

O le tinamatua o Spencer o Ann Alice Gheen Kimball o se “tamaitai faamaoni, … e matamuli i lo latou nuu, e umi ma foliga masani, ma se loto agamalu mo e vaivai ma mamai.”³ O lana tama lona tolu o Andrew Kimball. O le isi tinamatua o Spencer, o Mary Ann Olpin Woolley, e mai Egelani ma sa avea ma se tina o se fanau e sefulutasi, o le lona ono sa igoa ia Olive.

Na faaipoipo Andrew Kimball ia Olive Woolley i le aso 2 o Fepuari, 1882, i le Aai o Sate Leki, lea sa fau ai lo latou fale. Pe tusa o le tolu tausaga mulimuli ane, na maua ai e Andrew se valaauga ina ia tuua le aiga ae galue i le Misiona a Teritori o Initia, sa tu i le setete ua ta’ua i aso nei o Oklahoma. Ina ua mavae le auaunaga mo le lua ma le afa tausaga i le avea ai ma se faifeautalai faamisiona, ona valaauina lea o ia e pulefaamalumalu ai i le misiona. Ae peitai, na avea le valaauga fou ma auala na nofo ai o ia i le fale, ma o le isi 10 tausaga sa faamautu ai o ia i Iuta faatasi ma lona aiga a o taitai le misiona e ala i tusi faapea ma faigamalaga i le eria.

O le tautua a Andrew e 12 tausaga i le Misiona a Teritori o Initia sa faapea ona sosoo mai ai ma se isi valaauga, o le malaga atu lea ma faamautu i le Vanu o Gila i le itu i saute tutotonu o Arisona. O iina sa ia pulefaamalumalu ai o se peresitene o le siteki i tolauapiga uma a le Au Paia o Aso e Gata Ai i lena faaitu, lea sa faatulagaina e avea ma Siteki a St. Joseph. I le 1898, sa toe tapena ai e Andrew ma Olive ma le la fanau e toaono (e aofia ai ma le alii o Spencer e tolu tausaga) a latou meatotino ma toe siitia atu mo le 600 maila i saute mai le Aai o Sate Leki.

Talavou

Na soifua mai Spencer Woolley Kimball i le aso 28 o Mati, 1895, o le lona ono o le fanau e toasefulutasi a Andrew ma Olive Kimball.

I le toe tomanatu i lona tuputupu ae i Arisona i lona talavou, na ia tusia ai, “O se atunuu e matutu, ae peitai sa ola lauusiusi ona o galuega a tagata tinou e galulue.”⁴ Na ia toe manatuaina: “Sa matou ola i se tamai faatoaga i le faatausiusiuga i saute o Thatcher, Arisona. O lo matou fale sa i le tulimanu faapea ma se faatoaga tele i le itu i saute ma sasae. O tua mai o le fale sa i ai le vaieli, o le pamu, o le uili taavili, o se tane laupapa tele mo le matou sapalai o le vai, o le fale mo meafaigaluega, ma o tua atu teisi, o se faaputuga laau tele. Ona sosoo ane ai lea ma lo’ilo’i, pa manu, faaputuga vaomamago, ma le fale e teu ai fatu laau.”⁵

Na vave aoaoina e Spencer lesona taua o le talalelei mai ona matua. “Ou te manatuaina i lo’u talavou,” na ia saunoa ai, “ma te savavali atu ai ma lo’u tina i le auala pefu i le fale o le epikopo i aso sa masani ona matou totogiina ai a matou sefuluai mai a matou lafu ma fua o faatoaga. A o ma savavali, sa ou fai atu, ‘Aisea ta te o ai e ave fuamoa i le epikopo?’ Sa ia tali, ‘Aua o fuamoa o le sefuluai ma o le epikopo e taliaina sefuluai mo le Tama Faalelagi.’ Ona toe faamatala lea e lo’u tina ia afiafi taitasi pe afai e ao mai fuamoa, e tuu le fuamoa e tasi i totonu o se tamai ato ae o le isi iva e tuu i totonu o se ato lapoa.”⁶

O faataitaiga a Andrew Kimball i le tautua maelega sa tele sona faatosinaga ia Spencer, o le na saunoa mulimuli ane e faapea: “O lagona muamua lava na oo ia te au i le galuega a se peresitene o le siteki na maua mai lea i lo’u vaavaai i lo’u lava tama. … Ou te talitonu sa auauna atu tama i ona tagata ma sa ia faataunuuina se faamanuiaga na tuuina atu ia te ia e Peresitene Iosefa F. Samita, o le na folafola atu faapea o le a saili atu tagata o le Vanu o Gila ‘ia te ia e pei ona saili o fanau i se matua.’ E ui ou te mautinoa e le’i atoatoa ona ou talisapaia lana faataitaiga, ae o le faatulagaga na ia faataatiaina o se faataitaiga aoga tele lea mo soo se peresitene o se siteki.”⁷

Sa ola faamaualalo le aiga o Kimball. “Matou te le i iloaina sa matou matitiva,” na toe manatua ai e Spencer. “Sa matou manatu sa matou ola lelei lava.”⁸ O o latou lavalava sa su’i i le fale ma tuufaasolosolo. O a latou meaai o meaai lava e masani ai, e aofia ai aano o manu ma fua o a latou lava faatoaga.

Sa fesoasoani Spencer i galuega i le faatoaga. “Sa masani ona ou pamu limaina le vai e fui ai le togalaau,” na ia toe manatuaina ai, “ma sa ou aoao foi e tatau susu o povi, teteu laau e ‘aina o latou fua, faalelei le pa, ma isi mau galuega. E toalua o’u uso matutua, o e sa ou talitonu, sa la faia galuega faigofie uma ae tuu uma mai ia te au galuega mamafa. Ae ou te le’i faitio; sa ou maua ai le malosi.”⁹ Sa amata ona taulotoina e Spencer i le iva o ona tausaga ia Mataupu Faavae o le Faatuatua, o Tulafono e Sefulu, ma le tele o viiga mai le tusipese a le Ekalesia a o tatauina susu o povi ma faafeinu ia solofanua i aso uma.

O le 11 o tausaga o Spencer na maliu ai lona tina. O se tasi lea o tofotofoga tele i lona talavou. Sa ia tau manatunatu pe o le a faapefea ona faaauau lo latou aiga. “Ae na ou iloaina,” na ia saunoa ai, “e pei ona ou iloaina i le tele o taimi mulimuli ane, e toetoe lava ina mafai e se tasi ona onosa’ia soo se mea.”¹⁰ E le’i umi se taimi, ae toe faaipoipo ia Andrew Kimball, ma avea ai Josephine Cluff ma tina o Spencer. O “Josie,” e pei ona tauvalaau ai [Josephine] e ana uo, sa le mafai ona suitulaga atoatoa ia Olive, i le olaga o Spencer, ae o lona tomai ma lona onosai, na faaopoopo atu ai i le tulaga mautu o le aiga o Kimball.

I vaitaimi o lona talavou, sa le gata sa aoaoina ai e Spencer galuega mamafa e masani ai i se laufanua gaoa, ae na ia aoaoina foi nisi tomai na saunia ai o ia mo se tautua maoae mulimuli ane i lona olaga. Sa ia aoao e pese ma taitaia musika ma sa tofia e avea ma taitaipese a le siteki i le 15 o ona tausaga. E ui lava o ona tamailima e “pupuu ma puputa” ¹¹ e pei ona ia faamatalaina ai, ae sa ia aoao lava e faitau ia musika ma ta le piano. Sa alualu i luma o ia seia oo lava ina ua mafai ona ia taina ia viiga ma auai i se au faaili laitiiti. I tausaga mulimuli ane, sa la feauauai ai ma Elder Harold B. Lee i le taina o le piano mo fonotaga faalevaiaso a le Korama a Aposetolo e Toasefululua.

Na tuai ona amataina aoga a Spencer nai lo le toatele o isi, e pei ona faamatalaina i le tala lenei: “Sa manatu le tina o Spencer e le’i lava le matutua o tamaiti mo le aoga seiloga e atoa le fitu, ma ina ua amata le aoga a Spencer sa tasi le tausaga sa tuai ai o ia nai lo isi tamaiti. … A oo i le aoauli e masani ona tamoe o ia ma pasia ni pitonuu se tolu mai le aoga, e pamu a’e vai mo nai meaola, fafaga puaa, ma ‘ai lana lanisi [lunch]. Sa fai atu lona tina ia te ia i se tasi aso, ‘O le a lau mea lea e fai i le fale i le taimi o le malologa? O lea e le’i oo i le aoauli.’ Sa ia toe tamoe i le aoga ma le popole ma ia iloaina ai ua i totonu uma le latou vasega mai se malologa puupuu. Sa talie uma le vasega—sei vagana ai le faiaoga, o le na faaaogaina lena taimi e ta’u atu ai i le vasega e faapea o Spencer ua maualuga tele atu nai lo isi tamaiti uma o loo i le vasega lua ma o le a sii o ia i luga ina ia vasega faatasi ma tamaiti o lana tupulaga.”¹²

Ina ua maea le aoga tulagalua, sa auai atu loa Spencer i le aoga a le Ekalesia o le Gila Academy. O iina sa ia mauaina ai i taimi uma ni togi maualuluga, auai i taaloga, ma sa avea ma se taitai o le aoga.

Sa tupu foi le iloa o Spencer i le Ekalesia ma na toetoe lava a atoatoa lelei lona auai i faamaumauga. O le faataunuuina o tofiga faaleperisitua o se faamuamua maualuga lea, e pei ona faamatalaina i le tala lenei: “O se vaega o la latou galuega, e faagutu ai e tiakono ia solofanua ma faanofoa ia taavale toso i masina taitasi a o le’i oo i le aso anapogi, ma latou o atu ai mai lea fale i lea fale e aoina taulaga mo e matitiva o le Ekalesia. A maea ona latou aveina lea o taulaga na latou aoina i le epikopo—o fagu o fualaau aina, falaoamata, sikuasi, hani, o nisi taimi o se limasefulusene po o ni siliva. Sa faapena foi le naunau o Andrew e aoaoina lona atalii i lona tiute ina ia leai se mea e faalavelave ia Spencer i le aoina o taulaga i lena aso. E leai se taimi faapea ua pisi tele ai le solofanua ma le taavale a le aiga o Kimball mo le faaaogaina i le galuega a le korama a tiakono. Afai e le alu atu se isi tamaitiiti na tofia la te o faatasi, e alu lava na o Spencer e fai le galuega.”¹³

E le gata i ona tiute i le fale, aoga, ma le Ekalesia, sa galue foi Spencer o se failautusi i lona tama. E tele tusi a Andrew e fai, pe tusa ma le ono i le aso. E tusi e Spencer a o faalau atu e [Andrew] ona ia taina ai lea o tusi.

O nei aafiaga mai le popofou o le olaga o Spencer na ia aoaoina ai le taua o le galue, o se lesona na ia faaaogaina ma aoaoina atu i lona olaga atoa. I tausaga mulimuli ane i le avea ai ma se Aposetolo i le 70 o ona tausaga, sa i ai ni aso sa ia lagonaina ai le matuai vaivai lava i le faaletino. O se tasi o aso faapena na ia tusia ai: “Sa amata lo’u aso ma le matuai faanoanoa lava ma sa ou taumanatunatu pe mafai ona ou faaumaina le aso, ae … sa foliga mai sa ou matua’i galue punoua’i ma faagalo ai ia te au lava ia, ma sa avea ai o se aso lelei lava.”¹⁴

Auaunaga Faafaifeautalai

O le 1914, na faauu ai Spencer mai le Gila Academy, ma faamoemoe e ulufale atu i le Iunivesite o Arisona i le tautoulu. Ae peitai, i le faagasologa o le faauuga, na faasilasila atu ai e Andrew Kimball faapea o le a tofia Spencer mo se misiona.

I tapenapenaga mo lana misiona, sa alu atu ai Spencer e faigaluega i Globe, Arisona, i se falesusu. O se taimi muamua lava lea ua ia ola ai i fafo mai o le nuu o le Au Paia o Aso e Gata Ai i le Vanu o Gila. Na ia iloaina ai, e mafai lava ona latou fegalegaleai faatasi ma tagata e matuai le tutusa o latou tulaga faatauaina, e aunoa ma le fetuunaia o ona lava tulaga faatonuina. Sa faaaloalogia o ia e ana uo faigaluega. I le faaiuga o le taumafanafana, sa faia ai e lona pule, o se tagata e ulaula tapaa, e le o se tagata foi o le Au Paia o Aso e Gata Ai, se pati faamavae mo Spencer ma tauaaoina atu ai ia te ia se uati auro.

Mai ia Oketopa 1914 e oo ia Tesema 1916, sa auauna atu ai Spencer o se faifeautalai faamisiona i le Misiona a Setete Tutotonu, o le ofisa autu sa i Initipene, Misuri. O le eria foi lava lea e tasi sa auauna atu ai lona tama, o lona tina fai, ma se tasi o ona uso matutua.

O le auaunaga a Elder Kimball i le misiona o se vaitau lea o le alualu i luma. Sa ia feagai ma luitau faaletino. Sa poloaiina e lana peresitene o le misiona ia alii faifeautalai ina ia sailia ia meaai ma ni mea e nonofo ai mai ia i latou e talai i ai. O le mea na oo i ai, sa tele ni po faigata sa nofo ai Elder Kimball i ni tamai fale faa-se’e i tuavao o Misuri, e moe i mea e utufitia ma i ai manuninii a o faasoesa solo namu i ona autafa. Sa tele aso e matelaina ai i le fiaai, ae afai e maua atu ni meaai, na te faaaogaina lava soo se mea e laulauina atu i ona luma.

O se galuega faigata le fesootai atu mai lea faitotoa i lea faitotoa, e tau leai foi nisi e talia. O loo i ai se tala i se faiga e le masani ai sa faia e Elder Kimball i se tasi taimi:

“A o talai o ia i St. Louis sa ia iloa atu i le ava o se faitotoa o se fale se piano, ma sa ia faapea atu i le tamaitai sa tau tapuniina le faitotoa, ‘E ese le manaia o lau piano.’

“ ‘Faatoa faatau mai,’ o le tala lea a le fafine ma le faalotolotolua.

“ ‘E pei lava o se Kimball, a ea? O lo’u igoa foi lena. E mafai ona ou taina ai se pese mo oe atonu e te fia faalogo i ai.’

“Sa ofo i lana tali, ‘Manaia tele, susu mai i totonu.’

“Sa nofo ifo Spencer i le nofoa, ma sa ia taina ma usu [le pese], ‘Lo’u, Tama e.’

“Na pau le mea na iloa e Spencer, e le’i auai lea tamaitai i le Ekalesia, ae e le faapea ona sa le’i taumafai o ia.”¹⁵

O le misiona a Spencer na toe faamalosi ai mea na fofoa mai i lona olaga tuputupu a’e i Arisona: o le faatuatua i le Alii, galue malosi, maelega, tautua e aunoa ma se leo, ma le ositaulaga.

Faaipoipoga ma le Aiga

I le taumafanafana o le 1917, pe tusa lena ma le fitu masina talu ona taliu mai Spencer Kimball mai lana misiona, na ia vaaia ai se faasilasilaga i totonu o le nusipepa. O Camilla Eyring, o le na siitia atu i le Vanu o Gila i le 1912 ma lona aiga, o le a faiaoga i mataupu faatausiaiga i le Gila Academy. A o faitau ma toe faitau e Spencer le faasilasilaga, sa ia mafaufau ai o le a i ai se aso o le a ia faaipoipo atu ai ia Camilla Eyring. Ae na “faafuaseia” lona feiloai atu ia te ia i le fale faatalipasi e lata ane i le aoga ma sa la talatalanoa ai loa. Sa la nonofo faatasi i luga o le pasi, lea sa faaauau ai le la talanoaga, ma sa ia maua le faatagaga [mai ia Camilla] e asiasi atu ai ia te ia.

Sa matuai naunau lava le tina o Camilla i le taulealea o Spencer Kimball. Sa ia valaaulia o ia latou te talisua i le afiafi i soo se taimi lava e asiasi atu ai ia Camilla. Ma o Uso Eyring foi ia, o le sa matuai maua’i lona faaetete i ituaiga tagata e faamasani i ona afafine, sa leai ma se faatautee. Ina ua mavae le 31 aso, sa avea loa Spencer ma se tasi e toetoe lava o aso uma e maua ai i le aiga o Eyring. Sa fuafua i la’ua e faaipoipo, ae na aafia a la fuafuaga ona o le faifai pea o le Taua I a le Lalolagi. O lea sa nofo ai pea Spencer i Thatcher, Arisona, e faatali ai le aveina o ia i le fitafita, o lea sa le mafai ai ona la faia le malaga umi i se malumalu i Iuta. Sa faaipoipoina i la’ua faalemalo i le aso 16 o Novema, 1917, ae sa tulimatai atu i se faamauga i se malumalu i se taimi vave e mafai ai. O lena sini sa tino mai ia Iuni na sosoo ai i le Malumalu o Sate Leki.

Na iu ina maua se fanau e toafa a Spencer ma Camilla: e toatolu atalii ma se afafine e toatasi (Spencer LeVan, Andrew Eyring, Edward Lawrence, ma Olive Beth). I le avea ai ma matua sa la saunia se siosiomaga sa le gata na mafai ai e le la fanau ona lagonaina le alofagia ma le lagolagoina, ae sa faatuatuaina foi i le faia o faaiuga taitoatasi. Na ta’ua mulimuli ane e se tasi o atalii:

“Afai e faia ni faatinoga a tamaiti i le Aoga, Lotu po o soo se mea lava, e auai atu lava i ai o’u matua, e tusa lava pe la te faia ai se osigataulaga. Sa la faaalia pea lava lo la naunau ma le mitamita ia i matou.

“I totonu o lo matou aiga, sa i ai se lagona o le fegalegaleai, ae le o le pule sauaina o i matou e o matou matua. O le tiutetauave sili lava mo a matou mea e fai sa ia i matou lea. E faamalosiau ma taitai i matou e o matou matua, ae e le poloaiina malosi.”

O le atalii foi lava lea na faia le faamatalaga lenei e uiga i lona tama:

“E leai se isi ou te iloa e sili atu ona lotofoai i lona agaga nai lo lo’u tama. E agalelei ma manatu mo isi, e toetoe lava a avea ma sasi. E matele ina manatu fanau o o latou matua o ni tagata e pule malosi, e le tatau ona i ai ni manaoga faatauvaa. Ae ua ou iloa le matuai talisapaia e lo’u tama o se faamalo faamaoni po o sina upu faafetai. Ma e leai se faaalia o le talisapaia po o le alofa e sili atu ona taulia nai lo lea e aumai mai lona lava aiga.

“Ou te iloa e leai se mea e sili ona faamalieina ai o ia—e sosoo ma ona lagona ua faamaonia e le Alii ana taumafaiga—nai lo le vaaia lea o lona lava aiga o loo mulimuli i lona taulamua i le taumafaiga e ola amiotonu.

“Afai e i ai sa’u filifiliga po o ai e avea ma faamasino i le aso mulimuli, e leai se tagata soifua e muamua ona ou filifilia nai lo lo’u tama.”¹⁶

Soifua Galue, Valaauga i le Ekalesia, ma le Tautua i le Alalafaga

Faatasi ai ma Camilla i ona tafatafa ma tiutetauave o se aiga i ona luma, sa amata ai e Spencer lona soifua faigaluega i le avea ma se talitupe i se faletupe. A o mavae atu tausaga, sa ia siitia mai le faletupe i le atinaega o inisiua ma fanua. O le oo mai o le Pa’u o le Tamaoaiga (1929–39) na matuai faigata ai lava le naunau o Spencer i mea tau pisinisi, ae sa gafatia lava e le aiga ona manumalo i ia faigata.

Na maliu le tina o Spencer i le 1924, ina ua mavae lena o le lata i le tolusefulu tausaga sa avea ai ma peresitene o le siteki. Ina ua toe faatulagaina le au peresitene o le siteki e Peresitene Heber J. Grant, le Peresitene lona fitu o le Ekalesia, sa valaauina ai loa ia Spencer ua 29 tausaga o lona soifua, e avea ma fesoasoani lua.

E le gata i lona soifua faaleaiga, galuega, ma le auaunaga i le Ekalesia, sa avea foi Spencer ma se tagata e tele sona sao i le alalafaga. Sa ia fesoasoani e faatuina le uluai leitio i le lotoifale. Sa toaga o ia i le avea ai ma sui o le Kalapu a le Roteri, o se faalapotopotoga auauna atu, ma sa oo ai lava ina ua ia umia le tofiga o le kovana faaitumalo.

O le 1938 sa vaeluaina ai le Siteki a St. Joseph, ma sa valaauina ai ia Spencer e avea ma peresitene o le Siteki fou a Mount Graham. O le popole ina ne’i i ai nisi sa ia pulefaamalumalu ai o i ai ni lagona le fiafia ia te ia, o lea sa asiasi atu ai Spencer ma Camilla i soo se tasi lava sa i ai na lagona ina ia “faamama ni lagona le fiafia.”¹⁷

O Setema 1941, i le taimi o lana tautua o se peresitene o le siteki, na afaina ai le alalafaga i se lologa matautia. O timuga faalausosoo na siisii ai i luga le Vaitafe o Gila seia oo ai lava ina ua pa ma salalau atu i magaala o nisi o nuu. Sa tafiesea fale ma faatoaga e le vai. O tagata o le nuu, o le toatele lava o tagata o le Ekalesia, sa matuai moomia le fesoasoani. Ina ua maua tala e uiga i le faalavelave, sa faatumu loa e Spencer lana taavale i meaai mai punaoa a le Ekalesia ma agai atu loa i nuu na aafia i lologa. Sa ia faia se fuafuaga mo le faamamaina o lavalava eleelea. Sa ia fesoaosani i faifaatoaga ia toe maua ni fatu e fafaga ai lafumanu. E le’i umi ae taunuu atu se loli e tumu i meaai ma lavalava. E le’i uma le vaiaso, a ua amata ona toe solosolo manuia i latou o e sa sili ona mafatia i le lologa. Sa faaalia e tagata o le Ekalesia se lotofoai e le mafaatusalia. Sa faatautaia e Spencer le iloiloga o mea e manaomia ma le faasoasoaina o punaoa. Mai nei mea uma lava, sa la fesootai vavalalata ai ma Elder Harold B. Lee o le Korama a Aposetolo e Toasefululua, o ona tiutetauave sa aofia ai le polokalama o le uelefea.

O Le Tulaga Faa-Aposetolo

O le aso 8 Iulai, 1943, na valaau atu ai Peresitene J. Reuben Clark Jr. o le Au Peresitene Sili i le fale ia Spencer. Na ia saunoa atu faapea o Spencer ua tofia e faatumu le nofoa e tasi o nofoa e lua o loo avanoa i le Korama a Aposetolo e Toasefululua. O lea na tali atu ai Spencer: “Oi, le Uso e Clark! E le o au? E le o au lena e faatatau i ai? Atonu e sese. E mautinoa lava e sa’o au o loo sese oe. … E foliga mai e le sa’o. O au ou te vaivai ma laitiiti ma e le lava le malamalama ma le gafatia.”¹⁸ Sa faamautinoa atu e Spencer ia Peresitene Clark e mafai lava ona tasi se tali mai le Alii, ae e le’i vave faatoilaloina e lona naunautai e auauna atu ia ona lagona le atoatoa ma le le agavaa.

O na lagona na faateteleina i aso na sosoo ai, lea sa tau le maua ai se moe a Spencer. A o i ai o ia i Boulder, Colorado, e asiasi i lona atalii, sa alu atu ai o ia i se tasi taeao e savalivali i luga o mauga. A o ia a’ea’e agai i luga, sa ia toe tomanatu ai i le tele naua o le tofi faaaposetolo. Sa matuai mafatia o ia i le manatu atonu o le a le tusa ai o ia ma le tofi, ma atonu o lona valaauga o se mea ua sese. Faatasi ai ma lea lava manatu i lona mafaufau, ma ina ua ia oo atu i le tumutumu o le mauga sa ia a’eaina, sa ia faapa’u ifo loa i lalo ma tatalo ma manatunatu loloto ai. “E maeu la’u tatalo sa fai!” sa ia toe manatuaina. “E maeu lo’u puapuagatia sa i ai! E maeu lo’u tagi! E maeu a’u tauiviga sa fai!” A o mafatia o ia, sa miti o ia i lona tamamatua o Heber C. Kimball ma le “galuega tele sa ia faia.” O lenei malamalama na faafilemuina ai le loto o Spencer. “Na oo mai se lagona malu o le mautinoa ia te au, ua mou ese atu le masalosalo ma le tuufesilisili. E pei lava ua matuu ese atu se avega mamafa. Sa ou nofo ma le toafimalie ma matau le matagofie o le vanu, ma faafetai i le Alii mo le faamalieina ma le tali mautinoa i a’u tatalo.”¹⁹ O le aso 7 o Oketopa, 1943, i le 48 o tausaga, na faauuina ai Spencer W. o se Aposetolo.

O le auaunaga a Elder Kimball i le Korama a le Toasefululua na oo atu i le tolusefulu tausaga. O le taimi lena, sa tele ai ona femalagaai o ia, e faamalosi i tagata ma lagolago atu i le faatupula’ia o le malo. O se tofiga faapitoa mai ia Peresitene Siaosi Alapati Samita, sa faananau atu ai lava ia Elder Kimball i tagata na tupuga mai i le perofeta o Liae o le Tusi a Mamona—o tagatanuu moni o Amerika i Matu, Tutotonu, ma Saute. Sa avea o ia ma leo malosi mo mea sa latou naunau i ai e le gata i korama sinia o le Ekalesia, ae faapea foi le lautele o le Ekalesia. Sa ia fetuuina ia faiga faailogalanu uma ma le faapologaina o e matitiva.

I ana lauga, e mafai e Elder Kimball ona lagi faasolo ma saunoa tuusao. E masani ona ia taulimaina mataupu ma’ale’ale o atugaluga o le tele o tagata o le Ekalesia. E faaopoopo atu i le anoanoai o saunoaga, na ia tusia le tusi O Le Vavega o le Faamagalo Atu. O lenei tusi na faapogai mai ona o le aafiaga umi o Elder Kimball i le avea ai ma se Aposetolo, e fautuaina ai i latou o e ua lolo atu i solitulafono matuia. O loo ia faamanino mai ai i totonu o le tusi ia faamoemoega o le Alii mo i tatou, o lo tatou malosiaga paia, ma le auala e tatau ona tatou uia ina ia salamo ma maua ai le faamautinoaga o le faamagaloga atoatoa mai le lagi. O loo tuuina atu ai le molimau a Elder Kimball i le tagata faitau, e alofa mutimutivale le Alii ma e faamagalo ia i latou o e salamo faamaoni.

Luitau o le Soifua Maloloina

I le gasologa o lona soifuaga, sa mafatia ai Spencer W. Kimball i ni manua ma ni gasegase eseese. E lua ni luitau ogaoga lava o le soifua maloloina i ona tausaga a o avea ma se Aposetolo. O le gasegase muamua lava na tuua ai se faailoga tumau ia Elder Kimball lea sa iloagofie lava i soo se taimi e saunoa ai. I le taufaaiuiuga o le 1956, na ia lagonaina ai le pei e oolo lona leo. Na maua i suesuega ua aafia o ia i le kanesa o le faai. O se taotoga ia Iulai o le 1957 na mafua ai ona aveeseina le afa o se tasi o pusa leo. Ina ua mavae le taotoga, sa ia faamaloloina lona leo ina ia mafai ai ona manuia atoatoa. O le tele o po e tau le maua se moe, ma manatunatu ai Elder Kimball pe mata e mafai ona toe tautala.

E ono masina talu ona mavae le taotoga, ae faailoa atu e fomai ua toe manuia le faai o Elder Kimball. Na toe faamatalaina e Elder Boyd K. Packer o le Korama a Aposetolo e Toasefululua le faaaogaina e Elder Kimball o ni tala malie e mua’i faailoa atu ai i le au faalogologo lona leo fou:

“Ona oo mai lea o le faataitaiga. Pe mafai ona ia tautala? Pe mafai ona ia lauga atu?

“Na toe foi o ia i lona aiga [i Arisona] mo lana saunoaga faatamaitai. … O iina, i se konafesi i le Siteki a St. Joseph, … sa ia tulai ai i le pulelaa.

“ ‘Ua ou toe foi mai iinei,’ sa ia saunoa atu ai, ‘ina ia faatasi ma o’u lava tagata. O iinei i le vanu lenei sa ou pulefaamalumalu ai o se peresitene o le siteki.’ Atonu na manatu o ia afai e le manuia [lona leo fou], ae o la e faatasi ma nisi e sili ona alolofa ia te ia ma o le a malamalama ia te ia.

“Sa matua’i tele le alofa. Na aveesea lenei lagona ootia ina ua faaauau lana saunoaga, ‘E tatau ona ou faamatala atu ia te outou le mea na tupu. Sa ou malaga i Sasae, ma a o o’u i ai iina, sa ou pau atu i lima o le au tipitipi faai. … ’ Ina ua mavae lena, sa le toe afaina se mea na ia saunoa ai. Ua toe taliu mai Elder Kimball!”²⁰

O lona leo fou sa malu, pau, ma oolo. I upu a Elder Packer, “o se leo e filemu, faatauanau, malu, ma maopoopo, o se leo e tosina mai ai, o se leo … sa alofagia e le Au Paia o Aso e Gata Ai.”²¹

Na aafia foi Elder Kimball i ni faafitauli matuia o le fatu. Ina ua avea ma se Aposetolo, sa mafatia soo o ia i gasegase o le fatu. I le 1972, a o avea ma Sui Peresitene o le Korama a le Toasefululua, sa faia ai sona taotoga faigata lava. O Dr. Russell M. Nelson o le fomai lea o le fatu a Peresitene Kimball i le taimi lena. Mulimuli ane, i le avea ai ma se sui o le Korama a Aposetolo e Toasefululua, na toe manatua ai e Elder Nelson le mea na tupu i le taimi o le taotoga: “O le a le mafai ona galo le lagona na oo ia te au ina ua toe amata ona tata ma le malosi lona fatu. O le taimi lava lena, na faailoa mai ai e le Agaga ia te au o lenei gasegase o le a ola e avea ma perofeta a le Atua i le lalolagi.”²²

Peresitene o le Ekalesia

O le po o le aso 26 o Tesema, 1973, na maliu faafuasei ai Peresitene Harold B. Lee, le Peresitene lona 11 o le Ekalesia. Ina ia tausisia le tulaga maopoopo i le faasologa faaaposetolo i le Ekalesia, o le aso 30 o Tesema, 1973, na avea ai Spencer W. Kimball, o le sui sinia o le Korama a le Toasefululua, ma Peresitene O Le Ekalesia a Iesu Keriso o le Au Paia o Aso e Gata Ai.

O se mea lenei na ofo ai tagata o le Ekalesia—aemaise lava ia Peresitene Kimball. Sa faauuina o ia e avea ma se Aposetolo i le lua ma le afa tausaga e sosoo atu ia Harold B. Lee. Ona o le manatu faapea e fa tausaga e matua ai Peresitene Kimball nai lo Peresitene Lee, ma sa foliga mai e sili atu ona le lelei lona soifua maloloina, na matuai talitonu ai lava Peresitene Kimball faapea o le a le mafai ona soifua o ia ina ia avea ma se e suitulaga ia Peresitene Lee. Na ia toe manatuaina mulimuli ane: “Sa ou matuai lagona le mautinoa o le a ou oti, pe a oo mai lo’u taimi, a o avea ma peresitene o le Toasefululua. … Sa ou fai atu i le falelauasiga o Peresitene Lee, e leai se tasi sa sili atu ona tatalo malosi nai lo ma’ua ma Sister Kimball mo le toe faafoisia mai o lona malosi pe a gasegase ma le faaauauina pea o lana galuega a o malosi o ia.”²³

Sa lagolagoina ia Peresitene Kimball e tagata o le Ekalesia i le konafesi aoao o Aperila 1974. E lei sailia e ia lenei tofiga, ae na filifilia o ia e le Alii e avea ma Ana perofeta, tagatavaai, ma tali faaaliga ma taitai Lana Ekalesia ma le malo i le lalolagi.

Na afua mai i lena konafesi aoao o Aperila, na tuu atu ai e Peresitene Kimball se saunoaga i le galuega faafaifeautalai i se fonotaga mo taitai o le Ekalesia. O Elder William Grant Bangerter, na avea mulimuli ane ma se sui o le Au Peresitene o Fitugafulu, sa avea ma sui risone i le taimi lena ma sa auai i le fonotaga. Na ia toe faamatalaina le aafiaga o upu a Peresitene Kimball:

“Sa matou iloaina na tatala e Peresitene Kimball pupuni o le lagi ma talotalo mai matou te o atu ma vaavaai faatasi ma ia i fuafuaga o le faavavau. Sa pei lava o loo ia tosoina i tua pupuni lea sa ufiufi ai le faamoemoega o le Silisiliese ma valaaulia i matou ina ia matou vaai faatasi ma ia i le taunuuga o le talalelei ma le vaaiga mamao o lana galuega.

“Ou te masalo e leai se tagata sa auai i lena aso o le a mafai ona galo lena sauniga. O au lava ia, e seasea lava ona ou toe faitauina le saunoaga a Peresitene Kimball talu mai lena taimi, ae o le aano o le mea na ia saunoa i ai sa matuai manino lava i lo’u mafaufau lea sa mafai ona ou taulotoina e toetoe lava o le saunoaga atoa i le taimi lenei mai lo’u manatuaina.

“O le Agaga o le Alii sa i luga o Peresitene Kimball ma na sau mai ia te ia e oo mai ia i matou e pei o se mea e fai sona tino, lea sa le gata ina ootia ae ofoofogia foi. Sa ia faapupulaina i lo matou malamalama se faaaliga vaaia mamalu.”²⁴

O le saunoaga a Peresitene Kimball i lena faatasiga na manino mai ai se anavatau o lana galuega i le avea ai ma Peresitene o le Ekalesia:

“O’u uso e, ou te le iloa pe o tatou faia uma mea tatou te mafaia. Pe o faamalieina ea i tatou i le ala o loo tatou aoao atu ai le talalelei i le lalolagi uma? Ua 144 nei tausaga o tatou talai atu le talalelei. Pe ua tatou saunia ea e faauumi a tatou laa? Ia faamamao la tatou vaai?…

“Uso e, ua ou iloaina e le o se mea faigofie lenei galuega, e le mafai ona faia e aunoa ma ni taumafaiga, e le mafai foi ona faia i se taimi puupuu, ae o loo ia te au le faatuatua e mafai ona tatou tuleiina i luma ma vave faalautele nai lo le mea o loo tatou faia ai nei.…

“… Ou te manatu afai e tasi uma o tatou mafaufau ma tasi o tatou loto ma tasi le faamoemoe e mafai ona tatou agai i luma ma suia le manatu lea e foliga mai e faapea ‘O loo lelei lava mea uma. Aua ne’i o tatou “faatupuina ni faafitauli.” ’ ”²⁵

O lea na amataina ai se vaitaimi ofoofogia o le alualu i luma ma suiga. E ui o galuega faafaifeautalai o le uluai faamamafa lea, ae na vave ona manino i tagata o le Ekalesia o Peresitene Kimball sa le fia manao e tutu ai pea i se vaega o taumafaiga amiotonu.

Galuega Faafaifeautalai

Sa taumafai Peresitene Kimball e tatalaina faitotoa o malo mo le talaiga o le talalelei. O feeseeseaiga o le “Taua Maatiati” [Cold War] i le va o malo temokarasi ma malo komunisi na taofia ai le talaiga i le tele o atunuu i Europa ma Asia. E le gata i lea, o le tulafono a le Ekalesia i le faauuga i le perisitua sa taofia ai foi taumafaiga faafaifeautalai i Aferika, vaega o Amerika i Saute, ma le Atu Keripiane. Sa silasila Peresitene Kimball i soo se avanoa e faalautele ai le oo atu o le Ekalesia.

O le taimi lea, sa ia faamamafa atu ai faapea o avanoa silisili e aoaoina ai atunuu e faalagolago lea i le naunautai o tagata o le Ekalesia e taliaina na avanoa. Mo alii talavou agavaa ma saunia atoatoa, o le galuega faafaifeautalai sa le o se vaega e tuu i le faitalia ae o se tiute paia ma se avanoa. O lenei matafaioi sa i luga lea o alii talavou e tusa lava po o fea sa nonofo ai. E mafai foi e tamaitai talavou ona auauna atu o ni faifeautalai ae sa le aofia ai i le matafaioi lea e pei o alii talavou. E le gata i lea, sa uunaia foi ulugalii matutua ina ia tautua i le autau o faifeautalai. Ina ua amataina e Spencer W. Kimball lana tautua o se Peresitene o le Ekalesia, e 17,000 faifeautalai faamisiona sa auauna atu i le lalolagi. Ina ua maliu o ia i le 12 tausaga mulimuli ane, sa faateleina lena numera e latalata i le 30,000. O le faateleina o taumafaiga faafaifeautalai na matuai fua mai ai ni fua se tele: na siitia le faitau aofai o le Ekalesia mai le 3.3 miliona i le lata i le 6 miliona.

I se saunoaga i se vaega o tupulaga talavou o le Ekalesia i le 1975, na saunoa ai Peresitene Kimball: “Pe ua outou iloa le mea ua faia e le Alii mo outou alii talavou? O outou o ni alii aulelei. Tou te malolosi ma maloloina ma fiafia. O ai na avatu ia te outou le ola maloloina? O ai na avatua o outou mata? O ai na avatua o outou taliga? O ai na avatua o outou leo? Pe ua outou mafaufau ea i lena mea? E tatau ona i ai se tasi na ia avatua ia te outou nei mea taugata.”

Ona ia faamatalaina lea o lona aafiaga i se taotoga o le faai ma le auala ua ia maua ai na o se vaega o lona leo. Sa ia faaauau: “Ou te fia fesili atu ia te outou pe toafia nisi o outou e naunau e tuuina atu o latou leo? Pe na e faatauina mai ea pe fai ai se fefaafesuia’iga? Pe na tuuina atu ea e se tasi ia te oe? Pe na tuuina atu ea e le Alii se leo ia te oe ina ia mafai ona faailoa mai ai oe lava? Ae aisea la tou te le o atu ai i le lalolagi ma faailoa atu le tala silisili i le lalolagi, ma ta’u atu i tagata e faapea ua uma ona toefuatai mai le upumoni; o loo faaauau pea ona tuuina mai e le Alii ia perofeta e amata mai ia Atamu e oo mai i le taimi nei; ma o oe o loo i ai le perisitua paia, ma o le a e faalauteleina i aso uma o lou ola? Ta’u atu lena mea i le lalolagi! Latou te manaomia!

“Ma o lea ou te toe fia fesili atu ai ia te outou, o ai na avatua lou leo? Aisea?—pe tau ina mafai ai ona e pese pe talanoa ai pe fiafia ai ma isi tagata? Pe na ia tuuina atu ea lena leo ina ia mafai ona e aoao atu ai le talalelei? …

“Ua ou manatu ai nei loa e sili ai ona tatou o atu i le misiona, a ea?—o tama uma lava o loo agavaa.”²⁶

Galuega Faalemalumalu

I le avea ai ma Peresitene o le Ekalesia, na vaaia ai e Spencer W. Kimball se faatupula’ia o malumalu ua fausia. I le amataga o lana taitaiga, e 15 malumalu sa faagaoioia; ina ua maliu o ia i le 12 tausaga mulimuli ane, ua faateleina le numera i le 36, ua sili atu nai lo le faaluaina. Na tautino mai e Peresitene Gordon B. Hinckley, le Fesoasoani Lua i le Au Peresitene Sili, “O lenei uunaiga malosi mo le faateleina o le fausiga o malumalu na tuuina mai e Peresitene Kimball e tusa ma faaaliga mai le Alii.”²⁷

Na saunoa Peresitene Kimball e faatatau i galuega faalemalumalu: “Ua oo mai le aso ma e le o toe mamao lava ma i tatou, o le a faasoloatoa ai i le ao ma le po ia malumalu uma i luga o lenei fogaeleele. … O le a i ai vaega o tagata faigaluega i le po ma le ao e toetoe lava a mafatia, ona o le taua o le galuega ma le toatele naua o tagata o loo momoe i le faavavau ma o loo naunau mai, ma manaomia ia faamanuiaga ia e mafai ona oo atu ia i latou.”²⁸

Pulega o le Ekalesia

I le gasologa o le 1975 ma le 1976, na taitaia ai e Peresitene Kimball se toe faatulagaga ma le faalautelega o le pulega o le Ekalesia ina ia ogatasi ai ma le faatupulaia o le Ekalesia. O se vaega o le faailoa mai o le faatulagaga ma tiutetauave o le Au Pulega Aoao, na toe faatulagaina ai le Korama Muamua a Fitugafulu ma e oo mai ia Oketopa 1976 ua aofia ai uso e 39. “O lenei faiga,” na faamalamalama mai ai e Peresitene Kimball, “o korama pulefaamalumalu e tolu o le Ekalesia o loo faamatalaina mai i faaaliga,—o le Au Peresitene Sili, o le Korama a le Toasefululua, ma le Korama Muamua a Fitugafulu,—ua tuuina i o latou tulaga e pei ona faaalia mai e le Alii. O le a mafai ai ona faigofie ona taulimaina le avega mamafa o loo i ai nei ma ia saunia mo le faateleina o le faalautelega ma le saoasaoa o le galuega, ma tulimatai atu i le aso o le a toe afio mai ai le Alii e taitaia Lana ekalesia ma le malo.”²⁹ O lenei faaaliga mai le Alii i Lana perofeta na oo atu ai i isi suiga i le pulega o le Ekalesia e pei ona moomia “i le galuega o le tovine” (MFF107:96).

Tusitusiga Paia

I le 1976, na faatonuina ai e Peresitene Kimball e faapea, o faaaliga e lua, o le tasi na tuuina atu i le Perofeta o Iosefa Samita ma le isi tasi na tuuina atu ia Peresitene Iosefa F. Samita, ina ia faaopoopoina atu i le faasologa o tusitusiga paia (tagai MFF 137 ma le 138). I lalo o le taitaiga a Peresitene Kimball, sa lolomiina ai se lomiga a le AAG o le Tusi Paia a King James i le 1979, ma se lomiga fou o le tusi fusitolu (o le Tusi a Mamona, o le Mataupu Faavae ma Feagaiga, ma le Penina Tautele) sa lolomiina i le 1981. Na saunoa Elder Boyd K. Packer e faatatau i le oo mai o nei lomiga o tusitusiga faavae, “A o gasolo mai augatupulaga, o le a manatua lenei mea o se vaega faatumutumu ua ausia i le taitaiga a Peresitene Spencer W. Kimball.”³⁰

I le taimi o le nofoaiga a Peresitene Kimball, na avea ai foi tusitusiga paia ma faavae mo mataupu aoaoina a le Aoga Sa a le Ekalesia.

Faafaigofieina

A o faateleina le toatele o le Ekalesia faapea foi gaoioiga, na silafia e Peresitene Kimball ma isi taitai o le Ekalesia le moomia ona faafaigofie o le tele o polokalama a le Ekalesia ina ia mafai ona saunia polokalama e sili ona taua ma manaomia mo i latou o loo i se paranesi aupito fou e faapena foi ia i latou o loo i ai i uarota ua leva. Na saunoa Peresitene Kimball:

“O le misiona a le Ekalesia mo ona tagata o le tuuina atu lea o mataupu faavae, polokalama, ma le perisitua lea e mafai ona latou saunia ai i latou lava mo le faaeaga. O lo tatou manuia, e le gata i tagata taitoatasi ae faapea i le Ekalesia, o le a matuai faalagolago lava lea i le auala tatou te taulai atu ai ma le faamaoni i le ola ai i le talalelei i totonu o le aiga. Seiloga e manino la tatou vaai i tiutetauave o tagata taitoatasi ma le matafaioi a aiga ma auaiga ona faatoa mafai lea ona tatou malamalama lelei o korama a le perisitua ma faalapotopotoga a ausilali, e oo i uarota ma siteki, o le faamoemoega autu o lo latou i ai o le fesoasoani lea i tagata ina ia ola i le talalelei i totonu o le aiga. Ona mafai lea ona tatou malamalama e sili atu le taua o tagata nai lo polokalama, ma e tatau i polokalama a le Ekalesia ona lagolago atu i ai e le aunoa ma ia aua lava nei faaitiitia ai le taua o gaoioiga faaleaiga e faaautu i le talalelei. …

“O la tatou tautinoga i le olaga i le aiga e faaautu i le talalelei, e tatau ona avea ma savali manino a soo se polokalama a le perisitua ma ausilali, ma pe a talafeagai ai, ia tuuitiitia soo se gaoioiga e tuu i le faitalia lea e ono mafai ona faaitiitia ai le taua o le tulimata’i lelei atu i le aiga ma le auaiga.”³¹

O se tasi suiga taua i le taimi o le taitaiga a Peresitene Kimball o le amataga lea o le faatulagaga e tolu itula o sauniga i le Aso Sa. O lenei faiga ua tuufaatasia ai sauniga eseese o le vaiaso ma le Aso Sa, i se faiga faigofie ma sili atu ona talafeagai i le Aso Sa. O le amataina o lenei faatulagaga tuufaatasia i le 1980, na matuai tuuitiitia ai le taimi faaalu ma tupe a tagata o le Ekalesia ina ia mafai ona latou auai i le atoatoaga o polokalama a le Alii.

Faaaliga e uiga i le Perisitua

O se tasi o suiga e aupito sili ona taua na oo mai i le taini o Spencer W. Kimball i le au peresitene o le faaaliga lea e uiga i le perisitua (tagai Tautinoga Aloaia 2 i le Mataupu Faavae ma Feagaiga).

I le aso 1 o Iuni, 1978, sa fono ai Peresitene Kimball, ma isi sui o le Au Peresitene Sili faapea le Korama a Aposetolo e Toasefululua, i le afeafe pito i luga o le Malumalu o Sate Leki. Na lipotia mai mulimuli ane e Peresitene Gordon B. Hinckley, o le sa faatasi ai i lena faatasiga a o avea ma se sui o le Korama a Aposetolo e Toasefululua:

“O le fesili i le faasafuaina atu o faamanuiaga o le perisitua i tagata uli sa i mafaufau o le toatele o le Usoga i le tele o tausaga. Sa aumaia pea lava pea e Peresitene o le Ekalesia. Na avea ma se mataupu na manatu tele i ai Peresitene Spencer W. Kimball.

“Sa umi se vaitaimi sa ia tatalo ai e faatatau i lenei fesili ogaoga ma le faigata. Sa ia faaaluina le tele o itula i lena afeafe pito i luga i le malumalu na o ia e tatalo ma mafaufau loloto ai.

“O lena faatasiga sa ia tuuina atu ai le fesili i luma o ona Uso—o ona Fesoasoani ma Aposetolo. Ina ua mae’a lenei talanoaga sa matou aufaatasi loa i le tatalo i se tulaga e silisili ona paia. O Peresitene Kimball lava ia na fofogaina lena tatalo. … Sa i ai le Agaga o le Atua iina. Ma o le mana o lena Agaga Paia na oo mai ai i lena perofeta se faamautinoaga e sa’o le mea sa ia tatalo atu ai, ma ua oo mai le taimi, ma ua tatau ona faasafua atu faamanuiaga ofoofogia o le perisitua i alii agavaa uma e tusa lava po o le a lona tupuaga.

“O tagata uma sa i totonu o lena li’o, sa iloaina uma le mea e tasi, e ala i le mana o le Agaga Paia.

“O se faatasiga filemu ma le mamalu. …

“… E leai ma se tasi o i matou sa i ai i lena faatasiga na toe lagonaina ia faalogona sa i ai muamua ina ua mae’a. E faapena foi le Ekalesia.”³²

O le faasilasilaga o le faaaliga na auala atu i se tusi na tusia i le aso 8 Iuni, 1978, i taitai perisitua aoao faapea taitai i lotoifale i totonu o le Ekalesia: “O alii faamaoni, ma agavaa uma o le Ekalesia e mafai ona mauaina le perisitua paia, faatasi ai ma le mana e faaaoga ai lana pule faalelagi, ma ‘ae’ae ai faatasi ma e pele ia te ia i soo se faamanuiaga e maua mai ai, e aofia ai faamanuiaga o le malumalu” (MFF, Tautinoga Aloaia 2).

Na toe ta’ua e Peresitene Hinckley: “Na auina atu le tusi i le Ekalesia ma le lalolagi. Ou te le tau faailoaina atu le aafiaga malosi sa lagonaina e le gata i totonu o le Ekalesia ae faapea foi i fafo atu. Sa tele le tagiaue, o loimata o le faafetai e le gata ia i latou o e sa muai teenaina le mauaina o le perisitua ma ua avea nei ma nisi ua faamanuiaina i lenei faasilasilaga, ae faapea foi i alii ma tamaitai i le salafa o le lalolagi o e na lagonaina e pei foi ona matou lagona e tusa ai ma lenei mataupu.”³³

Pe tusa o le tolu masina mulimuli ane, na ta’ua ai e Peresitene Kimball, e faatatau i le faaaliga: “Na saunoa se tasi o Uso ananafi e faapea ua oo mai se tasi o suiga ma faamanuiaga ofoofogia ua iloaina. … Se’i vagana ai ni nai tagata sa fia faatautee, ua talia e tagata o le lalolagi lenei suiga ma lo latou loto faafetai. … O lea, ua matou matuai faafetai ai lava, aemaise o i latou o e na teenaina muamua le mauaina o nei faamanuiaga.”³⁴

Alofa mo Tagata ma le Galuega a le Alii

I le faamatalaina o Peresitene Kimball, na saunoa ai Elder Neal A. Maxwell o le Korama a Aposetolo e Toasefululua: “Sa i ai se mafanafana lautele i le tautua a lenei tagata. O le alofa ma le toto’a o lana silasila, o lana opo mai, o lana sogi paia, o lona agamalu—sa lagonaina e le toatele—o ia mea uma na foafoaina ai se siosiomaga po o se lagona ua onomea mo lenei tamalii, e le o le faigata ona talanoa i ai, ae o le faapitoa o le mafanafana. O lona alofa e lautele; e leai se tasi na lagona se le amanaiaina. E mafai e uso taitoatasi o le Au Pulega Aoao ona manatu faapea o ia e sili ona alofagia e Peresitene Kimball, aua e alofa tele o ia ia i matou! E mafai faapefea e se tasi ona ese sona manatua i lena mea?”³⁵

Na ta’u mai e Peresitene Kimball i tagata o le Ekalesia, “Ou te manao ia iloa au o se tasi e alofa i ona uso ma ona tuafafine.”³⁶ Na lagonaina e le Au Paia o Aso e Gata Ai ma faailoa atu lena alofa mo ia e taui atu ai, lea sa ia matuai faafetaia lava. Na ia saunoa: “E masani ona ou ta’uina atu i tagata pe a latou fai mai e alolofa ia te au, ‘Ioe, manaia tele lena, aua o le mea lena ou te ola ai.’ O le uiga tonu lena o la’u faamatalaga.”³⁷

I lana auala alofa ma le naunautai, sa apoapoai mai ai Peresitene Kimball i le Au Paia o Aso e Gata Ai ina ia sili atu ona faateleina mea latou te faia i le galuega a le Alii nai lo le taimi muamua, ia faatoilaloina le manatu faapito, agasala, po o isi faafitauli ia e taofia ai i latou mai le agai i luma. I lona lava olaga, sa ia auauna atu o se faataitaiga o le agai i luma i le galuega a le Alii, e tusa lava po o a faigata.

Na saunoa ia Elder Robert D. Hales, a o avea lena ma se sui o le Korama Muamua a Fitugafulu, e uiga ia Peresitene Kimball: “O ia o se tagata o faatinoga, na faaalia lena i se faaupuga faigofie sa i luga o lana kesi e faapea, ‘Ia Faia.’ … O lana faataitaiga ma le alofa na uunaia ai i latou o e na mulimuli i lana faataitaiga ina ia ausia sini maualuluga ma faalautetele a latou laa ina ia agai atu ai ina atoatoa.”³⁸

I se lauga na tuuina atu i le konafesi aoao ia Oketopa 1979, na faamatalaina ai e Peresitene Kimball le tala ia Kalepo o le Feagaiga Tuai, lea sa feagai ma faafitauli e faatatau i le ulufale atu i le nuu o le folafolaga, e faapea, “Ia e tuuina mai ia te au lenei mauga” (Iosua 14:12). Na saunoa Peresitene Kimball e faatatau i na upu:

“O lo’u lagona lenei mo le galuega i le taimi nei. O loo tele naua luitau o loo i o tatou luma, o ni avanoa tetele e ao ona faafetaiaia. Ou te taliaina lena naunautaiga ma le lagona e faapea atu ai i le Alii, ma le faamaualalo, ‘Ia e tuuina mai ia te au lenei mauga,’ tuu mai ia te au nei luitau.

“Ma le faamaualalo tele lava, ou te tuuina atu ai lenei tautinoga i le Alii ma outou, o o’u uso ma tuafafine pele, o e o loo galulue i lenei faamoemoega paia o Keriso: O le a ou agai i luma, faatasi ai ma le faatuatua i le Atua o Isaraelu, i le iloaina lea o le a ia taialaina ma faatonutonuina i tatou, ma taitaiina i tatou, seia oo lava, i le ausiaina o ona faamoemoega ma le taunnuu atu i lo tatou nuu folafolaina ma o tatou faamanuiaga ua folafola mai.…

“Ou te aioi atu ma le faatauanau ma le naunautai ina ia faia e outou uma taitoatasi lenei tautinoga ma le taumafaiga—o taitai perisitua uma, o tamaitai uma i Isaraelu, o tama talavou uma, o teine talavou uma, ma soo se tamaitiiti ma soo se teineitiiti.”³⁹

O le aso 5 o Novema, 1985, ina ua mavae le lata i le 12 tausaga talu ona avea ma Peresitene o le Ekalesia, na maliu ai ia Spencer W. Kimball. I le taimi o lona maliu, sa faailoa mai ai e le fesoasoani o Peresitene Kimball o Peresitene Gordon B. Hinckley: “O so’u faamanuiaga ma se avanoa le galue ai i autafa o Peresitene Kimball i le tauaveina o le galuega a le Alii. I se tasi taimi sa ou taumafai ai e tau faatelegese o ia, ae sa ia saunoa mai, ‘Gordon, o lo’u olaga e pei o o’u seevae—ia masaesae i le galuega.’ Sa ia soifua faapena. Sa ia maliu faapena. Ua alu atu o ia e faatasi ma Ia o le sa auauna atu i ai, le Alii ia o Iesu Keriso, o le sa ia molimau ma tautino atu ai.”⁴⁰