Faamalolosia o o Tatou Aiga

O le olaga faaleaiga o le ala sili lea mo le ausiaina o le fiafia i lenei lalolagi, ma o se mamanu manino lea ua tuuina mai ia i tatou e le Alii e faatatau i le tulaga o le a i ai i le isi olaga.⁴

Sa faatulagaina e le Alii le polokalama atoa lava i le amataga, e i ai se tama e muai foafoaina, tausia, ma e alofa ma taita’ia, ma se tina e tauaveina ma fanauina ma faafailele ma fafaga ma aoaoina. Semanu e mafai ona faatulagaina e le Alii se isi faiga, ae peitai sa ia filifilia ina ia i ai se iunite e i ai tiutetauave ma fegalegaleaiga aoga e mafai ai e fanau ona aoao ma pulea lelei e le tasi le isi ma ia alofa, faataua, ma talisapaia e le tasi le isi. O le aiga o le fuafuaga silisili lea o le olaga e pei ona sa foafoaina ma faatulagaina e lo tatou Tama o i le Lagi.⁵

O le aiga o le iunite faavae lea o le malo o le Atua i le lalolagi. E le mafai ona sili atu le manuia o le Ekalesia nai lo ona aiga.⁶

Aua e mai le amataga lava sa faamamafaina ai e le Ekalesia a Iesu Keriso o le Au Paia o Aso e Gata Ai le olaga i le aiga. O loo tatou malamalama pea lava pea i lenei tulaga, aua o le faavae o le aiga o se tulaga e faavavau, ma sa faataatia lenei faavae a o lei foafoaina lenei lalolagi! O se faalapotopotoga e leai sona faavae i le olaga faaleaiga o lona uiga e leai sona faavae mautu—e avea ai o se mea e leai sona aoga, ma e vave foi ona lepetia ma faaleagaina. …

O i tatou lava, mai tagata uma … e le tatau ona faaseseina i manatu sese e faapea, o le iunite o le aiga ua saisaitia i se vaega faapitoa tau le atinae o loo aafia ai se faalapotopotoga faaletino. Tatou te saoloto e tetee atu ai i na gaoioiga o loo faaseseina ai le taua o le aiga, ae ua faamamafaina le taua o le manatu faapito o le tagata lava ia. Ua tatou iloa e mafai ona faavavau le aiga. Ua tatou iloa, afai e faaletonu totonu o le aiga, e faaletonu foi totonu o isi faalapotopotoga uma. …

O a tatou faalapotopotoga faaupufai … e le mafai ona laveai ina mai i tatou pe afai e le o mautu la tatou faalapotopotoga autu, o le aiga lea. E le mafai e feagaiga o le filemu ona laveaiina i tatou pe afai e i ai le feitagai, nai lo le alofa i totonu o le aiga. E le mafai e polokalama saili galuega ona laveai mai ai i tatou pe afai e le toe aoaoina le toatele ia galulue, pe leai foi se avanoa e galue ai po o le musu, i nisi tulaga, e faia faapea. E le mafai e le malosi o le tulafono ona puipuia i tatou, pe afai e toatele tagata e le mananao e pulea i latou lava, pe aoaiina.⁷

E leai sa tatou filifiliga … ae ia faaauau pea ona sii a’e le tulaga lelei o le aiga o le Au Paia o Aso e Gata Ai. O le mea moni e faapea, e le o maua e isi le avanoa e ola ai i totonu o se aiga faapena, e le lava lea mafuaaga e tuu ai le talanoa e uiga i ai. Ae ui i lea, tatou te talanoaina le olaga faaleaiga ma le magafagafa ma le nofouta e toatele [tagata] … latou te le o maua i le taimi nei le avanoa e auai ai pe saofaga ai i se aiga faapena. Peitai, e le mafai ona tatou faataatiaeseina lenei tulaga, ona e tele naua nisi mea e faamoemoe i ai.⁸

E tele ituaiga faatanoa o loo i ai i o tatou olaga. O nisi faatanoa e mo le teuina o vai. O nisi e teu ai meaai, e pei ona tatou faia ia tatou polokalama uelefea a aiga, ma e pei ona sa faia e Iosefa i le nuu o Aikupito i le taimi o le mau i tausaga e fitu. E tatau foi ona i ai ni faatanoa o le malamalama e faafetauia ia manaoga i le lumanai; ni faatanoa o le lototele e faatoilalo ai lolo o le atuatuvale lea e tuuina ai le le mautonu i olaga; se faatanoa o le malosi faaletino e fesoasoani ina ia tatou fetaiai ai ma avega masani o galuega ma ma’i; faatanoa o le amio lelei; faatanoa o le malosi; faatanoa o le faatuatua. Ioe, aemaise lava ni faatanoa o le faatuatua, lea a faapea e fetuleni mai le lalolagi i o tatou luga, tatou te tutu atu i le mausali ma le malosi; pe a oo mai faaosoosoga a se lalolagi pala o siomia ai i tatou e aveesea ai lo tatou malosi, e alu uma ai lo tatou malosi faaleagaga, ma saili e toso i tatou i lalo, tatou te manaomia se teugaoa o le faatuatua lea e mafai ona tauaveina le talavou ma mulimuli ane avea ma tagata matua i luga ae o taimi o le pogisa, o faigata, ma le matautia, faanoanoaga, o taufaasese ma tausaga o faigata, mana’ona’o, lē mautonu, ma le fenumiai. …

Ou te faafetai i o’u matua, aua sa la faia ni faatanoa mo o’u uso, o o’u tuafafine, ma a’u. Sa faatumulia ia faatanoa i amioga masani o le tatalo, suesue, gaoioiga, auaunaga lelei, ma le upumoni ma le amiotonu. O taeao uma ma po uma lava sa matou tootutuli ai i o matou nofoaga i talaane o le laulau ma tatalo feauauai. Ina ua ou faaipoipo, sa tumau pea lea masani, ma faaauauina pea e lo ma aiga fou lea faiga.⁹

O le olaga i le aiga, o le aoaoina lelei i totonu o le aiga, o le tulaga faaletaitai ma le taitaiga faamatua—o vaifofo ia mo le gasegase o le lalolagi ma ana fanau. O vaifofo ia mo faamai faaleagaga ma faalelagona ma le vaifofo mo ona faafitauli. E le tatau i matua ona tuu atu i isi le aoaoina o fanau.

E foliga mai o se tulaga faatupulaia le me’i atu o lenei tiutetauave mai le aiga i aafiaga i fafo atu e pei o aoga ma le ekalesia, ma le tulaga e popole tele ai, i ofisa ma faalapotopotoga eseese e tausia tamaiti. Po o le a lava le foliga mai e taua nei faalapotopotoga e i fafo atu, e le mafai lava ona suitulaga i uunaiga a le tina ma le tama. O le aoaoina e le aunoa, o le mataala e le aunoa, o le mafutaga ma le avea ma ni leoleo ia tatou lava fanau, e manaomia ina ia mafai ona faatumauina ai o tatou aiga ma ia faamanuiaina ai a tatou fanau i le ala a le Alii lava ia.¹⁰

O ausilali a le Ekalesia e taua tele, ma e tatau ona tatou tofo uma i faamanuiaga latou te ofoina mai. Peitai e le tatau, le tatau lava ona tatou faatagaina i latou e suitulaga i matua, e suia matua i le tiutetauave o le aoaoina o a latou fanau i le talalelei a Iesu Keriso.¹¹

E tatau i taitai o ausilali ma faiaoga o le autalavou ona fesili ifo, e mafai faapefea ona ou fesoasoani i nei tagata talavou ina ia alolofa ma usiusitai i o latou matua, ia ava ia i latou, ma ia lagolago i matafaioi a o latou aiga? E faapefea ona tatou faatulagaina ni fonotaga, faataitaiga, ma gaoioiga ina ia le faalavelave ai i mafutaga ma tiutetauave i le aiga, ma maua ai le taimi mo gaoioiga faaleaiga?

O la tatou tautinoga o le faatutotonuina i le aiga o le ola i le talalelei, e tatau ona avea ma savali manino a polokalama uma a le au perisitua ma ausilali, ma faaitiitia ai, pe a manaomia, ia nisi o gaoioiga e le faamalosia ia e ono tosoesea ai mai le faamoemoega tonu mo le aiga ma le fale.¹²

Ua na o le fuafuaina ma le taitaiga lelei o o tatou olaga faaleaiga, e mafai ona tatou taitaia ai a tatou fanau ma faasaolotoina ai i latou mai mailei e faapea ona oo atu ai i le agasala ma le faatafunaga, ma tuu atu i latou i le ala o le fiafia ma le faaeaina. O lenei mea, e leai se mea e sili atu ona mamana nai lo le faataitaiga a o latou lava matua ma aafiaga a o latou olaga faaleaiga. O olaga o a tatou fanau o le a tutusa lelei lava ma mea latou te vaaia i totonu o o latou lava aiga a o tuputupu ae i le faatamatane ma le faatamaitai. O lea e tatau ai ona fuafua o tatou auala i le ala lea tatou te mananao e mulimuli ai a tatou fanau.¹³

O le a tauaveina foi e le tamaitiiti i lona lava olaga le tele o mea na te vaaia i totonu o le olaga o lona aiga. Afai e vaai o ia e o soo ona matua i le malumalu, o le a amata foi ona ia fuafuaina se olaga i le malumalu. Afai e aoaoina o ia e tatalo mo faifeautalai, o le a agai malie atu o ia i le polokalama faafaifeautalai. O lenei, e matua faigofie lava lenei mea, ae o le ala lea o le olaga. Ma matou te tautino atu ia te outou, o le a aumaia e a outou fanau le ava ma le faamamaluina, a o outou tuuina atu ia i latou faataitaiga ma aoaoga sa’o.¹⁴

E i ai nisi taimi ou te vaai ai ua fouvale ia fanau a ni aiga lelei, latou te tetee, e se ese, e agasala, ma iu lava ina faasagatau atu i le Atua. O lenei tulaga latou te aumaia ai le faanoanoa i o latou matua, o e na faia mea sili latou te mafaia … e aoao atu ma ola o ni faataitaiga. Peitai ou te vaai pea lava pea i le toatele o nei lava fanau, i le mavae ai o tausaga e tele o feoai, faatagata matua, ma iloa ai mea ua latou misia, salamo, ma faia ni sao se tele i le olaga faaleagaga o o latou alalafaga. O le pogai ou te talitonu e mafai ona tupu ai lea mea aua e ui lava i matagi feagiai sa fesouaiina ai nei tagata, ae sa sili atu ona ta’a’ina i latou, e peau o le olaga i totonu o aiga sa tausia ai i latou, ma e sili atu nai lo le mea na latou iloa. Pe afai o le a latou mananao i ni tausaga mulimuli ane, ina ia toe faatulagaina i totonu o o latou lava aiga lena siosiomaga e tasi lea sa latou fiafia ai a o avea ma ni tamaiti, e foliga mai o le a latou liliu atu i le faatuatuaga sa faapea ona aoga i olaga o o latou matua.¹⁵

Tama ma tina, o lou tiutetauave aupito sili ona taua o lou aiga. O le galulue faatasi o le a mafai ai ona outou maua le ituaiga aiga ua finagalo le Alii ia outou maua. O le faaalia o le alofa ma le manatu o le tasi i le tasi, faapea ma lau fanau, o le a mafai ai ona outou fausia se faatanoa o le malosi faaleagaga lea o le a le mafai lava ona matutu.¹⁶

O le a oo mai le taimi e mafai ai na o i latou o e talitonu faamaoni ma malolosi i le aiga ona faasaoina o latou aiga mai le totonugalemu o mea faatiapolo ua siomia ai i tatou.¹⁷

Ua iloa lelei e le tiapolo le mea e osofai. O le a ia osofaia le aiga. O le a ia faatamaiaina le aiga. O le mea lena e manao o ia e fai. … Ia fai nei a tatou faaiuga, na te le faia lea tulaga i o tatou aiga.¹⁸

E manaomia lava lo tatou faamalolosia pea o o tatou fale ma aiga ma puipuia i latou mai le faaoosala a le tiapolo e pei o le tetea, aiga malepelepe, sauaina ma le faatautala, aemaise lava i ava ma fanau. E manaomia ona puipuia i taimi uma mai le ola le mama, tusi ma ata mataga, ma amioga faatautala o feusuaiga lea o le a faaumatia ai le mama o tagata o le aiga, o e talavou ma e matutua. …

… E toetoe lava o mea uma tatou te o i ai, tatou te maua i ai nei malosiaga faatiapolo. E toetoe lava o taimi uma tatou te vaaia ai. Tatou te aumaia i totonu o le aiga mai le aoga, mai le malae taalo, mai le fale tifaga, le ofisa ma le maketi. E itiiti lava ni nofoaga tatou te o i ai i aso uma o le olaga, e mafai ona tatou sosola ese ai mai ia mea.

O le a la sa tatou gaoioiga e fai? O le a se mea e tatau ona tatou faia? E tatau lava ona tatou mataala e le aunoa i lo latou leaga i totonu o o tatou aiga, ma ia faaumatia loa e pei ona tatou faia i siama ma le leaga o faamai. E tatau ona tatou sue faatapito mai itu uma o o tatou mafaufau, ma faasaolotoina i tatou lava mai ia mea faalelalolagi, ma titina ai aloiafi o le amioleaga a o lei avea ma ni afi musaesae matautia. E faapefea ona tatou faia lenei mea?”

Afai o le a tatou sosola ese mai na tui matautia a le tiapolo ma ia faia o tatou fale ma aiga ia saoloto ma ia matuai mausali mai faatosinaga faatafuna uma ua siomia ai i tatou, e tatau ona tatou maua le fesoasoani a le na ia faavaeina ma faatulagaina lenei fuafuaga o le aiga—o le Foafoa lava ia. E na o le tasi lava le ala mautinoa, e ala atu lea i le talalelei a le Alii o Iesu Keriso ma ia usiusitai i ana aoaoga moni ma le musuia. E moni e tatau ona tatou iloa o le tau mo le faatauina o se fale o se aiga e saoloto mai na faatosinaga leaga, o le tausia lea o poloaiga a le Atua.¹⁹

A o faitau matua i nusipepa ma mekasini ma vaai i mea o loo taumafai le lalolagi e aoao ia latou fanau, ua tatau lava ona sili atu lo latou naunau ina ia aua ne’i faaleagaina a latou fanau e na agasala ma mea sese. E tatau la i matua ona saunia se olaga faaleaiga, o le amio pulea, ma le aoaoga o le a faasagatonu ai ma tineia le amioleaga ua faapea ona faia i le lalolagi. A o aoaoina e le fanau mea mataga a le lalolagi, e tatau foi ona latou aoaoina mea lelei a le lalolagi ma tali lelei ma uiga talafeagai.²⁰

I nai tausaga ua mavae, sa matou asiasi atu ai i se atunuu sa aoaoina ai ni talitonuga ese ma ni “aoaoga matautia” sa aoaoina i aso uma i aoga faapea ai ma nusipepa e pulea e le malo. O aso uma lava e faalogologo ai tamaiti i aoga i aoaoga, filosofia, ma manatu e faamatalaina atu e o latou faiaoga.

Sa i ai se tasi sa faapea mai “o le sinasina pea o le vai o le a nuti ai le maa sili ona malo.” Sa ou iloaina lenei mea, o lea na ou fesili ai e uiga i tamaiti: “Pe latou te taofimau i lo latou faatuatua? Pe le o lofituina ea i latou i uunaiga faifai pea a o latou faiaoga? E mafai faapefea ona e mautinoa o le a latou le tuua le faatuatua faatauvaa i le Atua?”

O le tali na tulai mai e faapea “Matou te fonofonoina le faatanoa ua faaleagaina i po taitasi. Matou te aoaoina a matou fanau i le amiotonu lelei ina ia le sao atu i ai ia talitonuga sese. O loo tutupu a’e a matou fanau i le faatuatua ma le amiotonu, e ui lava i uunaiga mai fafo e toetoe a lofituina ai.”

E oo lava i faatanoa vai ta’eta’ei e mafai ona fonofonoina ma faasaoina, ma e mafai e taga oneone ona taofiofia le lolovaia. Ma o le ta’uta’u atu pea o le upumoni, tatalo faafouina, aoaoga o le talalelei, faailoaina atu o le alofa, ma le naunautai faamatua, e mafai ona faasaoina ai le tamaitiiti ma faatumauina ai o ia i le ala sa’o.²¹

O se aiga moni o le Au Paia o Aso e Gata Ai o se maluapapa lea e tetee atu ai i matagi ma faigata o le olaga. O le faaleagaga e fanauina ma fafagaina e le tatalo i aso uma, suesueina o tusitusiga paia, talanoaga faaletalalelei i le aiga ma gaoioiga faapena, afiafi faaleaiga, fonotaga faaleaiga, galulue ma taaalo faatasi, auauna atu o le tasi i le tasi, ma le faasoaina atu o le talalelei ia i latou e siomia i tatou. O le faaleagaga foi e fafagaina ia tatou amioga o le onosai, agalelei ma le fefaamagaloai o le tasi i le tasi, ma lo tatou faaaogaina o aoaoga o le talalelei i le li’o faaleaiga. O le aiga o le nofoaga lea e avea ai i tatou ma ni tagata popoto ma le aoaoina o le amiotonu i le talalelei, aoaoina ma ola faatasi i upumoni o le talalelei.²²

E tatau ona avea le aiga ma se nofoaga e avea ai le faalagolago i le Alii o se aafiaga masani, ae le seiloga o ni taimi faapitoa. O se tasi ala e faatulagaina ai lena mea, o le tatalo faatauanau lea e le aunoa. E le lava le na ona tatalo. E taua tele lo tatou talanoa moni atu i le Alii, ma faatuatua o le a ia faaalia mai ia i tatou o matua ia mea e tatau ona tatou iloa ma faia mo le manuia o o tatou aiga.²³

O le suesue i tusitusiga paia o le tagata lava ia po o le aiga foi, e sili ona taua i le aoaoina o le talalelei. O le faitauina ma le talanoaina o tusitusiga paia i aso taitasi, ua leva ona fautuaina mai o se meafaigaluega aupito mamana lea e tetee atu ai i le valea ma faaosoosoga a Satani. O lenei faiga o le a maua ai le fiafiaga sili ma o le a fesoasoani foi i tagata o le aiga e alolofa ai i le Alii ma lona agalelei.

E uiga i le taitaiga o o tatou aiga, ua tonu ona aoaoina i tatou e faapea, o fonotaga faaleaiga o le fono faavae sili lea a le Ekalesia. I lalo o le taitaiga a le tama ma le tina, o e foi e tatau ona fono faatasi, o aufono faaleaiga e tatau ona talanoaina ai mataupu e faatatau i le aiga, talanoaina ai tulaga tau tupe a le aiga, faia ni fuafuaga, ma lagolagoina ma faamalolosia tagata o le aiga.²⁴

O le tulaga i a tatou afiafi faaleaiga, o se afiafi i le fale faatasi ma le aiga po o se afiafi e o ai i se isi nofoaga e fiafia i ai faatasi ma lou aiga, e na o se vaega e ausia ai le manaomia ona faia ia afiafi faaleaiga. O le autu taua lava o le aoaoina lea o fanau i le auala o le olaga e matuai taua lava. O le o faatasi i se tifaga po o se pati, pe fagogota, ua na ona faamalieina ai se vaega o le manaoga moni, ae o le nonofo i le fale ma aoao le fanau i le talalelei, i tusitusiga paia, ma o le alofa o le tasi i le tasi ma le alofa i matua o le mea sili lea ona taua.²⁵

O le tuu atoatoa o o tatou loto ma mafaufau i le faia e le aunoa o afiafi faaleaiga musuia ma le fuafuaina ma le faaeteete o mea e fai i lena afiafi, tatou te tuuina atu ai se faailo ia tatou fanau o le a faapea ona latou manatuaina e faavavau. O le mea lea a tatou tuuina atu o tatou lava taimi ia tatou fanau, ua tatou tuuina atu i tatou lava, o se meaalofa e matauina i taimi uma.²⁶

Ou te fia faatusaina le afiafi faaleaiga, tatalo faaleaiga, ma isi gaoioiga faapena a le Ekalesia mo le laveaiina o le aiga, pe a faataunuuina ma le faaeteete, i se faamalu. Afai e le tatalaina le faamalu, e itiiti lava sona eseesega ma se tootoo ma e itiiti foi se puipuiga e maua ai mai afa faanatura. E faapena foi i fuafuaga ua tuuina mai e le Atua, e itiiti se aoga seiloga lava e faaaoga.

O le faamalu e tatala faalautele e sasa’o ai le ie silika. A palasi mai le timu, e tafe ese; a toulu mai le kiona, e sesee ese; a toulu mai timu maa, e fitifiti ese; a agi mai le matagi, e taamilo solo i le faamalu. Ma o le tulaga lava lea e tasi, o lenei faamalu faaleagaga e tetee ese ai fili o le valea, talitonuga sese, masalosalo, liliuese, ola le mama, ma isi ituaiga uma o le le amioatua.

O la’u tatalo ia faapea ona tatou tatalaina uma o tatou faamalu faaleagaga mo le puipuiga o o tatou aiga.²⁷

O le Atua o lo tatou Tama. E alofa ia i tatou. Sa ia faaaluina se malosi tele i le taumafaiga e aoaoina i tatou, ma e tatau ona tatou mulimuli i Lana faataitaiga ma ia alolofa faamaoni ia tatou lava fanau ma tausia i latou i le amiotonu.²⁸

O le a le umi talu ona e opoina lau fanau, e tusa lava po o le a le matutua, i ou lima ma ta’u atu e te alofa ia i latou, ma ua e fiafia ona e mafai ona avea pea ma au fanau e faavavau?²⁹

Oka, uso e ma tuafafine, e mafai ona faavavau aiga! Aua nei avea faaosoosoga i le taimi lava lena e tosoeseina ai outou mai o outou aiga! O le faaleAtua, faavavau, ma le aiga—e o faatasi, e uulima faatasi, ma e tatau foi ona faapena i tatou.³⁰