Mataupu 23

Leoleo Mamoe o le Lafu

E i ai le saogalemu i le lagolagoina ma le mulimuli i le perofeta ma isi taitai o le Ekalesia.

Mai le Soifuaga o Spencer W. Kimball

Emasani lava ona aoaoina e Peresitene Spencer W. Kimball le taua o le lagolagoina o taitai i le lotoifale faapea taitai aoao o le Ekalesia. I le taimi o le sauniga perisitua o le konafesi aoao ia Aperila 1978, sa ia faamatalaina ai ni lagona na ia te ia a o talavou e faatatau i alii taitoatasi o e sa avea ma ona epikopo: “Sa i ai lava so matou epikopo lelei i taimi uma. Sa matou alolofa ia te ia i taimi uma. Sa i ai Epikopo Zundel ma Epikopo Moody ma Epikopo Tyler ma Epikopo Wilkins. Ou te alofa i o’u epikopo uma lava. Ou te faamoemoe e alolofa ou uso talavou uma lava i o latou epikopo e pei ona sa ou faia.”¹

I se isi ana saunoaga sa ia faapea mai ai: “Ou te manatuaina lo’u sau i lenei tapeneko [o le Tapeneko i Sate Leki] o se tamaitiiti mai Arisona, faatasi ma lo’u tama, e auai i le konafesi aoao. Sa ou matuai fiafia lava ou te faalogo i saunoaga a le Usoga uma. … Sa ou matuai fiafia ia latou saunoaga ma sa ou mafaufau loloto ia latou lapataiga, e ui lava ina sa ou laitiiti. O nei alii o ni perofeta a le Atua, e pei lava o perofeta o le Tusi a Mamona ma le Tusi Paia.”²

Sa masani ona saunoa Peresitene Kimball ma faailoa lona talisapaia o tagata o le Ekalesia mo lo latou naunautai e lagolago o ia ma isi taitai o le Ekalesia: “Soo se mea ou te alu i ai, e i ai lava se tulaga maoae o le sasaa mai o le alofa ma le agalelei, ma ou te faafetai ai ma le lotomaualalo mo lena tulaga. O le manai lea i lo’u agaga. O a outou tatalo ma lo outou alofa e lagolagoina ai a’u. E faafofogaina e le Alii a outou tatalo ma faamanuiaina ai a’u ma o’u Uso i le ola maloloina ma le malosi ma taitaiina i matou i mataupu o lona malo iinei i le lalolagi. O lenei mea, matou te matuai faafetai ai lava.”³ Sa saunoa foi o ia e uiga i le alofa latou te lagonaina ma isi taitai o le Ekalesia mo le Au Paia: “Matou te alolofa ia te outou [le au paia] ma matou te talosia lo outou manuia atoatoa ma le olioli ma le fiafia, lea matou te iloa e na o le pau le auala e oo mai ai o le mulimuli lea i apoapoaiga a le Atua e pei ona folafolaina mai e ana perofeta ma taitai.”⁴

Aoaoga a Spencer W. Kimball

E taitaiina e le Alii Lana Ekalesia e ala i taitai na tofia mai le lagi.

O le Matai ma le Faaola, le Alii o Iesu Keriso lava ia, e tu i le ulu o lenei Ekalesia i lona mamalu ma le viiga. Na te taitaia lana galuega e ala i ana perofeta ma aposetolo ua tofia ma lagolagoina.⁵

O mataupu a le Ekalesia a Iesu Keriso e taitaiina e le Au Peresitene o le Ekalesia ma le Au Aposetolo e Toasefululua, ma le toatele o isi Pulega Aoao e fesoasoani i ai, ma e ala foi i peresitene o siteki ma misiona faapea ma epikopo. O nei alii o leoleo mamoe o le lafu. Ua tuuina e le Alii ia nei alii e taitaia lona malo i le lalolagi, ma i o latou luga ua ia tuuina i ai le pule ma le tiutetauave, e taitoatasi le tagata i lona tiutetauave faapitoa. Ua Ia tuuina atu i nei alii le Perisitua Mekisateko, o lona lava mana ma le pule ua faasafuaina atu i alii. Na te silafiaina ma faamaonia ia galuega a nei auauna filifilia ma faauuina.⁶

O la’u molimau ia te outou e faapea, o taitai o lenei Ekalesia a Iesu Keriso ua valaauina e le Atua ma ua vaetofia e taitai e ala mai i le agaga o valoaga e pei lava o isi tisipenisione.⁷

I tagata uma o lenei Ekalesia, ua tuuina e le Alii ni taitai i vaega e tolu: o le Epikopo po o le Peresitene o le Paranesi, o le Peresitene o le Siteki po o le Peresitene o le Misiona, ma le Au Pulega Aoao. O nei taitai e felagolagoma’i. Atonu o se tasi o i latou e le lava lona atamai, aoaoga po o le aoaoina, ae e mafai ona ia maua faaaliga a le Alii mo ona tagata ma ua avanoa foi ala o fesootaiga i le Atua mo ia lava.⁸

Talu mai le faasatauroga, ua filifilia ai e le Faaola le faitau afe o alii e faataunuuina ni tofiga o tiutetauave, e leai se tasi o i latou e atoatoa, ae peitai ua valaauina uma i latou e le Alii ma e tatau lava ona fesoasoani ma lagolagoina e i latou o le a fai ma soo o le Alii. O le agaga moni lena o le talalelei.⁹

O taitai ua filifilia, taliaina, ma faauuina o le a puipuia i tatou mai “le pepelo o tagata, i togafiti leaga.” [Efeso 4:14.] E le mafai ona faaseseina se tasi pe a puipuia o ia lava mai taitaiga tauaso pe saua foi, e ala i le mulimuli i le Agaga ma taitai moni o le Ekalesia.¹⁰

E leai se isi e sili atu le naunau nai lo le Usoga o e o loo tutu i le ulu o lenei Ekalesia, ina ia maua lea ituaiga o taitaiga e tuuina mai e le Alii ia i latou mo le manuia o tagata soifua uma faapea ma tagata o le Ekalesia.¹¹

Ou te iloa o loo i ai fesootaiga a le Alii ma ana perofeta, ma o loo ia faaali mai le upumoni i le aso i ana auauna e pei ona ia faia i taimi o Atamu ma Aperaamo ma Mose ma Peteru ma Iosefa ma le toatele o isi i le gasologa o taimi. O savali a le Atua o le malamalama ma le upumoni o loo tuuina moni mai i tagata i le aso e pei foi o isi tisipenisione.¹²

E tutusa lava savali e aoao atu e perofeta.

Atonu e mafaufau nisi pe aisea e saunoa ai le Au Pulega Aoao i le mea lava e tasi mai lea konafesi i lea konafesi. A o ou suesueina ia saunoaga a perofeta mai le faagasologa o senituri, e manino lava la latou mamanu. Matou te saili, i upu a Alema, ina ia aoao atu tagata “ia inoino e faavavau i le agasala ma le amioletonu.” Matou te aoao atu le “salamo ma le faatuatua i le Alii o Iesu Keriso.” (Alema 37:32, 33.) Matou te viia le lotomaualalo. Matou te saili e aoao tagata “e tetee atu i tofotofoga uma a le tiapolo, i le faatuatua i le Alii o Iesu Keriso.” (Alema 37:33.) Matou te aoaoina o tatou tagata ina ia “aua le faapalapala i galuega lelei.” (Alema 37:34.)

E saunoa mai perofeta i le mea lava e tasi aua o faafitauli lava ia e tasi tatou te feagai. Uso e ma tuafafine, o le fofo i nei faafitauli e lei suia lava. O le a avea o se moli o le ava lea e tuuina atu faailoilo eseese e taialaina ai vaa uma e ofi mai i se taulaga. O le a avea o se taitai [a’e] mauga leaga na te iloa le auala saogalemu e agai ai i luga o se mauga, ae aveina atu tagata na te taitaia i auala e le iloa ma faigata lea e leai se tagata malaga e toe foi mai ai.¹³

E le mafai e taitai o le Ekalesia, i soo se taimi matou te aoao atu ai ia te outou, ona tuuina atu se auala fou pe sili atu le matagofie o le a toe foi atu ai i le afioaga o lo tatou Tama Faalelagi. O loo tumau lava le auala. O lea, e ao ai ona tuuina atu soo ia faamalosiauga e uiga i mea lava e tasi ma e ao foi ona toe tuuina atu ia lapataiga. E le faapea a faamanatu soo atu se upumoni ona faaitiitia ai lea o le taua po o le sao o lena upumoni. O le mea moni, e sa’o ai le faafeagai.¹⁴

E mafai ona ou vaai faalemafaufau, ana faapea o le Alii lava ia o loo tu mai i luga o le Mauga o Olive ma ana faapea o loo ia aoaoina tagata, o le a ia fetalai mai i le tele lava o mea ua maea ona ta’u mai ma o le a ta’u mai [ia tatou konafesi]. E mafai ona ou vaai faalemafaufau, ana faapea o loo tu o ia i le Vai o Kalilaia faatasi ma vaa i luga o le vai ma o loo tutu tagata e liolioina o ia, o le a ia fetalai mai i ia mea lava e tasi: ia ola i poloaiga a le Atua, ia tausia i tatou ia mama atoatoa mai le lalolagi, ma ia ola i poloaiga uma ua tuuina mai e le Atua ia i tatou. O mea na o le a fetalai mai ai o ia, ma o aso nei, o loo ia fetalai mai i nei mea e ala i ana auauna.¹⁵

E masani ona le amanaiaina pe teenaina ia perofeta i o latou lava vaitaimi.

Pe a mulimuli le lalolagi i perofeta, ua alualu foi i luma; ae a le amanaiaina i latou, o taunuuga o le le alualu i luma, faapologaina, ma le oti.¹⁶

E oo lava foi i totonu o le Ekalesia e toatele ua taumafai e teuteu ia tuugamau o perofeta ua mavae ae ua fetogia faalemafaufau ia perofeta soifua. [tagai Mataio 23:29–30, 34].¹⁷

Ia aua ne’i o tatou toe faia mea sese a e anamua. E toatele tagata lolotu i aso nei o e talitonu i perofeta e pei o Aperaamo, o Mose, ma Paulo, ae matua le talitonu i perofeta o aso nei. E mafai foi ona talia e tagata anamua ni perofeta o aso e i luma atu, ae tausalaina ma upuleagaina ia perofeta o o latou lava vaitaimi.¹⁸

Sa faaaogaina ni ‘alofaga eseese mai lava i na seneturi ina ia le amanaiaina ai nei avefeau faalelagi [perofeta soifua]. Sa i ai le teenaina ona o le perofeta e sau mai se nofoaga faatauvaa. “E mafai ea ona tupu o se mea lelei mai Nasareta?” (Ioane 1:46.) Sa fetaiai foi Iesu ma le fesili, “E le o le atalii ea lenei o le tufuga?” (Mataio 13:55.) E ui mai i se tasi auala po o se isi foi, o le auala e sili ona vave teena ai perofeta paia o le sailia lea o se mafuaaga sese, po o le a lava le pepelo po o le faavalevalea, ina ia teena ai le tagata ma teena ai foi lana savali. O perofeta o e le o ni failauga faatauanau, ae e lemu lana tautala, sa o se mea noa i le mafaufau o tagata. Nai lo le taliaina o le savali a Paulo, sa vaai nisi i le nofo mai o lona tino e augavaivai ma o ana upu e faatauvaa [tagai 2 Korinito 10:10]. Atonu sa latou faamasinoina Paulo e ala i le tulaga o lona leo po o le faiga o lana tautala, ae le o upumoni sa ia tautalagia.

… O popolega o le lalolagi e matua tele ma matua lavelave, e oo lava i tagata lelei ua faaseseina mai le mulimuli i le upumoni ona ua pupu tele i latou i mea o le lalolagi. …

O nisi taimi e faatagaina ai e tagata o latou loto ina ia pupu i mea ma viiga o lenei lalolagi, ua le mafai ai ona latou aoaoina lesona e sili atu ona manaomia lo latou aoaoina. O upumoni faatauvaa e masani ona teenaina ae sili le taliaina o manatu o tagata, ma o le isi lea mafuaaga o le teenaina o perofeta. …

E le gata ina le taliaina e perofeta paia le mulimuli atu i amioga sese a tagata, ae ua latou faailoaina mai foi ia sese. E leitioa la e le o taimi uma na faaalia ai lo latou le popole i le tali atu i perofeta. Sa masani ona teena ia perofeta ona sa latou teenaina muamua ia auala sese a o latou lava tagata. …

E i ai lava se auala a perofeta e faateia ai le mafaufau faalelalolagi. E tele taimi e tauseseina ai ia perofeta paia e faapea e saua ma faanatinati ina ia tusia a latou saunoaga ina ia mafai ona toe faapea mai, “Na ou fai atu lava ia te outou.” O na perofeta ua ou iloaina o ni alii e sili ona loto alolofa. O lo latou alolofa ma lo latou faamaoni lena, lea e le mafai ai ona latou suia le savali a le Alii tau lava ina ia faatoafimalie ai le tagata. O i latou o ni alii agalelei tele ma e le saua lava. Ou te matuai faafetai lava ona e le naunau ia perofeta ia lauiloa.¹⁹

E tatau i matua ona aoaoina a latou fanau ia lagolago ma mulimuli i taitai o le Ekalesia.

E faapefea ona e aoaoina lau fanau ia alolofa i le au pulega o le Ekalesia? Afai e masani ona e faia ni faamatalaga lelei e uiga i le au peresitene o le paranesi, le au peresitene o le itu, le au peresitene o le misiona, ma le Au Peresitene o le Ekalesia, o le a tutupu ae lau fanau e alolofa i le usoga.²⁰

Tatou te tatalo mo taitai o le Ekalesia. Afai e manatua e fanau i aso uma latou te tatalo ai i tatalo faaleaiga ma tatalo a le tagata lava ia, e tuu atu i luma o le Alii ia taitai o le Ekalesia, o le a faigata lava ona pauu atu i latou i le liliuese. …

O fanau o e tatalo mo le usoga o le a tutupu ae foi e alolofa ia te i latou, viia i latou, faaaloalo ma faataitai ia i latou. O i latou o e faalogo i aso uma o ta’ua ma le alofa tele ia taitai o le Ekalesia i tatalo, e mautinoa lava o le a latou talitonu i lauga ma apoapoaiga latou te faalogo i ai.

A talanoa atu ia tamaiti i le Alii e uiga i o latou epikopo, o le a faapena foi ona latou matua faatauaina ia faatalanoaga ma le epikopo lea e talanoaina ai siitaga i le perisitua ma misiona ma faamanuiaga o le malumalu. O le a faapena foi ona i ai se faaaloalo mausali o teineiti mo sauniga uma a le Ekalesia a o latou tatalo mo taitai o le Ekalesia.²¹

O i latou o e mulimuli i le au pulega o le Ekalesia latou te maua le saogalemu.

O le a maua i taimi uma e tagata auai o le Ekalesia le sogalemu pe afai latou te mulimuli lelei i faatonuga ma apoapoaiga ma le taitaiga a le au pulega o le Ekalesia.²²

O le au pulega ua faatulagaina e le Alii i lana Ekalesia ua faavaeina mo tagata o le Ekalesia, i se isi faaupuga, o se taulaga, se nofoaga o le sulufa’iga, ma se maluapapa. E leai se tasi o lenei Ekalesia o le a sese mamao pe afai e pipiimau atu i le Au Pulega o le Ekalesia, ua faatulagaina e le Alii i Lana Ekalesia. O le a le se ese lava lenei Ekalesia; o le a le taitaiina outou e le Korama a le Toasefululua i ni auala sese; e lei faia lava ma o le a le faia lava. E i ai ni tagata taitoatasi o le a vaivai; ae o le a le i ai lava se taimi e ono tulai ai se vaega tele o le Aufono a le Toasefululua i le itu sese. Ua filifilia i latou e le Alii; ua Ia tuuina atu ia i latou ni tiutetauave faapitoa. Ma o na tagata uma e tutu latalata atu ia i latou o le a saogalemu. Ma, i le isi itu, soo se taimi lava e amata ai ona alu se tasi i lona lava ala e faatuiese i le pulega, ua oo o ia i se tulaga matautia tele. Ou te le faapea atu o na taitai ua filifilia e le Alii ua sili atu ona atamamai, pe sili atu foi ona aoaoina, ae o i latou o tagata filifilia, ma afai ua filifilia e le Alii, o i latou o lana au pulega ua faailoaina mai, ma o tagata e faalatalata atu ia te i latou e maua le saogalemu.²³

Afai o le a tatou ola i le talalelei ma mulimuli i fautuaga a taitai o le Ekalesia, o le a faamanuiaina i tatou e ‘alofia le tele o faafitauli ua malaia ai le lalolagi.²⁴

Ia tatou faalogo ia i latou o e ua tatou lagolagoina o ni perofeta ma tagata vaai, faapea foi ma isi o le usoga, e peiseai e faalagolago i ai lo tatou ola e faavavau, aua e faalagolago moni lava i ai!²⁵

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau (v–ix).

Ia manatunatu pe na faapefea ona faamanuiaina lou olaga i lou lagolagoina o taitai o le Ekalesia i vaega e tolu ua faamatalaina e Peresitene Kimball (tagai itulau 278). A o e faia lena mea, o a ni aafiaga ua e manatuaina?
Toe faitau le vaega lea e amata i le itulau 279. O a nisi o savali sa faailoa mai ma o loo faailoa mai pea ua e matauina i konafesi aoao lata mai?
Toe faitau atoa ia parakalafa lona tolu ma le fa i le itulau 280. Aisea e te manatu ai e faigata i nisi tagata ona mulimuli i perofeta soifua? O a ni faataitaiga lata mai e te manatuaina?
O a ni mea e mafai ona tatou faia e faamalosiau atu ai i fanau ma isi ia faaaloalo ma mulimuli i taitai o le Ekalesia? (Mo ni faataitaiga, tagai itulau 282).
Toe faitau le vaega mulimuli o le mataupu. Aisea e maua ai le saogalemu i le mulimuli i fautuaga a taitai o le Ekalesia?

Mau e Faatatau I Ai: Efeso 2:19–20; 4:11–16; Helamana 13:24–29; MFF 1:14, 38; 21:4–6; 121:16–21