Sa Foafoaina e le Tama Faalelagi ma Ieova le Lalolagi

“Ia malamalama!” Sa fetalai mai ai Ieova*. Na faafuasei ona oso mai se malamalama susulu i le pouliuli o le vanimonimo. Na silasila atu le Tama Faalelagi ma Ieova i le malamalama ua lelei. Sa Laua ta’ua le malamalama o le ao ae o le pouliuli o le po. Na amata ai se lalolagi fou.

Sa taialaina e le Tama Faalelagi ia Ieova i le foafoaina o le lalolagi. Sa Laua fuafuaina faatasi ma le faaeteete ina ia i ai meaai, vai, manu vaefa, ma mea uma lava o le a tatou manaomia i lo tatou aiga i le lalolagi.

Sa faaaoga e Ieova le mana o le perisitua e faatulaga ai elemene. Sa usiusitai mea uma i Lana poloaiga. Sa Ia foafoaina se paneta i maa ma palapala ma vai. Sa Ia faapotopotoina faatasi ia vai e faia ai sami ma vasa.

Ina ua Ia fetalai atu, “Ia i ai le eleele matutu,” sa o a’e i luga mauga tetele, mauga iti, ma vanu i tafatafa o sami. I luga ae o le eleele ma le vai, sa Ia foafoaina ai le lagi ma ao.

Sa avea le lalolagi atoa ma faatoaga a le Atua. Sa tuu fatu laau i le eleele e ola ae o ni laau e i ai moli susua, pupulaau e i ai vine e aai ai manu felelei, ma le vao e ufiufi ai laufanua mauga.

Sa foafoaina e Ieova le la ia susulu i le aso atoa ina ia ola ai laau. Sa Ia foafoaina le masina ma fetu e susulu i le po. Sa Ia faia le lalolagi ina ia faataamilo i lona taamilosaga ina ia i ai aso, vaitau, ma tausaga.

Sa Ia foafoaina meaola uma e feausi ma faatumu le lagi i ituaiga manu felelei. O tafola e faapisipisi. O alualu e gaioio. O pato e aloalo. Ao pelikana e apatā.

Sa foafoaina e Ieova tagalū ia tuu a latou pepe i totonu o a latou taga a o osooso, ma manuki e faalue mai laau i o latou siusiu. O manuninii uma e fetolofi; o pili e fetolofi; o meaola uma e tagi taalili, patapatatū, pe ‘ua’ua—sa faia uma e Ieova. Sa foafoaina ia meaola taitasi ia fananau a latou tama o le a pei lava o o latou matua. Mulimuli ane, ua saunia le lalolagi e avea ma aiga o le fanau a le Tama Faalelagi.

O Atamu ma Eva o uluai fanau agaga ia a le Tama Faalelagi na o mai i le lalolagi e maua ni tino. Sa faamanuiaina i laua e le Tama Faalelagi e avea o se tane ma se avā. Sa silasila atu Ieova i mea uma na foafoaina ua lelei naua!

Sa fetalai atu le Tama Faalelagi ia Atamu ma Eva ia “fanafanau ma uluuluola” ina ia nonofo a laua fanau ma a latou fanau i le lalolagi atoa.

O pepe fou taitasi e fananau mai e maua se tino faaletino mai ona matua faalelalolagi ma o se atalii/afafine agaga o le Tama Faalelagi. Ma o tamaiti taitoatasi e o mai i le lalolagi ua faamanuiaina i se lalolagi matagofie sa foafoaina e le Tama Faalelagi ma Ieova.