Ua Lagolago Atu Tagata o le Ekalesia i [Galuega] Taulamua mo le Misela

Talu lava ona auai le Ekalesia i le Polokalama Taulamua ma Faapaaga mo le Misela i le 2003, ua faitau afe tagata o le Ekalesia ua fesoasoani atu i le taumafaiga e titina le faama’i.

E tusa ma le 56,000 tagata o le Ekalesia i le salafa o le lalolagi ua tuuina atu le silia ma le 600,000 itula o auaunaga i atunuu e 32 i Aferika, Asia ma Amerika Tutotonu ma Amerika i Saute.

O se vaega o faalapotopotoga o auaunaga alofa—o le Koluse Mumu a Amerika, o le Faalapotopotoga a Malo Aufaatasi, Ofisa Tutotonu a le I.S. mo le Taulimaina ma le Puipuia o Faama’i, UNICEF, ma le Faalapotopotoga o le Soifua Maloloina a le Lalolagi—na faavaeina le Polokalama Taulamua ma Faapaaga mo le Misela i le 2001, ma le sini ia faaitiitia le numera o tagata maliliu ona o le misela i le lalolagi atoa i le 90 pasene i le faaiuga o le 2010.

I le avea ai o se vaega o le tautinoga a le Ekalesia i lea polokalama, lea e aofia ai le foai e $3 miliona, na valaaulia ai e le Au Peresitene Sili tagata o le Ekalesia i atunuu na aafia, i lalo o le taitaiga a taitai perisitua ma le Aualofa i le lotoifale, ina ia auai i le faasalalauina atu o le tala ma fesoasoani i le faiga o tui faagata.

E silia mal e 20 ulugalii tautua faamisiona a le Ekalesia o loo lagolagoina nei polokalama faalauiloa. O le galue ai i le nofoaga [e faatino ai le faiga o tui faagata] mai le tasi e oo i le fa masina, e faamaopoopo ai e nei ulugalii ma taitai perisitua ma le Aualofa, matagaluega o le soifua maloloina, ma isi faalapotopotoga faapaaga e tuuina atu le lagolago e ofofua atu i itu eseese o le faalauiloa.

E ui e le faatauina sa’o mai e tagata o le Ekalesia le tui pe latou te faia foi tuiga, ae latou te o atu i pitonuu e tufa atu pepa o faamatalaga, faatautau pepa lautele o i ai savali ma tagavai i auala, fesoasoani i nofoaga e fai ai tui, ma faatulaga ni avanoa mo leitio ma televise. Sa fatuina e se tasi o faifeautalai talavou ua mae’a mai se misiona se pese malie puupuu mo le faalauiloaga i Matakasa. O lenei pese malie puupuu ua faaliliuina ma usuina i gagana e 28 i luga o le tele o alaleo i leitio i le tele o atunuu na faia ai faalauiloaga.

Mai lava i le amataga o le polokalama taulamua i le 2001 e oo ia Tesema 2008, ua 600 miliona tamaiti ma talavou ua uma ona fai tui i atunuu atofaina, lea ua mafua ai ona faaitiitia i le 74 pasene le aofai o tagata maliliu i le misela i le lalolagi atoa ma e 89 pasene ua faaitiitia ai i Aferika lava ia. O tagata maliliu ona o le misela na faaitiitia mai le 750,000 i le 2000 i le 197,000 i le 2007, lea ua atili latalata atu ai le lalolagi i le sini a Malo Aufaatasi ia faaitiitia ifo i le 100,000 tagata maliliu i le lalolagi atoa i le faaiuga o le 2010.

E ui ina faaleleia atili e taumafaiga faalauiloa ia le tele o olaga, ae e le o manuia uma e faaletino. O le tuafafine o Olavi Ndafediva o loo nofo i Namibia, ma o se tagata o le Ekalesia, na volenitia i le faalauiloaga na faia i le lotoifale i le 2006. I se tasi aso na ia fai atu ai i lona tuagane o Olavi e le mafai ona saofia atu, ma o lea sa ia talosaga atu ai i lona tuagane e alu e sui o ia. “Ina ua mavae lena aso,” na fai mai lona tuagane, “na tonu ia te a’u e tatau ona ou sailiili atili i se ekalesia lea ua matua tele lana fesoasoani i o’u tagata.” Na auai atu Brother Ndafediva i le faalauiloaga i le 2009 ina ua auai o ia i le Ekalesia.

O Cape Verde, o ni atumotu e selau ma ona tupu maila e mamao ai mai le talafatai i sisifo o Aferika, o se tasi lea o le tele o atunuu na ofo fua mai ai le tautua a tagata o le Ekalesia. I le faalauiloaga ia Mati 2009, na fesoasoani ai tagata o le ekalesia ina ia faatino le faiga o tui faagata i le silia ma le 50,000 o tamaiti. E silia ma le 600 tagata o le Ekalesia i Cape Verde na ofoina mai itula e 4,200 e uunaia ai le faalauiloaga mai lea aiga i lea aiga.

“Sa maoae le toatele o tagata na aofia ai mai atumotu e ono lea o loo i ai paranesi o le Ekalesia, aemaise lava le autalavou ma talavou matutua nofofua,” o le saunoaga lea a Isias Barreto da Rosa, o le fesoasoani lua i le au peresitene o le Misiona a Cape Verde Praia. “O le polokalama lenei mo le misela ua faalauteleina moni ai la matou vaai e uiga i mea e mafai ona matou faia ia aofia ai i le fofoina o faafitauli i o matou nuu.”

O le misela o se faama’i pipisi e osofaia le ala manava ma e mafai ona faatupuina ai pata i le tino, nimonia, fula o le faiai, ma isi faafitauli. E masani lava ona ogaoga ona tulaga. E tusa ai ma faamatalaga mai le Polokalama Taulamua mo le Misela, pe tusa ma le 540 tamaiti i le aso na maliliu i le faama’i i le 2007. O tamaiti e le lelei ona aai ma lē faia tui e aupito i lamatia i le misela. Ae peitai, e faigofie lava ona puipuia le faama’i i tui ma e le atoa le $1 Amerika e togafiti ai se tamaitiiti e toatasi.