Usuina o se Viiga Fou

A o lau mai e le epikopo igoa o tagata o le uarota ua faamalolo mai o latou valaauga i lena Aso Sa, sa ou mapuea, ma tilotilo i o’u lima nofonofovale. Ua faamaloloina au mai le avea o se fesoasoani muamua i le au peresitene o le Aualofa. Sa faigata ona ou mafaufau i le tuua o lenei valaauga sa ou matua fiafia i ai, ma le tuua o sootaga vavalalata ma isi uso i le au peresitene.

Ina ua ou faalogo i igoa o le au peresitene fou na lau mai, sa ou lagona se faamaoniga a le Agaga, na faailoa mai ai ia te a’u ua i ai mea uma e pei ona sa tatau ai. O nei uso fou ua valaauina e le Alii e faia lenei galuega. A o sii lo’u lima e lagolagoina i latou, sa ou iloa o le a latou faia se galuega matagofie ma o le a i ai isi auala ou te auauna ai. E faafetai lava, ona sa ou toafilemu.

Ona oo lea i le taimi e usu ai le viiga o le faamanatuga. Sa faalau mai e le epikopo se fatuga ese o se pese tuai ou te fiafia i ai, “A Tatou Fetagofi i Nei Faatusa” (Viiga, nu. 98). A o ou faalogologo atu i le ta okeni o ta mai le amataga, sa amata ona alu ese atu lo’u filemu. “Aisea tatou te le usuina ai le fati masani?” O ou mafaufauga le leoa ia. “E sili atu lo’u fiafia i ai.” Ae ina ua amata ona ou pese ai, sa ootia lo’u agaga i le matagofie o le fati [ou te] le masani ai, ma na ou iloa ai o le fati lea o se fati matagofie mo ia upu. Sa avea le musika ma mea ou te mafaufau ai i le uiga o le viiga i se auala fou.

Na faafuasei lava ona o mai faatasi lenei viiga ma lo’u faamalologa i lo’u mafaufau e ala i se uunaiga malosi a le Agaga. O le a faia e le au peresitene fou le galuega lava e tasi lea sa ou faia, ae o le a faia i lima ese ma se vaaiga fou—e pei lava o le viiga e tutusa lava le savali ae eseese fati o musika. Ma o le a maua so’u valaauga fou e talafeagai ma la’u fati. O lenei suiga o le a fesoasoani ia te au ou te tuputupu a’e ai i auala e le mafai ona ou iloa pe ana fai ou te tumau lava i le nofoaga tuai.

Na ou iloa lava i taimi uma o le talalelei ma le faatulagaga a le Ekalesia e faamanuiaina ai tagata taitoatasi i le tele ma tele o auala. Tatou te aoao i auala e taitai ai ma auala e lagolago atu ai, ma o le faagasologa o lenei aoaoga e faia pea lava pea i o tatou olaga. Ae na ou iloa mai i lena sauniga faamanatuga afai tatou te faalogo i le Agaga, o le a tatou iloa mai suiga taitasi le tutumau faavavega o le fuafuaga a lo tatou Tama Faalelagi mo i tatou.