Aisea E Te Le Sau Ai i le Pati?

I le avea ai o se tagata liliu mai i le Ekalesia i Meleisia, o se atunuu e toaitiiti ni tagata Kerisiano e i ai, o nisi taimi e faigata ai ona tu atu mo o’u talitonuga. I se tasi aso ia Tesema, sa fai mai ai lo’u pule o le a faia se pati faamanatu a la matou kamupani i le faaiuga o le tausaga ma e tatau ona ou auai. Sa ou popole ma ou lē manao ou te alu, aua o le inuina o ‘ava malolosi i pati o se vaega lea o le tu masani a la matou kamupani. Na ou iloa foi o le a taumafai le matou aufaigaluega e faamalosi a’u ou te inu.

Ae sa mautu le faatonuga a lo’u pule e tatau ona ou auai. Sa ou manatunatu pe o le a faapefea ona ou foia lenei luitau.

Mulimuli ane, sa taofi a’u e se tasi o la matou aufaigaluega ma fesili mai, “Aisea e te le fia sau ai i le pati?” Sa ou fai atu ia te ia ou te le inu ava malosi ona o o’u talitonuga faalelotu.

Sa tali mai o ia ma le ita, “E tatau ona e popole i le lalolagi o loo e ola ai nei, ae le o se isi lalolagi ailoga lava o i ai. E te manao e maua sau tupe pe maumau ona o ou talitonuga valea?” Ina ua ia fesili mai i lenei mea, sa ou lagonaina lo’u fefe. Na ou iloa afai ou te le inu i le pati, o le a tuli a’u ma la’u galuega. Ae na faafuasei ona oso mai i lo’u mafaufau se mau: “O a’u, o a’u lava le faamafanafana ia te outou: o ai ea oe e te fefe i le tagata e oti, ma le atalii o le tagata e avea o ia e pei o le mutia; ua galo foi ia te oe o Ieova o Le na faia oe, Le na fofola le lagi, ma faavaeina le lalolagi?” (Isaia 51:12–13).

O le taimi lava lea na ou iloa ai e tatau ona ou mata’u i le Atua, ae le o lo’u uso faigaluega po o lo’u pule. Sa ou iloa foi o lo’u faamoemoega i le lalolagi e le o le maua o tupe ae ia tuputupu a’e faaleagaga. O lea na ou tali atu ai i lo’u uso faigaluega, “O le a ou filifilia o’u talitonuga, ma e tatau ona e faaaloalo i ai.”

O ni nai vaiaso mulimuli ane sa ou faamavae ai ma la’u galuega. I lo’u aso mulimuli i le galuega, sa manaia la matou talatalanoaga ma la matou aufaigaluega. Sa ou faamalamalama atu i ai le eseesega O Le Ekalesia a Iesu Keriso o le Au Paia o Aso e Gata Ai mai isi ekalesia. Sa ou ta’u atu ia i latou e uiga i o’u talitonuga ma lo’u manao e tausi poloaiga.

Pe a ma se vaiaso mulimuli ane, na maua ai se isi a’u galuega e lelei atu le totogi nai lo le galuega na ou tuua. O la’u galuega fou foi e maua ai le taimi ou te sauniuni ai mo la’u misiona.

O lenei aafiaga na le gata ina aoaoina ai a’u, o le tausia o poloaiga o le a mafai ai ona ou toe foi atu i le Tama Faalelagi i se aso, ae ua tuuina mai ai foi ia te a’u le lototele, o a lava luitau e oo mai ia te a’u i aso uma, o le a saunia lava e le Alii le ala mo a’u (tagai i le 1 Nifae 3:7).