Sefuluai

Sa lagolagoina e lo’u tina nofofua lana fanau laiti e toatolu i se totogi faatauvaa o se faiaoga. Ina ua ou malamalama o loo matou ola e aunoa ma nisi o mea mananaia… , sa ou fesiligia lo’u tina pe aisea e faaalu ai le tele o lona totogi i le sefuluai. E le i galo lava ia te a’u lana faamatalaga: “Dallin, atonu o loo i ai nisi tagata e mafai ona ola e aunoa ma le totogiina o le sefuluai, ae tatou te le mafaia. Ua filifili le Alii e aveesea lou tama ae tuu mai ia te a’u e tausia outou. E le mafai ona ou faia lena mea e aunoa ma faamanuiaga a le Alii, ma ua ou mauaina na faamanuiaga e ala i le totogiina o le sefuluai. A ou totogiina la’u sefuluai, ua ou maua le folafolaga a le Alii o le a Ia faamanuiaina i tatou, ma e tatou te manaomia na faamanuiaga ina ia tatou ola lelei.”

I ni tausaga se tele mulimuli ane sa ou faitau ai i se tala a Peresitene Iosefa F. Samita i se molimau ma ni aoaoga faapea a lona tina nofofua. I le konafesi o Aperila 1900, sa faasoa mai ai e Peresitene Samita lenei tala mai lona tuputupu a’e:

“Sa nofofua lo’u tina, faatasi ma se aiga toatele e tausia. I se tasi tautotogo ina ua eli a matou pateta sa auina atu e ia lana fanau tama e ave se uta o pateta sili ona lelei, ma sa ia auina atu i le ofisa o le sefuluai; sa oge pateta i le vaitau lena. O a’u sa ou laitiiti i le taimi lena, ma sa ou aveina le taavale solofanua. Ina ua matou oo atu i le faasitepu o le ofisa o le sefuluai, ma ua matou sauni e la’u i lalo le uta pateta, sa oo mai se tasi o failautusi ma faapea mai i lo’u tina, ‘Tinā Samita, o se tulaga maasiasi lou tau totogiina o le sefuluai. ’ … Sa faaseā o ia i le totogi e lo’u tina o lana sefuluai, ma lau lo’u tina i soo se faaupuga, ae leai ma se faapea mai, e poto ma faautauta; ma sa fai mai e i ai isi e malolosi ma mafai ona galulue, a e o la e tausia e le ofisa o le sefuluai. Sa liliu atu lo’u tina ia te ia ma faapea atu: ‘Viliamu, ua tatau ona e maasiasi ia te oe lava. Pe e te teena ea ni o’u faamanuiaga? Afai ou te le totogiina la’u sefuluai, ou te talitonu o le a taofia e le Alii Ana faamanuiaga mai ia te a’u. Ou te totogiina la’u sefuluai, e le gata ona o se tulafono a le Atua, ae ona ou te faamoemoe e maua so’u faamanuiaga i lo’u usitai i ai. E ala i le tausia o lenei tulafono ma isi tulafono, ou te talitonu ou te manuia ai ma mafai ai ona tausia lo’u aiga’” (i le Conference Report, Ape. 1900, itu. 48).

Fai mai nisi tagata, “E le lava a’u tupe e totogi ai le sefuluai.” O i latou o e tuu atu lo latou faatuatua i le folafolaga a le Alii e faapea mai, “E le mafai ona ou faatamala i le totogiina o le sefuluai.”