Taitaia o le Ala

A o lei auai le aiga i le Ekalesia, sa popole le au Calderón ona sa faigata ona maua e Jared ma Angie ni aoaoga lelei ma faaleagaga i se lalolagi e le faatauaina ai aoaoga faalelotu.

O le talalelei, lea na maua e le aiga o Calderón, na maua ai tali i faafitauli sa latou feagai. “Ina ua matou malamalama i le talalelei ma amata ona faaaoga ona aoaoga, o lena malamalama na suia ai le auala na matou ola ai,” o le tala lea a Uso Calderón. “Na matou iloa ai o matou faasinomaga ma le auala e mafai ai ona matou toe foi atu i lo tatou Tama Faalelagi. Ona o mea na matou iloa [i le Talalelei], ua matou ola ai i se olaga faaleagaga ua faatamaoaigaina atili.”

Sa le faigofie i taimi uma le taliaina atoa o mea na latou aoaoina mai faifeautalai, ae a o latou faataitai ona ola i mataupu faavae o le talalelei, na latou maua ai se molimau e uiga i ai. “A o matou aoaoina tulaga faatauaina o le talalelei, sa matou taumafai e tumau i totonu o tuaoi o le ola agavaa. Sa tuu la’u inu kofe. (Sa matua malosi la’u inu kofe i le taimi muamua!) Sa faatutuina a matou sini o se aiga e aua le faaaogaina upu masoa, ia tautala ma le alofa le tasi i le isi, ma ia tausisia isi mataupu faavae lelei.

“O le ositaulaga sili lava na matou faia o lo matou manatu faamaualuga,” na faaauau ai lana tala. “Sa matou aoao e lotomaulalo, ae ina ua matou taumafai e aoao ma ola i le lotomaulalo, ua matou maua ai faamanuiaga e tele ma maua ai le alualu i luma maoae o ni tagata taitoatasi, o se ulugalii, ma o se aiga.”

O Jared Calderón o le tagata muamua o lona aiga na auai i le Ekalesia; sa papatisoina o ia ia Iuni 2003. Na sosoo ai ma Angie ia Iulai 2004. Na papatisoina o laua matua ia Aperila 2007. Ma mulimuli ane, e lei leva ona atoa le valu tausaga o le uii o le aiga o Calderón, o James, i le 2007, ae papatiso loa o ia.

Ona amata lea ona sauniuni le aiga mo feagaiga ma sauniga faaopoopo i le malumalu. “Sa matou iloa lava o le papatisoga ua na o le laasaga muamua lea, o le tala lea a Tuafafine Calderón. “Ua matou faatuina se sini ia faaauau pea ona matou alualu i luma, e aofia ai le o atu i le malumalu ma faamauina o se aiga ina ia i ai se aso matou te toe nonofo faatasi ai ma lo tatou Tama Faalelagi.”

A o sauniuni mo la latou faamauga i le malumalu, sa faaalu ai e le aiga atoa le taimi e tatalo ma anapopogi ai. Sa auai foi Jared i nai taimi i le faia o papatisoga mo e ua maliliu. O le aso 10 o Me 10, 2008, sa faamauina ai le aiga i le Malumalu o San José Costa Rica.

E manatua e Jared ona lagona i lena aso. “Ina ua ou ulufale atu i le potu o faamauga, sa matua malosi lava le Agaga. Sa matua sa’o lava le faalogoga o le i ai iina ma lo’u aiga,” o lana tala lea.

E manatua e lona uso o James le umi ona faatali faatoa ulufale atu ai i le potu o faamauga, ae, fai mai o ia, sa matua aoga lava: “Sa ou lagonaina le tele o le olioli ma le fiafia. E faaauau pea ona ou lagona le fiafia i lo’u iloa e mafai ona ou faatasi ma lo’u aiga e faavavau.”

A o faia e le aiga le tele o suiga i o latou olaga e saunia ai mo sauniga o le malumalu, ua latou iloa ai e moni lava o sauniga ua suia i latou. Mo se faataitaiga, e manatua e Angie a o lei faamauina lo latou aiga, sa fai atu o ia i lona tina e le fia faaipoipo i le malumalu. “Ou te lei malamalama i le taimi lena i folafolaga,” o lana tala lea. “O lea la ua ou vaai i le fuafuaga atoa, ma ua i ai foi sa’u sini maualuga atu. Oute manaoou te faaipoipo i le malumalu. Ou te manao e fai so’u lava aiga i se aso, ma ola faatasi ma i latou e faavavau.”

O le isi suiga ua oo ia Angie o le faateleina lea o lona manao e faia talafaasolopito o aiga ma galuega faalemalumalu mo ona tuaa ua maliliu. E asiasi atu i laua ma lona tinā i le faletusi o talafaasolopito o aiga i lo latou falelotu e saili ai ia igoa. E matua malosi tele le lagona alofa o Angie mo ona tuaa. E naunau o ia i taimi uma e fai galuega o talafaasolopito o aiga.

Ua matauina foi e Jared se suiga ia te ia lava i le auala ua ia faia ai tagata o lona aiga. Ua ia faamatala mai: “A e alu i le malumalu, e sili atu le manino o lau vaai i mea uma. Ua ou lagona le taitaiina o a’u e le Agaga e fai faalelei o’u matua ma nai o’u tei, ia faatumauina se sootaga lelei ma i latou. Na i ai taimi sa ou lagona ai le le fiafia ma ou manatu ai o le isi tagata e sese, ae ina ua ou manatua o i matou o se aiga e faavavau, sa ou iloa ai e le taua le fefinaua’i i mea faatauvaa.

“Ma le isi,” na ia faaopoopo mai ai ma se ataata taufaasee, “afai o le a matou nonofo faatasi e faavavau, e tatau ona ou faamasani ia i latou.”

Ua iloa e le aiga o Calderón o le osia o feagaiga ua le lava lena—e taua foi le tausia o na feagaiga. O loo latou taumafai e faitau pea tusitusiga paia ma tatalo faatasi. Latou te o atu i le lotu ma faataunuu o latou valaauga ma e lagolago e le tasi le isi. “O mea na e fesoasoani ia i matou e manatua ai mea ua matou folafolaina atu ma aumaia ai ia i matou le tele o faamanuiaga, faaleagaga ma le faaletino,” o le faamatalaga lea a Tuafafine Calderón.

O loo faaauau pea ma o le a faaauau pea ona feagai le aiga ma luitau i o latou olaga, ae ua faia e feagaiga se eseesega tele i o latou manatu ma lagona. O le toe tepa i tua i filifiliga na faia e lona aiga, ua lagona ai e Uso Calderón le fiafia tele: “Ina ua matou aoao e uiga i le talalelei ma ola ai, ua matou atiina ae se tautinoga, se faamautinoaga, o le talalelei lenei a Iesu Keriso, ma o ana taitaiga e fesoasoani tatou te faia sa’o ai faaiuga taua. Ua latalata atili ai lo matou aiga i le Faaola. Ua matou alualu i luma faaleagaga, ma matou te lei fiafia faapenei i o matou olaga.