O Le Seevae Faasee e Tasi

Ou te manatua pea lava la’u uluai malaga faasee i le atunuu sa matou faatasi ai ma lo’u aiga. Sa uta mea faasee i le taavale ma sa matou malaga atu ma o’u matua, uso ma tuafafine i se mauga lata ane lea o le a matou i ai i le aso atoa. Ina ua matou taunuu i le nofoaga, sa ou iloa ai, o le faanatinati o le teuina o le uta na galo ai ia te a’u le isi ou seevae faasee i le fale. Ae o le mea sili ona leaga, na galo ai foi ma o’u tootoo faasee.

Sa matua le mafai foi ona toe foi atu i le fale e aumai a’u mea faasee ia ua galo. Sa fai mai lo’u tama e sili ona poto ia te a’u, pau lava le mea o lo’u taumafai lea e fai le mea sili ou te mafai. O le mea e lelei ai, sa alofa mai lo’u tuafafine matua ia te a’u ma aumai ai ia te a’u le isi ona tootoo.

Talu ai ou te lei faasee muamua lava i le aisa, o lea sa ou le manatu ai e afaina le tasi o le mea faasee. Sa sili atu lo’u fiafia nai lo so’u le fiafia—o le mea taua lava, o lea ua atoa nei o’u tausaga ou te auai i le gaoioiga sili ona fiafia ai lo’u aiga!

Sa taitasi ona faamau seevae faasee o o’u uso ma tuafafine ma agai atu loa i le tamai mauga lea e manaia e faasee ai agai i lalo. Ae sa le mafai ona ou migoi i se inisi! Sa goto loloto i le kiona le vae e leai se seevae faasee o i ai. O le vae sai ai le seevae faasee sa mau foi aua sa pipii i ai le kiona i le laupapa tuai o loo faia ai le seevae, ma atili mamafa tele ai.

Aisea ua le faafaigofie ai lenei mea? O le malosi lava o lo’u taumafai, o le atili ai foi lea ona mamau o’u vae ma faateleina ai lo’u le fiafia. Sa atili faateleina le faigata o la’u tauiviga i lo’u vaai atu lea ua mamao tele atu lo’u tama ma o’u uso. Sa taunuu i latou i le laufanua ma foliga mai ua matua fiafia tele i latou a o latou fe’a’ei agai i luga o le mauga ma faasee mai ai i lalo.

Sa fai lava ma foi mai Papa e siaki mai a’u, ma tuuina mai ni upu faamalosiau. “Taumafai pea! O lena ua e mafaia.” Ae ou te le i mafaia. O le mea moni, na uma lava lena aso ou te le i oo lava i le laufanua [e a’e ai i le mauga]. Sa ou matua le fiafia i la’u uluai malaga faasee.

A o faasolo ina ou matua, ua ou iloa ai o i tatou uma lava e oo mai i ai taimi tatou te lagonaina ai o loo tatou taumafai e ola i le seevae faasee e tasi—o se seevae faasee laupapa e le fetaui. Tatou te tauivi ma faafitauli ma mea lē fiafia ma mea le atoatoa, o nisi lava o mea sa oo mai ona o i tatou lava, ae o nisi e oo mai ona o loo tatou ola i se lalolagi lē atoatoa. O nisi ua na o se taimi e le tumau; o nisi tatou te feagai i o tatou olaga atoa.

E vave lava ona tatou iloa lo tatou le saunia mo le siosiomaga ua tatou i ai. Tatou te lagona le le agavaa. E faateleina lo tatou tiga pe a tatou vaai atu i isi e foliga mai e leai ni o latou faafitauli. I tulaga faapea e manino e le mafai ona tatou taunuu na o i tatou lava.

O le mea e sili ai, e le manaomia ona taunuu o tatou aafiaga faaleolaga e pei o la’u uluai faaseega. Sa matuai tuuina atu i ai a’u taumafaiga sili ae peitai e le i i ai se agai i luma. Ae i le olaga e mafai ona tatou tuuina atu la tatou taumafaiga sili ona tuuina atu lea o le isi vaega atoa i le Atua. E mafai e i tatou e ala i Lona malosi ma Lona alofa tunoa ona tatou faia mea e le mafai ona tatou faia pe a tuu i ai na o lo tatou lava malosi.

Ua ou iloa foi e le tatau ona natia a tatou tauiviga mai lo tatou Tama Faalelagi alofa. E fesoasoani o tatou vaivaiga ia i tatou e malamalama atili ai i Lona finagalo mo i tatou, o i tatou moni lava o Lana fanau. O Lona alofa ia i tatou na Ia auina mai ai Lona Alo.

Afai tatou te o mai ia Keriso, o le a tuuina mai foi e o tatou vaivaiga sina malamalama itiiti i le alofa tunoa ma le alofa mutimutivale o le Faaola a o Ia fesoasoani mai ia i tatou. Mo se faataitaiga, ua i ai taimi ua ou lagona ai lo’u fia faapea atu, i se gagana faavaoli’a, “Vaai, e na o le tasi lo’u seevae faasee. Ae tusa lava foi pe ana i ai o’u seevae faasee e lua, ou te talitonu lava o a’u o se tagata faasee e lē lelei. O le mea lea aua le popole mai fua ia te a’u.”

Ae i Lona agalelei, ua fesoasoani mai ai pea le Faaola ia te a’u. Ua silafia e Ia o loo ou feagai ma lu’i, ma ua manaomia e Ia tau lava o le mea sili ona ou mafaia: “E faaolaina i tatou i le alofa tunoa pe a uma ona faia mea uma tatou te mafaia” (2 Nifae 25:23). O le alofa tunoa e le o le mauaina lea o se pea iila fou o seevae faasee ma le auina atu lea tau lava o ‘ita i lo ta taunuuga. E sili atu ona latalata i le tagata ma mafanafana le alofa o le Faaola nai lo lena. E fesoasoani mai o Ia ia te a’u i le mea o loo ou i ai, i le ituaiga tagata e i ai a’u, ma fesoasoani mai ia te a’u e ola ma avea faapei o Ia ma le Tama Faalelagi. Ou te talitonu o loo fiafia i La’ua i a’u taumafaiga sili, po o le a lava le faatauvaa. Ma ou te iloa e alolofa i La’ua ia te a’u i le ala e mafai ai ona ou talitonuina ma ou faalagolago atoatoa ia i La’ua.

Ina ua mavae la’u uluai faaseega le faamanuiaina lena, ou te le i faavaivai ai i le faasee. Sa ou toe foi pea lava pea ma lo’u aiga ma ave foi a’u vasega faasee i le kolisi. O lea la ua avea nei ma mea faapasitaimi ou te fiafia i ai. Ou te faafetai ou te le i fiu

Ou te faafetai foi e—faavavau—aua e le fiu lava le Tama Faalelagi ma Iesu Keriso ia i tatou. E le i tuua i tatou e le Atua i a tatou lava taumafaiga faaletonu. Talu ai Lona alofa e faavavau mo Lana fanau, ua Ia auina mai ai se Faaola e saunia le ala e toe foi atu ai i Lona afioaga. Ou te iloa afai tatou te tuu atu lo tatou faatuatua ia i La’ua, o le a mafai e i tatou uma lava ona agai i luma i o tatou olaga.