O La Tatou Avanoa

2010

O La Tatou Avanoa

Fepuari 2010

O La Tatou Avanoa

Faataitaiga ma Sauniuniga

I se tasi Aso Sa na talosagaina ai a’u e tatā la’u vaiolini i le sauniga faamanatuga. Sa ou popole a o tata le vaiolini, ma sa tetete o’u lima ma vae. Sa manatu tagata o le faapotopotoga sa matua lelei tele la’u ta, ae na ou lagona sa mafai lava ona sili atu sa’u taumafaiga. E pei ona fai mai le Mataupu Faavae ma Feagaiga 38:30, “Ae afai ua saunia outou o le a outou le matatau ai lava.” Sa ou aoaoina mai i lenei aafiaga le taua o le [tatā] faamasani pea.

E le gata ina faatatau i se mea fai musika, ae o soo se mea foi i le olaga. Mo se faataitaiga, i le vasega matematika ou te lei malamalama lelei ai i le mataupu. Ae o le tele o lo’u faataitai pea lava pea, sa aoga lava i le faaiuga, ma sa mafai ona ou mulimuli ai i le aoaoina o le mataupu. E faapena foi i le talalelei. Afai e faataitai pea lava pea ona faasoa atu a tatou molimau, o le a faasolo ina lelei ma tatou tau le fefefe tele pe mumusu foi e faasoa atu. O le mea moni, o nisi taimi ou te faasoaina atu ai lo’u malamalama o le talalelei i la’u uo i le aoga lea e le talitonu i le Atua.

Ou te iloa o le a sili atu a tatou taumafaiga i le olaga pe a tatou faataitai pea lava pea.

Tifare C., 15, Virginia, ISA

Pe a Ou Tufaina le Faamanatuga

O le taimi muamua lava na ou tufaina ai le faamanatuga o se tiakono, sa ou popole lava mai le amataga e oo i le faaiuga. Sa ou popole ina nei ou savali i le itu sese pe alu foi i le laina sese. Sa ou tulimataia lava le taimi ou te tufaina ai le faamanatuga mai se taimi umi lava e gata mai ai lo’u manatua. Sa ou vaavaai i tiakono i vaiaso taitasi ma ou mafaufau i lo latou foliga mamalu.

O le faamanatuga o se taimi taua lea tatou te mafaufau ai ia Iesu Keriso ma mea e mafai ona tatou suia ma auala e mafai ona tatou lelei atili ai. O se tiakono e mafai ona fesoasoani i isi e mafaufau loloto i le taimi o le faamanatuga e ala i le fai faalelei o lavalava, ia faaaloalo, savali lemu, uuina ma le faaeteete o fata faamanatuga, ma lē tautalatala solo.

Na sao lelei lo’u vaiaso muamua e aunoa ma se mea sese, ma ua ou le toe popole nei. Ae, a ou tufaina le faamanatuga, ou te lagona le faaaloalo ma le fiafia.

E toafa o’u uso laiti, ma ou te taumafai malosi lava e fesoasoani atili ia i latou ae lē o le finau ma i latou. E taua tele le avea ma se faataitaiga lelei. Afai ou te le faia, atonu o le a latou manatu ifo e le taua le perisitua. Ae e taua. Ua suia lava a’u talu ona ou mauaina le perisitua. O se perisitua lelei e tatau ona tausia poloaiga, fai lelei isi tagata, ma ia manatua o i tatou o loo umia le perisitua, i le aoga faapea foi ma Aso Sa.

Hao-Chen W., 15, Taiuani

O Lou Avanoa Lenei

O a outou itulau nei—o lou avanoa e fefaasoaa’i ai ma isi talavou i le taua o le talalelei ia te oe. O mea nei e mafai ona e tulimatai i ai e faitauina i luga o nei itulau ma mea emafai ona faasoa mai:

Aafiaga po o lagona loloto na fesoasoani ia te oe e faaleleia atili ai lou malamalama ma lou ola ai i le talalelei.
O se ata manaia ma manino lelei sa e pueina, ma se mau e tusi i lalo o le ata.
O se aafiaga lelei na e maua a o e galue i lau Tiute i le Atua po o le Alualu i Luma o le Tagata Lava Ia.
O sau faamatalaga e uiga i se mau na musuia ai oe. Ia aofia mai ai ma lou ata pe a e manao ai.
Manatu faaalia e uiga i le Liahona. O a vaega na e fiafia e faitau?

I-meli mai lau tala, ata, po o faamatalaga i le liahona@ldschurch.org. Faamolemole tusi ai le “Our Space” i le laina mo le mataupu, ma ia aofia ai ma le faatagaga a ou matua e lolomi mea o loo e auina mai. E ono faapupuuina tala mo le uumi po o le manino.