Na feiloai atu Elder David A. Bednar o le Korama a Aposetolo e Toasefululua i minisita o le Palemene a Sikotilani mo le lua itula ia Setema e talanoaina ai auala e mafai ai e tagata o le Ekalesia i Sikotilani ona lagolago atu i mataupu ta’uaogaina ma faamamafa atu aoaoga a le Ekalesia i le taua o le aiga. O le fonotaga i le Maota Fono a le Palemene i Holyrood i Edinburgh na aofia ai ni minisita se toalima o le Palemene. Na asiasi atu foi Elder Bednar ma isi taitai o le Ekalesia i Aialani mo nisi o fonotaga a le Ekalesia.

Ua fofogaina mai e le Au Peresitene Sili se suiga i le Au Peresitene o le Eria a le Pasefika e amata atu ia Oketopa 2009. O Elder David S. Baxter o le Fitugafulu, sa avea ma Peresitene o le eria mai ia Aokuso 2008, na faia sona taotoga i se taimi e le’i mamao atu i le Aai o Sate Leki, ma ua toe tofia nei o ia i le laumua o le Ekalesia. O Elder Tad R. Callister o le Fitugafulu o le a avea ma Peresitene o le eria, ma Elder James J. Hamula o le Fesoasoani Muamua ma Elder Brent H. Nielson o le Fesoasoani Lua.

Na faapotopoto le autalavou nofofua a le Au Paia o Aso e Gata Ai mai Uosigitone, D.C., ISA, i le Vanu maotua o Polochic i Kuatemala ia Aokuso 2009 e auauna atu i tagata Q’eqchi’. O le galulue faatasi ai ma se faalapotopotoga e le su’e tupe, sa latou fesoasoani ai e fausia se faleaoga mo se aoga tulagalua ma se faletusi, aoao faamasani ia faiaoga, ma tufatufa atu vaitamini. Sa latou faia foi ni mafutaga faaleaoaoga mo le tumama, meaai paleni, tausia o oloa [nifo], tulaga tautupe a le tagata lava ia, ma aoaoga faafaatoaga mo tagata e 300 o le alalafaga, ma sa amata ai foi ona latou fauina se umukuka a le aoga, potu faasoifua maloloina, ma le suavai mo le alalafaga.