O Le Folafolaga o le Malumalu

Sa ou fanau ma ola ae i le Ekalesia ae sa ou filifili ou te le toaga i le lotu i le 20 o o’u tausaga. Sa ou faaipoipo atu i se alii lelei sa lē toaga foi i lana lotu. Ina ua amata lo ma’ua aiga ma Ioane, lea na iu ina maua ai se fanau e toalima, na amata ona naunau lo’u loto i aoaoga o lo’u talavou. Ou te le i faamalosia Ioane, ae na ia lotomalie matou te tapuai faatasi ma le ma fanau tama e toalua, o Ioane Rowe ma Iosefa. Sa amata ona matou auai i la matou uarota i Aso Sa taitasi. Sa aoaoina Ioane e faifeautalai, ma sa ia talia le talalelei ma papatiso ai i le tolu masina mulimuli ane.

Na avea i matou ma tagata toaaga o la matou uarota, ma faataunuuina valaauga i ausilali eseese. O isi tamaiti e toatolu—Hayley, Tessa, ma Jenna—na oo mai i lo matou aiga, ma na fiafia le toalima i le Peraimeri, Aso o Gaoioiga, ma le Sikauti. I le isi sefulu tausaga, na ma auai ma Ioane i vasega e sauniuni ai mo le malumalu i taimi eseese e tolu, ae ma te lei o lava i le malumalu. Na ma mananao e faamauina lo matou aiga, ae na ma lagona le le’i saunia e ola ai i poloaiga uma. Sa ma toaaga e auai i sauniga lotu ma usiusitai i le tele o poloaiga—ua lava lena lelei, e a? E le gata i lea, e le i iloa lelei lava e la ma fanau le eseesega.

Na vave ona ma iloa e le moni lena tulaga. A o ma tuuina le ma tama matua i lona moega i po taitasi, sa amata ona fesili mai o ia po o afea e o ai lo matou aiga i le malumalu. O lena mea sa tosoina noanoa o o ma fatu.

E tusa o le taimi lava lea na valaaulia ai foi maua ma lo’u toalua e le epikopo i lona ofisa. Sa fia iloa e ia pe aisea ua ma le tautino ai ia avea faamanuiaga o le malumalu o se mea moni mo lo ma aiga. Sa ma faamalamalama atu ma te le i saunia e ola i poloaiga uma o loo manaomia mo le mauaina o pepa faataga ma sa ma lagona ua leva ona ma faia le mea sili ona ma mafaia.

E pei ona faia e epikopo muamua, sa fautuaina i maua e Epikopo Riding e uiga i le taua o nei sauniga ma faamanuiaga faavavau e tatau ona maua e lo ma aiga. Ae peitai na i ai se mea na tupu o le a le mafai ona galo ia te a’u. Sa nofo filemu Epikopo Riding mo ni nai sekone ona fai mai lemu ai lea, “Ua ou lagona le musumusuga e ta’u atu ia te oulua o le taimi lenei e te lua o atu ai i le malumalu. O le a tapunia le faitotoa o avanoa mo lo outou aiga.”

Ma te le i malamalama i le uiga uma o le saunoaga a le epikopo, ae na ma lagonaina i le taimi lava lena le faamaonia mai e le Agaga o le moni o ia mea. Na ma iloaina e le gata o le a faamanuiaina e faavavau i matou e le malumalu ae o le a fesoasoani foi la matou faamauga i la ma fanau a o tuputupu ae i latou ma amata ona faia filifiliga taua mo o latou olaga.

Sa tuua e i maua ma Ioane le ofisa o le epikopo i lena afiafi ma se lagona fou faanatinati. Na ma faatuina ni sini patino ma se aso mautu mo o maua faaeega paia i le malumalu ma le faamauga. Mai le taimi lena na ma taumafai ai ma le loto atoatoa e ola i poloaiga uma—ae le na o vaega ma te fiafia i ai. E le gata i lena, ae sa tuuina atu atoa a maua taumafaiga i taimi uma i le tatalo ma le suesue i tusitusiga paia ma faateleina le finafinau e auauna ai i o ma valaauga. A o ma faia ia osigataulaga, sa ma vaaia le tele o faamanuiaga ua oo mai i o matou olaga.

A i ai se taimi e tauivi ai, sa faamalosiau atu le tasi i le isi. Ou te manatua se tasi po patino ina ua lagona e lo’u toalua sina popolega. Sa faitau e ia se fasifuaitau mai le tusi a Peresitene Boyd K. Packer O Le Malumalu Paia,¹ lea sa ma suesueina faatasi. O upu sa ia faasoa mai sa faalauteleina ai la’u vaai ma faatoafilemuina o’u lagona atuatuvale.

Sa faaauau pea ona faamalosiau mai Epikopo Riding ia i maua, e pei foi ona faia e tagata o le uarota. Sa tuuina mai e se uo ia i maua se kopi o le tusi o Malumalu lea sa ma vaavaai loloto i ai. Sa taliina e faiaoga o la matou vasega sauniuni mo le malumalu a maua fesili ma aapa mai i le agalelei ma le faaaumea, ma sa faaali mai foi e le tele o tagata o le uarota faataitaiga lelei o le agavaa ai mo le malumalu.

A o ma tuuina le ma fanau i o latou moega i po taitasi, sa ma lototetele e fai atu ia te i latou ioe, o le a o lo tatou aiga i le malumalu. A o faasolo ina latalata mai le taimi, sa mafai ona ma tuuina atu ia i latou se aso patino.

I le aso 17 o Aperila, 1998, e tusa o le ono lena o masina talu lena aso na suia ai o ma olaga i le ofisa o le epikopo, sa ma tootutuli ifo ma Ioane i le fatafaitaulaga o le Malumalu i Dallas Texas, faatasi ma le ma fanau e toalima. E toatele ni uo mai le matou uarota sa auai, ma na ala mai i la latou lagolago na ou iloa ai lo latou faanaunautaiga ia matou olioli i faamanuiaga na latou iloa i totonu o o latou lava aiga. E leai se masalosalo, o la matou faamauga ua avea o le taualumaga e tasi e sili ona taua i o matou olaga.

Ia i maua ma lo’u toalua, o aafiaga o la matou faamauga e foliga e matua mautu ma mafai ona pa’i tino i ai. Mo se faataitaiga, sa ma’ua matauina se suiga i le lagona sa i ai i lo matou aiga, aemaise lava i la maua fanau. Sa foliga mai i latou ua sili atu ona usiusitai, ma e ui ina e le atoatoa i latou, ae na latou taumafai i aso uma e faia filifiliga lelei ma mulimuli i poloaiga. Sa faateleina foi le lotogatasi faaleaiga.

E ui ina matua mauoa na faamanuiaga, ae na faapitoa lava le faagaeetia o le tulaga moni lava o faamanuiaga faalemalumalu i le 2007. I le taeao o le aso 21 o Oketopa, sa aafia ai le ma masaga, sa 17 o la tausaga, i se faalavelave tau taavale. Sa manua mitimiti Tesa, ae sa matua tigaina le tulaga o Jenna. Sa auina atu o ia i se falemai o le eria, lea sa taoto ai ua le iloa se mea. Ina ua ma iloa atonu o le a le ola o ia, na toe foi mai le ma fanau matutua e toatolu mai le kolisi. A o matou i ai faatasi i le potu o Jenna i le falemai, sa matua faamafanafanaina lo matou aiga i sauniga o le a mafai ai ona matou toe faatasi pe a mavae le oti. Sa tele le taimi na matou talatalanoa ai e uiga i le natura faavavau o aiga—o lo matou aiga. I le vaiaso ina ua mavae le faalavelave, na uma ai le ola o Jenna.

Ua matua sili atu ona taua ia i matou a matou feagaiga i le malumalu talu mai lona oti. Ua matou matua misia tele Jenna ma ua tulimatai atu i le aso e mafai ai ona matou toe faatasi, ae o lo matou faatuatua i le ata o le faaolataga ma la matou molimau o aiga e faavavau o loo faamalosia i matou. O loo faaalia i lo matou fale se ata o lo matou aiga i le malumalu, e faamanatu mai ai ia i matou lo matou aafiaga ma folafolaga ua matou iloa e mafai ona avea mo i matou.

Ua matou faafetai tele mo taitai perisitua faamaoni o e ma fautuaina i maua, ae maise lava mo le epikopo lelei o le na mulimuli i se musumusuga na taitaia ai lo matou aiga i faamanuiaga e faavavau. Matou te faafetai mo uo ma tagata o le uarota o e na faamalosiauina i maua i le ala ma e na faaalia mai faataitaiga lelei mo i maua e mulimuli ai. Ae silisili lava, ma te faafetai i se Tama Faalelagi alofa, o Le na mafai ai e “sootaga faaleaiga ona tumau pea i talaatu o le tuugamau” e ala i le meaalofa o Lona Alo ma ala i sauniga o le malumalu.²