Filifili e savali i le Usiusitai.

Otagata ola uma ua i ai le filifiliga saoloto a i latou lava; ma e tusa ai ma a latou lava filifiliga o le a faaolaina pe faasalaina foi i latou (DBY, 62).

Pe mafai ea e tagata ona malamalama, e mafai ona oo mai mataupu faavae le tonu i o latou luma, po ua le aoga lenei tulaga faataitai, ma ua leai se avanoa e faaaoga ai le filifiliga saoloto ua tuuina mai ia i tatou? Pe mafai ea ona latou malamalama e le mafai ona tatou maua le ola e faavavau sei vagana ua tatou matua iloa ma malamalama i mea tatou te oo i ai, i mataupu faavae o le lelei ma mataupu faavae o le leaga, le malamalama ma le pouliuli, upumoni, mama, ma le paia. —e faapena ma le amioleaga, agasala, ma faiga piopio? (DBY, 66).

E mafai e le tagata ona fai ma pulea ana ia lava gaioiga, ae le pulea e ia faaiuga (DBY, 63).

E leai se tasi i luga o le fogaeleele ua leai ia te ia lava le agavaa e faasaoina pe faaleagaina ai ia lava; ma e faapena foi i atunuu (DBY, 67).

E iai le mutaaga o filifiliga saoloto, ma mea uma ma tagata uma, ma o la tatou filifiliga saoloto e le tatau ona taofia ai lena tulafono. E ao i le tagata ona filifili i le ola poo le oti [vaai Helamana 14:31], ae afai ua ia filifili i le oti o le a iai le mutaaga, ma o le filifiliga saoloto ua tuuina atu ia te ia, ua noanoatia, ua le mafai ai ona ia faaaogaina e faasagatau atu i le tulafono, e aunoa ma le tuuina o ia lava e faasaoina ma faasalaina e le ona le mana uma lava.

E mafai e le tagata ona aveesea lana filifiliga saoloto poo lona tofi, e faapei o Esau o anamua, ae pe a aveeseina, e le mafai ona toe maua e ia; o le ala lea, e ao ai ia i tatou ona faaeteete, ae aua le aveeseina lena filifiliga saoloto ua tuuina mai ia i tatou. O le eseesega o le tagata amiotonu ma le agasala, ola e faavavau poo le oti, fiafia poo le faanoanoa, o lenei, ia i latou ua faaeaina e leai se noataga poo se mutaaga i o latou avanoa, o le a faaauau pea o latou faamanuiaga, ma o latou malo, nofoalii, itumalo, pulega ma le mana e leai se iuga, ae faateleina i le faavavau; ae o i latou ua teena le folafolaga, ua le talia le alofa mutimutivale o le Alii na ofoina atu, ma saunia ai i latou e tulieseina mai lona afioaga, ma avea ma uo a le tiapolo, e faaitiitia ai loa lava o latou filifiliga saoloto, ma i ai loa noataga ma mutaaga o a latou faiga (DBY, 63–64).

E le faamalosia e le Alii se tasi na te talia le Talalelei, ma ou te le manatu o le a na faamalosia i latou e ola ai pe a uma ona latou taliaina (DBY, 64).

Ua ia tuuina atu ia i latou le avanoa e filifili ai mo i latou lava, poo le lelei poo le leaga; ae o le iuga o a tatou filifiliga o loo i ai pea lea i ona aao (DBY, 62).

O tulafono e faavavau o loo soifua ai o ia ma isi i le faavavau o le Atua, ma o le maliliega o tagata e ao ona maua ao le i pulea i le atoatoa e Le na foafoaina.

Ou te le faamalosia se alii poo se tamaitai i le lagi. O le toatele ua manatu o le a mafai ona latou faamalosia tagata i le lagi, ae le mafai ona fai lenei mea, aua o le poto o loo ia te i tatou e tutoatasi e faapei o le Atua. E le tatau ona faamalosia tagata, ma tuuina i se nofoaga vaapiapi agaga o le fanau a tagata ua faamalosia atu i le lagi e ala lea i le laugaina malosi o le matautia o le faasalaga e faavavau, e pei o le afi o seoli (DBY, 64).

E mafai ona e iloa pe ua taitaiina oe i le sao poo le sese, e faapea foi ona e iloa lelei le ala i le aiga; aua o mataupu faavae uma ua faaalia mai e le Atua o loo i ai ona talitonuga maumaututu o lona moni i le mafaufau o le tagata, ma e leai se valaauga a le Atua i le tagata i le fogaeleele ua le aumaia ai se faamaoniga o le mea moni (DBY, 65).

E tatau ea ona aveesea mai le tagata lana aia tatau ona ua ia filifili i lona loto e faia le finagalo o le Atua? E ao ea i le tagata ona fai upu mataga ina ia faaali atu ai o loo i ai lana filifiliga saoloto? Ou te tautino atu e le tatau ona faia lena mea, e oo lava i le gaoi poo le fai o se mea sese. Ou te molimau i le lagi ma e o nonofo i le lalolagi ua ou fanau saoloto, ma o loo i ai lou saolotoga i luma o le Atua, agelu ma tagata, pe a ou tootuli e tatalo, e pei foi pe a faapea o le a ou alu atu ma fai upu mataga. O loo i ai lau aia tatau e valaau faatasi ai lou aiga i le taimi e tatau ai mo le tatalo, ma e ou te talitonu o le auala lea e faamaonia ai o loo i ai lau aia tatau e filifili ai, e faapea foi pe a faapea ou te gaoi, fai upu mataga, pepelo, ma ona (DBY,65).

Pe a tuuina atu lena usiusitai, po ua pologa ai ea i tatou? Leai, ua na o le pau lea o le auala i luga o le fogaeleele tatou te saoloto ai… . O le faapea atu ou te le fiafia i le faia o lou lava loto e faapei foi ona ou tatalo poo lou faia o upu mataga, o se mataupu faavae sese… . O le tagata ua tuuina atu le usiusitai atoatoa i tulafono o le Lagi, ua galue o ia i le filifiliga saoloto o lona loto ma faaalia lona saolotoga e faapei foi ona pologa o ia i le ita… . Pau lava le mea o loo manaomia e le Alii mai ia i tatou, o le usiusitai ma le atoatoa i tulafono o le olaga. O le taulaga o loo manaomia e le Alii mai ia i tatou o le usiusitai atoatoa ia tatou lava feagaiga ua uma ona tatou osia ma le Atua, o le auauna atu ia te ia ma le loto atoa (DBY, 225).

O le usiusitai o se tasi lea o mataupu faavae sili ona faigofie, e faaaoga i aso uma i o tatou olaga ua outou manatua ma iloa (DBY, 220).

Amuia i latou o loo usiusitai pe a tuuina sao atu e le Alii se tulafono, ae sili ona faaamuia ia i latou ua usiusitai e aunoa ma se tulafono tuu sao atu (DBY, 220).

Afai tatou te faalogo i fautuaga, o le a avea i tatou ma tagata sili i le lalolagi; o le a avea i tatou ma malamalama ua tuu i luga o le mauga, e le mafai ona lilo, poo le lamepa i luga o le tuugalamepa (DBY, 219).

Afai tou te mananao tou te maua ma fiafia i le agalelei o lo tatou Tama oi le lagi, ia fai lona finagalo (DBY, 223).

Afai ua tutumu o tatou loto i le Agaga o le upumoni, i le Agaga o le Alii, poo a lava upu moni mai le lagi, pe a fetalai le Atua, e ao i e gauai ia te ia ona valaau leotele, “Aleluia! Ia viia le Atua! Ua matou saunia e talia nei upu, aua e moni lava” (DBY, 219).

Ou te fiafia e vaai i uso o le Ekalesia, pe a latou lagona le upumoni ua sasaa atu i o latou luga, ua saunia latou te talia nei upu aua ua talafeagai lelei ma o latou lagona ma agaga uma, “O nei upu o le Agaga ia o loo i totonu ia te au; o lou fiafia, o au taumafa, ma vai; o vaitafe o le ola e faavavau. Ua talafeagai lelei i latou, e aunoa ma se feteenai ma ou lagona” (DBY, 219).

Afai e te malolo ma faapea ane, e leai sau fautuaga mo oe, e leai sau tali mo oe i le mataupu nei, aua ua le ia te au se faaaliga o le Agaga, ma fiafia e faailoa i tagata uma o le lalolagi ua e valea, o le a e maua vave le poto nai lo le tuuina atu o se fautuaga e faalagolago i lau lava faaiuga, e aunoa ma le faaaliga o le Agaga (DBY, 219).

E mafai e tagata uma o le malo o le Atua ona latou tuuina mai le fautuaga e tasi i mataupu taitasi, pe afai latou te faatali seia maua le finagalo o Keriso e uiga i nei mataupu. Ona maua ai lea e tagata uma le upu ma le manatu e tasi, ona mafai ai lea e tagata uma ona malilie atoatoa (DBY, 219).

O nei tagata uma e ao ina tasi le loto ma le manatu. E ao ona latou iloa le finagalo o le Atua ma faia loa, aua o le iloa o le finagalo o le Atua o le tasi mea, ae o le aumaia o o tatou loto, o o tatou lagona, ina ia talafeagai ma lo tatou iloa i le finagalo o le Atua o le isi lea mea (DBY, 221).

O tagata o le Au Paia e gauai atu i le finagalo o le Alii, ua tuuina atu ia i latou e faatatau i o latou tulaga faalemalo, ma manatu e uiga i tagata ma mea tau tupe, ou te faapea atu, ma faapea atu ma le mautinoa, ua ia i latou le poto ua sili atu nai lo le poto o le fanau o le pogisa poo le fanau a le lalolagi. Ou te iloa lenei mea e ala i faaaliga a le Alii o Iesu Keriso, ma taunuuga o au lava galuega. O i latou ua gauai i fautuaga ua tuuina atu ia i latou i mea faaletino, ua mautinoa le faaleleia o o latou tulaga i le faaletino ma le faaleagaga (DBY, 219–20).

O i latou uma ua maua le ola e faavavau ma le faaolataga o le a latou le maua i se isi lava auala nai lo le talitonu i le Alo o le Atua ma usiusitai i mataupu faavae ua ia faataatia. E mafai ona tatou faia se isi auala ma ata o le faaolataga? Tatou te le mafai (DBY, 223–24).

O le ala sili ona aoga i le faatuina o le talitonuga o le lagi o le ola ai, ae le o le oti ai: Ou te manatu e le afaina le mea o le a ou tau atu e faapea e toatele le Au Paia ua sili atu lo latou manatu e oti mo lo latou talitonuga nai lo le ola ai ma le faamaoni. E leai lava se isi faamaoniga e faaali atu ai i le Atua, agelu, ma tagata, o loo ola ai tagata i lo latou faatuatuaga, nai lo le latou salamo ma le faamaoni mai a latou agasala, usiusitai i le tulafono o le papatisoga mo le faamagaloina o agasala, ma faaauau ona faataunuuina galuega ma le amiotonu mai lea aso i lea aso (DBY, 221).

E te manatu e usiusitai tagata i le upumoni ona e moni, sei vagana ua latou alofa moni i ai? Leai, e le mafai ona latou fai. E usitaia le upumoni pe a alofa i ai. O le usiusitai atoatoa i le upumoni ua lava lena e mafai ai e tagata ona ola i le afioaga o le Silisiliese (DBY, 220).

E i ai se isi tomai faapitoa e faausiusitai ai nei tagata? Ua na o le tasi lava. Afai o outou, Toeaina o Isaraelu, e mafai ona maua le tomai o le aoao atu o le Agaga Paia i totonu o loto o tagata, o le a outou maua ni tagata usiusitai. Ua na o le pau lea o le tomai e manaomia. Aoao atu tagata i le upumoni, aoao ia i latou mataupu faavae moni, faaali atu ia i latou le mea e sili ona lelei mo i latou ma, faamata e te le manatu o le a latou mulimuli i lena ala? O le a latou mulimuli ai (DBY, 226).

O le Au Paia e ola i lo latou talitonuga o le a faaolaina, aua o le a latou le faafitia soo se faaaliga ua tuuina mai poo le a tuuina mai e le Alii, aua, afai o le a oo mai se mataupu faavae ia i latou ua le mafai ona latou malamalama atoatoa i ai, o le a mafai ona latou faapea mai, “Ua auina mai e le Alii lenei mataupu ia te au, ma ou te tatalo o le a ia puipui ma faasao ia te au mai le faafitia o soo se mea e tuuina mai ia te ia, ma aumaia ia te au le onosai e faatali ai seia ou malamalama i ai (DBY, 224).

O nei tagata o le a latou le faafitia, ma o le a latou avea nei mataupu ua latou le malamalama ai, e faatalitali seia oo ina ia matala le vaai a o latou mafaufau. O le auala lenei ua ou tumafai e ui ai, afai e i ai se mea e oo mai ou te le malamalama ai, ou te tatalo seia oo ina ou malamalama ai (DBY, 224).

Aua nei faafitia se mea ona o le fou pe le masani ai, ma aua le ataata pe taufaifai i mea o loo tuuina mai i le Alii, aua afai tatou te faia lea mea, ua tatou faalavelave i lo tatou faaolataga (DBY, 224).

Ou te talitonu e faigata tele i tagata, o se aiga poo tagata taitoatasi, le taumafai e maua le upumoni i le tasi itu, ma le sese i le isi itu, o le tautino e savali i le usiusitai i poloaiga a le Atua, ma, i lena lava foi taimi, ua tuu faatasi le loto i galuega ma le agasala (DBY, 223).

Ua tuuina mai e le Alii ana tulafono, poloaiga, ma sauniga i fanau a tagata, ma manaomia i latou ina ia usiusitai i ai ma le atoatoa, ma e tatou te le mananao ina ia soli na poloaiga, ae ia usiusitai i ai. Tatou te le mananao ina ia suia ana sauniga, ae ia usiusitai i ai; tatou te le mananao ina ia solia le sauniga e faavavau, ae ia usiusitai i ai faatasi ma o tatou tama, ma Iesu, ma lo tatou Tama o i le Lagi, ma agelu mamalu, ma ola ai e tusa ai ma ia tulafono (DBY, 220).

E faapefea ona tatou iloa ua tatou usiusitai ia te Ia? E tasi lava le auala e mafai ai ona tatou iloa, ma o le musumusuga a le Agaga o le Alii ua molimau mai i o tatou agaga o i tatou o ana fanau, tatou te alolofa ia te ia, ma e alofa o ia ia te i tatou. O le agaga o faaaliga o le a tatou iloa ai. E leai se faamaoniga i totonu ia i tatou lava, e aunoa ma le agaga o faaaliga. E leai so tatou faamaoniga i fafo atu, ua na o le usiusitai i sauniga (DBY, 224).

Soo se mea lava e le mama e ao ona faaumatiaina loa lava; e le afaina poo le faatuatua ma galuega a tagata taitasi, taulaga, atunuu, poo le malo. O le malo, tupu, malosi poo le tagata ua le pulea e mataupu faavae e mama ma paia o le a mulimuli ane ona mou lea ma faaumatiaina (DBY, 227).

A oo mai ia te au le faaolataga, e mafai ona ou teena pe talia. I le taliaina, ou te tuuina atu le usiusitai ma le gauai i le Pule silisili i lou olaga, ma i latou ua ia filifilia e aoaoina au; a ou teena, o le a ou mulimuli i le taitaiga o lou lava loto e sili atu i le finagalo o Le Foafoa ia te au (DBY, 390).

Ua tuuina e le Atua i totonu o i tatou uma se loto, ma e ao ona tatou fiafia e pulea lea loto e le finagalo o le Silisiliese (DBY, 264).

O i tatou o tagata, o le a aoaoina sei vagana ua tatou gauai atu ma le atoatoa i le Alii ma avea ma tagata moni o le Au Paia (DBY, 226).

Ou te iloa e faigata ona maua le aoaiga, aua e leai se aoaiga e faigofie, ae faigata i taimi e faia ai [vaai Eperu 12:11]; ae afai e maua e le tagata le aoaiga ma tatalo i le Agaga Paia e oo mai i ona luga, ina ia maua e ia le Agaga o le upumoni i lona loto, ma tumau ai i le mea e fiafia i ai le Alii, o le a foaiina mai e le Alii lona alofa tunoa e fesoasoani i le aoaiga, ma o le a ia gauai atu ma talia ma le iloa e mo lona lava lelei (DBY, 227).

• Aisea e “matua taua ai le i ai o mataupu faafeagai e tuuina i luma” o fanau a le Atua ma le tatau o le i ai o le “filifiliga saoloto ia i latou lava”?

• Na aoao mai Peresitene Iaga o le “tagata na te faia ma pulea ana lava gaioiga, ae leai sana pule i o latou taunuuga.” (Vaai le MFF 101:78.) O a ni auala ua taumafai ai nisi o tagata e maua le saolotoga e filifili ai ao taumafai e alo ese mai le taunuuga o a latou filifiliga?

• E faapefea ona taumafai Peresitene Iaga e faamatala le “eseeega o le amiotonu ma le agasala”? E faapefea ona tatou faamuta pe faaauau la tatou filifiliga saoloto? Na aoao mai Peresitene Iaga o le ua “faaolaina” e “leai ni tuaoi poo mutaaga i o latou faamanuiaga” E faapefea e le usiusitai atoatoa ona faateleina lo tatou saolotoga?

• Aisea e le “faamalosia ai e le Atua se tagata na te tausi i le Talalelei … [poo le] ola ai ina ua uma ona tausi i ai”? {vaai le MFF 88:22–25, 32.)

• Aisea ua faamamafa ai e Peresitene Iaga faapea, o le usiusitai o se faataitaiga o le filifiliga saoloto e pei lava foi o le faalogogata? Aisea ua avea ai le “usiusitai atoatoa … ma ala e tasi i luga o le fogaeleele mo oe ma au e saoloto ai”? (vaai Mosaea 2:22–24.)

• Aisea ua avea ai le usiusitai “o se tasi o mataupu faavae sili ona faigofie, ma faaaoga i aso uma”? Aisea ua mafai ai e le usiusitai ona tatou “maua ma fiafia i le agalelei o lo tatou Tama oi le lagi”?

• O le a le uiga o le avea o le “agaga ma le manatu e tasi”? E faapefea ona fesoasoani le usiusitai ia i tatou e faataunuu ai lenei mea?

• E tusa ai ma le saunoaga a Peresitene Iaga, o le a lo tatou tiute pe a tatou le malamalama i se mataupu faavae poo se faaaliga? (Vaai Failauga 12:13; Ioane 7:17; Eteru 12:6; MFF 11:20.)

• E mafai faapefea ona tatou iloa ua tatou usiusitai i le finagalo o le Atua, ma e faapefea ona tatou aoao le usiusitai?

• E fesoasoani faapefea le naunautai e tuuina atu o tatou loto i le finagalo o le Silisiliese, tatou te faapei atili ai o le Faaola? O le a le uiga o le “gauai ma le atoatoa o i tatou i le Alii”?

• O le aoai atu, o le faasa’o ma le faamamaina lea. Aisea e masani ai ona faigata ona talia le aoaiga? (Vaai Eperu 12:11.) O le a le aoaoga a Peresitene Iaga e faatatau i lo tatou talia o aoaiga? “O le a le taunuuga o le aoaiga?