Salamo ma le Papatisoga

Ole agasala, o le faia o mea sese pe a tatou iloa ma e mafai ona faia le mea sili, ma o le a faasalaina i se faasalaga tatau, i le aso tatau a le Alii (DBY, 156).

E ui ina tatou faia le mea sili tatou te iloa i le taimi nei, e le mafai ea ona i ai se alualu i luma i o tatou olaga? E mafai. Afai tatou te sese ona o le valea, afai tatou te aoao ua sese, o lo tatou tiute le aloese mai lena sese i le taimi nei lava ma le faavavau (DBY, 156).

Afai ua ou faamanualia se tasi, e ao ona ou tau atu i lena tagata ma faaleleia le mea sese ua ou faia (DBY, 158).

Ou te talitonu i lou sau i luma ma le faamaoni i se mea e ao ona faailoa faalauaitele, ma tuu ia te oe lava mea e ao ona tuu… . Tau atu i tagata mea e tatau mo tagata. Afai ua e agasala i tagata, tautau atu ia i latou. Afai ua e agasala i se aiga poo se tuaoi, alu atu ia i latou ma tautau atu… . Afai ua e agasala i se tagata e toatasi, ia ave lena tagata tau lava o oulua ma tautau atu ia te ia (DBY, 158).

Afai e salamo ma le loto faamaoni tagata, ma faailoa atu i le lagi e faamaoni lo latou salamo e ala i le usiusitai i tuutuuga ua uma ona faailoa atu ia i latou e ala i tulafono o le Talalelei, o le a agavaa i latou mo le mauaina o le faaolataga, ma e leai se malosi e mafai ona taofia le agaga lelei mai ia i latou (DBY, 156).

O nisi o a tatou tu anamua ua aoao mai ai ia i tatou, o se tagata nofosala ona o amioga fasioti tagata e ao ona salamo ina ia faaolaina pe a i ai i luga o le tulaga e faaoo ai le oti; ma i le taimi o lona faasalaga e faalogo ai i se faamatalaga, “Faamanuia le Atua! Ua alu o ia i le lagi, e faapaleina i le mamalu, e ala i le galuega faaola a Keriso le Alii” O mea sese uma nei mea. O lenei tagata ua le vaai o ia i le lagi. O nisi ua tatalo, “Ou te faamoemoe ou te oti ma ulufale atu i le isi olaga i le po o lou faaliliuga!” E faamaonia ai manatu sese ma le fiasili o loo faia e le lalolagi Kerisiano (DBY, 157).

O i tatou o tagata o le Au Paia, e talitonu i le papatisoga o le faatofuina mo le faamagaloina o agasala, e tusa ai ma le molimau a le au soo ma faaaliga a le Alii ua tuuina mai i aso e gata ai. O tamaiti laiti e mama, e leai se faanoanoa o le loto poo le agasala e salamo ma lafoai ai, ma o le ala lea e le tatau ai ona papatisoina mo le faamagaloina o agasala. Afai ua tatou agasala, e ao ona tatou iloa le lelei mai le leaga; o le tamaitiiti na te le iloa lenei mea, e le mafai ona ia iloa; e le i iloa e ia le manatu e filifili ai le lelei ma le leaga; ua le o iai se poto na te faalogo ai i matua poo faiaoga poo le ositaulaga pe a latou tau atu le mea sao poo le mea sese poo se mea e lavea ai; sei vagana ua malamalama nei mea e le mafai ona tuuina atu le matafaioi ma e le mafai ona papatisoina mo le faamagalaoina o agasala [vaai Moronae 8] DBY, 158–59).

E leai se sauniga ua tuuina mai e le Atua i lona lava siufofoga, e ala mai i lona Alo o Iesu Keriso, poo fofoga o se isi o ana Perofeta, Aposetolo poo Peteriaka, ua le aoga. O sauniga uma, o poloaiga uma ma tuutuuga e taua mo le togiola o le aiga o tagata (DBY, 152).

Afai ua e amiotonu mai le taimi na e fanau mai ai, ma e lei faia lava se agasala ma se solitulafono, ia papatisoina ina ia faaatoatoaina ai le amiotonu uma, e faapei o Iesu. Afai ua e faapea mai ua leai sau agasala e salamo ai, faagalo i ou manatu sese, ae alofa ma auauna atu i le Atua ma le agaga e lå faaluafesasi (DBY, 159).

O tagata uma o le Au Paia ua latou maua le feagaiga fou e faavavau ina ua auai i lenei Ekalesia. Ua latou osia feagaiga e faamuta le lagolagoina, faatumauina ma le faafiafiaina o le malo o le Tiapolo ma le malo o le lalolagi. Ua latou maua le feagaiga fou e faavavau e lagolagoina le Malo o le Atua ae le o se isi malo. Ua latou faia se tautinoga sili ona mamalu, i luma o le lagi ma le lalolagi, ma o lena foi, e faalagolago iai lo latou faaolataga, o le a latou lagolagoina le upumoni ma le amiotonu ae le o le amioleaga ma le amioletonu, ma fausia le malo o le Atua, ae le o le malo o le lalolagi (DBY, 160).

Ae peitai o le tele o mea ua tatou tuuina atu e o faatasi ma le Atua ma lana galuega e le mafai ona agavaa i tatou i faamanuiaga o lona malo sei vagana ua avea i tatou ma ona tagatanuu. E faapefea ona tatou faia lea mea? E ala i le salamo i a tatou agasala, ma usitaia tuutuuga o le Talalelei o le Alo o le Atua ua tuuina mai ia i tatou. E faitau selau ma faitau afe tagata ua talitonu i le Alii o Iesu Keriso ma salamo ia latou agasala, ma ua maua le Agaga Paia e molimau ia i latou o le Atua o le alofa, latou te alolofa ia te ia ma e alofa o ia ia i latou, ae le o i ai i latou i lona malo. Ua le agavaa i latou i tuutuuga e tatau ai, ua le ui mai i latou i le faitotoa (DBY, 152–53).

Ua le ia te oe le mana e te papatiso ai ia te oe lava, pe ia te oe foi le mana e toe faatuina ai lava oe; e le mafai ona e papatisoina i la le tulafono se tasi tagata mo le faamagaloina o agasala sei vagana ua papatisoina muamua oe e se tasi ma faauuina oe i le pule (DBY, 160).

O iai ea i le vai lava ia se tulaga mama e faamama ese ai le agasala? O le mea moni e leai; ae ua fetalai mai le Alii, “Afai e salamo le tagata agasala i ana agasala, ma alu ifo i le vai o le papatisoga, e faatofuina ai e faatatau i le foliga o le oti, ma toe faatuina mai le vai, e faatusa o le fanau mai—afai e faamaoni lona loto ua ia faia ai lenei mea, o le a faamamaina ese ana agasala.” [vaai MFF 128:12–13] E mafai e le vai lava ia ona faamama ese agasala? Leai; ae o le usitaia o poloaiga a le Atua o le a faamamaina ai pisipisia o le agasala (DBY, 159).

• Sa faapefea ona faamatala e Peresitene Iaga le agasala (vaai Iakopo 4:17.)

• O le a le aoaoga a Peresitene Iaga e uiga i o tatou tiute ao faateleina lo tatou malamalama i le sao ma le sese? (Vaai 2 Nifae 9:25–27.)

• O le a la tatou amio e tatau ai e faaalualu ai i luma o tatou olaga? (Vaai Alema 34:33.) O le a le mea o loo aoao mai e lenei mea e uiga i le malamalama, o mea tatou te tali atu ai, ma tiutetauave?

• O le a le iuga o le salamo moni? Aisea e avea ai le usiusitai i tulafono o le talalelei o se vaega taua o le salamo?

• O le a le aoaoga a Peresitene Iaga e faatatau i le salamo ina ua latalata ona oti?

• O le a le vaega e fai e le papatisoga i le o mai ia Keriso? (Vaai Moronae 8:25–26.)

• O le a le aoaoga a Peresitene Iaga poo ai e tatau pe le tatau ona papatisoina? Aisea e le talafeagai ai le papatisoina o i latou i le taimi e le tatau ai? (Vaai Moronae 8:9–14.) O le a le saunoaga a Peresitene Iaga e uiga i tagata ua tatau ona papatiso ae fai mai e leai ni a latou agasala?

• Ua aoao mai Peresitene Iaga o sauniga uma o le talalelei, e aofia ai ma le papatisoga, e aoga mo lo tatou faaolataga. E faapefea ona faamanuiaina lou olaga e sauniga o le talalelei?

• Sa aoao mai Peresitene Iaga o “tagata uma o le Au Paia ua faia se feagaiga fou e faavavau ina ia avea i latou ma uso o le Ekalesia.” Ina ua papatisoina i tatou, o a feagaiga ua tatou osia? O a mea ua tatou osi feagaiga o le a taofia mai le faia? (Vaai Mosaea 18:8–10.)

• Aisea ua le lava ai le na o le talitonu i le Alii o Iesu Keriso ma le alofa ia te Ia e ulufale atu ai i le faitotoa o Lona malo?

• Aisea e ao ai i se tasi ona “faauuina … i lenei pule” e papatiso ai?

• E tusa ai ma le saunoaga a Peresitene Iaga, o le a le taua ma le faatusa o le papatisoga? (Vaai Roma 6:3–6, 11; Mose 6:58–60; 1 Ioane 5:7–8.) Sa faamatala e Peresitene Iaga “o le na o le vai, [e le mafai] ona faamama ese ai agasala.” O le a le mea e faamamaina i tatou mai agasala?