Fiafia ma Fiafiaga Lautele

Ole a se faamoemoega autu o loo tulimatai e tagata soifua? O le fiafia. Afai e te aumaia ia te au le mamalu, afai e te aumaia ia te au le mana, afai e te aumaia ia te au le tamaoaiga, afai e te aumaia ia te au se igoa lelei, afai e te aumaia ia te au se faatosinaga mai ou uso a tagata, afai e te aumaia uma ia te au nei mea, ae le o lona taunuuga o le ala o le fiafia; e fuafua uma lava pe na faapefea ona mauaina nei mea (DBY, 235).

O loo tatou saili uma lava mo le fiafia; o loo tatou faamoemoe atu i ai, tatou te manatu o loo tatou ola ina ia mauaina, o lo tatou faamoemoega lena i lenei olaga. Ae po o tatou ola ea ina ia tatou olioli ai i fiafiaga o loo tatou matuai faananau i ai? (DBY, 236).

O fea o i ai le fiafia, le fiafia moni? E le o i se isi mea, ae o loo i le Atua. O le mauaina o le agaga o lo tatou talitonuga, ua tatou fiafia ai i le taeao, ua tatou fiafia ai i le aoauli, ua tatou fiafia ai i le afiafi; aua o le agaga o le alofa ma le lotogatasi o loo i ai tatou, ma tatou te olioli ai i le agaga aua, o le agaga ia o le Atua, ma tatou te olioli i le Atua, aua na te foai mai mea lelei uma. Soo se Au Paia lava o aso e Gata Ai, ua iloaina le alofa o le Atua i lona loto, ina ua mavae le mauaina o le faamagaloina o ana agasala, e ala i le papatisoga, ma le faaee atu o lima, na te iloaina ua faatumulia o ia i le olioli, ma le fiafia, ma le faamafanafanaina. Atonu e mafai ona oo i ai tiga, oo i ai le sese, o le mativa, po o le falepuipui foi, pe afai ua matuai le tagolima lava, ae, o loo tumau pea lona olioli. O le mea lea ua matou maitauina, ma e mafai e soo se tasi o le Au Paia o Aso e Gata Ai ona molimauina lena mea (DBY, 236).

O le a so outou lagona, o le Au Paia, pe a faatumulia outou i le mana ma le alofa o le Atua? E pei lava lo outou fiafia o le fiafia e mafai e outou tino ona tauaveina (MSS, 15:48).

O le lalolagi atoa o loo tulimatai atu i le fiafia. E le maua i auro ma siliva, ae o loo i le filemu ma le alofa (DBY, 235).

O le a se mea na te tuuina atu i le tagata le olioli? O le mea lena na te maua ai le filemu (DBY, 235).

Afai e fiafia le loto, o le a faatumulia le tagata i le olioli ma le malamalama; e leai se faanoanoa (DBY, 235).

Afai e sogasoga ma amiotonu le tagata, ona fiafia lea o ia (DBY, 235).

O se manatu sese lava i tagata o loo i le lalolagi le faapea ane e le o se mea sili mo i latou le gauai atu ma usiusitai i poloaiga a le lagi, ona o le fefefe ina nei taofia ai i latou mai mea o loo latou faananau i ai ma mea o loo latou fiafia i ai; aua e leai lava se filemu moni, e leai se fiafia moni i soo se mea lava i le lagi po o i le lalolagi, sei vagana ai ua na o i latou o loo auauna atu i le Alii. O lana galuega e i ai le olioli, e i ai le fiafia, ae le mafai ona maua i se isi lava mea. E i ai le filemu ma le mafanafana, ae a faatumulia le agaga i le olioli ma le mamalu, ma ua atoatoa ona faamalieina i nei mea uma, ona i ai lea i le tagata na o se manatu laitiiti e uiga i mea o loo teuina mo i latou uma e faamaoni (DNW, 15 July 1857, 4).

Ua faia i tatou ina ia tatou fiafia i mea uma e fiafia i ai le Atua, ia maua mea uma na te maua, ia umia le mana uma o loo ia umiaina, o tulaga maualuluga uma ua ia saunia—o mea uma lava mai ia te ia e tuuina atu i ana fanau faamaoni, ina ia latou olioli ai i mea uma ua ia te ia; o nei fuafuaga uma ina ia aumaia ai le filemu i le loto o loo tatala mo le malamalama (DBY, 237).

E na o le tasi lava le auala mo le Au Paia o Aso e Gata Ai ina ia fiafia ai, o se mea faigofie lava o le ola ai lea i lo latou talitonuga, i se isi faaupuga ia talitonu i le Talalelei a Iesu Keriso i ona vaega uma, ia usiusitai i le talalelei o le saolotoga ma le loto atoa, lea e faasaolotoina ai i tatou. Afai o le a tatou faia, o se nuu, ia usitai i tulafono a le Atua, ma galulue e tusa ai ma sauniga o le faaolataga, ona mafai lea ona tatou faamoemoeina le fiafia o loo tatou matuai naunau i ai (DBY, 236).

E pei ona ou mafaufau ai pea lava pea, ma faapea ane, a manaomia e lo’u tiute lo’u sau mai le fale o o’u fiafia ma ou toe foi atu ma le fiafia, aua o lo’u fiafiaga ma le faamafanafanaga sili lea o le faia lea o mea o loo manaomia mai e le Alii mai ia te au ma lo’u iloaina po o le a lo’u tiute, e leai se afaina po o le a le mea o loo manaomia mai e le Alii mai ia te au. O lenei galuega e maua mai ai le olioli ma le filemu (DN, 6 Feb. 1856, 4).

E moni lava, o se alii po o se tamaitai, po o ni tagata foi e fiafia, o i latou ia ua latou talia fiafia avanoa o le Talalelei a le Alo o le Atua, ma ua latou iloa pe faapefea ona talisapaia ana faamanuiaga (DBY, 236).

Matou te mananao e vaai i foliga uma o faatumulia i le fiafia, ma mata uma ua susulu i le faamoemoe mo le fiafia i le lumanai (DBY, 236).

Ou te faapea atu, afai tou te mananao ina ia outou mauaina le fiafiaga sili, ia avea ma Au Paia o Aso e Gata Ai, ona ola lea i aoaoga a Iesu Keriso (DNSW, 30 June 1874, 1).

O le tagata e na te fiafia i mea ua ia iloaina i le malamalama o le Malo o le Atua i le lalolagi, ma o le taimi foi lea e tasi ua ia maua ai le alofa o le Atua ia te ia, o le tagata sili lea ona fiafia i tagata uma o loo i le lalolagi (DBY, 235).

Tatou te aoao ina ia tatou iloa pe faapefea ona tatou fiafia ai i mea o le olaga—pe faapefea ona tatou agavaa i lo latou tulaga faaletino iinei. E leai se fiafiaga, leai se faamafanafanaga, leai se faamalieloto, leai se mea e mafai e le loto o le tagata ona manatunatu i ai, faatasi ai ma le agaga atoa o faaaliga e mafai ona tatou maua, nai lo le taumafai e faamanaia, ia fiafia, ia faamalieina ma le filemu, ma ia faaeaina lagona faaletino, ae o mea uma ua teuina e le Alii mo lana fanau. Na te lei teenaina lava lo latou faia o mea latou te loto i ai. Na te lei faaalia mai lava ni aoaoga, ou te lei malamalama i ai, sei vagana ai lava i lona natura ua ia fuafuaina ai ina ia faatumulia i le filemu ma le mamalu, ma siitia ae ai i luga lagona uma taitasi o le loto mai lagona maualalo, faanoanoa, le mautonu, sese ma le pepelo. E finagalo le Alii ina ia tatou ola ina ia mafai ona tatou olioli i le atoatoaga o le mamalu lena e tau i le mamalu selesitila, ma faamavae atu ai i lagona faasiasia, pogisa, le mautonu lea ua salalau solo i tagata o le lalolagi (DBY, 237).

E i ai ea ni uiga leaga i faafiafiaga? Afai ou te vaaia o’u atalii ma ou afafine o fiafia i latou, talatalanoa, feasiasiai, tietie taavale, o i se pati po o se siva, e i ai se uiga leaga o i ai iina? Ou te matuai vaavaai totoa lelei i ai, ma afai ou te faalogoina se upu, iloa se vaaiga, po o se faatausua i mea paia pe soo se mea lava e aveesea ai ni uiga lelei o se tagata, ou te lagonaina i sina taimi, ma faapea atu, “Afai e te mulimuli ai i le mea lena o le a le taitaiina atu ai oe i le lelei, ae o le tiapolo; o le a le taitaiina atu ai oe i le punavai o le ola ma le malamalama. Ia mulimuli i le na o le ala lava e taitaiina atu ai i le ola e faavavau” (DBY, 237).

O se faamanuiaga i le Au Paia le olioli ai i mea lelei uma, aua o le lalolagi ma mea uma o i ai e a le Alii ia [vaai MFF 104:14], ma ua ia folafolaina atu i lana Au Paia faamaoni uma; ae tatau ona olioli i ai e aunoa ma le agaga o le manaonao ma le faaloloto—e aunoa ma le agaga o le manao fua, ae o le agaga o le Talalelei; ona susulu manaia ifo ai lea o le la i o tatou luga; i aso taitasi o le a faatumulia ai i tatou i le fiafia, ma o mea uma lava o le a faatumulia i le matagofie, e aumaia ai le olioli, faamalieina, ma le malologa i le Au Paia (DBY, 237).

O le faafiafiaina o i tatou e tuufaatasia lea i le fuafuaga tele o le i ai o le tagata. Ua ou aoaoina ina ia aua nei ou popole i se mea e le mafai ona ou fesoasoani i ai. Afai e mafai ona ou faia ia lelei, o le a ou faia; ae afai e le mafai ona ou mauaina se mea, o le a ou faapea ifo ia te au lava ia ina ia aua nei ou popole fua i ai. O le a avea lena ma mea ou te fiafia ai i le aso atoa (DBY, 236).

O lea ia aoao ai ina ia fiafia ao maua le avanoa (DBY, 235).

O lenei o loo tatou fiafia ai i mea e faaaoga i ai taimi. E masani ona tatou feiloai ma tapuai i le Alii e ala lea i pesega, tatalo, ma lauga, anapogi, ma mafuta faatasi ma isi i le Faamanatuga a le Alii. O lea ua tatou feiloai o se nuu—mo le a? Ina ia malolo ai o tatou mafaufau, ma maua ai e o tatou tino le faafiafiaina lea e tatau ai ma e manaomia mo le faatumauina pea o le paleni, ina ia siitia ai le soifua maloloina i le tino ma le agaga (DBY, 240).

E masani lava ona ou tauina atu i tagata i o tatou nofoaga o faafiafiaga, afai latou te le mafai ona o atu i ai iina ma le Agaga o le Alii, e sili ai pe a latou nonofo i le fale (DBY, 240).

I a tatou fesootaiga faalauaitele uma, po o a lava a outou fegalegaleaiga, ia aveesea le pouliuli, le le fiafia, o le muimui, ma lagona le logoleleia—o fua leaga na o le mafaufau e toulu mai se laau e le mafai ona vaaia; ma ia faatamaiaina, e aunoa ma lou tauaveina ma tuuina atu i ou tuaoi. Ae afai e te maua le olioli ma le fiafia, malamalama ma le atamai, upu moni ma le mama, ia e ofoina atu lena fua i ou tuaoi, ma o le a latou maua ai le lelei, ma o le a faamalosia ai lagona o ou uso a tagata (DBY, 240).

Na ou fausiaina le fale faafiafia ina ia faatosina mai ai o tatou tupulaga talavou ma ia saunia ai ni faafiafiaga mo tama ma teine, nai lo le fetaufetuliai solo i lea mea ma lea mea mo ni faafiafiaga. I se taimi ua leva ao lei fausiaina sa ou faapea atu ai i Epikopo, “Ia faavaeina ni a outou faatasiga faafiafia ma ni nofoaga faafiafia e faafiafiaina ai tagata” (DBY, 243).

E i ai ea se leaga i totonu o fale faafiafia po o se faletifaga; i totonu o le fale siva; i le nofoaga e tapuai ai; i le fale; i le lalolagi? Ioe, pe a faapea e fuafua tagata latou te faia ni uiga leaga i totonu o nei nofoaga. E i ai le tiapolo i totonu o tagata pe a talatalanoa, pe afai lea latou te faatagaina i latou lava e gauai atu i le tiapolo ao talatalanoa (DBY, 243).

I luga o le tulaga o se fale faafiafia e mafai ai ona faafoliga mai ai ni tagata, o le leaga ma ona aafiaga, o le lelei ma ona taunuuga fiafia ma ona taui; o vaivaiga ma uiga leaga o le tagata, o le silisili ese o le mama ma le maoae o le upu moni. O le tulaga e mafai ona faia ina ia fesoasoani atu ai i le pulelaa i le faagaeetiaina o mafaufau o tagata ma faamalamalamaina ai lagona o se olaga mama, o se nofoaga taufaafefe foi i le leaga o agasala ma ona taunuuga taufaamatau. O le ala o le agasala faatasi ai ma ona faigata ma tiga, ma ana mailei ma maunu e mafai ona faaalia, ma le ala e tapunia ai (DBY, 243).

O tala faatino e matautia e fiafia tele i ai le lalolagi i fafo; ou te le fia lagolagoina lena mea. Ou te le fia manao e faaalia i luma o o tatou tamaitai ma fanau le fasioti tagata ma ona tau faamatau uma ma le amioleaga e tau atu i ai; ou te le manao i se tamaitiiti na te tauaveina atu i le fale i totonu o lona loto le fefe … . i le pelu, o le fana, po o le naifi, ma mafatia ai i le po i ni miti taufaafefe. Ou te manao i tala faatino faapena ina ia faatinoina ma ia maua ai se lagona lelei o tagata matamata; ma ou te manao foi ia i latou o e matamata ina ia filifili lelei ia ituaiga tala faatino e faaalualuina ai i luma le mafaufau, ma siitiaina ai le tulaga lelei o se nuu (DBY, 243–244).

Afai e te manao e te siva, ia siva; ma e pei lava o loo outou sauniuni mo se fonotaga tatalo pe a maea ona e siva nai lo se isi lava taimi, pe afai o outou o le Au Paia. Afai ua e naunau e ole atu i le Atua mo soo se mea lava, e faapena foi ona e saunia e te faia i le siva e pei lava o isi nofoaga, pe afai o outou o le Au Paia (DBY, 243).

[Ae peitai,] o i latou e le mafai ona auauna atu i le Atua ma se loto mama i le siva e le tatau foi ona siva (DBY, 243).

Ou te manao ina ia matuai malamalama lelei ma manino, o taaloga ma siva e le o se vaega o a tatou tapuaiga. O le fesili e mafai ona tulai mai, O le a la lo latou faamoemoega? Ou te tali, ina ia mafai ai ona o faatasi lo’u tino ma lo’u mafaufau. O lo’u mafaufau e galue e pei o le tagata tatuu laau, i taimi uma; ma o le mafuaaga lenei ou te matuai fiafia ai lava i nei faafiafiaga— latou te aumaia ai ia te au le avanoa e aveesea ai le tele o mea, ma luluina lo’u tino, ina ia mafai ai ona faagaoioia lo’u tino, ma ia malolo ai lo’u mafaufau. Mo le a? Ina ia maua ai le malosi, ma ia faafouina ma faavave ma faaolaola, ma faagaoioi, ina ia le mate ai lo’u mafaufau (DBY, 242).

E i ai le toatele o nisi o o tatou uso ma tuafafine ua pulapula lagoto lo latou soifua, o e lei mafai lava ona ulu atu i totonu o se fale siva po o se fale faafiafia talu ai talitonuga sese a o latou augatuaa seia oo ina ua avea i latou ma ni Au Paia o Aso e Gata Ai, ma o lea ua foliga mai ua latou matuai fiafia lava i lenei ituaiga faafiafiaga nai lo a tatou fanau. E mafua mai lenei mea ona o le tele o tausaga sa latou le maua ai na faafiafiaga lea sa fuafuaina mo le faasaoina o o tatou agaga ma ia faamalolosia ma faatiotio ai o tatou tino, ma e faitauafe lava i latou ua maliliu ae latou te lei mauaina lava ia ituaiga gaoioiga mo le tino ma le mafaufau. Latou te manaomia le tausiga faaletino ina ia mafai ai ona latou soifua maloloina ma fiafia. O vaega ma malosiaga uma lava o le tino ma le mafaufau o se meaalofa lea mai le Atua. Aua lava nei faapea o mea uma lava o loo faaaogaina e foafoa ma faaauau ai pea ona maloloina le tino ma le mafaufau e mai seoli lea (DBY, 242).

Afai e te fia siva, tamoe i se tuuga, … po o le taalo i le polo, ia faia loa, ma faamalolosia ai o outou tino, ma ia faamalolo ai outou mafaufau (DBY, 243).

O i latou o loo tausia feagaiga ma auauna atu i lo latou Atua, afai latou te mananao e faagaoioi o latou tino i soo se auala ina ia faamalolo ai o latou mafaufau ma mapu i ai o latou tino, o ma fiafia ai i le siva, ma ia i ai pea le Atua i o outou mafaufauga i lenei mea ma isi mea uma, ma o le a ia faamanuiaina outou (DBY, 242).

O a tatou galuega, o a tatou mea e fai i aso taitasi, o o tatou olaga atoa o loo siomia e lo tatou talitonuga. O le mea lea o loo tatou talitonu i ai ma o loo tatou taumafai e faataitai. Ae peitai o loo faatagaina lava e le Alii isi mea e tele na te lei poloaiina mai lava … . E lei poloaiina mai lava au e le Alii ou te siva, ae peitai ua ou siva: ua outou iloaina uma lava, aua o lo’u olaga ua iloa uma e le lalolagi. Ae ui lava e lei poloaiina mai au e le Alii ina ia ou faia, ae ua ia faatagaina au. Ou te leiloaina pe na ia poloaiina tama e o e taaalo i le polo, ae peitai ua ia faatagaina lava. Ou te leiloa pe na ia poloaiina i tatou e fausiaina se fale faafiafia, ae ua ia faatagaina lava, ma e mafai ona ou tuuina atu le mafuaaga. O faafiafiaga ma faamalologa e aoga mo lo tatou ola maloloina e pei o se tasi o galuega sili ona taua i le olaga (DBY, 238.

Ou te ioe lava, o na tagata e tatu o latou vae, pati lima, mapumapu, ma faia isi faataitaiga faapisapisao ma malomaloa i totonu o fale faafiafia, e le talafeagai ma e mataga, ae laitiiti sona uiga, ma leiloa le eseesega i le va o se ataata o le faamalieina e tapuaia taumafaiga a se uo, po o le ataata faasiasia e aumaia ai le inoino o le tasi tagata i le isi tagata (DBY, 241).

[Ae] tuu atu ia o tatou mafaufau e pepese i le olioli, ma tuu atu le ola e sosolo atu i vaega uma o le tino; aua o le faamoemoega o la tatou feiloaiga e mo lona faia, mo lona lelei (DBY, 240).

• Aisea e saili ai e tagata soifua le fiafia? Aisea e foliga mai ai e toatele tagata latou te le mafai ona mauaina? O fea e mafai ona tatou maua ai le fiafia moni? E mafai faapefea e le talalelei ona saunia le fiafia e oo lava ia i latou “o loo tiga, o loo sese, o loo matitiva, pe falepuipui”?

• E toatele tagata e talitonu o le usiusitai i poloaiga a le Atua o le a taofiofia ai lo latou saolotoga ma le atoatoa ai lo latou fiafia. O a ni tulaga ua e maitauina pe ua e oo foi i ai ua faaalia ai o lona faafeagai e matuai moni lava—o le usiusitai i poloaiga tatou te maua ai le fiafia, ae o le le usiusitai tatou te maua ai le faanoanoa?

• O le a sou lagona i lou iloaina lea “ua faia oe ina ia e olioli i mea uma e olioli i ai le Atua” ma e finagalo le Tama Faalelagi ma Iesu Keriso ina ia e fiafia?

• O le a le saunoaga a Peresitene Iaga e uiga i le auala e tasi mo le Au Paia o Aso e Gata Ai ia latou maua ai le fiafia? E faapefea ona e maua le fiafia e ala i lou ola ai i le talalelei?

• O le a sou manatu aisea na uunaiina ai e Peresitene Iaga ia faafiafiaga?(Vaai foi MFF 136:28.) E mafai faapefea e a tatou gaoioiga faafiafia ona “faatumuina i tatou i le filemu ma le mamalu, ma siitia ai lagona uma ma vaega ?

• O a matafaioi e tatau ona tatou faataunuuina muamua ae tatou te lei auai i se faafiafiaga, pe afai o a tatou gaoioiga e faamanuiaina ai i tatou i le faaleagaga faapea foi ma le faaletino?

• Na aoao mai Peresitene faapea, o gaoioiga e tatau ona faia i le agaga sa’o. E mafai faapefea ona tatou mautinoa ua i ai le Agaga o le Alii i a tatou faafiafiaga?

• Aisea e taua ai le auai i gaoioiga eseese, e aofia ai faafiafiaga ma taaloga? O le a le saunoaga a Peresitene Iaga e faatatau i nisi o faamanuiaga ma’oti e maua mai i musika, siva, ma fale faafiafia? O le a lana saunoaga ia i latou e talitonu o le fale faafiafia ma le fale siva o nofoaga o le tiapolo?

• O le a sa tatou faasologa e tatau ona i ai mo le filifiliaina o faafiafiaga e talafeagai? E mafai faapefea ona e mautinoaina “o loo i ai le Atua i ou mafaufauga uma” e tusa lava pe o loo e auai i gaoioiga po o taaloga faafiafia? E mafai faapefea e matua ona faia se faataitaiga lelei mo a latou fanau e ala lea i le ituaiga o faafiafiaga latou te filifilia?

• Aisea e taua tele ai “ia fiafiaga mo lo tatou ola maloloina lelei e pei foi o isi galuega taua o le olaga?

• E mafai faapefea ona e fesoasoani e saunia ni taaloga ma ni faafiafiaga malupuipuia ma atoatoa mo oe lava, o lau fanau, po o isi tagata i le nuu?