Saunia mo le Alualu i Luma e Faavavau

Ole a la tatou mea o fai iinei? E aoao ina ia maua ai le fiafia sili, ma faateleina le poto i mea e fai (DBY, 87).

O le faamoemoega o lenei olaga o le aoaoina, o le mea e mafai ona fai na o se vaega laitiiti i soo se taimi (DBY, 87). O le olaga faaletino atoa o le tagata, e le sili atu pe itiiti ifo foi i se tulaga faasauniuni ua tuuina mai i tagata ola, o se avanoa ina ia mafai ai ona faaleleia i latou lava mo se tulaga maualuga o le olaga (DBY, 78).

O le muai mataupu faavae sili e ao ona manatu i ai tagata uma, e ao ona malamalama i ai le tamaitiiti ma le tagata matua, o le pogai sili o gaioiga uma, ma e poo malamalama i ai tagata pe leai, o le mataupu faavae o le faaleleia. O le mataupu faavae o le faateleina, o le faaeaga, o le faaopoopo i mea ua uma ona ia i tatou, o le mataupu faavae faapitoa ma o le mafuaaga o gaioiga o fanau a tagata. E le afaina poo le a lo latou faamoemoega, poo a atunuu sa fananau mai ai, o ai tagata ua latou galulue faatasi, o le a lo latou talitonuga, poo tofiga faalemalo o latou umia, o le mafuaaga tupito lenei o gaioiga a tagata, o le tuufaatasia o mana uma e tatau ai i le faataunuuina o tiute o le olaga (DBY, 87).

Ua tuuina i tatou i lenei lalolagi e faamaonia ai lo tatou agavaa e o atu i le lalolagi selesitila, le terasitila, poo le telesitila poo seoli, poo se isi lava malo, poo se nofoaga, ma ua lava lo tatou olaga ua tuuina mai ia i tatou e faia ai lenei mea (DBY, 87).

O le lalolagi lenei e suesueina ai i tatou. O le olaga o le tagata o se aso o le faamasinoga, tatou te faaali atu ai i le Atua, i lo tatou pouliuli, i lo tatou vaivai, ma poo fea o loo pule ai le tiapolo, o i tatou o uo a lo tatou Tama, ma e tatou te maua le malamalama mai ia te ia ma agavaa e avea ma taitai o a tatou fanau—e avea ma alii o alii, ma tupu o tupu,—ina ia pulea lelei i luga o lena vaega o o tatou aiga o e o le a faapaleina i le malo selesitila i le mamalu, tino ola pea, ma le ola e faavavau (DBY, 87).

Faalogo maia, outou uma le Au Paia! Pe tou te faaalu ea le taimi o lo outou olaga faataitai e faamaumau ai lo outou ola ma le i ai iinei? Sa faatulagaina outou, ma aumaia i le olaga faaletino, mo le faamoemoe e tutumau seia oo i le iuga, pe a outou faataunuuina le fuafuaga o lana foafoaga, saili le ala sao, tausia tulaga manaomia o le tulafono selesitila, ma usitaia poloaiga a lo tatou Atua (DBY, 87).

E manaomia e Le Foafoa tagata ola ina ia galulue ma le faamaoni i le faia o mea lelei i aso uma o o latou olaga, e le gata i le faaleleia o o latou tulaga faalemafaufau ma le faaletino poo lena o o latou tuaoi (DBY, 88).

Ua tatou iai iinei ina ia ola, e faasosolo atu le poto ma le malamalama i tagata. O loo ou iinei e aoaoina ou uso, aoao i lou aiga i le auala o le ola, ina ia faatoateleina ou tupuaga, ma ia ola ma pe a tusa ai ma lou malosi, seia vagana o le agasala, taufaaleaga, seoli, ma le Tiapolo, ma vaega uma o tulaga inosia ua tulia ese mai i le fogaeleele. O lou talitonuga lena ma o le faamoemoega lena o loo ola ai. Ua tatou le o mai iinei e saunia ai e oti, ona oti lea; ae ua tatou o mai iinei ina ia ola ma atinaeina le malo o le Atua i le fogaeleele—e faaalualu i luma le Perisitua, faatoilaloina le mana o Satani, ma aoao i fanau a tagata le mafuaaga o le foafoaina o i latou— aua i totonu o i latou o loo tanumia ai le sosia o le poto uma lava. O le amataga lenei— o le faavae ua faataoto i le faatulagaga o le tagata ina ia maua le atoatoa o le poto ma le mamalu e faavavau. Tatou te o atu ea i le isi olaga ina ia maua ai? Leai; e ao ona tatou siitiaina i lenei fogaeleele (DBY, 88).

O le Au Paia i le vanu i nei mauga ma le lalolagi atoa e ao ona latou aoao le ala ua latou i ai i lenei fogaeleele. Ua latou i ai iinei ina ia fanafanau ma uluuluola, ina ia faateleina, ina ia faapotopotoina le Aiga o Isaraelu, faaola Siona, atinaeina o Siona o lo tatou Atua, ma sii ae le tulaga o le poto e faavavau o loo faatasi ma Atua, ma amata ona toto i lenei fogaeleele, ina ia mauaa ma maua mai ai ni fua i luga i le mamalu o le Atua, seia vagana ua faaumatia mataupu faavae inosia uma o loo i loto o tagata, ma toe foi le fogaeleele i lona tulaga faa-parataiso, ona afio mai lea o le Alii ma nonofo ma nei tagata, ma savavali ma talanoa ma i latou e pei ona ia faia i le Tama o Atamu. O la tatou galuega lena, ina ia le faaaluina uma lo tatou malosi i le na o le sauniuni e oti (DBY, 89).

O le faamoemoega o lo tatou olaga o le faatuina o Siona o lo tatou Atua, faapotopotoina o le Aiga o Isaraelu, aumaia o le atoatoaga i tagata o nuu ese, toe faatuina ma faamanuia le fogaeleele i lo tatou tomai ma avea o se Faatoaga i Etena, faaputu i oa o le malamalama ma le poto i lo tatou iloa, faamamaina o tatou loto ma saunia tagata e fetaiai ma le Alii pe a afio mai (DBY, 88).

O le galuega lenei o le galuega alualu i luma, o le mataupu faavae o loo aoaoina i le Au Paia i lona natura e faaeaina, faateleina, faalauteleina seia vagana ua tatou iloa e pei ona iloa i tatou, vaai e pei ona vaaia i tatou (DBY, 90).

O loo tatou o i ai i se aoaoga ma o loo aoao pea, ma e le o i ai se faamoemoe e faamuta le aoaoina ao tatou ola ai i le fogaeleele; ma afai o le a tatou pasi atu i le isi itu o le veli, e faamoemoe o le a faaauau ona tatou aoao pea ma faateleina lo tatou malamalama. Atonu o se manatu ese lea i nisi tagata; ae ona o le mafuaaga faigofie e le mafai ona tatou maua le poto uma i le taimi e tasi. O lea e ao ai ona tatou maua si mea laitiiti iinei ma si mea laitiiti iina (DBY, 91).

Sa ia tuuina atu sina aoaoga i ona soo lotomaulalo i le aso, afai latou te alualu i luma i lenei aoaoga, o taeao o le a ia tuuina atu se isi e sili atu, ma le isi aso ua sili atu foi. Na te le faaopoopo i mea latou te le maua ai le alualu i luma, ae manaomia lo latou alualu pea i luma i le poto ua latou maua, ma ia maua se faaputuga o le atamai (DBY, 90).

O le na o le mulimuli atu i le ala ua faasino mai i le Talalelei e i latou ua aumaia le ata o le faaolataga, o le mulimuli lea i le ala e tau atu i le ola, o le faateleina e faavavau; o le mulimuli i le ala e le mafai ai lava ona aveesea mea ua tatou maua, ae faaauau ona aoao, faapotopoto faatasi, faateleina, faasalalau atu i nuu mamao, ma faalauteleina i vaega e le gata. O tagata uma o e ua taumafai e maua le ola e faavavau, o le a maua le faatelega o le a fiafia i ai o latou loto. E le itiiti ifo nai lo le faamanuiaga o le faateleina e faavavau, i ona tulaga uma, e faamalieina ai le agaga o le tagata ola (DBY, 93).

E mafai ona faaleleia i tatou, ua faia i tatou mo lena faamoemoe, o lo tatou tomai ua faatulagaina ina ia faalauteleina seia o tatou maua i lo tatou malamalama le poto ma le atamai faaselesitila, ma ia faaauau ai, i le faavavau (DBY, 90).

Pe tatou te aoao pea ae le mafai ona maua le poto o le upumoni? [vaai 2 Timoteo 3:7.] Leai, ou te fai atu e le tatau ia i tatou; ae ao ona tatou maua le poto o le upumoni. O lou faamoemoe lea ma le naunautaiga, ma o lou fiafia foi lea (DBY, 90–91). Ua i ai ia i tatou le mataupu faavae, e faapena foi i tagata uma o le lalolagi, o le faateleina ma le faaauauina o le faateleina, o le faalauteleina ma maua ma faapolopolo i le upumoni, seia atoatoa i tatou (DBY, 91).

Ua tatou saunia mo nisi o mea, ma ua vave foi ona tatou maua e pei lava ona tatou saunia i tatou lava (DBY, 95).

E le ole atu i le Alii ina ia foaiina mai mea e tele i luga ia te outou, ae ole ifo outou ia te outou lava ina ia maua le faatuatua ia te outou lava, ina ia maua le faamaoni ia te outou lava, ina ia iloa le taimi e tautala ai ma le mea e tautala ai, mea e ao ona faaali atu, ma le auala e savali ai i luma o le Alii. I le vave o lou faamaonia atu ia te ia o le a e puipui i mea lilo uma e tatau ai— o le a e faia i ou tuaoi mea uma e te mafai, ae le sili atu, ma aoao i le ala e faasoa atu ai lou malamalama i ou aiga, uo, tuaoi, ma uso, o le a faamanuia atu le Alii ia te oe, ma tuuina atu ia te oe, seia oo i le iuga o le a ia faapea mai ai ia te oe, “O le a e le pau; o lou faaolataga ua faamauina ia te oe; ua faamauina oe i le ola e faavavau ma le faaolataga, e ala i lou faamaoni” (DBY, 93).

O le meaalofa sili lenei e mafai ona faauuina i luga o tagata atamamai, ina ia ola ai e faavavau ma ia aua nei faaleagaina (DBY, 96).

Ua tusia, o le meaalofa sili e mafai e le Atua ona tuuina mai i le tagata, o le meaalofa o le ola e faavavau. O le mea sili e mafai ona tatou maua o le faasaoina o lo tatou faasinomaga i se vaega e faavavau i totonu o au a le lagi. Ua ia i tatou upu o le ola e faavavau ua tuuina mai ia i tatou e ala i le Talalelei, afai tatou te usiusitai, o le a malupuipuia mo i tatou lena meaalofa taua (DBY, 96).

O le faamutaina o le i ai o le poto o loo ia te au, o se lagona le manuia; o loo faaauau pea. O lenei poto e ao ona tumau pea; e ao ona iai i se mea. Afai ou te tauaveina le ala sao ma faasaoina i lona faatulagaga, o le a ou faasaoina ia te au lava le ola e faavavau (DBY, 96).

O le a tatou maua le malo o le Atua i lona atoatoaga, o le maualuluga ma le loloto o lona mamalu, mana, ma le poto; ma o le a i ai o tatou tama ma tina, ma ava ma fanau (DBY, 97).

Faapea e mafai ona e maua le faamanuiaga e faamautu ai mo oe lava le ola e faavavau—o le ola ma fiafia ai i nei faamanuiaga e faavavau, e te faapea ane o le faamanuiaga sili lenei ua oo mai ia te oe… . O le a se faamanuiaga e tutusa ma lenei? O le a se faamanuiaga e tutusa ma le faaauauina o le ola—o le faaauauina o la tatou faalapotopotoga? (DBY, 96).

Ua faamanuiaina i tatou e le Alii i le tomai e fiafia ai i le ola e faavavau ma Atua ma ua folafolaina mai o le meaalofa sili lea a le Atua. O le meaalofa o le ola e faavavau, e aunoa ma ni fanau, i le avea o se agelu, o se tasi o meaalofa silisili e mafai ona maua; ae peitai ua tuuina mai e le Alii ia i tatou le faamanuiaga o le avea ai o ni tama o agaga. O le a le tama o agaga e pei ona taua i Tusitusiga Paia? O le tama e i ai ana fanau e faavavau. O faamanuiaga ia na maua e Aperaamo, ma ua atoatoa ai le faamalieina o lona agaga. Sa ia maua le folafolaga o le a avea o ia ma tama o agaga (DBY, 97).

Afai e faamaoni tagata, … o i latou ma le na Foafoa o le a tasi i latou, o le a tasi le loto ma tasi le manatu, e galulue faatasi; aua o le a lava le mea e faia e le Tama e faia foi e le Alo, ma faaauau ai pea a latou galuega uma i le faavavau (DBY, 97).

E finagalo le Alii e vaai ua tatou mulimuli i le ala e tau atu i le faitotoa vaapiapi, ina ia faapaleina ai i tatou o atalii ma afafine o le Atua, aua ua na o i latou i le lagi e fanafanau ma uluuluola… . O e o loo totoe ua latou maua le malo maualalo, ua latou le maua ai lenei faamanuiaga… . E ao ona tatou filifili pe avea i tatou ma atalii ma afafine, o suli faatasi ma Iesu Keriso, poo le tatou talia o le mamalu maualalo (DNSW, 8 Aug. 1876, 1).

• O a upumoni tatou te aoao mai o tatou tofotofoga i lenei olaga e fesoasoani ia i tatou ina ia alualu ai i luma e faavavau? (Vaai MFF 122:7–8.) O le a le saunoaga a Peresitene Iaga e uiga i le mataupu faavae o le “tumau e faavavau”? (vaai MFF 121:7–8; 3 Nifae 15:9.)

• E faapefea e le “galue ma le fiafia i le faia o mea lelei i aso uma” ona fausia le faavae e “maua ai le atoatoaga o le poto ma le mamalu e faavavau”? (vaai Alema 5:41; 26:22; MFF 58:26–29.)

• E tusa ai ma le saunoaga a Peresitene Iaga, o se tasi o o tatou faamoemoega i le olaga o le aoao. O le a le mea e taofia i tatou mai le aoaoina? E faapefea ona tatou aoao atili mai ia tatou suesuega o le talalelei? E faapefea ona tatou aoao mai i mea tatou te faia? O a ni upumoni faapitoa ua outou aoao mai e ala i mea tou te fai ma le aafiaga a le Agaga?

• Ua tau mai e Peresitene Iaga ni faamoemoega o le i ai i luga o le fogaeleele. E faapefea ona tatou faaleleia le faataunuuina o nei faamoemoega? (Vaai MFF 81:5.)

• O a ni auala e fesoasoani e “saunia ai tagata e fetaiai ma le Alii”? E faapefea ona e fesoasoani faapitoa e faia lenei mea?

• Na saunoa Peresitene Iaga tatou te maua le poto “o si mea itiiti iinei ma si mea itiiti iina.” E faapefea ona faaaoga lenei faatulagaga i lo tatou malamalamaaga i le talalelei, le avea ai ma matua, ma la tatou galuega auauna atu i le Ekalesia? (Vaai 2 Nifae 28:30; MFF 130:18–19.)

• O le a le aoaoga a Peresitene Iaga e uiga i le faateleina e faavavau? (Vaai MFF 93:12–14.)

• Sa faapea mai Peresitene Iaga “ua i ai mataupu faavae i totonu ia i tatou … e faateleina ma faaauauina le faateleina, o le faalauteleina ma le mauaina, ma faapolopolo i le upumoni, seia atoatoa i tatou. E faapefea ona fesoasoani lo tatou taumafai e maua le poto e saunia ai mo le faaeaga? (Vaai MFF 50:40; 93:24,26–30; 130:18–19.)

• Na saunoa Peresitene Iaga “o le meaalofa sili lenei e mafai ona faauuina ia i latou ua atamamai, ina ia ola ai e faavavau ma ia aua nei faaleagaina” O le a lana saunoaga o le “mea e sili ona maua” ma pe faapefea ona tatou faasaoina? (Vaai MFF 14:7; 130:20–21.)

• O le a le uiga o le “suli faatasi ma Iesu Keriso”? (vaai Roma 8:17.) O a faamanuiaga ua maua e i latou ua “faapaleina o atalii ma afafine o le Atua”?