Faatulagaga o le Ekalesia ma le Malo

I le faailoa atu o vaega o mataupu faavae e faatatau i le alualu i luma ma le atinaeina pea o le malo o le Atua i luga o le fogaeleele, ma le faailoa mai o lona manatu ma le finagalo, e tasi le fofoga e auala mai ai lona finagalo i tagata. Afai e finagalo le Alii e tuuina atu se faaaliga i ona tagata, pe a ia finagalo e faailoa atu ni vaega fou o mataupu faavae ia i latou, poo le, e faia e ia e ala i le tagata ua ia tofia i lena ofisa ma le valaauga. O isi tofiga ma valaauga o le Ekalesia o ni fesoasoani ma le puipuiga mo le atinaeina o le tino o Keriso ma le faaatoatoaina o le Au Paia, ma isi foi, o peresitene, epikopo, toeaina, faitaulaga, faiaoga, tiakono taitasi ma i latou o loo tulai mai i lona faatulagaga ma galue ai i lena tofiga ma le valaauga o le Perisitua, o e talai i le upu o le ola o ni leoleo mamoe e vaavaaia ituaiga ma vaega o le lafu mamoe a le Atua i le lalolagi atoa, ma o ni fesoasoani e faamalosia aao o le Au Peresitene Sili o le Ekalesia aoao (DBY, 137).

Ina ia maua ma faatumauina le agaga o le Talalelei, faapotopoto Isaraelu, togiola Siona, ma laveai i le lalolagi e ao ona faamuamua, ma avea ma naunautaiga faifaipea i agaga o le Au Peresitene Sili, o toeaiina o Isaraelu, ma tagata mautofi uma i le Ekalesia ma le malo o le Atua (DBY, 137).

I le faia o ni faaiuga o mea uma tau i mataupu faavae, ina ia faia ai faaiuga tatau, e ao ona maua le agaga autasi, faatuatua ma faaiuga. I le tofiga o se Korama, o le Au Peresitene Sili e toatolu e ao ona tasi lo latou manatu; o Aposetolo e Toasefululua e ao ona autasi i lo latou manatu, ina ia maua se faaiuga sao i mea uma e oo mai i o latou luma, e pei ona outou faitau ai i le Mataupu Faavae ma Feagaiga. O mea uma lava tou te vaai iai i le autasi o nei Korama ia latou folafolaga, e ao ona outou talia e moni [vaai MFF 107:27]. E ao i toeaiina ona faatasitasi, i le faatuatua ma le moni; ma pe afai ua latou malilie i se mataupu, e ao ona outou iloa e sao lea (DBY, 133).

O le Alii Silisiliese na te taitai i lenei Ekalesia, ma o le a na le tuulafoaiina outou e taitai seseina pe afai tou te faia o outou tiute. E mafai ona outou o i le fale ma momoe lelei e faapei o se pepe i lima o lona tina, e faapena i soo se tulaga faigata pe a taitai outou e o outou taitai i le malaia, aua afai ua latou taumafai e faia lenei mea o le a vave ona aveesea e le Alii i latou mai le fogaeleele. O loo taumafai o outou taitai e ola ai i o latou talitonuga i le mea e oo i ai lo latou malosi (DBY, 137).

O ki o le perisitua e faavavau, e mulimuli i le faatulagaga o le Alo o le Atua, o loo aofia ai i le valaauga o se aposetolo. O perisitua uma, o ki uma, o meaalofa uma, o faaeega paia uma ma mea uma e saunia ai e toe foi atu ai i le afioaga o le Tama ma le Alo, o loo i ai lea, poo lou faapea atu o loo aofia ai i le valaauga faaaposetolo (MS 15:489).

Ina ua matou foi mai Misuri, o lou uso o Iosefa Iaga ma au sa pepese ina ua maea ona lauga i se sauniga; ma ina ua maea le sauniga, sa faapea mai Iosefa Samita, “O mai, tatou o atu ma au i lou fale.” Sa matou o atu ma pepese mo ia mo se taimi umi, ma talanoa ma ia. Sa ia talanoa mai i le mataupu e uiga i le Toasefululua ma le Fitugafulu mo se taimi muamua sa ou manatu i ai. Na ia saunoa, “Uso e, o le a ou valaauina ni Aposetolo e Toasefululua. Ou te manatu o le a matou faatasi, mai lea taimi i lea taimi, ma filifili ni Aposetolo e Toasefululua, ma filifili se Korama a Fitugafulu mai ia i latou ua o ae i Siona… . “I le 1835 i le aso faaiu o Ianuari poo Fepuari, … sa faia ai a matou fonotaga mai lea aso i lea aso, ma o le uso o Iosefa sa ia valaauina Aposetolo e Toasefululua [i le aso 14 Fepuari] (DBY, 141–42).

O le valaauga o se Aposetolo o le atinaeina o le malo o le Atua i le lalolagi atoa; o le Aposetolo ua ia umia ki o lenei mana, ma e leai ma se isi. Afai e faalauteleina e se Aposetolo lona valaauga, o ia o le upu a le Alii i ona tagata i taimi uma (DBY, 139).

Sa ou taumafai e faailoa atu ia te outou, uso e, i se puupuu e mafai ai, le faatulagaga o le perisitua. Afai ua faauuina se alii e avea ma Aposetolo, o lona Perisitua ua leai se amataga o aso, poo le faaiuga o le olaga, e faapei o le Perisitua o Mekisateko, aua o lona Perisitua sa talanoaina i lenei gagana ae le o le tagata (DBY, 141).

O le tiute ma le faamanuiaga o Aposetolo e Toasefululua le maua o le Agaga Paia e avea ma a latou soa tumau, ma ola ai pea i le Agaga o Faaaliga, le iloa o o latou tiute ma malamalama i o latou valaauga; o le tiute foi lenei ma faamanuiaga o le Au Peresitene Sili o le Ekalesia (DBY, 139–40).

O se Aposetolo a le Alii o Iesu Keriso o loo i ai ki o le Perisitua paia, ma ua faamauina i ona luga le mana, ma o lenei ua i ai ia te ia le pule e talai ai le upumoni i tagata, afai latou te talia, lelei; afai e leai, o le a i ai le agasala i o latou lava luga (DBY, 136).

O le Perisitua Maualalo, o lea, ua outou iloa, o se vaega o ituaiga o le pulega a le Au Aposetolo, aua o le alii na te maua lea perisitua, ua ia te ia le aia e galue ma taitai ai o se Faitaulaga Sili, o se tasi o Fautua Maualuga, o se Peteriaka, o se Epikopo, Toeaina, Ositaulaga, Aoao, ma le Tiakono, ma isi foi tofiga ma valaauga o loo i ai i le Ekalesia, mai le maualuga seia oo i le maualalo, pe a manaomia e o latou tiute (DBY, 140).

Ua outou faitau i le faaaliga ua taua e faapea afai ua tofia le Toasefululua ma faauuina, ua latou maua le mana ma le pule lava lea e faapei o le Au Peresitene Sili e toatolu, ma le faitau atili tou te iloa ai le manaomia o fesoasoani e tatau ai e mai i lenei Perisitua [vaai MFF 107:22–26]. O Fitugafulu e tutusa i le pule ma le mana, [ua latou maua le pule faapitoa e pei ona valaaulia ai mo le] faatuina, atinaeina, faagaioiga, faauuina ma faatulagaina i le ala e tatau ai le malo o le Atua i lona atoatoaga uma i le fogaeleele. E i ai la tatou Korama o Faitaulaga Sili, ma e toatele i latou. O i latou e galulue i le eria o loo latou nonofo ai, ao Fitugafulu e femalagaai ma folafola atu, e faapena foi i Faitaulaga Sili pe a valaaulia. Ua ia i latou le Perisitua e tasi o loo i le Fitugafulu ma le Toasefululua ma le Au Peresitene Sili; ae pe ua faauuina ea i latou i le pule atoa, mana, ma ki o le Perisitua? Leai, e le o faauuina i latou i ai. Ae o Faitaulaga Sili i latou a le Atua, ma pe a latou faalautele i lo latou Perisitua [valaauga], o le a latou maua i se taimi le pule atoa ma le mana e mafai e alii ona maua (DBY, 140).

O le tofiga o le Epikopo [Pule Faamalumalu] e faasino i le Perisitua Maualalo [Arona]. O ia o le tofiga sili ona maualuga i le Perisitua Arona, ma e i ai … asiasiga a agelu, pe afai e i ai lona faatuatua, ma ola ina ia maua e ia ma manuia ai i faamanuiaga sa maua e Arona (DBY, 143).

O le Epikopo i lona valaauga ma tiute o loo faatasi i le Ekalesia i taimi uma, ua le valaaulia o ia e malaga i nuu mamao e folafola atu, ae o loo i ai i le nuu, ua le i ai o ia i le atunuu mamao o le lalolagi, ae ua i ai faatasi ma le Au Paia (DBY, 144).

O Epikopo e ao ona avea ma faataitaiga lelei i o latou Uarota i mea uma (DBY, 144).

Afai e galue le Epikopo i le tulaga o lona valaauga ma le tofiga, ma faalautele i ai, o le a leai se tagata i lana uarota ua le faigaluega i le ala e sili ai. O le a ia vaai ua ola tagata uma i le ala e tatau ai, savavali ma le lotomaulalo ma lo latou Atua. O le a leai se tagata i lana Uarota ua ia le iloa, ma o le a ia iloa lelei o latou tulaga, amioga, ma lagona [vaai 1 Timoteo 3:1–4] (DBY, 145).

E ao i le Epikop ona auina atu i latou ua faatuatuaina, o e ua latou iloa le amiotonu, e avea ma leoleo i le olo, ma ia latou sailiili i e ua pagatia (DBY, 145).

Ia auai atu ma le faamaoni Epikopo uma i o latou Uarota, ma vaai o loo lelei alii ma tamaitai uma ma o loo faaaogaina lelei ma le faamaoni; ia vaaia lelei e mamai ma matutua ma ia le pagatia se tasi. Ia avea Epikopo ma tama alofa ma le lotofaamagalo i lana Uarota, ia tuuina atu se upu faamafanafana ma le faamalosiau iinei, o se upu timai ma le faufautua iina, ma se upu o le aoaiga i se isi mea, pe a manaomia, e aunoa ma le faaituau, faamasino ma le poto i le va o le alii ma le alii, vaaia lelei ma saili ma le naunau le manuia mo tagata uma, leoleo i le lafu mamoe a le Atua ma mataala o se leoleo mamoe moni, ina ia le oo mai luko ma maile i le lafumamoe ma faaleaga i latou (DBY, 144–45).

Ou te fai atu i le Epikopo, … o lau matafaioi ma lou valaauga lenei. Ia aua lava nei i ai se vaipanoa se tasi o mea e nonofo ai le Au Paia o lau uarota, e te le silafia (DBY, 146).

E ao i Epikopo, e ala i a latou faiaoga, ona vaai i aiga uma o la latou uarota, o e e mafai, ona foai atu mea e masani ona latou taumamafa ai i le aso anapogi mo e matitiva (DBY, 145).

E le tatau lava ona tatou maua ki o le pule e avea ai i tatou ma pule, seia vagana ua tatou pule e faapei o le Atua pe ana faapea o iinei o ia (DBY,146).

Ae o le malo o le lagi, pe a faatulagaina i luga o le fogaeleele, o le a i ai taitai uma, tulafono ma sauniga e tatau ai mo le pulea o i latou e amio le pulea, poo e soli i ana tulafono, ma vaaia i latou o e naunau e fai le mea sao, ae le savavali ai i aoaoga, ma o nei pule ma le mana uma o loo i ai i tagata (DBY, 146).

Epikopo, e i ai ni a outou faamasinoga? O feeseeseai lagona o uso i a outou uarota? “Ioe” O le a le mea e tatau ona latou fai i nei tulaga? E ao ona latou mulimuli i tulafono ua faataatia, ma faaleleia o latou uso. Ou te manatu e mafai ona faailoa mai o le tele o faafitauli i le va o uso e mafua mai i le le femalamalamaai ae le o le taufaaleaga ma le loto agasala, ma ua le talanoa le mataupu o le tasi i le isi i le agaga o tagata o le Au Paia, ae ua latou feeseeseai le tasi i le isi seia oo ina amatalia le leaga, ma ua aumai ai le agasala i o latou luga. Afai ua tatou faia le lelei i le ivasefuluiva o taimi ona fai ai lea o se mea leaga, pe le o se mea masani ea, ou uso e ma tuafafine, le mafaufau i lena agasala e tasi i le aso atoa ma le mafaufau ai lava i le lelei. Ao lei o tatou faamasino le tasi i le isi, e ao ona tatou vaai atu i le faamoemoega o le loto, afai o le leaga, e ao ona faasalaina lena tagata, ma faia se auala e toe aumaia ai o ia i le amiotonu (DBY, 149–50).

Ou te manao e vaai i Fautua Maualuga ma Epikopo ma Faamasino uma ua faatumulia i le mana o le Agaga Paia, ma pe afai e sau se tagata i o latou luma e ao ona latou faamasino ma malamalama i lena tagata, ma ia mafai ona faia se fono aoai i le vave ma le amiotonu… . Ou te manao i Epikopo ma isi taitai e lava lo latou mana ma le atamai mai le Atua ina ia latou iloa ma le atoatoa o le natura moni o mataupu uma e oo mai i o latou luma (DBY, 133).

E mafai ona outou, faasala mamafa i se Toeaina ae ua le iloa e ia ma lona manatu ua e agaalofa ia te ia. E i ai isi, afai tou te tau atu se upu ia i latou, poo le faasala mama ia i latou, ua loto momomo, ua malulu o latou lagona e pei o tamaiti, ma o le a liusuavai e pei o le gao i luma o le mumu o le afi. E le tatau ona outou faasala mamafa ia i latou; e ao ona outou faasala e tusa ai ma le agaga o loo i ai i le tagata. O nisi tou te talanoa i ai i le aso atoa, ma ua latou le iloa le mea o loo outou tau atu. E tele eseesega. Ia fai faalelei tagata e tusa ma tulaga o loo i ai (DBY, 150).

Afai ua aoaiina e le tasi le isi—afai e feiloai outou ma taitai ma faapea mai, “E sese le mea lena ia te outou,” e ao ona outou talia ma le filemu, tuuina atu le faafetai mo le aoaiga, ma faailoa ma tautino atu le sese, ma faailoa atu atonu ua outou faia pea le sese ae tou te le iloa, ma faapea atu,“Ou te manao ina ia outou faamalamalama mai i lou mafaufau, ina ia outou taitai i lou lima, ma taitaiina au ma faamalosi ma sapasapaia e le tasi le isi.” O le a lou vaivaiga? Ioe. Tou te mananao e vaai i se tagata atoatoa? E le mafai a o outou nonofo ai iinei i le lalolagi (DBY, 150).

Sei ou faapea atu i uso ma tuafafine, afai e faasala outou e se tasi o tatou taitai, aua nei manatu ua faia lenei mea e le fili, ae talia pea o se agaga alofa mai o se uo ae le o se fili. Afai o o outou peresitene o o outou fili o le a latou tuu lafoai ia outou nai a outou solitulafono. Afai ua alofagia outou e le Alii o le a aoaiina outou [vaai Eperu 12:6]; talia ma le fiafia (DBY, 133).

• E faapefea ona faaaoga e le Alii ia le Peresitene o le Ekalesia ma le Aufono a le Au Peresitene Sili ma le Korama a Aposetolo e Toasefululua e taitaiina le Ekalesia? E faapefea i taitai o loo umia isi tofiga i le Ekalesia ona fesoasoani ia i latou? (Vaai MFF 107:21–38; 132:7.)

• Aisea e mafai ai ona tatou tuu atu le faatuatuaga ma le talitonuga atoa i le korama pule faamalumalu o le Ekalesia? (Vaai MFF 107:27.)

• Aisea e le faatagaina ai e le Alii le peofeta ona ia taitaiina le Ekalesia i le malaia? O le a le folafolaga sa fai e Peresitene Iaga mo i latou o e fai o latou tiute? (Vaai MFF OD 1.)

• O a ki o le perisitua o le tulaga faaaposetolo?

• O a tiute o Aposetolo? (Vaai MFF 107:23–24, 33, 58.)

• Talanoaina le faiã i le valaauga o se Aposetolo ma isi tofiga i le Perisitua Mekisateko ma le Arona (vaai MFF 107:58.)

• O a tiute o Fitugafulu i aso nei a o latou galulue ai i lalo o le taitaiga a le Au Peresitene Sili ma le Korama a le Toasefululua? (Vaai MFF 107:34.)

• O a ki, mana, ma le pule o loo i ai i le epikopo? (Vaai MFF 84:26–27; 107:13–17.) O a tiute o le epikopo i le avea ai o se peresitene o le Perisitua Arona? I le avea ai ma faitaulaga sili pulefaamalumalu o se uarota?

• E tusa ai ma le saunoaga a Peresitene Iaga, o le a le mea e fai e le epikopo e “galue ma le faamaoni i lana uarota”? (vaai 1 Timoteo 3:1–7.)

• E faapefea e i tatou o ni faiaoga asiasi poo faiaoga o aiga ona fesoasoani i le tausia o le Ekalesia?

• E faapefea ona faamatala e Peresitene Iaga i latou ua solitulafono?

• Sa saunoa Peresitene Iaga “o le tele o faafitauli i le va o [tagata] e mafua mai i le le femalamalamaai ae le o le taufaaleaga ma le loto mataua.” O le a lana fautuaga i le taulimaina o le le malamalama?

• O le a le mea e fia vaai i ai Peresitene Iaga i le aufono aoai? (Vaai MFF 107:71–84; 134:10.) E mafai faapefea e le “mana ma le atamai mai le Atua” ona fesoasoani ia i latou o loo faia faamasinoga i fono aoai? (Vaai MFF 121:41–42.)

• O a ni auala e mafai ai e i latou o loo taitaiina fono aoai a le Ekalesia ona “faitau ma malamalama” ia i latou o loo faia le aoaiga?

• O le a le saunoaga a Peresitene Iaga e uiga i le “faasalaina e faatatau i le agaga o loo i ai i lena tagata”? (vaai 3 Nifae 18:28–32.)

• O le a le saunoaga a Peresitene Iaga i le auala tatou te talia ai le faasalaga mai o tatou taitai? (Vaai MFF 95:1.)