Tamaoaiga Faaletino ma le Malo o le Atua

Pe a ou vaai atu i tagata o le lalolagi ma iloa atu lo latou vaivai, e mafai ona ou faapea atu, o le maualuga o le faavalevalea i loto o tupu, faipule, ma e silisili, ma i latou e tatau ona atamamai ma taualoa; pe a ou vaai atu ia i latou o loo latou faia ni mea matavale ina ia maua ai le tamaoaiga; o loo faananau, tauanau, naunau, ma tauva mo mea o lenei olaga, ou te manatu, o i latou o ni tagata valea, ua pupu o latou loto i mea o lenei olaga! … O se alii po o se tamaitai o le na te faatusatusa ‘oa o lenei lalolagi ma mea o nei aso ma mea a le Atua ma le atamai o le faavavau, e leai ni ona mata e vaai ai, leai ni taliga e faalogo ai, leai se loto e malamalama ai (DBY, 306–7).

A ou vaai atu i le lalolagi o tagata ma vaaia i latou o loo taufao, tausinio, tauva, ma o loo saili tagata uma taitoatasi ina ia faateleina lona ia lava lauiloa, ma ia faataunuuina ona lava faamoemoega, e aunoa ma lona amanaiaina o lona nuu, ma vaai maualalo i ona tuaoi—o loo saili, fuafua, ma iloilo toto’a i o latou itula e feala ai, ma pe a latou momoe foi latou te moemiti, “Pe mafai faapefea ona ou puleaina lo’u tuaoi? E mafai faapefea ona ou aveesea ona tamaoaiga, ina ia mafai ai ona ou lauiloa?” O se matuai manatu sese lava lenei… . O se tagata na te sailia le mamalu ma le lauiloa mo ia e ala mai meatotino a ona uso a tagata e le agavaa o ia i le faapotopotoga o e atamamai (DBY, 307).

O le umiaina o le tamaoaiga lava ia e le maua mai ai le fiafia, e ui lava o le a maua mai ai le faamafanafanaga, pe afai e mafai ona faafesuiai mo mea e talafeagai mo le tausiga o le olaga. Afai ae mauaina le tamaoaiga e ala mai lea i le gaoi po o le faomea, po o se isi lava auala le talafeagai ma le mamalu, o le fefe nei mauaina ma faasalaina o le a aveesea ai le fiafiaga faaletagata lava ia. Afai ae mauaina e se tagata le tamaoaiga i se auala mamalu, o le a i ai pea le lagona popole ina ne’i oo vave mai le oti ma aveesea ai lenei tamaoaiga mai ia te ia ae avea ma nisi. O a ni faamoemoega o ia te i latou i le lumanai, pe a mavae ona latou uia lenei lalolagi faanoanoa? Latou te leiloa se mea e tasi e uiga i le lumanai; e leai se mea latou te iloaina atu e na o le oti ma seoli. O le faamafanafanaga mausali ma le olioli e le uma o le a latou le iloaina (DBY, 314).

O le mauaina o auro ma ario uma o loo i le lalolagi o le a le faamalieina ai le agaga tuinanau o le tagata. O le meaalofa o le Agaga Paia o le Alii lava e mafai ona maua mai ai se mafaufau lelei, atoatoa ma faamalieina. Nai lo le saili atu mo auro ma ario, ae o le a tepa ae i le lagi ma taumafai e aoao le atamai seia oo lava ina e mafai ona e faatulagaina elemene o le natura mo lou lava faamanuiaina; ona amata ai lea i se taimi mulimuli ane ona e umiaina ‘oa moni (DBY, 305).

O loo anoanoai meatotino, ma auro ma siliva i totonu ma luga o le fogaeleele, ma ua tuuina atu e le Alii se vaega i lea, ma se vaega i se isi—o e amioleaga atoa ma e amiotonu—ina ia iloa ai pe o le a la latou mea e faia i ai, ae o ana mea uma lava. Ua ia tuuina mai mea e tele i nei tagata, ma, e ala i lo tatou faatuatua, onosai ma le galulue, o lea ua tatou faia ai o tatou fale lelei iinei, ma e toatele i latou ua tamaoaiga … . Peitai e le o ni a tatou mea, ma pau lava le mea e tatau ona tatou faia, o le taumafai lea e saili pe o le a le mea e finagalo le Alii tatou te faia i mea ua ia te i tatou, ona o atu ai lea ma ia faia. Afai tatou te faia se isi mea i luga atu o lenei mea, o lona uiga ua tatou laa atu i ni ituaiga pisinisi e le faatulafonoina. O la tatou pisinisi po o le galuega faatulafonoina, o le faia o le mea e finagalo le Alii tatou te faia, i mea ua ia tuuina mai ia i tatou e pei ona ia faatonuina, pe tatou te tuuina atu mea uma, tasi o vaesefulu, po o le sili atu foi (DBY, 305).

O alii ma tamaitai o loo taumafai e faafiafia i latou i le umiaina lea o le tamaoaiga po o le malosi o le a latou le mauaina, aua e leai se isi mea e mafai ona faafiafiaina ai tagata o le lalolagi ua na o le Talalelei lava a le Alo o le Atua, ma saunia ai i latou e olioli ai i le lagi iina ma le olaga a sau (DBY, 315).

E te leiloa ea o le umiaina o au meatotino ua pei o se ata lafoia, po o le sau i le taeao ao lei oo mai le susulu o le la i le aoauli, aua e le mafai ona e mautinoa lona puleaina mo sina taimi! O le aao le mavaaia lena o le Atua o loo puleaina ai (DBY, 305–6).

E le mafai ona tatou faatuatua atu i le mauaina o mea faaletino; ua na o sina taimi, ma o le faalagolago i ai o le a oo atu ai i se faanoanoaga i latou uma o e faatuatua i ai (DBY, 306).

E maeu le puleaina e le Tiapolo o se tagata e tapuai i mea faalelalolagi!(DBY, 306).

Ua sili atu lo’u fefe i le mana’o o o tatou Toeaiina nai lo lo’u fefe i seoli (DBY, 306).

O i latou o e mananao fua ma faaloloto, ua latou tulimatai atu i le mauaina o le lalolagi uma, e le o faigofie i taimi uma, ma o loo latou faia pea a latou fuafuaga ma tauivi pe faapefea ona mauaina lenei mea, o lena mea, ma le isi (DBY, 306).

O loo faaloloto tagata mo mea o lenei lalolagi. I totonu o o latou loto o loo latou mananao fua. E moni o mea o lenei lalolagi ua fuafuaina mo lo tatou lelei, ma ua maua ai e nisi tagata le fiafia e pei ona latou i ai iinei; ae o ‘oa e le mafai lava ona faafiafiaina ai le Au Paia o Aso e Gata Ai. O ‘oa lava latou ia latou te le mafai ona atiaeina se fiafiaga tumau; ae na o le Agaga mai luga na te mafaia ona faia lena mea (DBY, 306).

O le Au Paia o Aso e Gata Ai o e liliu atu o latou manatu i le sueina o tupe, o le a le pine ae o latou mauaina ni lagona le fiafia i sauniga o le maota o le Atua. Ua latou teenaina a latou tatalo, ua le naunau e totogiina soo se foai; o le tulafono o le sefuluai ua avea ma se matuai luitau tele ia i latou; ma o le a oo lava ina latou faagaloina lo latou Atua, ma o faamanuiaga o le lagi e foliga mai ua tapunia mo i latou—ma o le taunuuga uma lava lenei o lo latou manao i mea o lenei lalolagi, ma o le a le pine ae faaleagaina, ma o lo latou faaaogaina o le a mavae lea ma aveeseina mai ia i tatou (DBY, 315).

O le mauaina o mea o lenei lalolagi e le o se tamaoaiga moni lena, e le o ni ‘oa foi na, e le sili atu pe itiiti ifo foi nai lo mea o loo mauaina e tagata uma, i e amiotonu ma e amioletonu, i le Au Paia ma e agasala. E susulu ifo le la i e amioleaga ma e amiolelei; e faatotoina ifo e le Alii lana timu i luga o e amiotonu ma luga o e amioletonu [vaai Mataio 5:45]; ua tatou vaaia lenei mea i o tatou mata, ma mea foi ua tatou oo i ai i aso taitasi. O le Tupu o Solomona, le alii poto, na faapea mai, ua le sili i le tausinioga e televavave, ua le malo i le taua e ua malolosi, ua le i ai foi i e faautauta le ‘oa tele [vaai Failauga 9:11]. O le faamaoniga o lenei faaupuga e maua mai lea i mea o loo tatou vaai i ai i aso taitasi … . O e vaivai, gatete, ma e maualalalo o i latou na e masani ona manumalo i le taua; ma o e le malamalama, valea, ma le faautauta o le a tautevateva atu i latou i le ‘oa (DBY, 308).

O le ‘oa moni o loo i ai lea i le tomai e gaosia mai ai ni mea mai elemene po o mea o loo i ai i le laueleele mo lo tatou lelei. O le mana uma ma le mamalu lea e mafai e le ‘oa ona tuuina mai i o tatou luga ua na o se ata lafoia, ae o lena mea e maua lea i le malosi ma galuega a le faitau miliona o loo gapatia. O galuega faatonutonuina lelei o le malosiaga moni lena e faafetaiaia o tatou manaoga. Na te tuuina atu le mamalu uiga ese ia i latou o e pule, o aoaoga ma le tamaoaiga i taitai faalelotu ma faalemalo, ma faafetaiaia ai manaoga o le faitau fiaafe o miliona o atalii ma afafine i le lalolagi (DBY, 309).

O le tasi vaetolu po o le tasi vaefa o le taimi e faaaluina ina ia maua ai se tausiga ua lava lena, pe afai o au galuega o loo faatonutonuina lelei. E manatu tagata o le a latou mauoloa pe a latou galulue malolosi—e ala lea i lo latou galulue mo le sefuluono itula mai le luasefulufa itula; ae le o lena. O le toatele o nisi o tagata lelei o le Au Paia e toetoe lava a le mafai ona latou faaaluina se taimi e auai atu ai i sauniga faalelotu. O aso e ono ua sili atu ona lava nai lo le taimi tatou te manaomia e galulue ai (DBY, 311).

O la’u fautuaga lenei mo le Au Paia o Aso e Gata Ai i le aso. Taofi, aua le faatelevave. Ou te leiloa pe mafai ona ou mauaina se tagata i totonu o lo tatou nuu e le o moomoo ina ia mauoloa, o se tasi e manao ina ia ona mauaina mea uma ina ia mafai ona fesoasoani atu mo lona lelei ma le faafaigofieina. Tou te iloa e faapefea ona maua? “Lelei,” o le tali lea a se tasi, “afai ou te le faapena, ou te moomoo ia ou faapena; ae foliga mai e le o faamanuiaina a’u—o le faamanuiaina o se mea lena e faafeagai ia te au.” O le a ou tauina atu ia te outou le mafuaaga o lenei mea—ua tele naua lo outou vavevave; e le o lava lo outou auai i sauniga, e le o lava lo outou tatalo, e le o lava lo outou faitauina o Tusitusiga paia, e le o lava lo outou mafaufau loloto, o taimi uma lava o loo outou pisi ai i nisi mea, ma o lo outou vavevave ua outou leiloa ai le mea e tatau ona faia muamua. E le o le auala lenei e faamauoloaina ai. Ou te faamamafaina le faaaogaina o le upu lea “mauoloa” ina ia taitaiina ai le mafaufau, seia oo ai lava ina mauaina ‘oa e faavavau i le malo selesitila o le Atua. O lenei o loo tatou moomoo mo ‘oa i se isi ona tulaga, o loo tatou moomoo mo manuia o le olaga. Afai tatou te naunau ina ia tatou mauaina, ia tatou faia se galuega ina ia maua mai ai. Sei ou faafaigofieina atu lava lea faaupuga—o se tasi o olaga sili ona faigofie e mafai ona faaaogaina— “Ia saunia e tali soo se faamanuiaga,” ina ia mafai ona oo mai uaga o faamanuiaga, ae o loo mafai ona e faatumuina lau ipu (DBY, 310).

Afai e galulue tagata [taitoatasi] e tusa ai ma mataupu faavae ia, o le a malupuipuia ai lo latou faaolataga e faavavau, ua mautinoa foi lo latou mauaina uma o mea o loo faanaunau i ai o latou loto; afai e le oo mai i le aso, o le a mafai ona oo mai a taeao; afai e le oo mai i lenei olaga, o le a oo mai i le olaga a sau (DBY, 309).

O e matitiva o tagata na o le Atua, ma e fai mo latou tofi le nuu (DBY, 316).

O le tagata ua fiaai ma mativa e tutusa lelei lava lana aia i la’u meaai e pei foi o se isi tagata, ma e tatau ona ou lagona le fiafia e fesootai ma ia, pe afai e lelei lona loto, e pei foi o i latou o loo tele a latou mea, po o le i ai foi o tamaoaiga o le lalolagi. Ou te siitiaina i latou uma i luga, e le faatatau i lo latou mauoloa po o le tofiga o loo latou umia, ae faatatau i le ituaiga tagata o loo ia i i latou (DBY, 317).

O tagata matitiva o e auauna i le Alii latou te le faagaloina a latou feagaiga, ae o tagata matitiva a le Tiapolo latou te le amanaiaina a latou folafolaga (DBY, 317).

Ia tuu atu i le tagata mativa ina ia faamaoni, ia tuu atu i le tagata mauoloa ina ia saoloto, ma faia a la fuafuaga e fesoasoani ai i e matitiva, ina ia fausia ai le malo o le Atua, ae i le taimi foi lava lea e tasi o loo la faatamaoaigaina ai i laua lava, aua o le ala lena e fausia ai le Malo o le Atua (DBY, 317).

Afai e mauaina uma e le tagata mativa meatotino o loo faasili a le tagata mauoa, o le tele o i latou o le a faataugaina ona o le tuinanau i mea a le tino, ma faaleagaina ai i latou i lo latou faaaogaina. Talu ai ona o lenei mafuaaga o lea e le o manaomia ai e le Alii le tuuina uma atu e tagata mauoa o a latou mea i e matitiva. E moni lava ina ua alu atu le alii talavou ia Iesu i lona fia iloaina po o le a le mea na te faia ina ia faasaoina ai o ia, na ia tauina atu ia te ia, “Alu ma faatau uma atu au mea, ma tufatufa atu i e matitiva, ona ia te oe lea o faulaigaoloa i le lagi, i le e sau ai, ma mulimuli mai ia te au;” ma o le toatele o nisi o loo manatu na ia tau atu i le alii talavou ina ia alu atu ma avatu uma ana mea, ae le manaomia e Iesu lea tulaga, e lei fetalai atu foi o ia ina ia faapea ona fai, ae faigofie lava, “tufatufa atu i e matitiva” [vaai Luka 18:18–23] (DBY, 317–18).

O se matuai tauleagaina lava i soo se alii ma se tamaitai ua mafai ona soifua, lona le tausiaina o ona lava aiga, o o latou tagata matitiva, ma fuafua e faia se mea mo i latou e mafai ona latou faia (DBY, 318).

O a mea e faaaoga i ai ‘oa? Mo faamanuiaga, ina ia faia ai mea lelei. O lea ia tatou tuuina atu ai loa mea ua tuuina mai e le Alii i le mea silisili e mafai ona faaaoga i ai mo le atinaeina o lona Malo, ma le faalauiloaina o le upu moni i le lalolagi, ina ia mafai ai ona tatou iloa ma olioli ai i faamanuiaga o le Siona a le Atua iinei i luga o lenei fogaeleele (DBY, 307).

Afai, e te mauaina le faitau afe ma miliona, itiiti ifo pe sili atu foi, mai au galuega ma au sailiiliga mamalu, o lau matafaioi o le faaaogaina uma lea o mea ua e mauaina, i lau lava faamasinoga malamalama, ina ia atinaeina ai le Malo o le Atua i le lalolagi (DBY, 313–14).

Afai tatou te mauaina le faitauafe ma miliona o tupe ma tuuina atu na mea i le atinaeina o le Malo o le Atua ma tausia faalelei ana foafoaga, faatasi ai ma le manatu tasi i lona mamalu, o le a sili atu lo tatou faamanuiaga ma o le a sili atu foi lo tatou agavaa mo le faaolataga e pei o le tagata aisi o loo aisi mai lea faitotoa i lea faitotoa; e sili atu foi ona agavaa o le tagata mauoa faamaoni i faaaliga a Iesu Keriso e pei o le tagata mativa faamaoni (DBY, 314).

E tatau ona tatou mataala ma tatalo, ma fuafua lelei i a tatou talanoaga ma lavasiga, ma ia ola faalatalata i lo tatou Atua, ina ia le mafai e le alofa i mea o lenei lalolagi ona fetinaiina ai le upu moni faapelepele, ma ia lagona le sauniaina, pe afai e talafeagai ai, ina ia ofoina atu mea uma, e oo lava i o tatou ola, mo le Malo o le Lagi (DBY, 314).

Ia mataala, outou le fanauga a Isaraelu, ma ia faaeteete ina ia aua nei outou alolofa i le lalolagi po o mea a le lalolagi i o latou foliga mai, ma ia aua nei avea lo outou faasausili ma le faamaualuga, e faagaloina ai le Alii lo outou Atua. E le manaomia ona tatou toe popole mo auro ma ario, ma meatotino ua tuuina mo le lalolagi amioleaga, nai lo le eleele ma le palapala lea o loo tatou tutu ai (DBY, 314).

E ui lava o loo o’u umiaina le faitau miliona o tupe ma meatotino, e le faapea o le a avea lena ma alofaga ia te au mai le faia o galuega e faatatau i lo’u valaauga ina ia faataunuuina, e fuafua lava i lo’u malosi ma le mafai ona ou faia, ae sili ona alofaga mai ai le tagata sili ona mativa i totonu o le aai. O le tele lava ona faamanuiaina o i tatou i mea ua tatou maua, o le tele foi lena ona faamanuiaina o i tatou i tiutetauave; o le tele lava ona faamanuiaina o i tatou i le faautauta ma le mafai ona galue, o le tele foi lena ona tuuina o i tatou i vaega e talafeagai ai le faaaogaina o lena faautauta ma le mafai ona galue i le faasalalauina o le amiotonu, o le faailoaina atu o le agasala ma le malaia, ma le faaleleia o le tulaga o tagata soifua. O le tagata e na o le tasi le taleni ma le tagata e lima taleni, na i ai ni o laua tiutetauave e tusa ai ma faamaumauga [vaai Mataio 25:14–30]. Afai e i ai so tatou lalolagi o tamaoaiga, ua i ai so tatou lalolagi o tiutetauave (DBY, 315).

• Aisea e valea tele ai le pupu o o tatou loto i mea a lenei lalolagi? E mafai faapefea ona pupu o tatou loto i mea a le Atua?

• E tusa ai ma le faamatalaga a Peresitene Iaga, aisea ua faamanuiaina ai isi i ‘oa? O a ni mea matautia o loo faatalitali mai mo i latou o e toilalo “i le faia o le mea o loo finagalo le Alii latou te faia i mea ua ia tuuina atu ia te i [latou]”? E mafai faapefea ona e iloa o loo mulimuli i se “faiga faapisinisi e le faatulafonoina”? O a ni mea na oo ia te oe i lou fetufaai atu lea o ni au meatotino ao e taumafai e te ola ai i le talalelei?

• Aisea e taitaiina atu ai e le faalagolago i ‘oa faaletino i tatou i le faanoanoa? O le a se faamaoniga ua e vaaia e tatau ai ona tatou fetufaai atu le atugaluga o Peresitene Iaga e uiga i le manao o loo i loto o tagata? E mafai faapefea ona tatou teenaina nei ituaiga faafitauli?

• O le a le mea e tupu ia i latou o e “liliu atu o latou loto i le sailia o tupe”? E faapefea ona liliueseina e le foai sese o tupe ia tagata mai le malumalu, tatalo, ma sefuluai?

• O le a le “oa moni”? (Vaai foi MFF 6:7.)

• O le a le fautuaga a Peresitene Iaga ia i latou o e latou te faaaluina le tele o o latou taimi e taumafai ai ina ia mauaina tamaoaiga faalelalolagi?

• O le a le mea e tatau ona tatou faia ina ia maua ai “‘oa e faavavau i le malo selesitila o le Atua”?

• Na saunoa mai Peresitene Iaga e faapea: “Aua le vavevave… . E le o le auala lenei e mauoa ai.” O le a sou manatu o le a le uiga o lana saunoaga? E mafai faapefea ona e faatatauina lana fautuaga i lou olaga?

• O a ni o tatou uiga e tatau ona i ai i le fesoasoani atu i e matitiva? O le a le mea o loo moomia mai e le Alii mai e matitiva? Mai e mauoa? (Vaai foi Mosaea 4:16–28.)

• Aisea e taua ai le tagata lava ia nai lo ‘oa faaletino?

• O le a lo tatou tiutetauave i tagata o le aiga e le o tagolima?

• O le a le tiutetauave o i latou o loo mauaina ia ‘oa faaletino?

• E mafai faapefea e le tagata mauoa ma le tagata mativa ona foai atu i le atinaeina o le malo? O a faamanuiaga o loo teuina mo i latou o e latou te faia faapea?