O La Tatou Sailiga mo le Molimau Moni ma le Patino a le Tagata Lava Ia

O le tele o tagata o lenei lalolagi, latou te matele atu lava i le faia o le mea tonu. E moni lena mea. E i ai se mea o loo i totonu o tagata taitoatasi, na te lapataiina le tagata, ma o le a i ai le malosi uma e pulea ai, afai na te faatagaina ina ia fai, o le a faapea ona taitaiina atu ai i le upu moni ma le mama [vaai Moronae 7:15–17] (DBY, 423).

O tagata faamaoni, i le lalolagi atoa, ua latou naunau ina ia iloa le ala sao. Sa latou saili i ai, ma o loo saili pea i ai. O loo i ai i le lalolagi tagata o loo latou saili pea i taimi uma ma le maelega ina ia iloa ala o le Alii. O i latou na, ua latou fua mai ni fua lelei, e tusa ai ma lo latou malosi (DBY, 421).

Sei vagana ua latou lafoaia le alofa mutimutivale o le Atua, ae o loo i ai se mea i totonu o tagata uma, lea o le a faafiafiaina ai i latou, ina ia tulai ma teena le leaga, ae taliaina le upu moni. E leai se tagata i lenei lalolagi e faatauvaa, ae afai e na te vaai i totonu o lona lava loto, ma faamamaluina alii ma tamaitai o loo auauna i le Atua—o le mama ma le paia—ma inoino i ana uo o loo agasala e pei o ia lava. E leai se tagata i lenei lalolagi, i le alofa tunoa o le Atua, e le faafiafiaina i le lelei, i le upu moni, ma le mama, sei vagana ai ua ia agasala ma lå toe tauivi ai le Agaga o le Alii, ina ia faamalamalamaina lona mafaufau (DBY, 421).

Ua faamaumauina faapea, o nisi e i ai mata e vaai ai, ae le vaai; o taliga e faalogo ai, ae le lagona; o loto o loo i ai, ae le malamalama. O outou ua outou mafaufau i le faaleagaga, o loo i ai le tofamamao i o outou mafaufau mataala, … e mafai ona malamalama e faapea, o le mana lena na tuuina atu ia te outou fiafiaga faaletino, o le mana foi lava lena o le Atua na tuuina atu ia te outou le malamalama i le upu moni [vaai MFF 88:11–13]. O le mana mulimuli lena e i totonu… . e faitau afe ma afe i latou ua latou iloa, e ala lea i o latou fiafiaga i totonu e lå mavaaia, o mea sa i ai, o mea o loo i ai, ma mea o loo i le lumanai, e faapea foi i le lanu o se fasi ieie i la latou vaai atu i fafo. Afai e aveesea mai lenei malamalama o loo i totonu ia te i latou, o le a latou leaga loa na i lo le taimi muamua, e le mafai ona latou malamalama, ma o le a latou liliuese mai mea a le Atua (DBY, 421–22).

O le agaga o loo i totonu o nei tino, e alofa lava o ia i le upu moni, e alofa foi i le malamalama ma le atamai, e alofa foi i le mama, e alofa i le Atua ma le amioatua; ae talu ai ona e matuai vavalalata lava ma le tino, o lea e fefiloi ai o laua lagona, ma o lo laua tuufaatasia e manaomia lea i le umiaina o se atoatoaga o le olioli ia i laua uma [vaai MFF 93:33–34], o lea e moni lava e gauai atu le agaga ina ia aafia i le agasala, lea o loo i totonu o le tino, ma o le a faatoilaloina e le agasala ma le mana o le Tiapolo, sei vagana ua faapupulaina e lena agaga lea e faamalamalamaina soo se tagata e oo mai i le lalolagi, ma le mana o le Agaga Paia lea e tuuina mai e ala mai i le Talalelei (DBY, 422–23).

Soo se mea lava ua talaiina atu i ai le Talalelei a Iesu Keriso, i aso nei po o aso anamua, sa fetaiai pea ma se vaega o tagata e foliga matagofie le upu moni ia te i latou ma e faapei o le Atua, ma o le agaga o loo i totonu o i latou, e uunaiina i latou ina ia taliaina; ae peitai, latou te iloaina le tele o mea o lenei lalolagi latou te aafia ai, ma e tele foi mea latou te fiafia i ai, latou te popole nei tei ua le toe maua pe afai latou te taliaina le talalelei, ma ua latou manatu ai faapea o le a latou le taliaina le talalelei, ma o i tonu foi lea, o le a toe tulai mai ai le feteenaiga. E toaitiiti nisi o le a latou faatoilaloina manaoga o le tino, ae mulimuli atu i taitaiga a le agaga; ae o le toatele lava o nei ituaiga tagata e faatosinaina lava e o latou tuinanauga ma pipii atu i mea o loo latou faanaunau i ai (DBY, 434).

O le a le mea ua tatou o mai ai iinei? Ina ia aoao ia fiafia atili, ma ia faateleina le malamalama ma le atamai (DNW, 27 Sept. 1871, 5).

E le tatau lava ona gata lo tatou aoaoina, seiloga lava ua tatou liliuese… . E mafai ea ona outou malamalama i lena mea? (DNW, 27 Feb. 1856, 2).

IfAfai e mafai ona tatou maua le avanoa, o le a tatou faatamaoaigaina o tatou mafaufau i le malamalama, faatumuina nei tino faaletino i le ‘oa o le atamai faalelagi (MS, Oct. 1862, 630).

O a tatou sailiiliga uma faaleaoaoga, o loo i ai lea i le galuega a le Atua, aua o nei galuega uma, e faavaeina ai le upu moni i le lalolagi, ma, ina ia mafai ai ona faateleina lo tatou atamai, faautauta, malamalama i le mana o le faatuatua ma le poto o le Atua, ina ia mafai ai ona tatou agavaa ina ia nonofo i vaega maualuluga o le olaga ma le atamai, nai lo le mea o loo tatou fiafia ai nei (DNSW, 25 Oct. 1870, 2).

E mafai e se tagata ua alofa i le lalolagi ona ia faatoilaloina lena alofa, ina ia maua ai le atamai ma le malamalama, seia oo ai lava ina ua ia vaai i le tulaga moni o mea e pei ona i ai, ona ia le alofa ai lea i le lalolagi, e pei ona ia vaai atu i ai (DNW, 28 Nov. 1855, 2).

Tatou saili ia le Alii ma o tatou loto atoa, ona tuueseeseina ai lea o i tatou mai le lalolagi; e leai se tagata e fiafia ai i lenei, i lena, po o le isi mea, sei vagana ua ia faia i ai se mea lelei; ina ia siitia ai le fiafia e faavavau o tagata, ma saunia i latou ina ia faaeaina i le tino ola pea… . E mo outou ma au, ina ia tatou mauaina le faautauta, ina ia saunia ai mo le faaeaga ma olaga e faavavau i malo o loo i ai nei i le faavavau (DNW, 14 May 1853, 3).

O se alii po o se tamaitai ua naunau i le fia iloaina o le upu moni, e ala lea i lona faalogo atu i le Talalelei a le Alo o le Atua ua talaiina atu i le moni ma le faigofie, e tatau ona ole atu i le Tama, i le suafa o Iesu Keriso, pe moni. Afai latou te le uia lea ala, latou te taumafai e finau ia i latou lava i le talitonuga e faapea, o loo latou faamaoni lava e pei ona mafai ai e soo se alii ma soo se tamaitai i luga o le fogaeleele; ae leai, o loo latou faatamala lava i mea o loo sili ona latou fiafia i ai (DBY, 430).

Faatali seia outou sailiili ma toe sailiili ma mauaina le faautauta ina ia malamalama ai i mea ua matou talaiina atu… . Afai o le galuega a le Atua, o le a tumau [vaai Galuega 5:38–39] (DBY, 435).

O se tiute ma se avanoa lenei o le Au Paia o Aso e Gata Ai ina ia iloaina o lo latou talitonuga e moni (DBY, 429).

Ia maua e tagata uma taitoatasi se atamai mo ia lava, e iloa ai o lenei galuega e moni. Matou te le mananao ina ia outou faapea mai e moni, seiloga tou te iloa e moni; ma afai tou te iloaina, o lena atamai e tusa lava lona lelei, e pei ona afio ifo le Alii ma tau atu ia te outou (DBY, 429).

O se avanoa faapitoa ma se faamanuiaga o le Talalelei paia ia i latou e talitonu faamaoni, le iloaina o le upu moni mo i latou lava (DBY, 429).

Ou te le manao i tagata ina ia o mai ia te au po o o’u uso nei, mo le molimau e faamaonia ai le moni o lenei galuega; ae ia tuu atu lava ia i latou, ina ia latou suesue i Tusitusiga Paia o le upu moni paia, ma o iina o le a faasino atu ai le ala ia i latou, e matuai manino lava e pei o se laupapa faasino, e ta’u atu ai i tagata faimalaga le ala tonu e ui ai. O iina o le a faasino atu latou e o i ai, e le faasino atu i … soo se Aposetolo po o se Toeaina o i Isaraelu, ae o le Tama, i le suafa o Iesu Keriso, ma fesili atu mo faamatalaga o loo latou manaomia. Pe mafai ea e i latou e uia lenei ala ma le faamaoni ma le moni ona latou mauaina ia faamatalaga? Pe o le a liliuese ea le Alii mai ia te i latou ua loto faamaoni, o loo latou sailia le upu moni? E leai, o le a ia le liliuese lava; o le a ia faamaonia atu nei mea uma, e ala lea i faaaliga a le Agaga. Ma afai o le a tatalaina le mafaufau i faaaliga a le Alii, o le a ia vave faamalamalamaina i latou, nai lo se isi mea e mafai e mata ona vaai i ai. E le o mea e mafai ona tatou vaaia i o tatou mata—e mafai ona taufaasese—ae o mea e faaalia mai e le Alii mai le lagi, lea e mautinoa ma mautu, ma tumau e faavavau (DBY, 429–30).

E tatau ona tatou maua le molimau a le Alii o Iesu, ina ia mafai ai ona tatou iloaina le va o le moni ma le sese, malamalama ma le pouliuli, o le tagata o loo i le Atua, ma le tagata e le o i le Atua, ma ia tatou iloa pe faapefea ona faavasegaina mea lelei ma mea leaga … . E leai se isi auala po o se isi metotia e matuai aoaoina ai se tagata ina ia mafai ai ona avea ma se Au Paia a le Atua, ma saunia ai o ia mo se mamalu selesitila; e tatau ona i ai ia te ia le molimau o le agaga o le Talalelei (DBY, 429).

O outou ma au, e tatau ona i ai le molimau a Iesu i totonu ia i tatou, pe o le a leai sona aoga mo i tatou e faafoliga ai o ni auauna a le Atua. E tatau ona i ai lena molimau ola i totonu ia i tatou (DBY, 430).

E tautino atu lava e le upu moni o ia lava i le tagata faamaoni, e le afaina po o le a le faigofie e tauina atu i ai, ma afai e mauaina, e foliga mai ua leva ona tatou masani i ai i o tatou olaga atoa. O le molimau a le toatele o le Au Paia o Aso e Gata Ai e faapea, ina ua latou faatoa faalogo i le Talalelei a o talaiina, … e ui lava e matuai fou ia i latou uma, ae foliga mai ua leva ona latou malamalama i ai, ma sa pei ua leva ona avea i latou ma ni “Mamona” talu mai le amataga [vaai Ioane 10:27] (DBY, 432).

O le a tutu mai tagata iinei ma latou faapea mai latou te iloa o le galuega lenei a le Atua, o Iosefa Samita o se Perofeta, o le Tusi a Mamona e moni, o faaaliga na auala mai ia Iosefa Samita e moni, ma o le tisipenisione mulimuli lenei o le atoatoaga o taimi, lea ua faatulagaina e le Atua e faapotopotoina ai Isaraelu mo le taimi mulimuli, ma togiolaina ma faatuina ai Siona … E faapefea ona latou iloaina lenei mea? O le a iloa e tagata, ma o le a faaauau ona latou iloa ma malamalama i le tele o mea, e ala i faaaliga a le Agaga, ona o le tulaga o o tatou tino lea e faigata ona faamatalaina. O le tele o faamatalaga taua lea e auala mai i le mana ma le molimau a le Agaga Paia lava ia… E na o le pau lava lenei o le ala e mafai ai ona outou faailoa atu se atamai i mea e le vaaia a le Atua [vaai 1 Corinthians 2:9–14; 1 Korinito 2:9–14; 12:3] (DBY, 430).

E leai se mea e itiiti ifo ai le Agaga Paia … na te mafai ona faamaonia atu ia te outou o le galuega lenei a le Atua. O tagata e le musuia e le Atua e le mafai e lo latou faautauta faalelalolagi ona faamaoniaina lona sese, pe malo foi i ai; e le mafai foi e lo latou lava faautauta ona faamaoniaina e moni, pe mo i latou po o nisi foi. O lo latou le mafai ona malo mai ai, e le mafai ai foi ona faamaonia ai lo latou i ai i le Malo o le Atua, aua e tele manatu ma faatulagaga i le lalolagi, e le mafai ona teenaina e ala lea i le poto o le lalolagi, lea e sese lava. E leai se isi mea e sili atu nai lo le mana o le Silisiliese, na te faamalamalamaina le malamalama o tagata, e mafai ona faatinoina lenei upu moni mamalu i le mafaufau o le tagata (DBY, 430–31).

E faapefea ona tatou iloa le leo o le leoleo mamoe lelei mai le leo o se tagata ese? E mafai ea e se tagata ona tali lenei fesili? Ou te mafaia. E matuai faigofie lava. I soo se tagata mafaufau lava i le lalolagi, ou te faapea atu, e mafai ona faaseseina lou mata, e faapena foi ia te au; e mafai ona faaseseina lou taliga, e mafai foi ia te au; o le pa’i o lou lima e mafai ona faaseseina ai, e mafai foi ia te au; ae o le Agaga o le Atua ua faatumuina ai le tagata i faaaliga ma le malamalama o le faavavau, e le mafai ona faaseseina—o le faaaliga e sau mai le Atua e le taufaasese. Afai e faailoa atu e se tagata ua faatumulia i le Agaga o le Atua le upu moni o le lagi, ma lagonaina e le mamoe [vaai MFF 29:7], o le a ulufia e le Agaga o le Alii o latou agaga ma goto ifo ai i le taele o o latou loto; o le molimau a le Agaga Paia e puna ae pea ia i latou, ma o le a latou vaai ma malamalama mo i latou lava (DBY, 431).

E i ai se molimau e tasi lava—le molimau e tasi, lea e avea ma faamaoniga o le Talalelei a le Alo o le Atua, ma o le Agaga lena lea na ia faalauteleina atu i ona soo. Ia faia lona finagalo, ona tatou iloa ai lea pe na te tautala mai i le pule a le Tama pe o ia lava. Ia tatou faia e pei ona ia poloaiina ai i tatou, ma ia tatou iloa e ala i aoaoga, pe mai le Atua pe leai [vaai Ioane 7:16–17]. E na o faaaliga lava a le Agaga lea e mafai ai ona tatou iloa mea a le Atua (DBY, 431–32).

Ia maelega ma tatalo. O lou avanoa lou iloaina e oe lava o loo soifua le Atua ma o loo Ia faia se galuega i nei aso e gata ai ma o loo tatou faamamaluina Ana auauna.. Ia ola mo lenei atamai ma o le a outou mauaina lava. Ia manatua a outou tatalo ma ia filiga i le agaga (LBY, 245).

O la’u molimau e faavae i aafiaga, i luga o mea na ou oo au lava ia i ai, e o faatasi ma mea na ou mauaina e ala lea i lo’u mata’ituina o isi… . E faalauteleina atu lava e le upu moni faalelagi o ia lava i manatunatuga o tagata uma ma lo latou faatuatua; ae faapitoa ai lava i lagona o i latou o loo mananao ina ia faamaoni ia i latou lava, i lo latou Atua, ma o latou tuaoi. … Afai e mafai e se tagata ona ia mauaina sina mea itiiti, o le a faamaonia ai e mafai ona latou mauaina nisi mea e sili atu. Afai e mafai ona latou mauaina le mataupu faavae muamua ma le lua ma se lagona tonu, e mafai ona latou mauaina nisi mataupu faavae e sili atu (DBY, 433).

O la’u molimau e sa’o… . Ou te iloa o loo susulu le la, ou te iloa o loo o’u ola ma e i ai so’u tino, ma ou te molimau atu e i ai se Atua, ma o loo soifua Iesu Keriso, ma o ia o le Faaola o le lalolagi. Pe ua e oo ea i le lagi ma e aoao ai i lona faafeagai? Ou te iloa o Iosefa Samita sa avea ma se Perofeta a le Atua, ma e tele ana faaaliga. E i ai se tasi e mafai ona le faamaoniaina lenei molimau? E mafai e soo se tasi ona finau mai i ai, ae leai se tasi i le lalolagi e mafai ona ia faaseseina. Ua tele foi a’u faaaliga; ua ou vaai ma faalogo i ai, ma ou iloa ai o nei mea e moni, ma e leai se tasi i le lalolagi e mafai ona ia faaseseina. O le mata, o le taliga, o le lima, ma faalogona uma e mafai ona faaseseina, ae o le Agaga o le Atua e le mafai ona faaseseina; ma afai e musuia e lena Agaga, o le a faatumulia loa le tagata atoa i le atamai, e mafai ona ia vaai i se mata faaleagaga, ma iloa mea e sili atu nai lo le malosi o se tagata e teenaina ai. O le mea ua ou iloaina e uiga i le Atua, e uiga i le lalolagi, e uiga i faigamalo, ua ou mauaina lea mai le lagi, e le na o lo’u lava malosiaga, ma ou te tuuina atu ai i le Atua le mamalu ma le viiga (DBY, 433).

O se tasi o uluai mataupu faavae o le faaolataga, o le faamasani lea ma lo tatou Tama ma lo tatou Atua. O loo aoao mai e Tusitusiga Paia e faapea, o le ola e faavavau foi lenei, ina “ia latou iloa oe, le Atua moni e toatasi, ma Iesu Keriso o le na e auina mai [vaai Ioane 17:3];” e pei lava o le faaupuga lea e leai se tagata e mafai ona olioli pe saunia foi mo le ola e faavavau e aunoa ma lenei atamai (DNW, 18 Feb. 1857, 4).

Ua ia te i tatou le folafolaga, afai tatou te saili muamua le malo o le Atua ma lana amiotonu, o le a faaopoopoina mai ai lea o ia mea uma ia i tatou [vaai 3 Nifae 13:33]. E le tatau ona le faatuatuaina i tatou, ae ao ona tatou saili muamua pe faapefea ona tatou faamalieina le Atua lo tatou Tama; ia tatou saili pe faapefea ona tatou faasaoina i tatou lava mai mea sese o loo i ai i le lalolagi, mai le pouliuli ma le le talitonu, mai agaga faalialia ma le taufaasese lea o loo feoai nei i le fanauga a tagata ina ia faaseseina, ma ia aoao ina ia iloa pe faapefea ona faasaoina ma faaolaina i tatou lava i luga o lenei fogaeleele, ina ia talai atu le talalelei, fausia le malo, ma faavaeina le Siona a lo tatou Atua (DNW, 11 Jan. 1860, 1).

Ou … . te fiafia tele e manatunatu ma talanoa e uiga i mataupu faavae e faavavau. O lo tatou faaolataga e aofia ai lo tatou iloaina o na mataupu faavae e faavavau, ma ua fuafuaina i lo latou natura e faafiafia ma faamafanafanaina ai i tatou. Pe na faatulagaina ea lena faamoemoega e faavavau i totonu ia te au, lea e fafagaina i luga o le upu moni e faavavau, ina ia faatafunaina? E leai… . Saili atu i le Alii mo lona Agaga, e aunoa ma se faavaivai i au taumafaiga, seia oo lava ina mafuta lona Agaga i totonu ia te outou e pei o afi mumu tetele. Ia faapupulaina pea le malamalama o le Alii i totonu ia te outou, ona lelei lea o mea uma (DNW, 11 Jan. 1860, 2).

O loo ia te i tatou upu o le ola, ua ia te i tatou le avanoa o le mauaina o le malumalu, tino ola pea, ma ola e faavavau, pe o le a outou mauaina ea nei faamanuiaga? Pe o le a outou faaaluina ea o outou olaga ina ia maua ai se nofoa i le malo o le Atua, pe o le a outou nonofo ea e aunoa ma ni taumafaiga ma o atu ai i seoli? (DNW, 1 Oct. 1856, 3)

Tauivi ina ia amiotonu, e le mo se isi lava faamoemoega, ae talu ai ona o le amiotonu e matagofie, mama, paia, manaia, ma faaeaina; ua fuafuaina ina ia avea ai le agaga ma se agaga fiafia ma tumu i le olioli, i le tino o le tagata atoa, ua faatumuina i le malamalama, mamalu, ma le atamai (DBY, 428).

• E tusa ai ma le faamatalaga a Peresitene Iaga, o le a le mea lea e taitaiina “se vaega toatele o tagata o le lalolagi” ina ia faia le mea e sao ma saili le upu moni?

• Aisea e faatoilaloina ai le toatele o tagata ina ia le ola amiotonu e tusa lava pe ua maea ona latou mauaina se molimau o le upu moni? O le a se mea na sili ona fesoasoani ia te oe, ina ia e ola ai, e tusa ai ma le molimau na e atinaeina?

• O a faamoemoega mo taumafaiga faaleaoaoga e tatau ona i ai? O le a se mea e mafai ona tatou faia, ina ia faatoilaloina ai le alofa i mea faalelalolagi?

• HE mafai faapefea ona tatou iloaina mea moni a le Atua mo i tatou lava? E faapefea ona fesoasoani se molimau ia Iesu Keriso ia i tatou, ia tatou iloa ai le eseesega i le va o le moni ma le sese?

• O le a le ala e tasi lea e mafai ai ona tatou iloa o le talalelei e moni, o Iesu o le Keriso, ma o loo tatou i ai i le galuega a le Alii? O a ni mea na e oo i ai na aoaoina ai oe, e mafai e le Agaga Paia ma o le a ia faa-aafiaina ai lou olaga pe afai e te faatagaina o Ia ina ia faapea ona fai?

• Aisea e le mafai ai e le faautauta faalelalolagi ona faamaonia pe le faamaonia foi, le i ai o le Atua, ma le moni o le talalelei? E ui ina mafai ona faaseseina o tatou faalogona faaletagata i le sailiga o le upu moni, ae o le a le saunoaga a Peresitene Iaga i le mea e le “mafai ona faaseseina”?

• Aisea na mafai ai e Peresitene Iaga ona tuuina atu se molimau malosi faapena? E mafai faapefea ona tatou faamalosia a tatou molimau? O le a se mea e mafai ona e faia, ina ia avea ai oe ma se molimau malosi o le upu moni a le Atua?

• O le a le folafolaga na tuuina atu e le Alii ia i latou o e “saili muamua le malo o le Atua ma lana amiotonu”?

• HowE faapefea ona fesoasoani ia i tatou le iloaina o mea a le Atua i le mauaina o le faaolataga? E mafai faapefea ona maua so tatou “nofoaga i le malo o le Atua”?