Faigamalo Faalelalolagi ma le Malo o le Atua.

Afai e solia e se malo tulafono lelei atoatoa ma faapologa i soo se tasi o ona tagatanuu po o se isi malo, seia oo lava ina tumu le ipu o le amioleaga, e ala i gaoioiga e i lalo o lana lava puleaga, o le a aveeseina faamalosi e le Atua i latou o loo pule ai mai lo latou malosiaga, ma o le a faagaloina i latou; ma o le a ia aveina nisi tagata, e ui ina matitiva ma le aoga, ma inosia e malo lauiloa, ma o le a ia tuuina atu ia te i latou mana ma le faautauta; ma o le a faateleina i latou ma uluuluola, seia oo lava ina avea i latou ma se atunuu maoae i le lalolagi (DBY, 357).

O malo maoae ma silisiliese e faatuina e ia i luga o le tumutumu, ina ia faataunuuina ai ona faamoemoega e le mafai ona iloa, ma o lona lava lotomalie na te aveeseina ai ma leiloloa ai e pei o nisi o mea i aso anamua ua matuai galo atu lava. O nei suiga uiga ese o loo faaautu ma saunia ai le ala mo le faailoaina mai o lona Malo i aso e gata ai, lea o le a tumau pea e faavavau i le silisiliese ma le mana seia oo ina liliuina e se filemu paia, tumau, faalelotu ma faaupufai ia loto o e matitiva i le olioli i Le e Paia o Isaraelu, ma o lona Malo o loo manumalo i soo se mea (DBY, 357).

O se faigamalo e puleaina e le Atua [o se] malo lea e faataunuuina ana tulafono uma i le amiotonu, ma o ona tofiga e i ai le mana lea e maua mai le Silisiliese (DBY, 354).

Afai o le Malo o le Atua, po o se faigamalo faaleAtua, ua faavaeina i le lalolagi, o le tele o pulega o loo i ai nei o le a faamutaina (DBY, 354).

O le a le faatagaina se tasi nuu ina ia faatulagaina i latou e tetee atu i se tasi e faamalosia i latou e mulimuli i a latou faiga; o le a le faatagaina le isi lotu e faasaua atu i le isi aua e eseese o latou talitonuga faalelotu ma le ituaiga tapuaiga. O le a matuai puipuia lelei tagata uma i fiafiaga uma faalelotu ma aia faatagata lautele, ma e leai se setete, leai se malo, leai se nuu, e leai se tagata o le a ia mauaina le avanoa o le faalavelave fua i aia tatau a le isi; o le a le tulai mai le isi nuu Kerisiano ma faasaua atu i le isi (DBY, 354).

Po o ai lava e ola ina ia vaai i le Malo o le Atua ua faavaeina ma le atoatoa i le lalolagi, o le a vaai foi i se malo o le a puipuia aia tatau a tagata uma lava. Afai o lena malo o loo nofotupu mai nei … o le a outou vaai ai i le Katoliko Roma, o le Katoliko Eleni, o le Episetolo, o le Perepereane, o le Metotisi, o le Papatiso, o le Femoumouai, o le Saluu, o le [Hinitu], o le [Mosalemi], ma vaega uma o tagata tapuai e matuai puipui lava i o latou aia uma ma avanoa po o ai latou te tapuai i ai, o le a le mea latou te tapuai ai, pe a latou fiafia i ai, e le faalavelave ai fua lava i aia tatau a isi. Pe naunau ea se tagata faamaoni i se isi saolotoga sili atu e tusa ai ma lana faamasinoga tonu? (DBY, 355).

E mafai faapefea e se faigamalo ua filifilia ona tumau? E na o le tasi lava le auala e mafai ai ona tumau. E mafai ona tumau; ae faapefea? E mafai ona tumau, e pei ona tumau o le malo o le lagi, i luga o le papa o le upu moni ma le mama; ma e na o le pau lena o le faavae e mafai ai e se faigamalo ona tumau (DBY, 355).

Ou te manao i se malo lelei, ma ou te manao ina ia tonu ma sao lona faatautaiga. O le malo o le lagi, afai e puleaina e le amioleaga, o le a avea ma se tasi o malo sili ona leaga i luga o le fogaeleele. E le afaina po o le a le lelei o se malo, seiloga e puleaina e ni tagata amiotonu, o se malo leaga o le a puleaina e tagata amioletonu (DNW, 3 June 1863, 2).

E leai se tagata e agavaa e pule, taitai, ma faatonutonu, sei vagana ua ia … gauai atu ina ia usiusitai i le tulafono, ma faamaonia lona agavaa, e ala lea i le usitaia o le tulafono o loo i ona luga, ina ia avea ai o ia ma pule o lena tulafono (DBY, 357).

[O se malo lelei e manaomia ai se taitai e] mafai ona fesootai ma le malamalama o tagata, e tusa ai ma lo latou malosi, mo faamatalaga o mea uma e faatatau i le puleina ma le tonu o le Malo. E tatau ona ia malamalama lelei po o a tulafono faaletaitaiga o le a faamanuiaina ai le malo. E tatau foi ona ia te ia le malamalama ma le faatulagaina lelei, ina ia faaaogaina ma le faautauta i le tofiaina o taitai, e tusa ai ma le faatulagaga i totonu o lana pulega ma filifilia ai na o tagata lelei ma mafai ona tauaveina tofiga. E le tatau foi ona faapea e faataunuuina na o manaoga tonu ma le faatulafonoina o i latou na lagolagoina o ia, ae e tatau foi ona mafai ona ia faapupulaina lo latou malamalama ma faasa’o la latou faamasinoga. Ma o au ofisa uma lava i se pulega moni ua filifili ma le saoloto o le a galulue pea mo le puipuia o aia tatau uma, e tusa lava po o le fea vaega (DBY, 363).

E tatau i tagata ona taulai atu o latou lagona, o o latou aafiaga, ma o latou faatuatua ina ia filifilia ai tagata lelei e mafai ona avea ma o latou Peresitene, pe afai e leai sana mea e ai e sili atu nai lo o le pateta ma le masima—o se tagata o le a le saili ina ia sili atu o ia nai lo o tagata na filifilia o ia, ae ia faamalieina e ola e pei ona ola ai i latou, ia laei i ofu e pei ona latou oofu ai, ma o mea lelei uma, e tatau ona avea o ia o se tasi o i latou (DBY, 363).

Matou te mananao i tagata latou te puleaina le malo, ia sili atu ona latou popole ma sili atu ona alolofa i le soifua lelei o le atunuu nai lo auro ma ario, o le taualoa, po o le lauiloa (DBY, 364).

O le puleaina lelei o le tagata lava ia o le faavae lea o faigamalo lelei uma, e tusa lava po o le lagi po o le lalolagi… . O malo o loo puleaina e lima o tagata leaga e tatau ona faamutaina ona o le oi o tagata, ae o se malo e pulea e lima o tagata amiotonu o le a tumau, ma o ona malosiaga e oo atu i le lagi (DBY, 355).

Afai tatou te ola i lo tatou talitonuga faalelotu, ava i lo tatou Atua ma lana Perisitua, ona tatau lea ona tatou ava i faigamalo ma tulafono atoatoa uma o i ai i le lalolagi… . I atunuu, malo ma faigamalo eseese o le lalolagi e tatau ona maua ai ni tulafono, o ni aiaiga ma faatulagaga e lelei ma ua mafai ona faia mo le tagata i le olaga nei (DBY, 358).

Pe o tatou ea o ni tagata faaupufai? Ioe, e matuai polotiki aiai lava. Ae o le fea vaega e te au i ai pe e te palota foi i ai? O le a ou tauina atu ia te outou po o ai tatou te palota i ai: o le a tatou palota i le tagata o le na te lagolagoina ia mataupu o le saolotoga lautele ma talitonuga faalelotu, o le tagata na te iloa le mea sili ma e lelei lona loto ma lona faiai i le avea ai ma se faipule; e le popole i sina sene apa e tusa lava po o ia o se whig, o se democrat, … po o se republican, … po o se isi foi mea. O a tatou vaega faaupu fai na (DBY, 358).

O i tatou, e pei foi o isi tagatanuu lelei, e tatau ona tatou saili atu ina ia tuu tagata faapena i le pulega o le malo, o i latou o le a latou lagonaina ia matafaioi ma tiutetauave o loo latou i ai e mo ni tagata maoae; o i latou o le a latou lagonaina ma iloa le taua o le faatuatua ua tuuina atu ia te i latou e ala lea i le leo o tagata na valaauina i latou ina ia puleaina le tulafono (DBY, 362).

O ai tatou te mananao e faatumuina o tatou ofisa lautele? Tatou te mananao i ni tagata lelei e mafai ona tatou sailia mo le kovana, peresitene ma faipule, ma soo se isi lava tofiga o le faatuatuaina ma tiutetauave; ma afai o le a tatou mauaina i latou, o le a tatou tatalo loa mo i latou ma tuuina atu lo tatou faatuatuaga ma le aafiaga ina ia faia le finagalo o le Atua ma ia faasaoina i latou lava faapea ma tagata i le mea moni ma le amiotonu (DBY, 358).

• E tusa ai ma le saunoaga a Peresitene Iaga, o a tulafono na faavaeina mai ai faigamalo uma faalelalolagi? Aisea ua eseese ai nei faigamalo i le mafaufau ma tulafono? Aisea e tatau ai i faigamalo ona faavae i tulafono a le Atua ina ia faamanuiaina ai? O le a se mea tonu o le a tupu i soo se malo e le faavaeina i mataupu o le amiotonu? (Mo se faataitaiga o lenei taunuuga, manatunatu i le pauu o malo o Sa Nifae ma Sa Lamana i taimi eseese i totonu o le Tusi a Mamona.)

• E tusa ai ma le saunoaga a Peresitene Iaga, o le a le faamoemoega o faigamalo faalelalolagi? (Vaai foi MFF 134:1.)

• O le a faapefea ona ese se faigamalo e taitaiina e le Atua pe ana faapea e faavaeina i le lalolagi? O le a le mea na manatu Peresitene Iaga o le a avea ma saolotoga maoae e mafai e se malo e taitaiina e le Atua ona saunia?(Vaai foi MFF 134:4, 7, 9.)

• O a ni uiga e tatau ona i ai i se taitai o le malo? Afai o ni taitai o le malo e atamamai, malamalama, ma galulue malolosi, aisea la e taua ai foi le tatau ona i ai o uiga ia o le faamaoni ma le mama?

• Aisea e tatau ai i se taitai malosi ona i ai sona malamalama i le puleaina o ia lava a’o lei avea o ia ma pule? Aisea e tatau ai i taitai ona faaali atu ua latou usiusitai i le tulafono?

• Aisea e taua tele ai le “puleaina o le tagata lava ia” i le faamanuiaina o se faigamalo faalelalolagi? E faapefea ona aafia le faamanuiaina o le malo i le amiotonu o tagata o loo pule ai?

• Aisea e taua tele ai le palota pe a tuuina atu ia te oe le avanoa? E faapefea ona tatau ona e filifili po o ai e tatau ona e palota i ai?

• E mafai faapefea ona e faataunuuina lou tiute o le avea ai ma se tagatanuu faamoemoeina? (Vaai foi MFF 134:5–6.)