Galuega Faalemalumalu

N a maliu lo‘u tama ao lei tuuina mai faaeega paia. E leai ma se tasi o lana fanau ua faamauina ia te ia. Afai tou te manatuaina, outou na sa i Navu, sa tatou faanatinati i sina taimi puupuu na tatou faaaluina iina ina ua maea ona fausiaina le malumalu. Ua leva ona saunia tagata leaga iina, e faatafunaina i tatou; na latou saunia e susuina o tatou fale, ua leva ona latou faia mo se taimi umi; ae na tatou faamaeaina lava le malumalu e tusa ai ma le poloaiga na tuuina atu ia Iosefa, ma tatou malaga ese mai ai loa. O lea la, o lo matou taimi sa matuai puupuu lava, ma sa leai so matou taimi e auai atu ai i nei sauniga. O lea, sa lei faamauina ai le fanau a lo’u tama ia te ia. Atonu e mafai e ona atalii uma ona ulu atu i le faavavau, i le lalolagi o agaga, ao lei mafai ona faia lenei sauniga; ae o le a leai lava se eseesega o lea mea; o le a faatinoina e suli o le aiga lenei vaega, e tusa lava pe faia i le selau tausaga o lumanai ai (DBY, 401).

E faitau selau miliona tagata ua fananau mai, ma ola ai i o latou olaga puupuu ma le saasaa, ma maliliu, ma le le malamalama ia i latou lava ma le ata o le faaolataga, na saunia mo i latou. Ae peitai, e matuai tele se faamafanafanaga i le iloaina lea, o lenei fuafuaga mamalu ua fuafuaina e le Lagi e mulimuli atu ia i latou i le isi olaga, ma tuuina atu ai mo lo latou taliaina o le ola e faavavau, ma le faaeaina i nofoalii, pulega, malo, ma mana i le afioaga o le Atua ma lo latou Tama, e ala ia Iesu Keriso lona Alo (DBY, 404).

O loo tatou talaiina atu ia te i latou le Talalelei o le Faaolataga—i e ua maliliu—e auala atu ia i latou sa ola ai i lenei tisipenisione [vaai 138:57] (DBY, 397).

E i ai se avanoa mo tagata o loo i le agaga e mauaina ai le Talalelei. O Iesu, ao taoto ai lona tino i le tuugamau i po e lua ma le ao e tasi, na alu atu ai i le lalolagi o agaga ina ia faaali atu i ai i uso iina pe tatau faapefea ona latou fausiaina le malo, ma aumaia agaga i le malamalama o le upu moni i le lalolagi o agaga; na ia afio atu ai iina ma faia ai se faatulagaga, e pei ona ia faia i le lalolagi. O lea tatou te mauaina ai iina, e maua e agaga le avanoa e taliaina ai le upu moni. Atonu e te fesili ifo pe latou te papatiso ai iina? Leai. Pe mafai ea ona i ai ni o latou lima e faaee ia te i latou mo le meaalofa o le Agaga Paia? Leai. E leai ma se sauniga faaletino lea e faia i la le tino nei e faataunuuina iina, ae o le malamalama, mamalu, ma le mana o le Agaga Paia latou te olioli ai e pei lava ona tatou i ai i lenei lalolagi; ma e i ai foi tulafono e pulea ai le lalolagi o agaga, ma latou te gauai atu foi i ai (DBY, 397).

E mafai ea ona tatou faia soo se mea mo i latou? Ioe. O le a le mea o loo tatou taumafai ai e fausia se malumalu? Ma e le na o iinei tatou te fausia ai se malumalu, pe afai o le a tatou alualu i luma, ma o le a faamanuiaina ma faasaoina, ae atonu o le a tatau ona tatou amataina le lona lua po o le lona tolu, ma faaauau ai pea e tusa ai ma le manaomia e le galuega, mo le faamoe- moega patino o le togiolaina o o tatou tagata ua maliliu. A ou mauaina se faaaliga e faapea o nisi o au fanau o loo ola ma ua maliliu e aunoa ma faamanuiaga o le Talalelei, pe ua faalogo foi i ai ua talaiina, ae sa faamaoni e pei o au, ma tonu e pei o au, pe soo se alii lava po o se tamaitai e mafai ona i ai i luga o le fogaeleele; e amiotonu, e tusa ai ma mea ua latou iloa, e pei o soo se Aposetolo po o se Perofeta na soifua ai, o le a ou alu atu ma papatiso, faamau, mulumulu, ma faauuina, ma faia sauniga uma ma faaeega paia mo i latou, ina ia mafai ona tatalaina lo latou auala i le malo selesitila (DBY, 403).

O lenei aoaoga o le papatisoga mo e ua maliliu o se aoaoga maoae, o se tasi o aoaoga sili ona mamalu lea ua faaalia mai i le fanau a tagata; ma o loo i ai le malamalama, mamalu, tamalii ma le tino ola pea (DBY, 399).

Talu mai le faavaeina o le Ekalesia, ua tatou papatiso mo le toatele o tagata o e na maliliu—e lelei, faamaoni, tamalii, alofa i soo se tasi, ola lelei, ola mama. Tatou te le tuua i latou ina ia o atu i seoli; o le a le tuuina atu foi e le Atua. O le ata o le faaolataga ua lava lea ma totoe, ina ia toe aumaia ai i latou ma tuuina i latou i le mea e mafai ona latou olioli ai i mea uma na latou tulimatai i ai(DBY, 403).

Ua latou pasi mai faigata o le [olaga faaletino], ma ua latou i ai i le tulaga e le toe mafai ai ona latou faia nei sauniga mo le faamagaloina o a latou agasala ma mo lo latou faaeaga, o lea ua latou i ai i le tulaga o le manaomia ona faatuatuaina a latou uo, o a latou fanau ma fanau a a latou fanau, ina ia faia nei sauniga mo i latou, ina ia mafai ona aumaia i latou i le malo selesi- tila o le Atua (DBY, 406).

O le a so outou manatu, o le a se mea e mafai ona tautatala mai ai o tatou augatuaa pe ana mafai ona tautatala mai le tuugamau? Pe o le a latou le faapea mai ea, “Ua loa tausaga o matou taooto ai iinei, i lenei falepuipui, ma faatalitali mo lenei tisipenisione ina ia oo mai?” … O le a se mea latou te musumusuina mai i o tatou taliga? Aua, ana fai e ia te i latou le mana, o le a matuai taalililili lo latou tautatala mai i o tatou taliga, pe ua tatou iloa le taua o le galuega o loo tatou i ai nei. O agelu uma o le lagi o loo vaavaai ifo i lenei vaega o tagata, ma faatepa i latou i le faaolataga o le fanau a tagata. E faapea foi i tevolo o loo i seoli o loo vaavaai mai i nei tagata, ma taumafai e faatoilaloina i tatou, ma o loo faifaimea faatasi pea tagata ma auauna a le tiapolo nai lo le faapaiaina o i latou lava, ma vaalau atu i le Alii, ma faia le galuega ua poloaiina i tatou ina ia tatou faia (DBY, 403–4).

Ou te manatu e i ai se galuega e ao ona faia [i le Meleniuma] lea e foliga mai o loo fuafua le lalolagi atoa faapea e le tatau ona tatou faia. O le a lena galuega? O le fausia lea o malumalu. Ae tatou te lei amata faataatiaina le faavae o se malumalu, ae ua faasagatau mai ‘au uma a seoli ia i tatou… . O a mea o le a tatou faia i totonu o nei malumalu? E i ai se isi mea e faia ai i totonu iina? Ioe, ma o le a tatou le faatali mo le Meleniuma ma le atoatoaga o le mamalu o le Atua i le lalolagi; o le a tatou amataina loa pe a tatou maua se malumalu, ma galulue mo le faaolataga o o tatou augatama; o le a tatou aumaia o latou gafa i le mamao e gata mai ai. A mavae se taimi, o le a tatou faaatoatoaina o latou gafa. I totonu o nei malumalu, o le a tatou faia ai sauniga mo le Talalelei a Iesu Keriso mo a tatou uo (DBY, 402).

O lea ua tatou papatiso nei mo e ua maliliu … mo o tatou tama, tina, tama matutua, tina matutua, uso o tama, tuagane o tina, uso o tina, tuafafine o tama, aiga, uo ma e ua leva ona masani… . O loo musuia e le Alii loto o le toatele … , ma o le a i ai se naunautaiga uiga ese i nisi, ina ia sailia o latou gafa, ma ia lolomiina mai faamaumauga a o latou augatuaa. Latou te leiloa pe aisea ua latou faia ai, ae o loo musuia i latou e le Alii; ma o le a faaauau pea mai lea tupulaga i lea tupulaga, seia oo lava ina latou maua uma gafa o o latou augatama, i le mamao e mafai ona latou oo i ai (DBY, 406).

Pe a faavaeina lona malo i le lalolagi, ma o le a fausiaina Siona, o le a auina atu e le Alii ana auauna e avea ma faaola i le Mauga o Siona [vaai Opetaia 1:21]. O auauna a le Atua o e na ola ai i le lalolagi i augatupulaga ua mavae, o le a latou faailoa mai tagata eseese o e na ola, ae ua maliliu e aunoa ma le Talalelei, ma tuuina mai o latou igoa, ma faapea mai, “O lea, ia o atu, o outou o auauna a le Atua, ma faatinoina a outou aia ma avanoa; o ma faataunuu ia sauniga o le maota o le Atua mo i latou o e na pasia lo latou olaga faaletino e aunoa ma le Talalelei, ma mo i latou uma o le a mauaina soo se ituaiga faaolataga; aumai i latou ina ia mautofi i malo selesi- tila, terasitila, ma le telesitila,” … aua o tagata uma o le a latou mauaina se malo e tusa ai ma lo latou agavaa ma e tusa ai foi ma a latou galuega i la le tino, po o le lelei po o le leaga, po o le tele po o le itiiti (DBY, 407).

Ua fetalai mai le Alii, ua ou auina atu ki a Elia le Perofeta—ua ou tuuina atu lena aoaoga ina ia faaliliuina loto o matua i fanau, ma loto o fanau i matua [vaai MFF 2; 110:13–15]. O lenei, outou le fanau uma, pe o outou tulimatai atu ea i le faaolataga o outou tuaa? Pe o outou saili ea ma le maelega ina ia togiolaina i latou na maliliu e aunoa ma le Talalelei, e pei ona latou saili i le Alii Silisiliese ina ia mauaina folafolaga mo outou? Aua na mauaina e o tatou tama ia folafolaga, e le tatau ona faagaloina a latou fanau. Outou le fanau e, a tagata, ia vaai i nei mea. E ao ona outou ulu atu i malumalu o le Alii ma faia sauniga mo o outou augatama (DBY, 408).

Ua valaauina i tatou, e pei ona tauina atu ia te outou, ina ia togiolaina malo o le lalolagi. E le mafai ona faaatoatoaina o tatou augatuaa e aunoa ma i tatou; e le mafai foi ona atoatoa i tatou e aunoa ma o tatou augatuaa. E tatau lava ona i ai le faasologa lea i le Perisitua paia; e tatau ona fusia faatasi mai le augatupulaga o loo i ai nei e tau atu i le Tama o Atamu, ina ia aumaia i latou uma e mafai ona faasaoina, ma tuuina i se mea e mafai ona latou maua ai le faaolataga ma se mamalu i nisi malo. O lenei Perisitua e faataunuuina; o le faamoemoega lena o lenei Perisitua (DBY, 407).

O aoaoga a le Faaola ua faaalia mai, ma ua tuuina atu ai ia i latou ua talitonu, ina ia mauaina mataupu faavae lea e o atu ai faaola i le Mauga o Siona ina ia faaolaina … i latou uma sei vagana ai i latou o e na agasala i le Agaga Paia. O le a ulu atu alii ma tamaitai i totonu o nei malumalu, ma e faatusatusa atu i ai, o i latou o ni poutu iina [vaai aaaliga 3:12], ma faia sauniga i lea tausaga ma lea tausaga mo i latou o e na maliliu i le fiaafe tausaga ua mavae (DBY, 407).

Ina ia faataunuuina lenei galuega, o lea o le a le na o le tasi ai le malumalu ae o le a faitau afe, ma o le a faitau fiaselau afe alii ma tamaitai o le a o atu i ai i totonu o na malumalu, ma faia sauniga mo tagata, o e na soifua ai, e tau atu i le taimi o le a faaalia mai e le Alii (DBY, 394).

O le mea lenei o le a tatou faia mo tagata o le lalolagi. Pe a ou vaai atu i ai, ou te le manao ou te malolo, ae ia galue i le aso atoa; aua a tatou manatunatu i ai, e leai so tatou taimi e faamaimauina, aua o se galuega e moomia le galue malosi i ai (DBY, 410).

O le perisitua lea ua toe tuuina mai e le Alii ia i latou o le a taliaina, e mo le faamoemoega patino, o le sauniaina lea o i latou ina ia agavaa i mataupu faavae e faatatau i le tulafono o le malo selesitila. Afai tatou te usiusitai i lenei tulafono, ma faasaoina e aunoa ma le solia, ma ola e tusa ai, o lea ua tatau ai ona tatou saunia, ina ia olioli i faamanuiaga o se malo selesitila. Pe o le a i ai ea nisi? Ioe, e faitauafe ma miliona tagata o le lalolagi, o e o le a latou mauaina ma usitai i le tulafono ua tatou talaiina, pe afai latou te mauaina le avanoa. Afai e toe faafoisia mai e le Alii ia Siona, ma o le a iloa e tagata vaai, ma o le a faatuina Siona, o le a oo mai lava faaola i le Mauga o Siona ma faaolaina atalii ma afafine uma o Atamu e agavaa mo le faaolaina, e ala lea i le faia o sauniga mo i latou (DNW, 16 May 1860, 1).

E le mafai ona faaatoatoaina o tatou augatuaa e aunoa ma i tatou; e le mafai foi ona atoatoa i tatou e aunoa ma o tatou augatuaa. Ua uma ona fai la latou galuega ma ua maliliu nei. O lea, ua valaauina mai i tatou e faia la tatou galuega; o se galuega silisili lea ua faia e le tagata i le lalolagi. O le faitau miliona o tagata, o e na ola ai i le lalolagi, ma ua maliliu e aunoa ma le malamalama o le Talalelei, e tatau ona faia sauniga mo i latou, ina ia mafai ona latou mautofi i le ola e faavavau (o lena galuega e mo i latou uma ua mauaina le Talalelei). Ma ua valaauina i tatou ina ia o atu i lenei galuega (DBY, 406).

WO ai o le a ia mauaina le lalolagi ma lona atoatoa? Pe le na o i latou ea, na faasaoina e le Alii mo lenei mamalu? Ma o le a latou o atu i le Mauga o Siona, o ni faaola ina ia galulue i le Meleniuma, ina ia faaolaina isi (DBY, 407–8).

O loo tatou taumafai e faaolaina e o loo ola ma e ua oti. O e o loo ola, e mafai ona i ai la latou filifiliga, o e ua maliliu e leai sa latou filifiliga. E faitau miliona ma miliona i latou ua maliliu ae latou te lei mauaina le Talalelei, e aunoa ma le Perisitua, ma aunoa ma avanoa ia o loo tatou olioli ai. E tatau ona tatou o atu i le suafa o le Atua o Isaraelu, ma faia sauniga mo i latou. Ma o le taimi o le Meleniuma, o le afe tausaga lea o le a alolofa ai tagata ma auauna i le Atua, o le a tatou fausia malumalu ma faia sauniga iina, mo i latou o e ua maliliu mo le fiaselau ma le fiaafe o tausaga—mo i latou e lei mauaina le upu moni, pe ana fai latou te mauaina le avanoa; ma o le a tatou siitia ae i latou i luga, ma faaauauina ai le faasologa atoa, e tau atu ia Atamu (DBY, 404).

E pei ona ou tauina soo atu ia te outou, o le galuega lena o le Meleniuma. O le galuega lena e faataunuuina e fanau a Aperaamo, o le nuu filifilia, o le nuu tautupu, o e ua faamanuiaina e le Alii, o e na latou osi feagaiga ma le Alii. O le a latou o mai, ma faaolaina soo se atalii ma soo se afafine o Atamu, o e o le a mauaina le faaolataga iinei i le lalolagi; ma agaga uma o loo i le lalolagi o agaga o le a talai atu i ai, talanoa i ai, ma o le a tuuina atu mataupu faavae o le faaolataga ia i latou, ina ia latou maua ai le avanoa o le taliaina o le Talalelei; ma o le a tele a latou fanau iinei i le lalolagi, e faia sauniga mo i latou, i sauniga na o le Talalelei e faatatau i le tino nei (DBY, 403).

Tatou te faatuatua i le Atua. Ou te iloa o le a ia tauina o tatou taua, ma o le a tatou papatiso mo i latou ma le fanau a tagata i se afe tausaga; ma o le a fia selau o tatou malumalu ma le fiaafe o alii ma tamaitai o le a galulue ai i totonu iina mo i latou o e ua maliliu, e aunoa ma le mauaina o le avanoa e faalogologo ma usitai ai i le Talalelei, ina ia mafai ai ona aumaia i latou ma mauaina se toetutu mamalu, ma olioli ai i le malo ua saunia e le Atua mo i latou. O le a tau malosi le Tiapolo e faalavelave ia i tatou, ma o le a le mafai lava ona tatou alualu i luma i le taua ma le Tiapolo, seiloga tatou te usiusi- tai i le mana, ma faatuatua i le Talalelei a le Alo o le Atua. O loo tetee le lalolagi atoa i lenei aoaoga. Ae pe i ai ea se leaga o i ai? Afai e mafai ona latou iloaina atu e pei ona i ai i mea a le Alii, o le a latou fiafia i ai, ma, nai lo latou faasagatau i ai, ae o le a latou viia le Atua mo le faaalia mai o se aoaoga mamalu faapena (DBY, 401).

• O le “fuafuaga mamalu” mo le togiolaina o e ua maliliu e aunoa ma le mauaina o le atoatoaga o faamanuiaga o le talalelei, o se “matuai faamafanafanaga” lea ia Peresitene Iaga. Aisea? O le a le uiga o lena fuafuaga ia te oe ma e pele ia te oe?

• E faapefea, ae o anafea foi, na faatulagaina ai le talaiina atu o le talalelei i le lalolagi o agaga? O ai o loo faaauauina lena galuega i le taimi nei?(Vaai foi MFF 138:57.)

• O le a le uiga o le togiolaina o o tatou tagata ua maliliu, ma tatalaina le malo selesitila ia i latou? (Vaai MFF 138:58.)

• Aisea e matuai malosi ai lava Satani e tetee i galuega faalemalumalu? O a ni faamaoniga ua e vaai i ai i le le mafaia e Satani ona taofia malumalu mai le fausiaina, po o le taofia foi o sauniga faaola mai le faaolaolaina?

• Na saunoa Peresitene Iaga e i ai se taimi o le a tatou faaatoatoaina ai o tatou gafa po o talafaasolopito o aiga. E faapefea ona tatou faia lenei mea? O le a se mea e mafai ona e faia e oe lava ia, e avea ma ou sao i lou talafaasolopito faaleaiga?

• E tusa ai ma le faamatalaga a Peresitene Iaga, o ai o loo “musuia loto o le toatele” ina ia suesue e uiga i o latou augatuaa? O a ni faamaoniga ua e vaai i ai e iloa ai le moni o lenei mea i nei aso?

• O a “ki a Elia le Perofeta”? (Vaai foi MFF 27:9; 110:13–15.)

• E mafai faapefea ona avea i tatou ma faaola i le Mauga o Siona?

• Aisea e le mafai ai e o tatou augatuaa ua maliliu ona atoatoa e aunoa ma i tatou? Aisea foi e le mafai ai ona atoatoa i tatou e aunoa ma i latou?

• O le a le “galuega o le Meleniuma” o le a i ai? O ai o le a faataunuuina?

• E mafai faapefea ona tatou faatoilaloina taumafaiga a Satani e taofiofia le galuega? E mafai faapefea e le “usiusitai i le mana ma le faatuatua i le Talalelei a le Alo o le Atua”, ona fesoasoani ia i tatou ina ia saunia mo le Meleniuma?