Faatuina o Siona

Sei ou fai atu nai upu e faatatau ia Siona. Ua tatou talai atu o tatou o Siona. Afai tatou te loto mama e pei ona tatou i ai, aua o “Siona o le loto mama” [vaai MFF 97:21] (DBY, 118). O fea Siona? O fea o le faatulagaga o le Ekalesia o le Atua o i ai? Pe mafai ona ola ea faaleagaga i loto uma; ma tatou te ola ea ina ia maua pea le agaga o Siona! (DBY, 118).

O le Talalelei lenei; o le ata o le faaolataga lenei; o le malo o le Atua lenei; o Siona lenei e pei ona taua ma tusitusia e Perofeta uma mai le amataga o le lalolagi. O le galuega lenei a Siona sa folafolaina mai e le Alii o le a oo mai (DBY, 118).

O le a faalauteleina Siona, mulimuli ane, i lenei fogaeleele atoa. O le a leai se tulimanu i luga o le fogaeleele o le a le avea ma Siona. O le a Siona uma (DBY, 120).

O le faamoemoe o lo tatou olaga o le atinaeina o Siona o lo tatou Atua, o le faapotopotoina o le aiga o Isaraelu, aumai le atoatoaga o nuu ese, toe faatuina ma faamanuia le fogaeleele i lo tatou iloa ma faia e pei o le Faatoaga i Etena, faaputu oa sili o le malamalama ma le poto i lo tatou lava malamalama, faamamaina o tatou lava loto ma saunia tagata ina ia fetaiai ma le Alii pe a afio mai (DBY, 88).

E leai sa tatou galuega iinei sei vagana ai le atinaeina ma le faatuina o Siona o le Atua. E ao ona faia e tusa ai ma le finagalo ma le tulafono a le Atua [vaai MFF 105:5], e mulimuli i lena faataitaiga ma le faatulagaga sa fausia ma faaatoatoa ai e Enoka le Siona muamua, o le sa aveina i le lagi, e pei o le faamatalaga o Siona ua sola [vaai Mose 7:69]. Ina ua mavae sina taimi o le a toe foi mai, ma a o saunia e Enoka ona tagata ina ia agavaa mo le aveolaina, o lea o i tatou, e ala i lo tatou faatuatua, e ao ona saunia i tatou lava e fetaiai ma Siona mai luga pe a toe oo mai i le fogaeleele, ma fetaiai ma le pupula ma le mamalu o lona oo mai (DBY, 443).

Ua matou vaavaai atu i le aso o le a saunia ai e le Alii mo le fausia o le Ierusalema Fou, e saunia ai mo le tuufaatasia o le nuu o Enoka pe a fausia i luga o lenei fogaeleele [vaai Mose 7:62–64]. Ua matou faamoemoe e fiafia i lena aso, pe tatou te momoe i le oti ao le i oo i lena taimi pe leai. Matou te vaavaai atu ma le faatuatua o le a i ai matua ma fanau, e ao ona tatou i ai pe a afio mai Iesu; pe a tatou le i ai iina, o le a matou o mai ma ia; poo le a lava le tulaga, e ao ona tatou i ai iina pe a afio mai o ia (DBY, 120).

Ua faapotopotoina i tatou … mo le faamoemoe tumaoti o le faamamaina o i tatou, ina ia avea i tatou ma maa iila i le malumalu o le Atua. Ua tatou i ai iinei mo le faamoemoe o le atinaeina o le malo o le Atua i le fogaeleele. Ina ia saunia mo lenei galuega, o lea sa alagatatau ai ona faapotopoto i tatou mai nuu ma atunuu o le lalolagi [ina ia talia] sauniga o le Perisitua paia o le Alo o le Atua, e tatau ai mo le faatoatoaina o le Au Paia e saunia ai mo lona afio mai (DBY, 121).

O le sauniga o le faamauga e ao ona faia iinei [atalii] i le [tama], ma le ava i le tane, ma fanau i matua, ma isi foi, seia atoatoa le filifili o augatupulaga i le sauniga o le faamauga agai i tua i le Tama o Atamu; o lea, ua poloaiina i tatou e faapotopoto faatasi i tatou lava, ina ia o ese mai Papelonia [vaai MFF 133:5, 7, 14], ma faapaiaina i tatou, ma atinaeina le Siona o lo tatou Atua, e ala i le atinaeina o nuu ma malumalu, faaolaina o atunuu mai le pogisa, seia faapaiaina le fogaeleele ma saunia ai mo le nonofo faatasi ma le Atua ma agelu (DBY, 407).

Pe ua tatou iloa ea afai tatou te fiafia i Siona i le taimi o le faavavau e ao ona tatou faia e i tatou lava? O i latou uma, e i ai Siona i le faavavau o le Atua, faatulaga, faatonu, faatasia, ma faaatoatoaina e i latou lava, ma o lea ua alagatatau ai ona latou fiafia i ai? (DBY, 118).

Afai ua tatou faia ai se faaiuga e fausia Siona, o le a tatou faia loa, ma o lenei galuega e amata i totonu o le loto o tagata taitasi. Afai e manao le tama o se aiga e fausia Siona i lona lava aiga, e ao ia te ia ona avea ma taitai i lenei galuega lelei, e le mafai e ia ona fai sei vagana ua maua e ia le agaga o Siona. Ao le i faia e ia le galuega o le faaeaina i lona aiga, e ao ona faaeaina o ia lava, ma o lona uiga e mafai e le Atua ona fesoasoani ia te ia e faaeaina lona aiga (DBY, 118).

Ua maea ona fai e le Alii lana vaega o le galuega; ua ia siosiomia i tatou i elemene e maua ai saito, aano o manu fasi, laau, silika, fualaau, ma mea uma e mafai ona atinae ai, faamatagofie ma viia ai le Siona o aso e gata ai, ma o lo tatou tiute le faaaoga o nei elemene mo o tatou manao ma mea e tatau ai, e tusa ai ma le poto ua tatou maua ma le atamai e mafai ona tatou maua mai le lagi e ala i lo tatou faatuatua. I lenei tulaga o le a toe aumaia ai e le Alii Siona i luga o le fogaeleele, ae le o se isi (DBY, 294).

E leai ma se isi mea o galuega uma e faia i aao o le Atua, o loo manaomia e fausia ai Siona i luga o le fogaeleele pea mananao tagata e fai. E mafai ona tatou fausiaina Siona i le fogaeleele i lo tatou manao, e faalagolago i mataupu faavae lava e tasi tatou te toto ai se fanua o ni saito, poo le fausiaina o se nofoaga. Sa leai se taimi sa le maua mai ai ni mea e fua mai ai sana, saito, ma isi mea, ma ona o le faautauta o le pulea ma le faatulagaina lelei o nei mea o loo maua pea o le a mafai ai ona fausia Siona o le Atua i luga o le fogaeleele (DBY, 118).

Matou te mananao i tagata uma o le Au Paia ina ia malamalama i le ala e fausia ai Siona. O le Aai o Siona, i lona matagofie ma le matautia, o le a sili atu i soo se mea o loo i ai i luga o le fogaeleele. O le a aveesea le mala mai le fogaeleele ma le agasala ma o le a faamamaina le amioleaga mai ona luga. O ai o le a faia lenei galuega tele? Pe tauanauina ea e le Alii latou iina e aunoa ma sa latou vaega e taumafai i ai? Leai. O le a le afio mai o ia e fausia se malumalu, tapeneko, o fale le tumau, poo le faia o laau e maua ai fua, fai ia talipupuni mai lau o le mati poo ofu pau o manu, poo le galue i le apamemea ma le uamea, aua ua uma ona tatou iloa ona faia o ia mea… . E ao ona tatou fausia Siona, pe afai e fai o tatou tiute (DBY, 120).

Ou te vaai i alii ma tamaitai o lenei faapotopotoga—e toaitiiti i latou— sa tuliesea mai le Siteki tutotonu o Siona [i Jackson County, Missouri; vaai MFF 57:2–3]. Fesili ia i latou poo iai ni o latou faanoanoaga poo faafitauli; ona faavaai lea o i latou i le laufanua matagofie e tuuina atu e le Atua pe ana faatuatua uma i latou i le tausia o ana poloaiga, ma savavali i ona luma i le ala e tatau ai; ma fesili ia i latou e tusa ai ma faamanuiaga e tatau ona latou maua. Afai latou te tau atu ia te outou manatu o o latou mafaufau, o le a latou tau atu ia outou o le amo a Iesu o le a avegofie ma lana avega o le a mama, ma o le a mafai ona avea o se galuega fiafia le savali i le usiusitai i ana poloaiga ma avea o se agaga e tasi ma le manatu e tasi; ae ona o le manatu faapito o nisi, o le ifo i tupua, ona o lo latou manao i ava a isi, e tutusa lava, ma le tuinanau o o latou manatu, o lea sa lafoaina ai i latou i fafo ma tulieseina mai o latou aiga (DBY, 113–14).

Ia tatou aoao i o tatou mafaufau seia o tatou fiafia i mea lelei, matagofie ma paia, saili pea i lena poto e mafai ai e i tatou ona fausia o Siona, e aofia ai ma le fausiaina o fale, tapeneko, malumalu, auala, ma mea uma e aoga ma tatau ai e faamatagofie ai, saili e faia le finagalo o le Alii i aso uma o lo tatou ola, faaleleia o tatou mafaufau i le poto faasaeinisi ma numera, saili ma le filifiliga ina ia malamalama i le ata sili o mea uma na foafoaina, ina ia tatou iloa ai le mea e ao ona fai i o tatou olaga ma le auala e faaleleia ai i mea totino tatou te faaaogaina (DBY, 247).

Ua tatou o mai iinei e fausia Siona. E faapefea ona tatou fai? … E ao ona tatou faatasi i a tatou taumafaiga. E ao ona tatou galulue ma le faatuatua e tasi e pei o le loto o se tagata e toatasi; ma o le a lava le mea tatou te fai e ao ona faia i le suafa o le Alii, ona faamanuiaina lea o i tatou ma faatamaoaigaina i mea uma tatou te fai. O loo i ai le galuega e fai o lona tele e le mafai ona faamatalaina (DBY, 284).

E toatele le Au Paia o loo manatu afai latou te usiusitai i le Talalelei, faia se taulaga i le tuua o o latou aiga, poo o latou matua, tane, ava, fanau, faatoaga, fanua moni, poo isi mea e alolofa i ai, o lona uiga ua maea le galuega; ae o lea faatoa amata. O le galuega o le faamamaina o i tatou lava ma le saunia e fausia o Siona o le Atua … o lea faatoa tau amata ia i tatou ina ua matou oo mai iinei (DBY, 444).

O mea uma e fesootai ma le fausiaina o Siona e manaomia ai le galue malosi. O se mea le moni le talanoa e uiga i le fausiaina o se malo e aunoa ma le galue, e manaomia le galue o vaega uma o la tatou faalapotopotoga, poo le mafaufau, faaletino, poo le faaleagaga, ua na o le pau lea o le auala e fausia ai le malo o le Atua (DBY, 291).

Afai tatou te fausia le malo o le Atua, poo le faatuina o Siona i luga o le fogaeleele, e ao ona tatou galulue i o tatou lima, fuafua i o tatou mafaufau, ma saunia auala e faataunuu ai lena faamoemoe (DBY, 291).

O loo i ai pea Siona i lau vaai. O le a tatou le faatali mo agelu, poo Enoka foi ma lana vaega e o mai ma fausia ia Siona, ae o le a tatou fausia. O le a tatou toto ia tatou saito, fausia o tatou fale, faia pa o a tatou faatoaga, toto a tatou togavine ma togalaau, ma gaosia mea uma e maua ai e o tatou tino le sololelei ma le fiafia, ma i lenei uiga ua tatou taumafai ai e fausiaina ia Siona i luga o le fogaeleele, ma faamamaina ai mai eleelea uma.. Ia i ai pea le aafiaga paia e mai ia i tatou i luga o mea uma o loo i ai lo tatou malosi; i luga o le eleele o loo tatou faatoaina, i luga o fale ua tatou fausia, ma i luga o a tatou mea uma; ma e afai tatou te taofi le faaaumea ma mea leaga ae fausiaina Siona o le Atua i o tatou loto, i o tatou aiga, i o tatou aai, ma lo tatou atunuu, o le a tatou mulimuli ane ona pulea le fogaeleele, aua o i tatou e pule i le fogaeleele; ma, ua le o le vao tuitui ma le vao talatala, a o laau uma e aoga mo le taumafa a le tagata ma faamatagofie ai, o le a totogo ae mai le totonugalemu (DBY, 443–44).

Ua faamanuiaina au e le Alii, ua ia faamanuia soo ia te au; mai le taimi sa ou amata ai ona fausia Siona. Ua matua faamanuiaina lava au. E mafai ona ou faamatala atu ni mea matua tulaga ese ona uiga e faatatau i le taitaiga a le Atua ia te au, ina ia faapea ifo ai uso ma tuafafine i o latou loto, “E faigata ona ou talitonu i lenei mea”(DBY, 452).

E ao ona maua lo’u fiafia faaleagaga e lo’u lava olaga, ae o le a faaopoopo atili i le sologalelei o le nuu, ma i lo’u olioli, i le avea ai o se tasi o i latou, afai e ola le alii ma le tamaitai i lo latou talitonuga, ma olioli i le malamalama ma le paia o le talalelei mo i latou lava, ia le gaoia, loto maualalo ma faatuatua; o le a olioli pea i luma o le Alii, auai i galuega ua valaauina i ai i latou, ma ia mautinoa e le faia lava se mea sese (DBY, 119).

O le a i ai i tagata uma le filemu, fiafia, ma le leai o se feeseeseaiga, i o tatou auala ma i o tatou aiga. O le a le toe i ai se faamasinoga, o le a leai se faafitauli i luma o le Fono a Fautua Maualuga ma Faamasinoga a Epikopo, ma o le a le toe iloa ni faamasinoga, ni faaletonu, ma ni feeseeseaiga (DBY, 119).

O le a i ai ia i tatou Siona, aua o le a mama loto o tagata uma (DBY, 119).

Ua tonu i lo’u loto e faia le finagalo o le Atua, e fausia lona malo i luga o le fogaeleele, e faatuina Siona ma ana tulafono, ma faasaoina tagata; ma e mafai ona ou fai atu, i le moni ma le faamaoni, e lei oo mai le manatu i lo’u mafaufau, i a’u galuega uma, poo le a lo’u taui, poo lo’u pale pe tele pe laitiiti, pe i ai foi se pale, o se meatotino itiiti, pe tele, poo le leai o se mea. Sa leai sou manatu poo le mafaufau i tua i lenei mea, poo le popole i se mea muamua e uiga i ai. Pau lava le mea sa i lo’u mafaufau o le faapea o lo’u tiute le faia o le finagalo o le Atua, ma galue e fausia le malo i luga o le fogaeleele … aua o mataupu faavae ua faaalia mai e le Atua mo le faaolataga o e o nonofo i le fogaeleele e mama, paia ma faaeaina i lona natura. O loo ia i latou le mamalu ma le faateleina e faavavau, ua latou taitai mai le malamalama i le malamalama, malosi i le malosi, mamalu i le mamalu, poto i le poto, ma le mana i le mana (DBY, 452).

• Na faapefea ona faamatala e Peresitene Iaga Siona? (Vaai MFF 97:21.)

• O ai tagatanuu amiotonu o Siona, ma o fea e maua ai Siona? (Vaai Salamo 102:16; 4 Nifae 1:15–17; MFF 109:39.)

• Sa aoao mai Peresitene Iaga, O le faamoemoe o lo tatou olaga o le atinaeina o Siona o lo tatou Atua.” I le avea ai o se Ekalesia, o le a la tatou mea e fai e atinaeina ai Siona? E faapefea e outou taitasi ona fesoasoani i lenei galuega?

• O le a le faataitaiga ma le faatulagaga sa faaaoga e Enoka e fausia ma faaatoatoaina ai le Siona o aso anamua? (Vaai Mose 7:10–11, 17–21.) E faapefea ona tatou mulimuli i lena faataitaiga i o tatou aiga ma uarota poo paranesi i aso nei?

• E faapefea ona faatuina e aiga Siona i o latou lava aiga?

• E mafai faapefea ona faapaiaina i tatou lava ma o tatou aiga?

• Aisea ua “poloaiina ai i tatou e faapotopoto faatasi, ma o ese mai Papelonia” i Siona? (Vaai MFF 44:4–6; 133:14.) O le a le Papelonia faaleagaga ma e faapefea ona tatou o ese mai ai?

• O le a le faiã o le fausia o Siona ma sauniga o le perisitua paia?

• O a ni mea ua saunia e le Alii mo i tatou ina ia tatou auai i le faatuina o Siona?

• O Siona e amata i le “loto o tagata taitasi.” O a meaalofa poo taleni o loo ia te oe e mafai ona fesoasoani e te fausia ai Siona?

• I popofou o le Ekalesia, o le nofoaga o le siteki ogatotonu o Siona sa faaalia mai (vaai 57:2–3). E tusa ai ma le saunoaga a Peresitene Iaga, o le a le mea na taofia le Au Paia mai le ulufale atu i lo latou tupuaga ma fausia ai Siona i lena taimi?

• E faapefea i le Alii ona faataunuu le faatuina o Siona? (Vaai MFF 105:5–6.)

• Aisea e taua ai le “aoao o o tatou mafaufau” ao tatou taumafai e faatuina Siona?

• Sa aoao mai e Peresitene Iaga o le faatuina o Siona, e ao ai ona autasi a tatou taumafaiga. E faapefea ona faataunuu lenei tulaga autasi i o tatou aiga, korama, ma uarota ma paranesi?

• Aisea e manaomia ai e le Alii le “galue malosi” mai ia i tatou i le faatuina o Siona?

• Sa saunoa ia Peresitene Iaga, “Ua faamanuiaina au e le Alii, … mai le taimi sa ou amata ai ona fausia Siona. Ua matua faamanuiaina lava au. O a faamanuiaga o loo saunia mo i latou ua tausia a latou feagaiga e faatuina ai Siona (vaai Isaia 51:11.)