Toko 30
Manoro hevitra ireo zanany lahy i Almà
Tsy nahafaly an’i Almà ny nahalasa ny Nefita ho ratsy fanahy. Niresaka tamin’ny zanany lahy tsirairay momba ny fiainana am-pahamarinana izy.
Niteny tamin’i Helamàna lahimatoany i Almà fa tokony hatoky an’ Andriamanitra izy. Notantarainy taminy ny momba ny anjely izay nirahan’ Andriamanitra hilaza amin’i Almà mba tsy handrava ny Fiangonana intsony.
Nandritry ny telo andro dia nijaly noho ny fahamelohany i Almà Avy eo dia tsaroany ny fampianaran-drainy momba an’i Jesoa ka fantany fa afaka ny ho voavela ny fahotany.
Nivavaka ho an’ny famelana ny fahotany i Almà dia nivadika ho fifaliana ny fijalian’ny fanahiny. Voavela ny helony satria nanam-pinoana an’i Jesoa Kristy sy nibebaka izy.
Nanomboka tamin’izany dia nampianatra ny filazantsara tamin’ny hafa i Almà mba hahafahan’izy ireo mahatsapa ihany koa ny fifaliana izay tsapany. Nitahy an’i Almà Andriamanitra noho ny fahatokisany an’ Andriamanitra.
Nomen’i Almà an’i Helamàna ny rakitsoratra masina ary nandidy azy izy mba hanohy ny fanoratana ny tantaran’ny vahoakan’izy ireo.
Nolazain’i Almà fa raha mitandrina ny didy izy dia hotahian’ Andriamanitra sy hampiany amin’ny fiarovana ny rakitsoratra masina.
Nandidy an’i Helamàna ihany koa i Almà mba hivavaka isa-maraina sy isan-kariva ary hiresaka amin’ Andriamanitra momba izay rehetra ataony mba hahafahan’ Andriamanitra manampy azy.
Faly tamin’i Siblôna zanany,izay mpitory ny filazantsara nahery tany amin’ny Zôramita, i Almà. Nitoetra ho mahatoky foana i Siblôna na dia efa notorahan’izy ireo vato aza izy.
Nampahatsiahy an’i Siblôna i Almà fa i Jesoa Kristy ihany no làlana hahazoana famonjena. Avy eo dia namporisika ny zanany hanoy hampianatra ny filazantsara i Almà.
Tsy nitandrina ny didy i Kôriantôna zanakalahin’i Almà. Tsy nitazona ny maha-misiônera azy izy tamin’ny fampianarana ny Zôramita.
Noho ny zavatra izay nataon’i Kôriantôna dia tsy nino ny fampianaran’i Almà ny Zôramita.
Nolazain’i Almà tamin’i Kôriantôna fa tsy afaka manafina ny fahotany amin’ Andriamanitra ny olombelona ary mila mibebaka i Kôriantôna.
Nampianarin’i Almà tamin’ny zanany lahy fa hitsangana amin’ny maty avokoa ny olona rehetra fa ny olo-marina ihany no hiara-hiaina amin’ Andriamanitra.
Izao fiainana izao no fotoana ho an’ny olona mba hibebahana sy hanompoana an’ Andriamanitra, hoy i Almà.
Raha nampahatsiaro an’i Kôriantôna momba ny antsony ho misiônera i Almà dia nandidy azy izy hiverina any amin’ny Zôramita ary hampianatra ny vahoaka mba hibebaka.
Nanohy ny fampianarana ny filazantsara i Almà sy ireo zanany lahy. Nampianatra tamin’ny herin’ny fisoronana izy ireo.